Chipul cha 2: Ov, Chom ik Chikushikena Pinikeza Kufa?

ROMAN wading uchid nsand pafay murund nend umwing wa piswimp mu akisidan wa motak. Ndiy ulejen anch: “Nova kuyip nakash mulong wa rufu ra murund nam, mulong mu mivu yivud yasutina kudiosh pasadika akisidan winou, nikat kutongin pa yikata kutushiken anch twafa.”

Ov, mulong wak chifanyidin kwipul? Rufu ra antu rimeken kwikal rakad kufanyin. Chikalap nchik chimbu cha mivu tukweta, tukatap kusotang kufa. Antu avud akweting wom pa yikata kushiken kupwa kwa rufu.

Ov, antu amwing akwil mutapu ik? Antu avud akat kwitiyij anch ku rufu chikunku chimwing cha muntu chidandamedin kwikal ni mwom. Itiyijin kand anch antu awamp akez kuyifut mwiur, pakwez antu adinga ayimp akez kayilej kadimu chikupu mulong wa yitil yau. Akwau atongin anch ku rufu muntu kakatap kwikalaku kand ni akat kumuvuramen rawonsu.

Ov, yakul yiney yirumburikin ik? Chakul cha kusambish chilejen anch ku rufu muntu kakatap kufa chakin kamu. Cha kaad chimekeshin anch kwikil rutong mu mwom. Antu akweta yitongijok yiney akutwish kusambish kutong nayimp anch: “Tudiany, tunany, mulong diamashik tukufany kwetu.”—1 Korint 15:32.

Ov, chom ik chifundishinay Bibil? Bibil kakatap kulejan anch ku rufu chikunku chimwing cha muntu chikat kudandamen kwikalaku bwat. Nzamb wamupepila Mwant Salomon chakwel afunda anch: “Mulong antu aom ij anch, kwisudiel tukez kafa, pakwez antu afu kijap chom.” (Mulej 9:5) Akad ‘kwijik chom’ kakutwishap kwijik yawonsu yidia ku mutambu wau. Awiy kakutwishap kutesh ap kusal. Chawiy lel afu kakutwishap kuyikwash aom ap kuyisal nayimp.

Chinyim ni yitiyijinau antu avud, Nzamb kasotap anch antu afa. Ndiy wamutanga muntu wakusambish, Adam nich ruchingej ra kushakam chikupu pa divu. Nzamb wisambina kapamp ka kusambish piur pa rufu pamulejay Adam piur pa dipup anch walik kumuziyil. Ndiy wamukangesha Adam kudia dibuj dia ku mutond umwing ni wamubabesha anch ang wadia ku mutond winou, “chakin ukez kufa.” (Disambishil 2:17) Anch Adam nenday Ev ashala antu ashinshamena, awiy ni anau ashinshamena kudi Nzamb afanyidina kushakam chikupu pa divu.

Adam walika kutesh kubabesh kwa Nzamb. Ndiy wasala chitil palikay kumuziyil Nzamb, ni wafa. (Rom 6:23) Kwikil chikunku cha Adam chashala pakad kufa. Pakwez, ku rufu Adam kadandamenap kwikalaku. Nzamb wamuleja Adam anch: “Ku masuril mey kwawiy kuukeza kudil ruku, ukez kuchirikin kamu ku divu, mulong kwawiy kwakudioshau. Mulong ey udi kwey rufunfut ra pansh, ukez kuchirikin kand kwey ku rufunfut.” (Disambishil 3:19) Mulong antu awonsu adiokil kudi Adam, etwawonsu twaswana chitil ni rufu kudi ndiy.—Rom 5:12.

Ap anch Adam watonda kulik kuziyil, Nzamb ukez kuwanyish rutong rend ra kwizwish divu ni anend a Adam. (Disambishil 1:28; Isay 55:11) Piswimp ap, Yehova ukez kuyivumbul antu avud afila. Pisambinay piur pa chirung chinicha, kambuy Paul walonda anch: “Antu awamp ni antu ayimp akez kavumbuk kwikal kand aom.”—Midimu 24:15.

Roman, twisambina kwinsambishil, wileja Bibil ni wileja chifundishinay piur pa rufu ni piur pa Yehova Nzamb. Yatanay yading ni usu nakash padi ndiy. Tang jinsangu jidia pa paj wa 11 wa Chinong cha Kalam cha Kalang 1, 2012 mu Français.

Chakwel wijika yom yivud pa yikata kushiken ku rufu, tal shapitre wa 6 wa buku Chom ik Chakin Kamu Chifundishinay Bibil? Buku winou udi pa kapend ka Web www.jw.org

[Kamushet kadia pa paj wa 7]

Ov, Chom ik Chalejanay Yesu Piur pa Rufu?

Yesu kayitiyijap antakel amwing a relijon a pa chirung chend alonda anch kwikiling divumbuk dia afu. (Luka 20:27) Ap kalejanap anch chikunku chimwing cha muntu chikat kupand kupwa kwa rufu. Pakwez, Yesu walejana yom yilondwila ey.

Rufu ridi mudi tul. Pafay murund nend Lazar, Yesu walonda anch: “Murund netu Lazar walalang kal mu tul, pakwez nikuya ni kamulangwish.” In kwilej a Yesu kateshap kurumburik kwa mazu minam. Awiy amwakula anch: “Nsalejetu, anch ndiy ulel tul, komb ukuyerik kwend.” Rusangu ra Bibil rilejen anch: “Mazu malonday Yesu mading marumburikin anch, Lazar wafang kal, pakwez in kwilej atonga anch, Lazar ulel kwend mu tul twa kwiswedish. Chawiy Yesu wayibuzinap patok anch: ‘Lazar wafang kal.’”—Yohan 11:11-14.

Afu akez kuvumbuk. Pashikay Yesu ku ul wa Lazar, ndiy wamukasikesha Mart, mwanamakwend a Lazar anch: “Mwanamakwey ukuvumbuk, ukwikal kand mwom.” Kupwa Yesu wapana kushilamu kwinoku kukash anch: “Am yam mwin kuvumbul antu ni kuyinkish mwom. Muntu mwawonsu ukwingitiyija ukez kupand, ap anch wafap nchik.” Kushilamu kwadingap kwau kwa chamwamu bwat. Kurutu kwa atuman avud, Yesu wamuvumbula Lazar, ap anch ndiy wafil pasutin kal machuku manying.—Yohan 11:23, 25, 38-45.

Mu kujingunik kwapanau kudi kambuy Yohan, Yesu washilamu kand anch afu akez kuvumbuk. Ndiy ulejen pa chisu mu machuku ma kurutu pakezay rufu kuyidiosh antu awonsu akwatay mu chifanikesh.—Kujingunik 20:13.