Mwom Ukweta Kurumburik Katat ni Chikupu

UKUTWISH kuman kurumburik kwakin kwa mwom ap nlel unou. Ov, mutapu ik? Kusutil ku kulondul yany ya manangu yidia mu Bibil, Dizu dia Nzamb. Talany amboku yany yimwing ya ku yin ya.

CHANY CHA BIBIL: Mwant Salomon wafunda anch: “Chom chipandakena kuwap kudi muntu chidi kudia ni kuna, ni kusanger mapit ma midimu yend.”—MULEJ 2:24.

Atutanga mulong wa kusanger mudimu uwamp. Ap mu mikadil yikash, ukutwish kwikal ni musangar mu mwom nlel unou kusutil ku kusal mudimu nich mushiku nich win kashinsh.

CHANY CHA BIBIL: “Chiyukish cha mwin kupan chipandakenamu cha mwin kutambul.”—MIDIMU 20:35.

Antu avud amana anch kuyisadin antu akwau yom—kupan chisu ni usu wau mulong wa kuyikwash antu akwau mu mar—kwamekana anch kudi kwa usey nakash ni kwaleta kurumburik kwakin mu mwom wau. Mwant Salomon wafunda anch: “Sal kuwap kudi awiy aswiridina kuwap, anch chidi mu usu wey wa kuchisal.”—Jinswir 3:27.

Shinshikin chilakej cha Ralph. Pimikay mudimu wend, ndiy wamulondula mukajend mu mudimu wa chisu chawonsu wa win Kristu. Awiy asala yisu yivud ngond ni ngond mu mudimu wa kulejan, ni ipana nakash mu kulejan Bibil kudi antu akwau. Ralph ulondin anch: “Pitukata kuchirik urel ku chikumbu, tukatap kuziyang mulong wa kunanap bwat, pakwez twading tuziyin mulong wa kupan usu wetu wawonsu mu mudimu wa Tatukwetu wa mwiur. Chidi chovil chiwamp nakash cha kuziy mulong wa kusal mudimu uwamp!” Ndiy ni mukajend akwet musangar mulong mwom wau wawonsu wimedin piur pa kupan.

CHANY CHA BIBIL: “Murund ukat kumekesh rukat machuku mawonsu. Mwanamaku wavadika mulong wa kukwash mu yom yikash.”—JINSWIR 17:17.

Chiswapel kujijaman mu mar pamwing ni antu akwau. Francis Bacon filozof umwing mwin Inglish wafunda anch kudi awiy akad arund akin, “mangand madi mudi kushakam mwimpay.” Kwikal nich arund akin—ni kwikal murund muwamp—kukutwish kuwapishin mwom; ukutwish kwikal wa ufun ni usangareshina.

CHANY CHA BIBIL: “Ayuka kwau antu ija anch tukwet kuswir kwa yom ya Nzamb mu michim yetu.”—MATEU 5:3.

Pa chinech Yesu wajingunina chom cha usey chiswiridikina anch usotin kusanger kuwanyin kwa kushilamu kwa Nzamb—itiyij ni sal usu wa kuwanyish “kuswir [kwey] kwa yom ya Nzamb.” Chinyim ni anam, etu tukwet kuswir kwa kutesh kurumburik ni rutong ra mwom. Ching kusu Yehova Nzamb ndiy ukutwisha kuwanyish kuswir kwinoku, ni ukutwish kusal mwamu kusutil ku Dizu diend Bibil. Mudi mutwamena mu mutu wa mulong wasutina, Bibil walejana rutong ra Nzamb mulong wa divu. Utulejin mulong wa tudi pinap, mulong wak mar mapandiken nakash, ni chom ik chitinay Nzamb kud etu. Kutesh uyakin winou udia mu Bibil kudi kwa usey chakwel twikala nich mwom urumburikina ni usangareshina. Antu itekina chisu cha kwilej Bibil ni kusadil yom yilejinau akwet musangar. Ov, mulong wak? Mulong awiy akasikeshin urund wakin ni Sakatang wetu, Yehova “Nzamb muwamp.”—1 Timote 1:11.

CHANY CHA BIBIL: “Muvurika Sakatang wey . . . pimakadia kal kushik machuku mayimp mulong mivu yikez kez ey ukez kalond anch ‘Kinasangerap kand kwikal mwom.’”—MULEJ 12:1.

