Tulondulany Rutong Ra Nzamb Mu Chirung Chetu

“[Kristu] wayifila antu awonsu chakwel awiy adia aom kakwikalap kand aom mulong wa ayinau kusu.”—2 KORINT 5:15, MM.

1. Shimunin yamanay mishoner umwing mu mudimu wend.

MISHONER Aarona walonda anch: “Motak wetu wawiy wadinga motak wa kusambish wa antu akad kwikal amasalay kuya ku ul wa kulemp mu Afrik kupwa kwa njit ja an a ngand. Chatwishikap kwisamb ni kachikumangen kakemp kadinga kwinikwa, ni twabangina maswir ma akadivar netu. Kuwejin pa yakudia, masun, ni mikand yimedina pa Bibil, twasenda kaset video Les Témoins de Jéhovah : un nom, une organisation.b Chawiy kweza runtu mulong wa kutal kaset video kwi ndond ya ‘masengan’ ya mu ul—chikumbu chijim cha masuku chikweta video ni televizion—twamumekesha kwinikwa tupamp twaad. Kwikala antu avud itiyija kwilej Bibil kupwa kwa kumutal. Chakin kamu, usu wetu wawonsu wadinga wa usey.”

2. (a) Ov, mulong wak ukwatinau in Kristu mupak wa kusadil mwom wau mu mudimu wa Nzamb? (b) Yipul ik tukushinshikina katat?

² Ov, mulong wak Aaron ni arund nend aya mu weny winou ukash? Chidi mulong, wa kujikitish mulong wa chakupesh cha difut dia Yesu Kristu, amwinkisha Nzamb mwom wau ni asotil kuusadil kwambatan nich rutong ra Nzamb. Mudi awiy, in Kristu awonsu ipana kal akwatin kal mupak chakwel ‘kakwikalap kand aom mulong wa ayinau kusu’ pakwez chidi mulong wa kusal yawonsu “mulong wa Rusangu Ruwamp.” (2 Korint 5:15, MM; 1 Korint 9:23, MM) Ij anch pichiyila ni kupwa chisu cha ditenchik dined dia yom, nfalang jawonsu ni ntumb yawonsu yikez kwikal yakad usey. Komb kwikal nich mwom ni ukash kanang wa mujimbu, asotil kuyisadil yom yiney kwambatan nich rutong ra Nzamb. (Mulej 12:1) Mutapu ik tukutwisha kusal mwamu? Kwisu tukutwisha kutan dikasikesh dituswiridina ni usu wa kusal mwamu? Ni mitapu ik yitukweta ya kusal mudimu?

Kuya Kurutu Pakemp-Pakemp, Kufanyidina

3. Nzau ik ja pa dishin jidia mu kusal rusot ra Nzamb?

³ Kudi in Kristu akin, kusal rusot ra Nzamb ridi rutong ra mwom wau wawonsu. Usambishining chisu chivud nich nzau ja pa dishin mudi kufundish majin mau ku Shikol ya Mudimu wa Uteokras, kutang Bibil pichuku-pichuku, kusal mudimu wa kulejan, ni kubabatishiu. Mudi chituyilay kurutu, tukulam mu manangu mazu ma kambuy Paul anch: “Lamat ku mudimu winou; sok mu yom yiney; chakwel kujimb kwey kukumekan kudi antu awonsu.” (1 Timote 4:15) Kuya kurutu kwinoku kudiap kwitumbish kwa muntu amwinend pakwez chijingidij cha mupak wetu wa kusal rusot ra Nzamb pakad choy. Kusal mwamu kumekeshin anch tumushidin Nzamb ndond chakwel atakela nzau jetu mu milong yawonsu ya mwom, ni mwamu musadiningay mu mutapu uwamp nakash kutupandakanamu.—Kuseng 32:8.

