Kulondul Rutong Ra Usey Mu Mwom

“Yom yawonsu yikata kupim yimushimana kwau [Yehova].”—KUSENG 150:6.

1. Shimunin yasalay nsand umwing mulong wa kukimb rutong ra usey mu mwom.

SEUNG JIN wapamina mu Coréea walonda anch: “Nileja umwingang mulong nasota kusadil mwom wam mulong wa kuyikwash antu. Niyova kand anch kwikal nich ndond ni kuman nfalang ja kwikal dokter yikwingikadish nich musangar. Pinijika anch chakin kamu dokter ukwet yikemp nakash ya kusal mulong wa kuyikwash antu, nova ushon. Kupwa nileja ukaliweny wa kufwatul ni kusong atupwany, pakwez midimu yiney yayikwasha antu pakemp nakash, ni niyova anch nifanyidin kwisadil chom chikwinsangaresha amwinam kusu. Nikala mulej ni pakad kulab najingunina anch nadinga kwam kusu ni kulejan yom ya chamwamu kinadingap ni kulejan umutakel ukutwisha kuyishikij ku musangar wakin.” Mudi antu avud, Seung Jin wadinga ni kukimb rutong ra usey mu mwom.

2. (a) Chirumburikin ik kwikal nich rutong mu mwom? (b) Mutapu ik twija anch Sakatang wadinga nich rutong patutekay panap pansh?

² Kwikal nich rutong rakin mu mwom kudi kwijik diyingish dia mwom, kwikal nich rutong rakin mu mwom, ni kwikal nich diloz pitwasidina usu wetu wawonsu. Ov, chakin kamu antu akutwish kwikal nich rutong riner? Inge! Uman udi anch atutanga nich manangu, kom, ni ukaliweny wa kutongijok kumekeshina anch Sakatang wadinga nich rutong ra usey patutangay ni kututek pansh. Chawiy lel, chakin kamu, tukutwish kutan ni kuwanyish rutong retu rakin ching kusu ku kushakam kwambatan nich rutong ra Sakatang.

3. Nzamb ukwet rutong ik padi antu?

³ Bibil ulondil anch rutong ra Nzamb padi etu rirumburikin yom yivud. Chilakej, mutapu wamushena watutangau udi chakin kamu uman wa rukat rakad choy ra Nzamb. (Kuseng 40:5; 139:14) Chawiy lel, kushakam kwambatan nich rutong ra Nzamb kurumburikin kuyikat antu akwau pakad choy mudi mutukatinay Nzamb. (1 Yohan 4:7-11) Kurumburikin kand kulam yijidik ya Nzamb, yitukwashina kushakam kwambatan nich rutong rend ra rukat.—Mulej 12:13; 1 Yohan 5:3.

4. (a) Chom ik chiswiridikina chakwel kwikal nich rutong rakin mu mwom? (b) Risu rutong ra usey nakash rifanyidinay muntu ni muntu kulondul?

⁴ Rutong ra Nzamb radinga kand anch antu ashakama mu musangar ni mazang umwing ni mukwau ni pamwing ni yitang yawonsu. (Disambishil 1:26; 2:15) Chom ik lel tuswiridina kusal chakwel twikala nich musangar, diking, ni chisambu? Mudi mwan usotila kushakam pamwing ni anvaj end chakwel asangara ni kwikal mu diking, tuswiridin urund uwamp ni Tatukwetu wa mwiur chakwel tutana kurumburik kwakin ni rutong rakin mu mwom. (Hebreu 12:9) Nzamb usadil anch urund winou pamwing nend utwishika kusutil ku kututwishish tumushejina piswimp ni ku kutesh malembil metu. (Yakob 4:8; 1 Yohan 5:14, 15) Anch ‘twend pamwing ni Nzamb’ mu ritiy ni kwikal arund nend, tukutwish kumusangaresh ni kumushiman Tatukwetu wa mwiur. (Disambishil 6:9; Jinswir 23:15, 16; Yakob 2:23) Rawiy riner rutong ra usey nakash rifanyidinay muntu ni muntu kulondul. Nfund a kuseng wafunda anch: “Yom yawonsu yikata kupim yimushimana kwau [Yehova].”—Kuseng 150:6.

Risu Rutong Rey mu Mwom?

