Chalejanay Yesu Piur pa Want wa Nzamb

“Ndiy watambitamba mu misumb ni mu mal, wend ulejan . . . katumb kawamp ka want wa Nzamb.”—LUKA 8:1.

TUSOTINING kulond piur pa yom yitumena anch yidi ya usey, yom yidia mu muchim wetu. Mudi mwalonday Yesu amwinend anch: “Miruzu ya kuyip yidia mu muchim yawiy yikubudik ku kan.” (Mateu 12:34) Anch twashinshikin pa yom yalejanay Yesu mu mudimu wend wa kulejan, tukutwish kulond anch Want wa Nzamb wadinga wa usey nakash ku mes kwend.

Ov, Want wa Nzamb chom ik? Want udi winyikel utakedilau kudi mwant. Chawiy lel Want wa Nzamb udi winyikel watenchikau kudi Nzamb. Yesu wisambina nakash piur pa Want wa Nzamb, Want winou wading mutu wa mulong wa uruu wend. Kudi ma verse kupandakanamu 110 majimbwila Want mu ma Evanjil manying. Pakwez Yesu kalejanap ku kan kusu. Yisal yend yalejana yom yivud piur pa Want wa Nzamb ni yikezay kusal.

Ov, Mwant Udi Nany? Mwant wa Want wa Nzamb kadiap muntu utondinau kudi antu bwat. Pakwez, udi mwant watondau kudi Nzamb amwinend. Mu malejan mend, Yesu walejana anch amutondin kudi Nzamb chakwel ikala Mwant.

Yesu wading wij mauprofet matakela kulejan anch Mesia washilaumu ukez kutakel mu Want wa chikupu. (2 Samwel 7:12-14; Daniel 7:13, 14; Mateu 26:63, 64) Vurik anch Yesu walejana patok anch amwinend udi Mesia watakelau kulejan. Chikwau kand, Yesu wading wij anch udi Mwant watondau kudi Nzamb. (Yohan 4:25, 26) Chawiy lel, Yesu wasadila yisu yivud dizu “Want wam.”—Yohan 18:36.

Yesu walejana kand anch kukwikal antu akwau akeza kutakel pamwing nend mu Want. (Luka 22:28-30) Ndiy wayitazuka antu inay akeza kutakel nend anch “kachisak ka amikoku,” mulong uvud wau ukez kwikal ukemp. Ndiy wayileja anch: “Chinech chimusangarishil Tatukwen kukwinkishany en want.” (Luka 12:32) Buku wa nsudiel wa Bibil ulejen anch antu 144000 akez kwikal nich chisend cha kutakel nenday Kristu.—Kujingunik 5:9, 10; 14:1.

Ov, Want wa Nzamb uding kwisu? Yesu wamuleja Pons Pilate ntakel mwin Rome anch: “Want wam kiudip wa mangand minam.” (Yohan 18:36) Want wa Nzamb mu wintakel wa Kristu ukezap kutakel kusutil antu bwat. Yesu wisambina chisu ni chisu Want wa Nzamb anch “want wa mwiur.”a (Mateu 4:17; 5:3, 10, 19, 20) Chawiy lel, Want udi wintakel wa mwiur.

Yesu wading uchingejin kuchirik mwiur kupwa kwa kushakam pa divu. Chawiy chalonday anch uyil ‘kuyirijekin ndond,’ ni kuyifungwil antu akeza kutakel nend njil chakwel amulondula.—Yohan 14:2, 3.

Ov, yom ik yikeza kusal Want? Yesu wayileja in kumutesh amulembila Nzamb anch: “Want wey weza. Rusot rey arusala pansh mudi mwiur.” (Mateu 6:9, 10, MN) Rusot ra Nzamb rusadikin mwiur. Rutong ra Nzamb mulong wa divu rukez kusadik kusutil ku Want. Pakwel anch yom yiney yisadika, Want ukez kukarumun yom pa divu mu mutapu ushimokishina.

Ov, yik yikezay kusal Want pa divu? Yesu walejana anch Want wa Nzamb ukez kadiosh uyimp mu kuyishesh antu awonsu adandamedina kuusal. (Mateu 25:31-34, 46) Chinench chikurumburik nsudiel ya milad yawonsu ya kasolikany ni uyimp. Yesu wafundisha anch divu dikez kwizul nich antu “itudishina,” atentamina, akweta riy, “adia zwang mu michim,” ni in chisambu.—Mateu 5:5-9, MN.

