Ansand—Ov Yom ik Ukusalanya Nich Mwom Wen?

“NISOTIN kutan ukwash upandakena kuwap mu mwom.” Mwamu mwalonday changadim umwing wa mivu dikum. Chakin anch niyey udi mwom wa mutapu umwing usotininga. Ov mutapu ik lel ukutwisha kutan “ukwash upandakena kuwap” mu mwom? Yisaj ya kupalangeshin jinsangu ni arund ney, chisu chimwing ap alej ey, akutwish kulond anch mwom wa mutapu winou utwishikin nich kwikal ni nfalang jivud ni mudimu kampand wa katumb—kwikal muntu wijikena nakash mulong wa yiusadila!

Pakwez, Baibel, uyibabeshin ansand anch kulondul kupandikena kwa yom ya ku mujimbu chidi kwau chom chamwamu chidi mud “kumulondul rinkind.” (Mulej 4:4) Chidi mulong, ansand akemp kusu awiy akata kushiken ku kwikal nich mapit ni katumb. Antu akata kushiken ku kwikal nich mapit ni katumb chisu chivud akat kushikenang ayinau ku kuman mar nakash. Nsand umwing mwin Angleterre wadinga ni kulondul katumb ka shikol ya iniversite walonda anch, “kupandakan kwa mu yom ya mujimbu kudi mud mushet wakad chom. Anch watal yibudikin, mwikil chom ap chimwing.” Chakin, mudimu wa ku mujimbu ukutwish chisu chimwing kulet dipit ni kwijikan. Pakwez ukutwishap kuwanyish ‘maswir mey ma muspiritu.’ (Mateu 5:3) Chikwau kand, 1 Yohan 2:17 upanin kubabesh anch “mangand mayil ni kujiy.” Ap anch watwish kutan kupandakan mu mangand minam, kukwikal kwa chisu chikemp kusu.

Mulej 12:1 uyikasikeshin ansand anch: “Vurik Sakatang wey chisu uchidia nsand.” (New World Translation) Mwawiy, mutapu upandakena kuwap wa kusadil mwom wey udi kuusadil mu mudimu wa Yehova Nzamb. Pakwez cha kusambish, ufanyidin kuwanyish yitinau chakwel kwikal mu mudimu wa Nzamb. Ov mutapu ik ukutwisha kusal mwamu? Ov chom ik chitina mu mwom wa mudimu wa Nzamb?

Kuwanyish Yitinau Chakwel Kwikal Kaman wa Yehova

Cha kusambish, ufanyidin kukudish impu ya kumusadil Nzamb—ni impu yiney yikutwishap kwez kapamp kamwing bwat, ap anch anvaj ey adi in Kristu. Ufanyidin kwikal nich urund nenday Yehova. Changadim umwing ukweta chimbu cha mivu dikum ni kusut walonda anch: “Kulembil kukutwish kukukwash kwikal nich urund nenday Yehova.”—Kuseng 62:8; Jakobu 4:8.

Rom 12:2 wisambidin rizau rikwau ufanyidina kusadil. Ulondil anch: ‘Ijikany yiwapila ni yitiyikina ni yiwanyidina ku rusot ra Nzamb.’ Ov kand kal wiyipulap piur pa yom yimwing yakufundishau? Chawiy lel londul dikasikesh dia Baibel,  ni ‘ijik amwiney’ anch yom yiney yidi yakin! Kimbijol amwiney. Tang Baibel ni mikand yengamidina pa Baibel. Kwilej piur pa Nzamb kudiap kwau chisal chamwamu cha kusadil manangu mulong, wa kushinshikin uman. Itekina chisu cha kutongijokin yiutangina chakwel yishala dang mu muchim wey. Chinech chikez kujimbish rukat rey mulong wa Nzamb.—Kuseng 1:2, 3.

Cha kaad, pakish kwisambin yiwilejina pamwing ni antu akwau, pamwing ap ni arund ney a shikol. Kulejan ku chikumbu ni chikumbu ridi rizau rilondwilaku. Ukutwish kusankanijan ni murund ney wa shikol piuyila ni kulejan, ni chinech chikutwish pa kusambish kukovish kuyip. Pakwez Baibel utukasikeshin kulik ‘kwov usany mulong wa rusangu ruwamp.’ (Rom 1:16) Uletin uruu umwing wa mwom ni wa ruchingej! Ov mulong wak kwov usany mulong wa uruu winou?