5. Ov, mulong wak chidiap cha manangu kutek mapit ma ku mujimbu pa ndond ya kusambish?

⁵ Chikunku cha rutong ra Nzamb mulong wetwetu ridi anch twilama nawamp ayinetu ni majuku metu. Mu chom chinech mudi kwilam ku mujimbu ni mu spiritu. Pakwez, kwisikan kuswirikedin pa kusal mwamu, mulong wak yisakin ni milong ya ku mujimbu yiyikedinap yisakin ni milong ya usey ujim wa mu spiritu. (Mateu 4:4; 6:33) Cha ushon, antu avud asidin mwom wau ching kusu pa kusot kupit mapit ma ku mujimbu. Pakwez, kusotang kusangaresh maku metu min mawonsu nich mapit ma ku mujimbu kudingap kwa manangu ap kuding chinyim ni yom yidia yakin. Kukimbijol kumwing kwa piswimp kwasadikina kudi antu ampich nakash a mu Aziy kulejen anch avud au “iyovil anch adi mu chak ni akwet yakamish yivud, ap anch asangaredin ndond ya piur mu chisak ni ap ovil musangar udiokila ku mapit mau.”—Mulej 5:11.

6. Chiyul ik chaletay Yesu pa mulong wa kusot mapit?

⁶ Yesu wisambina usu wa “rupit ra makasu.” (Marko 4:19) Ov, mapit makat kudimbanang nchik? Mapit makat kumwikadish muntu nich musangar, pakwez mapit maletiningap kwau musangar. Mwant Salomon mwin manangu walonda anch: “Ukatila nfalang, kajikwetap jiwanyidina.” (Mulej 5:10) Ov, chitwishikin kulondul ntong ja kupit oku kand kumusadil Nzamb nich muchim wawonsu? Bwat, chitwishikinap. Yesu warumburila anch: “Kwikil muntu ukutwisha kusadil ant aad; mulong ukumukisip umwing, wamukat mukwau; ap ukupwichikin kudi umwing ni kumudiul mukwau. En kiukutwishanyip kumusadil Nzamb ni kusadil dipit pamwing.” Yesu wayikasikesha in kwilej end ijindjikina, kangal mapit ma ku mujimbu pansh, pakwez ajindjika “yipau [yau] mwiur,” charumburik anch, isadila dijin diwamp ku mes kwa Nzamb, mulong ndiy “wij kal kwend yom yiuswiridinanya piwakad kal kumwitany.”—Mateu 6:8, 19-25.

7. Mutapu ik tukutwisha kulamat ku “kupand kudia kamu kupand kwakin”?

⁷ Pamufundinay mbay nend wa mudimu Timote, kambuy Paul wamwinkisha chiyul chimwing chikash pa mulong winou. Ndiy wamuleja Timote anch: “Yishinshika ampich . . . chakwel awiy kangal itonga nakash piur, ap kutek ruchingej rau pa mapit mindjing, ching mwi Nzamb, ukat kutwinkish rupit ra yom yawonsu kutusangarish nich; chakwel asala nawamp, ikala ampich mu midimu yiwamp, . . . mwamu asa kudi ayinau manguj mawamp ku muten ukez kez, chakwel alamat kupand kudia kamu kupand kwakin.”—1 Timote 6:17-19.

“Kupand Kwakin” Chom Ik?

8. (a) Ov, mulong wak antu avud aril nakash mulong wa kupit ni kwikal nich ndond mu chisak? (b) Chom ik chikangenau antu inay kujingunin?

⁸ Kudi antu avud, dizu “kupand kwakin” diyinkining chitong cha mazang ni musangar ujim. Magazin umwing wa mu Aziy ulondil anch: “Antu akata kutal mafilim ku televizion ilejining kukat yimenau, kutongin pa yom yikutwishau kwikal nich.” Antu avud itekidining mu mwom wau rutong ra kupit mapit ni kwikal nich ndond mu chisak. Antu avud asheshin usand wau, ukash wa mijimbu yau, mwom wa majuku mau, ni usey wa mu spiritu wau mulong wa kusot yom yiney. Akemp kusu alikin kutong anch yifwatul yimeningau yidi kwau mizwizwimb ya “mwiku wa mangand minam”—usu wa kutong uyikedila mamiliyon ma antu adia pa divu ni kuyibachik asala chinyim nich rutong ra Nzamb mulong wetwetu. (1 Korint 2:12, MM; Efes 2:2) Pakad kwidjidjek kudi antu avud ilel akad kusangar!—Jinswir 18:11; 23:4, 5.