4. Mutapu ik tukutwisha kulik kwov wom wa chamwamu?

⁴ Pakwez, kwidjidjek ap kwiyakamish nakash, kukutwish kwikal chikangesh chikash ku kuya kwetu kurutu mu mudimu wetu utumusadidila Nzamb. (Mulej 11:4) Chawiy, kurutu tutana musangar wakin mu kumusadil Nzamb ni antu akwau, tufanyidin bil kupandakan wom wetu ayinetu. Chilakej, Erik, wadinga ni kusanger kusadil mu chikumangen cha rudim ra wingendj. Pakwez wadinga wiyakamishin anch: ‘Ov, akwingitiy mu chikumangen chinech? Ov, ni kuyikat akadivar adiamu? Ov, akwinkat?’ Ushimunin anch: “Nashikena ku kujingunin anch nadinga niswiridin kuyibangin nakash akadivar kupandakanamu kwibangin amwinam. Nakwata mupak wa kulik kwinan ni kwasin pa yom yinikutwisha kusal ni akwetu. Nalembila chakwel nitana ukwash ni kuya kurutu. Katat, Nikat kusanger nakash mudimu wam kwinikwa.” (Rom 4:20) Inge, mu chilik tumusadidila Nzamb ni antu akwau pakad choy, chawiy tukeza kutan musangar ni mazang.

5. Ov, mulong wak chiswiridin kwitenchik nawamp mu kudandamen kuwanyish rutong ra Nzamb? Let chilakej.

⁵ Chakwel kuwanyish rutong ra Nzamb mu chifanyidina chitin kand anch tutenchik nawamp milong yitutadina. Tukwiyep kusondam mabaz mavud makutwisha kututek mu uswik wa ditenchik dined ni kukoj want ipetu wa kusal mudimu wa Nzamb. Bibil utuvurishin anch: “mwin kusondam ukat kwikal muswik wa mwin kumusondjik.” (Jinswir 22:7) Kumuchingejin Yehova ni kutek yom ya mu spiritu pa ndond ya kusambish kutukwashin kushinshikin nawamp yom. Chilakej, Guoming ni ampanyend aad ashich ni makwau mu mwab umwing wadinga usey ukash wa kufutin yikumbu ni wadinga ukash pa kutan mudimu. Kusutil ku kusadil ni kukwashijan kuwamp nfalang, adinga awonsu ni yom ya mwom yiswiridikina ap anch awonsu kadingap ni kusal mudimu. Guoming ulondil anch: “Pa yisu yimwing, kitwadingap etu awonsu ni kutambul nfalang kwi nsudiel kwa ngond. Pakwez, twatwisha kudandamen mu mudimu wa uchibol ni kumulam nawamp makwetu. Tumujikitishin nakash Maku mulong kadingap ni kusot anch tulika ntong ja mu spiritu mulong wa kumutek mu mwom usangareshina.”—2 Korint 12:14b; Hebreu 13:5.

6. Chilakej ik chimekeshina anch tukutwish kusadil mwom wetu kukwatijan nich rusot ra Nzamb?

⁶ Anch ukwatiken nakash nich midimu ya ku mujimbu—kukimb nfalang ap kusal yom yindjing—kusot kusal bil rusot ra Nzamb kukutwish kwit kwitenchik nakash. Yitenchik yiney yidiap ya kusal mau-mau, ni anch wasal yilim kapamp ka kusambish kangal wayiman anch kudi kukangany. Tumushinshikinany Koichi, muntu wadinga ni mulong wa kusutish chisu chilemp mu kwipuwangesh. Koichi wileja Bibil padingay ni dikum dia mivu, pakwez mu kusut kwa mivu yivud, masengan ma video mamuyikela mu mwom wend. Dichuku dimwing Koichi wiyipula amwinend anch: ‘Chom ik nisadila? Nawanyish kal mivu 30 ni kusut, ni nisadilap chom kanang mu mwom wam!’ Koichi wasambishirila dilejan diend dia Bibil ni witiyija ukwash wa chikumangen. Ap anch yikarumun yeza pakemp-pakemp, kalikap kand. Nich kulembil nakash ni ukwash wa rukat ra antu akwau, washikena ku kudiokal mu uswik wakwachikay. (Luka 11:9) Katat nich musangar, Koichi usadil nich musangar mudi nkwash a mudimu.