Katat, anch anvaj ey adi in Kristu, chitwishikin anch wayitwalap kal mu mudimu winou wa kulejan. Ov ukutwish kusal yivud kupandakanamu kusu kwiman ku chis zoong ap kusu kupan kwau magazet ni matrakt? Ov ukutwish kulond amwiney ku chikumbu, nich kusadil Baibel chakwel kumufundish muntu wisambinany nend? Anch bwat, kimb ukwash kanang kud anvaj ey ap kud chid chimwing cha chikumangen chakudila kal. Chisala chikala rutong rey kuwanyish yitinau chakwel kwikal mwin kulejan wa rusangu ruwamp wakad kubabatishiu!

Mu kusut kwa chisu, chikez kukubachik kwipan—kwipan kud Nzamb anch ukez kumusadil ndiy kusambish kamu katat ni chikupu. (Rom 12:1) Pakwez, kwipan kudiap kwau mulong wa chamwamu wa muntu pa rend. Nzamb uyitin antu awonsu “kulond ku kan patok kudi antu.” (Rom 10:10) Pa chisu cha dibabatish, ukusambel bil kulond patok ya ritiy rey. Kupwa chad kubabatishiu kwa mu mem kukulondul. (Mateu 28:19, 20) Chidi chakin anch, dibabatish didi rizau rimwing ra usey nakash. Pakwez kangal wachirikin kwinyim mulong wa kutong anch ukutwish kukangany mwi njil yimwing ap yikwau. Anch wengamidin padi Nzamb mulong wa kukwinkish usu, ndiy ukez kukwinkish “ukash upandakena ukash wawonsu” chakwel kukukwash kujijaman.—2 Korint 4:7; 1 Pita 5:10

Pa chisu ukutambula dibabatish, ukwikal Kaman wa Yehova. (Isay 43:10, NW) Chinech chikutwish kwikal nich usu ukash pa mutapu ukeza kusadil mwom wey. Kwipan kurumburikin kand ‘kwidiul amwiney.’ (Mateu 16:24) Ukutwish kuvuramen jintong jey jimwing, maswir mey ni kusambish ‘kukimb bil want wa Nzamb.’ (Mateu 6:33) Kwipan ni dibabatish yikat kupan lel mitapu yivud ya kusal mwamu. Likany tushinshikinap mitapu yimwing.

Mitapu ya Kumusadil Nzamb Chisu Chawonsu

● Kusal mudimu wa uchibol udi umwing wa mitapu yiney ya kumusadil Nzamb chisu chawonsu. Ntwarubil udia chibol udi mwin Kristu wababatishinau kal ukweta chilikej chiwamp wirijekina chakwel kusutish uvud wa asaa 70 ngond ni ngond mu kulejan rusangu ruwamp. Kusutish chisu chivud mu mudimu wa chingand kukez kukukwash kukudish ukaliweny wey wa kulejan ni wa kufundish. Ayibol avud amana musangar wa kuyikwash antu ilejinau nau Baibel kwikal Atuman in kubabatishiu. Ov mudimu ik wa ku mujimbu ukutwisha kwikal usangareshina ni uwamp nakash?

 Chakwel kufutin yikwetau nich kuswir,  ayibol avud akweting midimu ya ku mujimbu ya chisu chiwanyidina. Avud akat kwitenchik kurutu kwa chisu mulong wa chisend chinech nich kwilej mudimu wa makas ku shikol ap kud anvajau. Anch ey ni anvajey umenany anch chikez kwikal cha ukwash kud ey kusambish kand kwilej shikol yikwau anch wapwish shikol yey ya kaad (secondaire), shinshikin kamu chikubachikina kusal mwamu, chidiap mulong wa kwiruzukin nfalang jivud, pakwez chidi mulong wa kukwatikesh mudimu wey wa kulejan ni pamwing ap kusadil mu mudimu wa chisu chawonsu.

