Mitapu ya Kutanduril Mudimu Wey wa Kulejan

PA CHISU chashikenay Yesu kuyitum in kwilejend mudi in kulejan a Want, ndiy wayileja anch: “Yakwangul yidi yivud, pakwez in mudimu wa kwangul adi akemp.” Kwading mudimu ujim wa kusal, chawiy walonda kand anch: “Mulembilany Mwant wa kwangul chakwel atuma in kwangul mu kwangul kwend.” (Mat. 9:37, 38) Yesu wayileja in kwilejend mutapu wa kuwanyish mudimu wau. Mazu mend malondwilaku am mamekesha anch mudimu udi wa kuswapej: “Ukupwishanyap mudimu wen mu misumb yawonsu ya in Isarel pakad Mwan a muntu kwez.”—Mat. 10:23.

² Nlel unou, kudi kand yom yivud ya kusal mu mudimu wa kulejan. Rusangu ruwamp ra Want afanyidin kurilejan kurutu disudiel dieza, ni chisu chiyil nakash! (Mar. 13:10) Mulong mangand mawiy madia mudi chir, tudi mu chirung chidia mudi cha Yesu ni in kwilejend, pakwez etu nlel chir chijimbin nakash. Anch twafanakesh uvud wa antu adia mu mangand niyetwetu, tukuman anch tudi akemp nakash, pakwez tufanyidin kwikal ni kashinsh anch Yehova ukutukwash. Rusangu Ruwamp ra Want akurilejan pa mangand mawonsu, ni pa chisu chitenchikinay Yehova, disudiel dikwez. Ov, tukutek Want wa Nzamb pa ndond ya kusambish mu mwom wetu chakwel tuwanyisha kamu mudimu wa kulejan? Ov, yom ik ya mu spiritu tufanyidina kwitekin mulong wa kuwanyish mudimu winou?

³ Mulong wa kulejan piur pa yom yitinay Yehova kudi atushalapol end ipanina, Yesu walonda anch: ‘Ufanyidin kumukat Yehova Nzamb wey ni muchim wey wawonsu ni mupim wey wawonsu ni manangu mey mawonsu ni usu wey wawonsu.’ (Mar. 12:30) Tufanyidin kumusadin Nzamb ni mupim wetu wawonsu. Chinech chirumburikin anch tufanyidin kwipan nakash ni kusal yom yivud mu mudimu wa Yehova. (2 Tim. 2:15) Muntu ni muntu pakach petu ukwet mutapu wa kusal yom kukwatijan ni mashakamin ni ukaliweny ukwetay. Shinshikin yom yimwing pakach pa yom yiney, ni tond yom ufanyidina kulondul mulong wa kuwanyish mudimu wey wa kulejan.

KUSAL MU CHIKUMANGEN MUDI MWIN KULEJAN

⁴ Antu awonsu itiyina uyakin akwet chisend cha kulejan rusangu ruwamp. Winou wawiy mudimu ujim wayishilay Yesu in kwilejend kusal. (Mat. 24:14; 28:19, 20) Nakash nakash, mwin kwilej wa Yesu ukat kusambish kuyilej antu akwau rusangu ruwamp kupwa kwendendiy kuritesh. Mwamu mwasalay Andare, Filip, Korney ni antu akwau. (Yoh. 1:40, 41, 43-45; Mid. 10:1, 2, 24; 16:14, 15, 25-34) Ov, chinech chirumburikin anch muntu ukutwish kuyilej antu akwau rusangu ruwamp kurutu amubatisha? Inge! Anch muntu wawanyish yom yitinau mulong wa kwikal mwin kulejan wakad kal kutambul dibatish mu chikumangen, ukutwish kulejan ku chikumbu ni chikumbu. Chikwau kand, kukwatijan ni usu ni mashakamin mend, ukutwish kwipan mu mitapu yikwau ya mudimu wa kulejan.

⁵ Anch mwin kulejan watambul dibatish, ufanyidin kusal usu wa kuyikwash antu akwau kutesh rusangu ruwamp. Amakundj nau amband, akwet chisend cha kusal mudimu wa kulejan. Akat kutuyukish anch twikasikesh kutwal yisakin ya Want kurutu ap anch tukwetap usu wa kusal yivud. Muntu mwawonsu ukutandurila mudimu wend wa kulejan kuwejaku ni mitapu yikwau ya mudimu ukwikal ni musangar.