Ilejany Kwikal Isikena

7. Ov, mulong wak tuswiridin kwikal isikena mu kusal mudimu wa Nzamb?

⁷ Tuswiridin kwipan nich mupim wawonsu chakwel kusal rusot ra Nzamb. Kitufanyidinap kwikal in usweral mu kusal rusot ra Nzamb. (Hebreu 6:11, 12) Chikwau, Yehova kasotinap anch twiziyisha ayinetu—ku mujimbu, mu manangu, ap mu yovil. Kwitiyij nich kwitudish anch tukutwish kusal nich usu wetu ayinetu mudimu wa Nzamb, kukat kumushiman ni kumekeshin kwisikan ku mutambu wetu. (1 Pita 4:11) Yehova ushidilamu kutwinkish usu utuswiridina wa kusal nich rusot rend, pakwez tukutwishap kusal usu wetu ayinetu kupandakenamu yitukutwisha kusal, kusot kusal yom yakaday ndiy kutuchingejin kusal. (2 Korint 4:7) Chakwel kudandamen kumusadil Nzamb pakad kuziy, tuswiridin kusadil nawamp usu wetu.

8. Chom ik chashikena chisu chapakishay nsand umwing mwin Kristu kwipan nakash pa chisu chimwing ku mangand ni kudi Yehova, ni yitenchik ik yasalay?

⁸ Chilakej, mu mivu yaad Ji Hye, udinga mu Aziy wa Kwingangel, wasala mudimu ukash oku udi chibol. Mband winou ulondil anch: “Napakisha kusal usu wam wawonsu mulong wa kumusadil Yehova ni mangand, pakwez nadinga ni kulal ching asaa atan kusu uchuku. Chakin kamu, kinadingap kand nich usu mu manangu mulong wa uyakin, ni nasangera pakemp yom ya mu spiritu.” Chakwel anch amusadil Yehova nich ‘muchim wend wawonsu, mupim wend wawonsu, ni usu wend wawonsu,’ Ji Hye wakimba mudimu wa chisu chikemp. (Marko 12:30) Ulondil anch: “Ap anch dijuku diampwita nakash nikimba nfalang, nikasikesha kutek bil rutong ra Nzamb pa ndond ya kusambish. Nadinga nichikwatin nfalang jifanyidina mulong wa yom ya mwom, mudi maswin mawamp. Ni niyovil nawamp kulal nakash! Nisangaredin mudimu wam, katat nidi mukash mu spiritu. Chidi mulong nipwichikinap kand nakash nich ku kuzuwol kwa mangand.”—Mulej 4:6; Mateu 6:24, 28-30.

9. Usu wetu ukwet yibudikin ik padi antu mu mudimu wa kulejan?

⁹ Chidiap anch muntu mwawonsu ukumusadil Nzamb mudi mwin kulejan wa chisu chawonsu. Anch wananapin kal, udi muyej, ap yikangesh yikwau, ijik anch Yehova usangaredin nakash kushinshaman kwey ni mudimu win wawonsu usadila nich muchim wey wawonsu. (Luka 21:2, 3) Kwikil muntu ap umwing pakach petu, mulong wa mayingishin minam, ufanyidina kupipesh chibudikin cha usu wetu, wikalap nchik ukemp, padi antu akwau. Chilakej, tulonda anch twaya ku yis kanang ni kwikil kwau muntu usangaredina uruu. Kupwa kwa kutumbuk, in chikumbu akutwish kulond anch tukat kuyendil mu asaa ap mu machuku, makadau kutwak! Kituchingejinap anch antu in awonsu akutesha rusangu ruwamp akez kuritiyij nawamp, pakwez amwing akuritiyij. (Mateu 13:19-23) Akwau akez kwitiyij kwinyim piyikeza kukarumuk mikadil mu mangand ap anch mwom wau wakarumuk. Chikalap nchik, ku kusal yawonsu yitukutwisha kusal mu mudimu wa kulejan patok, tukat kusal mudimu wa Nzamb. Tudi “in mudimu nend Nzamb.”—1 Korint 3:9.

10. Midimu ik yikutwishau kusal awonsu adia mu chikumangen?

¹⁰ Chikwau, etu awonsu tukutwish kuyikwash yid ya majuku metu ni akadivar ni anambaz netu a mu spiritu. (Galatia 6:10) Usu wetu uwamp padi antu akwau ukutwish wikal ukash ni wa chikupu. (Mulej 11:1, 6) Pakatau kusal amakurump ni ankwash a mudimu midimu yau nich mushiku, akat kuwejin ku ukash wa mu spiritu ni ukash wa chikumangen, ni kwiwejin kwa mujikit wa Ukristu. Tukwet kashinsh anch tusadil “midimu ya Nsalejetu,” nich mushiku “kiyidiap yamwamu, bwat.”—1 Korint 15:58, MM.