9. Antu kakutwishap kusal ik, ni chidi mulong wak?

⁹ Chidi nchik ku mutambu wa antu ipanina pakad choy mulong wa kuwap kwa antu akwau, arila tutaku mulong wa kupwish nzal, mayej, ni kuburen kutentam? Ntumb yau ni usu wa kwipan kwau kuyikwashin antu avud. Pakwez, chikalap nchik usu wau uwamp, kakezap kutwish kukarumun ditenchik dined dia yom dikala ditentamina ni diwamp. Ov, mulong wak? Mulong chakin kamu “ngand ya kabuj yidi mu chikas cha Satan”—ni kasotilap anch mangand maswimpa.—1 Yohan 5:19.

10. Chisu ik chikezau antu ashinshamena kusanger “kupand kwakin”?

¹⁰ Chidi cha ushon mudi ik anch muntu kakwetap ruchingej pa mwom wa mu mangand ma katat! Paul wafunda anch: “Anch tuchingejil mu Kristu mu kupand kwinoku kusu, tuyipandaken antu awonsu kutany.” “Lik tudiany kwetu, tunany lel kwetu, mulong diamashik tufil” mwamu mulondilingau antu itiyijininga mwom ching winou kwapwa. (1 Korint 15:19, 32) Pakwez kudi ruchingej, “maur masu ni ngand yisu, mudi mulondila kushilimu kwend [Nzamb], kukusokau in kutentam.” (2 Pita 3:13) Pa chisu chinicha, in Kristu akez kusanger “kupand kwakin,” charumburik anch, “mwom wa chikupu” mu kuwanyin, ap mwiur ap mwishin mwa umutakel wa rukat wa guvernema wa Want wa Nzamb!—1 Timote 6:12.

11. Ov, mulong wak kusal chakwel kutwal kurutu yisakin ya Want wa Nzamb udi rutong ra usey?

¹¹ Ching kusu Want wa Nzamb wawiy ukeza kupandakanamu mu kupwish milong yikwetau antu. Kusal chakwel kutwal kurutu yisakin ya Want wa Nzamb rawiy rutong ra usey nakash rifanyidinay muntu ni muntu kulondul. (Yohan 4:34) Pitusadila mudimu winou, tusangaredin chiyukish cha urund ni Tatukwetu wa mwiur. Tusangaredin kand kusal pamwing ni mamiliyon ma akadivar ni anambaz netu a mu spiritu, alondwila niyawiy rutong rawiy rimwing mu mwom.

Kwipan Kwakin

12. Let kushalijan kudia pakach pa mwom udia mu ditenchik dia katat ni “kupand kwakin.”

¹² Bibil ulondil anch mangand ma katat ‘makat kusut ni maku mau mawonsu.’ Akad kwikal mu mangand ma Satan, pamwing ni ntumb ni mapit mau, akez kupand, “pakwez wawonsu ukusala rukat ra Nzamb ushich chikupu.” (1 Yohan 2:15-17) Kushalijan nich mapit ma chamwamu, ntumb yikusuta, ni mazang ma makasu ma mangand ma katat, “kupand kwakin”—mwom wa chikumpu mu Want wa Nzamb—udi wa chikupu ni ufanyidin kwipan kwentu, tukuutan anch twipan muchifanyidina.