KUSADIN KWI NDOND KUDIA MASWIR NAKASH

⁶ Pamwing ap teritwar wa chikumangen chen alejenamu kal nakash ni kupanamu uman uwanyidina. Anch chidi mwamu, ukutwish kuman anch chiwapin kutanduril mudimu wey anch waya kwi ndond yikwau kudia maswir nakash. (Mid. 16:9) Anch udi mukurump ap nkwash wa mudimu, ijik anch kukutwish kwikal chikumangen chikwau chikutwisha kusanger ukwash wey. Kalam wa munyingumuku ukutwish kukulej yom yimwing yikukukwasha kwijik mutapu wa kukwash chikumangen chikwau chidia mu munyingumuku wen. Anch ukatin kusadin ndond yindjing mwi ngand yen, biro wa mutiy ukukulej nsangu jikwau ja usey.

⁷ Ov, ukatin kusadin mwi ngand yindjing? Anch chidi mwamu, ufanyidin kushinshikin nakash pa mulong winou kurutu kwa kubuk. Ov, umenap anch chidi cha usey kwisamb nau amakurump a mu chikumangen chey? Kushemunik kwinoku mulong wa kuya ngand yindjing kukutwish kuswimp mashakamin mey ni ma antu ukuya nau. (Luka 14:28) Pakwez, anch waman anch ukulabap mwi ngand ukimbina kuya, chidi cha usey kusadin mu rejon wa ngand yey.

⁸ Mu jingand jimwing, akadivar asadidinau mudi atulam akutwish kwikal antu asu mu uyakin. Akadivar ikepishina, akat kuyilikin amakurump ija yom yivud adiokila ndond jikwau mulong wa kutakel. Chawiy anch udi mukurump ni ukwet kuswir kwa kuya mwi ngand mudi yiney, ijik anch chitongijok chey chidiap cha kusal pa ndond ya akadivar a kwinikwa. Pakwez, sal nau pamwing. Yikasikesha chakwel awanyisha yom yitinau ni itiya yisend mu chikumangen. (1 Tim. 3:1) Ikal mwin kwishimpish anch waman anch yom yimwing yisadikinap mudi muyikata kusadik mwi ngand yen. Mulong udi mukurump, sadin yom wija mulong wa kuyikwash amakurump a mu chikumangen chinech. Kupwa, anch waman anch ufanyidin kuchirik mwi ngand yen, amakurump a pol akutwish chad kwikal awanyidina kulam chikumangen.

⁹ Kurutu biro wa mutiy akutumina majin ma yikumangen ufanyidina kuya kukwash, Komite wa Mudimu wa Chikumangen chey ufanyidin kutum mukand wa kukwijikish nich. Mukand winou udi wa usey nakash ap anch udi mukurump wa chikumangen, nkwash wa mudimu, chibol, ap mwin kulejan. Komite wa Mudimu ukutum mukand winou wa kwijikish nich pamwing ni fomu ku biro wa mutiy wa ngand uswiridina kuya kusadin.

KULEJAN MU DIZU DIKWAU

¹⁰ Mulong wa kutanduril mudimu wey wa kulejan, ukutwish kwilej dizu dikwau, kuwejaku ni dizu dia yijingidij (dia atumam). Anch ukwet chitongijok cha kwilej dizu mulong wa kulejan mu dizu dikwau, chidi cha usey kwambamb nau amakurump ap ni kalam wa munyingumuku. Akutwish kukulej yom yimwing ni kukukasikesh kamu. Kusutin umutakel wa biro wa mutiy, minyingumuku yimwing yikat kurijek mulong wa kuyifundish in kulejan nau ayibol awanyidina chakwel alejana mu dizu dikwau.

MUDIMU WA UCHIBOL

¹¹ In kulejan awonsu afanyidin kwijik yom yitinau mulong wa kwikal chibol nkwash, wa rawonsu, ap wa pakampwil, mudi mitapu yikwau ya mudimu wa chisu chawonsu. Chibol ufanyidin kwikal mwin Kristu wabatishinau kal ukweta chilakej chiwamp, ni mashakamin mend mamukwashin kulejan rusangu ruwamp ngond ni ngond mulong wa kuwanyish asaa itinau. Komite wa mudimu wa Chikumangen ndiy ukata kwitiy anch muntu ikala chibol nkwash ap wa rawonsu, pakwez biro wa mutiy ndiy ukata kutek ayibol a pakampwil.