Kulondul Rutong ra Nzamb Mudi Mudimu wa Chikupu

11. Pa ndond pa kusadil pamwing ni chikumangen cha pol pen, yisu mitapu yikwau ya mudimu tukutwisha kusal?

¹¹ Chitudia in Kristu, tusangaredin mwom, ni tusotin kumutumbish Nzamb mu yom yawonsu yitusadila. (1 Korint 10:31) Anch twipan nich kushinshaman mu mudimu wa kulejan rusangu ruwamp ra Want ni kuyilej antu akwau kusal yom yawonsu yalejanay Yesu, tukez kutan mitapu yivud ya kumusadil Nzamb yikutwisha kutuletin musangar. (Mateu 24:14; 28:19, 20) Kuwejin pa kusadil pamwing ni chikumangen chetu, tukutwish kwikal nich mitapu yikwau ya kusadil kwi ndond kudia maswir majim, chikala mu teritwar windjing, mu rudim rindjing, ap mwi ngand yindjing. Amakurump ayifuvu ni ankwash a mudimu akad kal kwatan akutwish ayitazuk ku Shikol ya Diyiy dia Mudimu, kupwa akutwish kusadil mu yikumangen mudia maswir mulong wa kuyikwash in Kristu aswila, chikala mu jingand jau ap mu jingand ja wingendj. Ambay atijadina asadila mudimu wa chisu chawonsu akutwish awanyish yitinau chakwel atambul diyiy dia Gilead ni akutwish kusadil mu teritwar wa wingendj. Ni kudi kuswir kujim kwa in kwipan mulong wa kusal mijikit kushalijan ku Bethel ni mu kutung ni kulam yot ya want ni mabiro ma mitiy.

12, 13. (a) Mutapu ik ukutwisha kukwat mupak piur pa mudimu ufanyidina kusal? (b) Let chilakej chimekeshina mutapu ronganyin rakau mu mudimu umwing rayikwasha kusal midimu yikwau.

¹² Mulad ik wa mudimu usotila kusal? Chiudia kashalapol wipana kal kudi Yehova, muchingejina chisu chin chawonsu ni ku dirijek diend mulong wa umutakel. “Kuwap” kwend ku kukukwash ukwata mupak utentamina. (Nehemi 9:20) Mudimu umwing uletining ukwau, ni uman ni ukaliweny ukwaka mu mulad umwing wa mudimu ukutwisha chisu chivud kwikal wa ukwash nakash mu mudimu ukulondula.

¹³ Chilakej, Dennis ni mukajend, Jenny, chisu ni chisu adinga ni kukwash midimu ya kutung Yot ya Want. Pakweza rikind mukash utazukinau anch Katrina kurul kwa États-Unis, ipana mulong wa kuyikwash antu adinga mu mar. Dennis ulondil anch: “Kusadil ukaliweny twaka mu kutung Yot ya Want mulong wa kuyikwash akadivar netu akwachika ku rikind kwatuletidin kal musangar ujim. Kusanger kwamekeshau antu itwakwasha kutusangareshin nakash. Yisak yikwau yivud ya kukwashan yasala yikemp nakash mu kutung. Atuman a Yehova adinga atungiril kal yikumbu 5300 ni kusut ni Yot ya Want yivud. Antu amana yiney ni katat asangaredin nakash mu uruu wetu.”

14. Chom ik ufanyidina kusal anch usotil kusal mudimu wa chisu chawonsu?

¹⁴ Ov, ukutwish kulondul rusot ra Nzamb kusutil ku kutond kusal mudimu wa chisu chawonsu mudi mudimu wey wa chikupu? Anch mwawiy, uchingejin nich kashinsh kutambul yiyukish yivud. Anch mikadil yey ya katat yikukangeshin kuusal, pamwing ap chikwitin witenchikaku. Lembil mudi mwasalay Nehemi pading paswiridinay kukwat mupak wa kusal mudimu ujim anch: “A! Nsalejam, . . . Nakwilembil, amboku, katat pan kupandakan kudi kashalapol wey.” (Nehemi 1:11) Kupwa, kumuchingejin ukata “kutesh kulembil,” sal kwambatan nich malembil mey. (Kuseng 65:2) Chakwel anch Yehova ayukish usu wey wa kumusadil muchifanyidina, ufanyidin bil kusal usu winou. Anch wakwat mupak wa kusal mudimu wa chisu chawonsu, sal kwambatan nich. Anch chisu chasut, ukuman ukaliweny wey ni nkeu jey jikuvulijan, ni musangar wey ukwikal ujim.