13. Mu mutapu ik utentamina wipanau ambay amwing atijadina?

¹³ Tumushinshikinany Henry ni Suzanne. Itiyijin mu kushilamu kwa Nzamb anch awonsu atekina Want pa ndond ya kusambish mu mwom wau akez kutambul ukwash wa Nzamb. (Mateu 6:33) Chawiy, chatondau kushakam mu chikumbu cha usey ukemp, pa ndond pa awonsu asala mudimu wa ku mujimbu, chakwel kufutin chikumbu cha usey, atwisha kusutish chisu mu mudimu wa mu spiritu pamwing ni anau amband aad. (Hebreu 13:15, 16) Murund nau muwamp kateshap kurumburik kwa chisal chau. Wamwela Suzanne anch: “Murund nam, anch usotinap kand kushakam mu chikumbu chiwamp, ukutwish kupan chom kanang.” Pakwez, Henry ni Suzanne, adinga ij anch kwipan cha kusambish kudi Yehova “kupandiken usey uwamp mu yom yawonsu yikweta kushilimu kwa mwom udiaku katat ni usotila kwez.” (1 Timote 4:8; Titus 2:12) Ayangadim au apama ikal atutwambil a chisu chawonsu akweta mushiku. Mudi dijuku, ovil anch kwikil chom cha usey chiburedinau, pakwez, isakidin nakash mulong wa kusot bil “kupand kwakin” mudi rutong rau.—Filip 3:8; 1 Timote 6:6-8.

Kangal ‘Wasadilany Mangand Nakash’

14. Kuvuramen rutong retu rakin kukutwish kutwal ku yibudikin ik yiyimp?

¹⁴ Kudi chak chakin, pakwez, anch twadiburil rutong retu rakin ni kuziyish kulam kwetu ku “kupand kwakin.” Tukwikal mu chak cha “yakamish, ni mapit, ni misangar” ya mwom winou. (Luka 8:14, MM) Maku makash ma kusot kupit ni “yakamish ya yakudia” yikutwish kushikij ku kwipan nakash mu ditenchik dined dia yom. (Luka 21:34, not) Cha ushon, antu amwing awila kal mu maku ma katat ma kusot kupit ni “akat kurumbuk mwi njil ya ritiy, abuzikin kal michim yau nich maushon mavud,” ap ku kushesh urund wau uwamp ni Yehova. Chibudikin chiyimp mudi ik mulong wa kukangany kulamat ‘ba ku mwom wa chikupu’!—1 Timote 6:9, 10, 12; Jinswir 28:20.

15. Mutapu ik wisakina dijuku dimwing ku kulik ‘kusadil mangand nakash’?

¹⁵ Paul wayula anch: “antu akata kusadil yom ya mangand minam ikal mudi kasadidilap kwau yom yiney.” (1 Korint 7:31, MM) Keith ni Bonnie atesha chiyul chinech. Keith ulondil anch: “Nikala Kaman wa Yehova panapwisha shikol ya malejan ma kwok mazeu. Chading chifanyidin kutond. Nela kuyok ayej avud ni kutan nfalang jivud, pakwez kusal mwamu kwela kupwitijan nich mwom wetu wa mu spiritu. Natonda kwifumb pakemp chakwel nikalaku ni chisu chivud mulong wa milong ya mu spiritu ni mashakamin mawamp ma dijuku dietu, pamwing ni ayangadim etu atan. Ap anch twadinga ni nfalang, twileja kujilam, ni twadinga nich yitwadinga tuswiridina. Dijuku diadinga mu uumwing, ni chirungil, ni musangar ujim. Chakin kamu, etu awonsu twasala mudimu wa chisu chawonsu. Katat ayangadim etu ayatin kal ni asanger, asatu avadil kal an au. Majuku mau ni mawiy masanger, pimadandamedina kutek bil rutong ra Yehova pa ndond ya kusambish.”

Tekany Rutong ra Nzamb pa Ndond

ya Kusambish mu Mwom Wen

16, 17. Yilakej ya antu ik adinga ni katok ka pakampwil ajimbwilau mu Bibil, ni ayivurikin mulong wak?

¹⁶ Bibil wisambidin yilakej ya antu asala ni alika kusal rutong ra Nzamb mu mwom wau. Malejan madiokila ku yilakej yiney masadil kudi antu a reng ni reng, a yishankur yawonsu, ni mikadil. (Rom 15:4; 1 Korint 10:6, 11) Nimerod watunga misumb yijim-yijim, pakwez ndiy wayitunga nich rutong ra kumubwambwil Yehova. (Disambishil 10:8, 9) Pakwez, antu akwau avud, adinga yilakej yiwamp. Chilakej, Moses, kasalap anch ndond yend ya ntumb yadingay nich mu Idjibit yikala rutong ra mwom wend. Pakwez, wamana yisend yend ya mu spiritu mudi ya “usey upandakenamu mapit mawonsu ma in Idjibit.” (Hebreu 11:26, MM) Dokter Luka chimeken anch wamukwasha Paul ni antu akwau kura nich mayej mau. Pakwez Luka wasala yivud mudi katwarubil ni nfund a Bibil. Ku mutambu wend, Paul wijikana, kangal mudi nsil wa Chijil, pakwez mudi mishoner, “mupostol wa in mangand.”—Rom 11:13.