¹² Ayibol ankwash akutwish kusal mwi ngond umwing ap mwa angond alondulijadina, ap angond avud kukwatijan ni mashakamin mau. In kulejan avud a Want akat kusalang yisu yivud mudimu wa uchibol nkwash, mudi chirung cha Chivurikish ap ngond wa kwendin kwa kalam wa munyingumuku. Amwing akat kutond kusal mwamu angond a kupim. In kulejan atambwila kal dibatish achidia ku shikol akutwish kusal mudimu wa uchibol nkwash chisu cha konje. In kulejan akutwish kutond kusal uchibol nkwash wa asaa akemp itinau Ngond wa 3 ni wa 4 ap kand chisu cha kwendin kwa kalam wa munyingumuku. Chikalap nchik mashakamin mey, anch ukwet yaku ni mikadil yiwamp, ni ukutwish kwirijek mulong wa kuwanyish asaa itinau, ni anch umen anch ukutwish kwikal chibol nkwash mwi ngond umwing ni kusut, amakurump akusanger kushinshikin kwit kwey mulong wa mudimu winou.

¹³ Mulong wa kwikal chibol wa rawonsu, ufanyidin kwikal ni mutapu wa kuwanyish uvud wa asaa uyitinau ayibol a rawonsu pa muvu. Mulong udi chibol wa rawonsu, ufanyidin kusal mu kwovijan ni chikumangen chen. Ayibol akweta mushiku ading chiyukish mu chikumangen, akat kuyikasikesh antu akwau kusanger mudimu wa kulejan ni kuyikasikesh kand kwikal niyau ayibol. Kurutu wikala chibol wa rawonsu, ufanyidin kwikal mwin kulejan wa chilakej chiwamp ni mwin Kristu wabatishinau kal pasut kal angond musamban.

¹⁴ Ayibol a pakampwil akat kuyitondang yisu yivud pakach pa ayibol a rawonsu akweta yibudikin yiwamp mu mudimu wa kulejan. Afanyidin kwikal ni mutapu wa kusal kwi ndond kwawonsu kukuyitumau kudi biro wa mutiy. Yisu yivud akat kuyitumang kwi ndond kulemp kwakad in kulejan, kukutwishau kusambish yikumangen yisu. Yisu yimwing, akat kuyitumang ayibol a pakampwil mu yikumangen mudia in kulejan akweta kuswir kwa kulejan mu teritwar wau wakabuj. Ayibol a pakampwil amwing adia amakurump akat kuyitumang mulong wa kukwash yikumangen yikemp yikemp, ap anch yikumangen yiney yikwetap kamu kuswir kwa pakampwil kwa in kulejan avud. Akat kuyinkang ayibol a pakampwil nfalang jikemp mulong wa kuwanyish maswir mau. Ayibol amwing a pakampwil akat kuyisadinang mu chisu kanang.

MUDIMU WA UMISHONER

¹⁵ Komite wa Mudimu wa Chisak Chitakedila ndiy ukata kutond amishoner, kupwa Komite wa Biro wa mutiy ukat kuyitum mulong wa kusadin mu jindond mudia antu avud nakash. Akat kusal yom yivud mulong wa kukwash ni kukasikesh mudimu wa kulejan ni midimu yikwau ya chikumangen. Yisu yivud, amishoner atuminau mu materitwar akat kuyifumb ku Shikol ya in Kulejan a Want ap ku Shikol ya Bibil ya Gilead. Akat kuyinkish ndond ya kulal ni nfalang jikemp mulong wa kuwanyish maswir mau.

MUDIMU WA MUNYINGUMUKU

¹⁶ Amakundj akatau kutond kudi Chisak Chitakedila mulong wa kwikal atulam a minyingumuku, chakusambish akat kuyifumb chakwel ikala ni ukaliweny mu kusal mudi atulam a munyingumuku ankwash. Amakundj inay akatining mudimu wa kulejan ni akadivar nau. Adi ayibol akweta mushiku, in kwilej atakamena a Bibil, in kusal madiskur nawamp ni alej akash. Akat kumekesh dibuj dia spiritu, adi isikena, akat kwitiy yitongijok ya antu akwau ni akwet nkeu. Anch kalam wa munyingumuku ukwet mband, mukajend udia chibol udi chilakej chiwamp mu yaku yend ni wovijadina nawamp nau antu akwau. Udi mwi kulejan wa mushiku. Ufanyidin kwikal mband mwin Kristu uziyidina, kafanyidinap kulond pa ndond ya nfumwend ap kuyikel mambamb. Atulam a munyingumuku ni akajau akweting program wa yom yivud ya kusal, chawiy antu awonsu akimbina kusal mudimu winou afanyidin kwikal ni ukash wa mujimbu uwamp. Ayibol kafanyidinap kumufundin kalam wa munyingumuku mukand mulong niyau ikala atulam a munyingumuku. Pakwez, akutwish kwijikish maswir mau ma kusal mudimu winou kudiay kalam wa munyingumuku, ukutwisha kuyinkish jinsangu kanang ja usey.