Kubabesh kwa Mwant Salomon kudi ansand, akutwisha chisu chimwing kukangany kwitiyij anch yikokujol yikutwish kushiken mu mwom, kudi kwa usey kudi etwawonsu. Muteka Sakatang wey pa ndond ya kusambish mu mwom wey. Chawiy lel chikez kulet rutong rakin ku mwom wey. Ipuk mwikadil wa kulond anch: “Tudiany, tunany, mulong diamashik tukufany kwetu.” (1 Korint 15:32) Mulej 8:12 ulejen anch, ang wamutek Nzamb pa ndond ya kusambish, yom “yikwikal kwau nawamp.”

Changadim ukweta dijin dia Wendi wamana anch mazu minam madi makin. Padingay nsand, ndiy ni mwanchend changadim ileja rudim ra mu Espagne chawiy chayikwasha kuya ku République Dominicaine, kwadinga kuburedina in kulejan rusangu ruwamp ra Bibil. “Twipana nakash mulong wa kusadin kwindond kwadinga kuswir kwa in kulejan, pakwez twasutisha chisu chiwamp nakash mu mwom wetu. Kwadingap chom ap chimwing chela kwisikan nich angond musamban twashakam kwinikwa! Twatambula yiyukish yivud kupandakanamu kwipan kwetu.”

Kushinshaman Kudi Nzamb Kusadin Mwom Urumburika

Kutung urund uwamp ni Yehova kukutwish kuwej kurumburik kwa mwom wey mu mitapu yawonsu ya pakampwil. Ov, mutapu ik? Kadingap Satan amwinend wayibachika Adam nenday Ev chakwel abwambwila ku chijil cha Nzamb, pakwez ndiy kand walonda anch kwikil muntu ap umwing ukeza kwikal ushinshamena kudi Nzamb mu yoziu. (Job 1:9-11; 2:4) Ukutwish kupan ukwash chakwel amekesha anch Satan udi mwin makasu! Ov, mutapu ik? Kusutil ku kushinshaman kudi Nzamb, ku kulam yany yend, ni kusutil ku kumekesh anch witiyijin mbil ya Yehova ya piur ya kutulej uwamp ni uyimp.—Kujingunik 4:11.

Tukutwish kujijaman mu yikokujol anch tusotin kulondul jinjil jitentamina. Ov, yikokujol yiney yikez kutukangesh kwikal nich mwom urumburikina? Chiwamp, tongin bil anch mukankuny mwin chisum wamudimben murund netu mukatish ap chid cha dijuku. Anch kumulondin muntu winou mukatish kwa tuletina mar mamwing ku chikas cha mukankuny netu, ov, chinech chikudiosh kurumburik kwa mwom wetu? Bwat kwau! Tukusanger kujijaman yikokujol yiney piur pa mulong winou. Chilik chimwing kand nich kushinshaman kudi Nzamb. Kushinshaman kwetu mu mikadil yiney yiyimp kukat kusangaresh muchim wa Nzamb.—Jinswir 27:11.

Mwom Urumburikina Chikupu

Itekina rutong ra kusal usu wa kwilej yom yawonsu ukutwisha kwilej piur pa Nzamb ni rutong rend. Yesu Kristu amwinend walonda anch: “Kupand kwin kwa chikupu kwawiy oku, chakwel akwijika ey Nzamb wakin, ni watuma ey ndiy kamu Yesu Kristu.” (Yohan 17:3) Pakezay kuwanyish Nzamb rutong rend ra kusambish mulong wa divu, antu ashinshamena akez kwikal nich chom chasotay Yehova kuyinkish pakusambish—“Kupand kwin kwa chikupu” mu paradis pa divu. Chawiy mwom ukez kwikal chakin kamu urumburikina ni usangareshina.—Kuseng 145:16.

Ov, kwisu ukutwisha kutan ronganyin risambidinay Yesu? Mu ma paj ma Dizu dia Nzamb diapepilay, Bibil. Anch usotin kutambul ukwash pa chinech mu kusal mwamu, yifundina amboku in kupalangesh gazet winou. Akwikal nich musangar wa kutum muntu umwing chakwel akukwasha kwilej chifundishinay chakin kamu Bibil.