Mwom Udia Wakin

15. (a) Mutapu ik tukata kutaninamu ku kuyilej antu akwau ni kutang piur pa jinsangu ja atushalapol a Nzamb a pasak? (b) Jimbul rusangu ra mwom rimwing rakukasikesha pakampwil.

¹⁵ Chibudikin ik ukutwisha kuchingejin ku kusal rusot ra Nzamb? Isamba ni atushalapol a Yehova asadila kal mivu yivud, pakampwil in asala mivu yivud mu mudimu wa chisu chawonsu. Mwom usangareshina, ukweta rutong wa mutapu ik wadingau nich! (Jinswir 10:22) Akez kukulej anch Yehova kandikal akanganyap kuyikwash ap mu mikadil yikash kutan yiswiridinau chakin kamu ni yivud chipandikena. (Filip 4:11-13) Kudiosh mu muvu wa 1955 djat mu muvu wa 1961, Chinong cha Kalam chapalangesha dilondurish dia jinsangu ja mwom wa antu inay ashinshamena mu mutu wa mulong ulondila anch “Kulondul Rutong Ram mu Mwom.” Kudiosh pinipa, apalangeshin kal yitot ya jinsangu ja mwom. Rusangu ni rusangu ra mwom rilejen spiritu wa mushiku ni musangar ukutwisha kutuvurish rusangu ridia mu buku wa Midimu udia mu Bibil. Kutang jinsangu ja mwom jinej jisangareshina kukubachik ulond anch, ‘Wawiy mulad wa mwom usotila kwikal nich!’

16. Chom ik chikata kwikadish mwom wa mwin Kristu ukweta rutong ni usangareshina?

¹⁶ Aaron, wisambidinau kwisambishil, uvurikin anch: “Mu Afrik, nadinga ni kusankanijan ni ansand adinga ni kutambitamb mwi ngand mu kukimb rutong ra mwom. Avud pakach pau karitanap kwau. Pakwez etu twadinga, ni kulondul rutong ra Nzamb kusutil ku kulejan rusangu ruwamp ra Want, ni twasangera mwom ukash ni urumburikina. Twimena ayinetu anch kudi “chiyukish chijim kudi mwin kupan chamupandakan mwin kutambul.”—Midimu 20:35.

17. Ov, mulong wak tufanyidina kulondul rutong ra Nzamb katat?

¹⁷ Ov, chidi nchik kudi ey? Rutong ik ulondwila? Anch ukwetap rutong ra mu spiritu, ntong jikwau jikwez mau nakash. Ov, mulong wak ukushesha mwom wey uwamp nich mangand ma chamwamu ma ditenchik dia Satan? Kichidiap kand kulemp mu machuku madia kurutu oku pimakeza “mar mapandakena,” mapit ma ku mujimbu ni ndond ja mangand kiyikez kwikalap ni usey. Chom chikeza kushal ching kusu urund wetu ni Yehova. Tukez kuzangam mudi ik kwijik anch twamusadila Nzamb ni antu akwau ni twasala muchifanyidina rutong ra Nzamb mu mwom wetu!—Mateu 24:21; Kuburik 7:14, 15.

[Mazu madia kwishin kwa paj]

Ov, Ukutwish Kurumburil?

• Mutapu ik wovilingay Yehova piur pa mudimu utumusadidila?

• Ov, kwikal mukash ni wisikena kutukwashining nchik tumusadila Nzamb ni antu akwau?

• Yisu ik tukweta ya kumusadil?

• Mutapu ik tukutwisha kwikal nich mwom ukweta rutong katat?

[Chipich chidia pa paj wa 25]

Tuswiridin kwisikan chakwel tudandamena kumusadil Yehova nich muchim wawonsu

[Chipich chidia pa paj wa 26]

Mudimu utumbila udi mu milad kushalijan