MASHIKOL MA UTEOKRAS

¹⁷ Shikol ya in Kulejan a Want: Kudi maswir nakash ma in kulejan a Want mulong wa kulejan mu materitwar makadau kal kulejan nakash ni mulong wa kukasikesh yikumangen. Chawiy, akadivar ajich, anambaz ajich ni ambay a uruw akat kuyifumb ku Shikol ya in Kulejan a Want. Kupwa kwa kwilej, akat kuyitum mudi ayibol a rawonsu kwi ndond kudia maswir nakash mwi ngand yau. Pakwez, in kwilej akwipana ni ishadidina akutwish kuyinkish yisend yikwau mwi ngand yau ap mwi ngand yindjing. Akemp akutwish kuyitum mudi ayibol a pakampwil mu chisu kanang ap a rawonsu. Ayibol akatina kwilej ku shikol yiney akutwish kwijik yom yitinau mulong wa kuya ku shikol yiney pa kukumangan ku chikumangan chikata kusadik ku chitentam cha rejon.

¹⁸ Shikol ya Bibil ya Gilead: Akadivar ni anambaz ajich ni ambay a uruw atondinau mulong wa shikol yiney afanyidin kwijik Inglish ni asadina mudi ayibol a pakampwil, amishoner, atulam a munyingumuku ap antu a ku Betel. Afanyidin kwikal ni ukaliweny wa kukasikesh nakash mudimu wa kulejan mu teritwar ap ku biro wa mutiy. Adi antu amekeshina kal anch asangaredin kuyisadin akadivar nau ni kuyikwash antu akwau mu mutapu uwamp wa kwilej ni kwitiy umutakel wa Bibil ni wa uteokras. Komite wa biro wa Mutiy wa ngand ndiy ukata kuyitumin in kwilej akweta ukaliweny fomu mulong amwizwisha chakwel ayitazuka ku shikol yiney. Kupwa kwa shikol yiney akat kuyitum mu mudimu wa kulejan ap ku biro wa mutiy wa ngand yindjing ap wa ngand yau.

MUDIMU WA BETEL

¹⁹ Kusadin ku Betel chidi chisend cha pakampwil. Dijin Betel dirumburikin anch “Chikumbu cha Nzamb,” ni kutazuk kwinoku kuwanyidin kamu mulong yidi ndond yikata kusadikinang midimu ya uteokras. Akadivar ni anambaz asadina ku Betel akat kusal mudimu wa usu mulong wa kukarumun, kubudish ni kupalangesh mikand yimedina pa Bibil. Mudimu wau ukwet usey nakash ku Chisak Chitakedila, chikata kupan umutakel ku yikumangen ya pa mangand mawonsu. Antu avud a ku Betel adia in kukarumun ashich ni asadidin mu teritwar wa mutiy mulondinau dizu dikarumwinau. Chinech chiyikwashin kutesh dichuku diawonsu dizu dilondinau. Akutwish kand kujingunin mutapu uteshinau antu yom yifundinau mu mikand yikarumwinau.

²⁰ Midimu yivud yisadinau ku Betel yitin kwikal ni usu uwanyididina. Pa mulong winou, akat kutazuk akadivar ipanina kal ni abatishinau kal achidia ansand, akweta ukash wa mujimbu uwamp ni akweta usu. Anch kudi maswir ma antu akimbina kusal ku betel utakedina mudimu mwi ngand yen, ukutwish kwijik yom yitinau anch wakumangan ku chikumangan mulong wa antu akatina mudimu wa Betel chikata kusadik ku yitentam ya rejon. Ukutwish kand kumwipul kalam wa munyingumuku piur pa mudimu wa Betel.

MUDIMU WA KUTUNG

²¹ Mudimu wa kutung yom kushalijan ya uteokras udi mudimu utumbila, mudi mwading mudimu wa kutung kwa tempel wa Salomon. (1 Ant 8:13-18) Akadivar ni anambaz avud akat kumekesh mushiku ukash mu kupan chisu ni yom yau ya usey mulong wa kukwash mudimu wa kutung.