Ov, antu inay ashinshamena akez kushakam pa divu diyipina? Bwat kwau! Yesu washilamu anch divu dikez kukarumuk mu mutapu wa kushimokish mu Want wa Nzamb. Muntu wajipau pamwing nenday Yesu walonda anch: “Yesu, winvurikang am piukwandama mu want wey.” Yesu wamwakula anch: ‘Chakin am nakulej kal ilel unou, ey ukwikal ni yamam mu Paradis.’ (Luka 23:42, 43) Chakin, Want wa Nzamb ukez kukarumun divu dined chakwel dikala paradis pa mangand mawonsu—paradis wa chilik chimwing ni wadingaku mu chir cha Eden.

Ov, Want wa Nzamb ukez kuyisadin antu chom ik chikwau? Yesu wasala yom yivud kupandakanamu kushilamu payikezay kusal Want wa Nzamb. Ndiy walejana kand yikezay kusal. Yesu wokana nakash mu yilay, chawiy chamekeshay mu chilik chikemp yikezay kusal mu chilik chijim mu machuku ma kurutu pakezay kutakel mu Want wend. Evanjil wapepidilau kudi Nzamb ulejen piur pa Yesu anch: “Yesu watambitamba mu Galilaya mwawonsu, wend ulej mu masinagog mau kulejan rusangu ra want, ni kwok mitapu yawonsu ya misong ni mitapu yawonsu ya kuyel pakach pa antu.”—Mateu 4:23.

Yesu woka misong kushalijan. Ndiy “waburila mes ma muntu wavadika mputames.” (Yohan 9:1-7, 32, 33) Pamukwatay nich kalimish, Yesu wamwoka muntu wading uyedila musong wa mak. (Marko 1:40-42) Pamuletinau “ikundj kajikamatu wading kand kamam,” Yesu wamekesha anch ndiy ukutwish ‘kumujikul kajikamatu, ni kumulondish kamam.’—Marko 7:31-37.

Mwant watondau kudi Nzamb wading ni usu wa kuyivumbul ap afu. Pa tupamp tusatu, Yesu wayichirishina afu mwom. Ndiy wamusangula mwan kapokal umwing wa mwadia-mufu, changadim umwing wa mivu 12, ni murund nend mukatish Lazaras.—Luka 7:11-15; 8:41-55; Yohan 11:38-44.

Palejanay piur pa machuku ma kurutu mashimokishina mayichingedina antu akeza kwandam mu Want wa Nzamb, Yesu watakela kulond kusutil kudiay kambuy Yohan anch: “Talany, mwinkand wa Nzamb udi nau antu, ukez kasok nau, awiy akez kwikal antwend, ni Nzamb amwinend ukez kikal nau, ukez kikal Nzamb wau. Ndiy ukez kayikuswol mansoj mawonsu ku mes kwau; kukez kikalip kand rufu; ap kukez kikalip kand madil, ap kushikok kudil, ap kusansan, kwamwamu kand; mulong yom yikuru yasutil kal.” (Kujingunik 1:1; 21:3, 4) Tongin bil—mangand makad mansoj ma runeng, makad kusansan, ni makad rufu! Chawiy lel malembil malejanay Yesu makez kuwanyin—Rusot ra Nzamb rikez chakin kamu kusadik pa divu mudi mwiur.

Ov, chisu ik chikweza Want wa Nzamb? Yesu walejana anch kusambish kwa kutakel kwend mudi mwant kukez kashiken pamwing ni chisu cha pakampwil chitazukinau anch “Kwez.” Yesu wapana uprofet wa kachom pa kachom palejanay piur pa kusambisha kwa chisu cha kwez kwend nich uyaj mudi mwant. Chisu chinech chikez kumekan kusutil ku mar pa mangand mawonsu, jinjit, nzal, kuzal kwa divu, tumungun, ni kuvulijan kwa uyimp. (Mateu 24:3, 7-12; Luka 21:10, 11) Yom yiney ni yikwau yivud yatakelau kwisambin kudi Yesu yasambisha kumekan patok kudiosh muvu wa 1914, muvu kwasadika Njit ja Kusambish ja Mangand. Chawiy lel, Yesu utakedil katat mudi Mwant. Piswimp ap chisu chikuwanyin chakwel Want weza ni usala anch rusot ra Nzamb risadika pa divu.b

Ov, kwez kwa Want wa Nzamb kurumburikin ik piur pey pakampwil? Yiney yawonsu yimedin piur pa mutapu witiyina rusangu ra Yesu.

[Mazu madia kwishin kwa paj]