¹⁷ David ndiy wa kusambish utuvurikina, kadingap kalal wa amasalay ap mudi nsil wa in kuwang ni kutomb miminy, pakwez wadinga kwend “muntu witiyika ku muchim [wa Nzamb].” (1 Samwel 13:14, NW) Tumwij Daniel, kichidiap mulong wa mudimu wend mudi kalal mukurump wa a in Babilon, pakwez chidi mulong wa mudimu wend mudi muprofet ushinshamena wa Yehova; Ester, tumwijap mulong anch wadinga mband a mwin Peris, pakwez chidi mulong wa chilakej chend cha kukapuk ni cha ritiy; Pita, Andre, Yakob, ni Yohan tuyijap mudi in kuta ansh akash, pakwez tuyij mudi atwimbuy a Yesu. Ni chilakej chipandikenamu, Yesu amwinend tumwij, kichidiap mudi “nsongamabay,” pakwez tumwij anch ndiy “Kristu.” (Marko 6:3; Mateu 16:16) Antu inay awonsu ova kurumburik nawamp anch ikala ni katok ap kisu, mapit mudi misu, ap ndond mudi yisu yadingau nich, mwom wau ufanyidin kwimanyin kichidiap pa mijikit yau ya ku mujimbu, pakwez pa mudimu wau umusadidilau Nzamb. Adinga ij anch difut dia usey ni dijim nakash dikutwishau kwikal nich diadinga kwikal ikundj ap mband umwovila Nzamb wom.

18. Mupak ik wakwatay nsand mwin Kristu umwing wa kusadil mwom wend, ni weza kujingunin ik?

¹⁸ Seung Jin, wajimbulangau kwisambishin, washikena niyend ku kutesh mwamu. Ulondil anch: “Pa ndond pakwipan nakash mu mudimu wa chimwingang, mu ukaliweny wa kufwatul ni kusong, ap mu kulejan yom ya ku mujimbu, nakwata mupak wa kusadil mwom wam kwambatan nich kwipan kwam kudi Nzamb.” “Nisadidil katat kuswiridinau alej a Bibil, kuyikwash antu aya mwi njil yiyila ku mwom wa chikupu. Nadinga ni kutong anch kwikal kashalapol wa chisu chawonsu kukezap kwikal nich yikokujol yikash. Katat mwom wam udi wa yikokujol yipandikena, mudi munipakishina kutenchik untu wam ni nkeu jam mulong wa kusot kusal ni antu a yishankur kushalijan. Nimen anch kusal rutong ra Yehova rikal rutong retu wawiy mwom urumburikina nakash.”

19. Mutapu ik tukutwisha kutan rutong rakin mu mwom?

¹⁹ Chitudia in Kristu, atuyukishin nich ronganyin ripandishina mwom ni ruchingej ra dipandish. (Yohan 17:3) Etu, kangal tutambulany “ranaken ra Nzamb chamwamu.” (2 Korint 6:1) Pakwez, tusadilany machuku metu ma usey ni mivu ya mwom wetu mulong wa kumushiman Yehova. Tupalangeshany ronganyin riletina musangar wakin katat ni ritwadila ku wom wa chikupu. Anch twasal mwamu, tukez kuman uyakin wa mazu malonday Yesu anch: “Chiyukish chijim kudi mwin kupan chapandakan mwin kutambul.” (Midimu 20:35) Ni tukez kutan rutong rakin mu mwom.

[Mazu madia kwishin kwa paj]

Ov, Ukutwish Kurumburil?

• Rutong ik ripandikenamu tukutwisha kwikal nich mu mwom?

• Ov, mulong wak chidiap cha manangu kushakam mu kwimen pa mapit ma ku mujimbu?

• “Kupand kwakin” kwashilayimu Nzamb chom ik?

• Mutapu ik tukutwisha kusadil mwom wetu mulong wa rutong ra Nzamb?

[Chipich chidia pa paj wa 20]

In Kristu aswiridin kwipan muchifanyidina