²² Ov, mashakamin mey makushidin chisu cha kukwash mudimu wa kutung? Anch udi mwin kulejan wabatishinau kal ni ukatin kukwash mudimu wa kutung, akadivar imedina mudimu wa kutung mwi ngand yen akusanger ukwash wey ni akusal usu wa kukufumb anch wijap yom yivud. Ukutwish kuyijikish amakurump anch wishadidin mulong wa kukwash. In kulejan amwing abatishinau kal awanyishina yom yitinau akutwish kuya mulong wa kutung ktung yom ya kushalijan ya uteokras mu jingand jikwau.

²³ Kudi mitapu yivud ya kukwash mudimu wa kutung. In kulejan abatishinau kal adia chilakej chiwamp ni akweta ukaliweny kanang, akutwish kukwash midimu ya kutung yisadinau piswimp ni kwol kwau mudi in Kutung Ipanina a Pol. Akwau akutwish kukwash midimu ya kutung yisadinau kulemp mu chisu kanang ni akat kuyitond kudi biro wa mutiy mulong wa kusal mudi in kutung ipanina mulong wa mbing jaad kushik ni angond asatu. Pakwez antu atondinau mulong wa kusal chisu chilemp ayitazukin anch atushalapol in kutung. Atushalapol in kutung akweta chisend cha kusadin mwi ngand yindjing ayitazukin anch atushalapol in kutung angendj. Chisak cha in Kutung chikwet atushalapol in kutung ni in kutung ipanina. Chisak chinech chikat kutakel mudimu wa kutung ni achikwashin kudi in kutung ipanina a pol ni kudi akadivar nau anambaz akatina kukwash mudimu winou. Chisak chinech chikat kushemunik ni kuya ndond yikwau ya teritwar wa biro wa mutiy wa ngand.

YOM IK YA MU SPIRITU UTONGINA KUSAL?

²⁴ Anch wipanin kal kudi Yehova, rusot rey ridi ra kumusadin Yehova chikupu. Pakwez yom ik ya mu spiritu utongina kusal? Kwikal ni yom ya mu spiritu ufanyidina kusal kukukukwash kusadin usu ni mapit mey kwa manangu. (1 Kor. 9:26) Kwitekin yom mudi yiney kukat kumukwash muntu kupam mu spiritu ni kudandamen kutongin pa yom yidia ya usey nakash ni kusal usu wa kwikal ni yisend ya mudimu.—Fil. 1:10; 1 Tim. 4:15, 16.

²⁵ Kambuy Paul watushila chilakej chiwamp tufanyidina kulondul mu mudimu wa Nzamb. (1 Kor. 11:1) Paul wikasikesha nakash kusal mudimu wa Yehova. Wajingunina anch Yehova ndiy wamukwasha kusal mwamu. Paul wayifundina akadivar a ku Korint anch: “Angazuridil chis chijim chakwel am nisala mudimu ukash.” Ov, niyetu tukutwishap kulond mudi Paul? Inge, tukwet mitapu yivud ya kumusadin Yehova pamwing ni chikumangen, nakash nakash mu mudimu wa kulejan rusangu ruwamp ra Want. Pakwez, mudi Paul, mulong wa kwandamin ku “chisu chijim” chitin kurish nau “akankuny avud.” (1 Kor. 16:9) Paul wasala usu wa kwikand amwinend. Walonda anch: ‘Nikat kumesh mujimbu wam mar ni kuutek mu usuk.’ (1 Kor. 9:24-27) Ov, tukat niyetu kutong mudi Paul?

²⁶ Muntu ni muntu ufanyidin kwikasikesh mulong wa kuwanyish yom ya mu spiritu kukwatijan ni mashakamin mend. Antu avud ipanina mu mudimu wa chisu chawonsu nlel, asadin mwamu mulong asambela kwitekin kurutu nakash yom ya mu spiritu ya kusal. Chisu chadingau an akemp, ayikasikesha kudi anvajau ni kudi akadivar nau anambaz kwitekin yom ya mu spiritu yifanyidinau kusal. Chawiy, asangera yiyukish yivud mu mudimu wa Yehova—pakad kwinan. (Jinsw. 10:22) Yom yikwau ya mu spiritu ukutwisha kwitekin yikutwish kwikal ya kusal mudimu wa kulejan rubing ni rubing, kusambish ni kutakel malejan ma Bibil ap kwitekin chisu chivud mulong wa kurijek yikumangan. Chom cha usey chidi kushal iminya dang ni akweta yivud ya kusal mu mudimu wa kulejan. Anch twasal mwamu, tukumutumbish Yehova ni tukuwanyish mupak wetu ujim nakash, charumburik anch kumusadin ndiy chikupu.—Luka 13:24; 1 Tim. 4:7b, 8.