Chipul cha 1: Ov, Mwom Wam Ukwet Rutong?

ROSALIND, wapamina mu Angleterre, wasota nakash kwikal nich ronganyin. Ndiy wasota kand kuyikwash antu. Papwishay shikol yend, ndiy watana mudimu uwamp wa kuyikwash antu akad yikumbu, ni wayikwasha kand ayilim ni akad kutwish kwilej. Ap anch wading ni mudimu uwamp ni yom yiwamp ya kumujimbu, ndiy walonda anch: “Pasuta mivu yivud niyipula anch, ‘Ov, mulong wak tudi pinap?’ ni ‘Ov, risu rutong ra mwom?’”

Mulong wak chifanyidin kwipul? Antu kadiap mudi anam akad kutong. Tukutwish kwilej yom ya pasak, kutenchik mulong wa machuku ma kurutu, ni kukimb rutong ra mwom wetu.

Ov, chom ik chilondinau antu akwau? Antu avud amen anch rutong ra kusambish ra mwom ridi kwikal nich ukash wa kumujimbu ap katumb chakwel kwikal nich musangar.

Ov, chakul ech chirumburikin ik? Tukat kwitekin ayinetu yom yifanyidina kwikal pa ndond ya kusambish mu mwom. Rusot ra Nzamb rikwet usey ukemp kupandakanamu maku metu.

Ov, chom ik chifundishinay Bibil? Mwant Salomon wakumangeja mapit mavud ni yom yisangareshina pakwez wamana anch yom yiney yawonsu yaleta kurumburik kwa rutong kwa chisu chikemp. Ndiy wajingunina yom yaleta rutong rakin mu mwom pafunday anch: “Kwinyim kwa yom yiney yawonsu, kwashal chom chimwing cha kulond. Mulimisha Nzamb, ziyil ku malejan mend, mulong wa chom chinech chawiy chamutangilau muntu.” (Mulej 12:13) Ov, chirumburikin ik kuziyil ku malejan ma Nzamb?

Chikunku cha rutong ra Nzamb kudi etu chidi kusanger mwom wetu. Salomon wafunda anch: “Chom chipandakena kuwap kudi muntu chidi kudia ni kuna, ni kusanger mu mapit ma midimu yend. Pakwez namana anch, yom yiney yawonsu yidiokil kudi Nzamb.”—Mulej 2:24.

Nzamb usotin kand anch tukata ni tulama dijuku dietu. Tal yiyul yiswapela, ni ya usey yipaninau mulong wa yid ni yid ya dijuku.

“Chifanyidin ngatan kumukat mukajend mudi muukatilay mujimbu wend amwinend.”—Efes 5:28.

“Chifanyidin niyend ngachik mwawonsu kumulimish nfumwend.”—Efes 5:33.

“En an . . . ziyilany kudi anvajen.”—Efes 6:1.

Anch twasadil yany ya Bibil, tukez kwikal ni musangar umwing. Pakwez, chom cha usey nakash chitufanyidina kusal chidi kwilej yawonsu tukutwisha piur pa Sakatang wetu ni kumusejin ndiy mudi Murund netu. Pakwez, Bibil utwitin anch “sejany piswimp kudi Nzamb.” Ni kushilamu kand anch: “Niyend ukusej piswimp ni yenen.” (Jakobu 4:8) Anch witiyij diladikij dined, mwom wey ukez kwikal nich rutong rakin.

Rosalind, utwisambidina kwinsambishil, katat watanin rutong ra mwom. Pa paj wa 10 wa Chinong cha Kalam cha Kalang 1, 2012 mu Français, ukutwish kutang yilejenay yamushikija ku kukarumun kwinoku kwa mwikadil wend.

Chakwel wileja yom yivud piur pa mutapu ukutwisha kushakam chakwel umusangaresha Nzamb, tang shapitre wa 12 wa buku Chom ik Chakin Kamu Chifundishinay Bibil? Buku winou udi pa kapend ka Web www.jw.org

[Kamushet kadia pa paj wa 5]

Ov, Chom ik Chalonday Yesu Piur pa Rutong ra Mwom?

Yesu kidjidjekap piur pa rutong ra mwom wend. Ndiy walonda anch: “Chom chimwing kusu chinezila kuvadik pa mangand minam, chading mulong wa kulejan uyakin.” (Yohan 18:37) Yesu wasutisha mwom wend mu kuyilej antu uyakin piur pa Nzamb ni rutong rend.

Mwom wetu ukez kwikal ni kurumburik kwakin anch twalondul chilakej cha Yesu. Pakwez, Yesu utwitin chakwel twileja piur pend. (Mateu 11:29) Shinshikinany katat mitapu yaad mutukutwisha kusal mwamu.

Yesu walejana anch chakwel twikala ni musangar tufanyidin kwikal ija anch: “Tukwet kuswir kwa yom ya Nzamb mu michim yetu.” (Mateu 5:3) Tukutwish kuwanyish kuswir kwetu kwa muspiritu anch twashiken ku kumwijik “Nzamb wakin, ni kumwijik Yesu Kristu.”—Yohan 17:3.

Yesu wayileja in kumulondul end anch ayileja antu akwau piur pa yom yilejau. Ndiy walonda anch: “Yangany kudi antu a michid yawonsu, yikarumunany kwikal in kwilejam. Yibatishany mu dijin dia Tatuku, ni dia Mwan, ni dia [m]wiku [u]tumbila. Yilejany kuziyil ku yom yawonsu yinakulejanya.”—Mateu 28:19, 20.

Antu akata kuwanyish maswir mau ma muspiritu kusutil ku kwilej Bibil ni ku kusadil yikatau kwilej amen anch mwom wau ukat kukarumuk ni kwikal uwamp. Awiy akwet kashinsh anch mwom wau ukwet ruchingej rakin chisu chasambishau kuyikwash antu akwau chakwel ileja piur pa Nzamb.