 Pakwez, diloz dia kusambish dia mwom wa chibol, didiap mudimu wend wa ku mujimbu, pakwez udi mudimu wend wa chingand—wa kuyikwash antu akwau kuman mwom! Ov mulong wak kulik kwitekin diloz dia kusal mudimu wa uchibol? Chisu chivud kusal mudimu wa uchibol kukat kutwalang ku yisend yikwau. Chilikej, ayibol amwing akat kusokin kwi ndond kudia kuswir kujim kwa in kulejan a Want. Akwau akat kwilej rudim ra wingendj ni kusadil kand ap nich chikumangen cha rudim ra wingendj chidia pa ndond yishichau ap kand kuya ni kusadil mwi ngand ya wingendj. Mwawiy, kusal mudimu wa uchibol yidi njil yimwing yipitishina mu mwom!

● Kusal mudimu wa umishoner yidi njil yikwau ya mutapu wa kumusadil Nzamb chisu chawonsu. Kudiosh kamu mu muvu wa 1943 Shikol ya Gilead ya Kwilej Baibel ya Watchtower yabudishin kal ayibol awanyishinau nich mafundish mamwing mawamp ma kwiyijidish kusal mudimu wa umishoner. In kutambul madiplom akat kutambul mudimu wa kusadil mud in kulejan a chisu chawonsu mwi ngand ja wingendj. Mwi ngand jivud, mikadil ya mwom yidi yikash nakash, chawiy lel ukash wa mujimbu uwamp ni usu wa mujimbu yawiy yidia ya usey mulong wa kusal mudimu wa umishoner. Chikalap nchik mwamu, amishoner akwet mwom umwing wa musangar, ni usangareshina.

● Shikol ya Mafundish ma Mudimu ayitenchika mulong wa kuyifundish nawamp amakurump ni ankwash’a mudimu achidia ajich. Mu ambing chinan a malejan ma yom yivud muding mitu ya milong mud yisend ya amakurump ni ankwash’a mudimu, dirijek ni mutapu wa kulond kurutu kwa antu avud. Amwing akat kuyitum kusadil mwi ngand yakwolikwau. Akwau akat kuyit kusadil mwi ngand yindjing.

● Mudimu wa Betel witin kusadil mud mwin kwikatin ku umwing wa mitiy ya Atuman’a Yehova. Yid yimwing ya dijuku dia Betel yikat kusadil kapamp kamwing mu mudimu wa kubudish mikand ya pa dishin dia Baibel. Akwau akat kupan ukwash ku mudimu wa kubudish mikand, mud kurijek kwa yikumbu ni yom ya mudimu ap maswir ma ku mujimbu ma dijuku dia Betel. Midimu yiney yawonsu yidi yisend yitumbila ya mudimu wa Yehova. Chikwau kand, antu adia ku Betel akwet musangar wa kwijik anch chom chin chawonsu chisadilau, chikat kuyikwash nakash akadivar avud mu mangand mawonsu.

 Yisu yimwing akat kuyitazukang akadivar akweta ukaliweny wa pakampwil kwez ni kusadil ku Betel. Pakwez, avud pakach pau, akat kutambulang diyiy kupwa kwa kushik ku Betel. Antu inay adia ku Betel kakatap kusadil mulong wa mapit ma yom ya ku mujimbu pakwez akat kusanger nich yirijek yitekinau mulong wa yakudia, kulal ni ka ukwash kakemp ka nfalang mulong wa kuland yikwetau nich kuswir. Nsand umwing chid cha dijuku dia Betel urumburil mudimu wend mu mutapu unou: “Chidi cha kushimok nakash! Program kaswapelap bwat, pakwez natambula yiyukish yivud nakash ya kusadil kunoku.”

● Mudimu wa mangand mawonsu ukat kumutwishish muntu kusadil mu mudimu wa kutung yikumbu ya mitiy ni Yot ya Want. In kusal mudimu wa mangand mawonsu, mud muyitazukiningau, akat kuya mwi ngand ja wingendj mulong wa kukwash mu mudimu winou wa kutung. Winou udi mulad wa mudimu utumbila, mud mudimu wa antu atunga tempel wa Salomon. (1 Ant 8:13-18, NW) Yitenchik mulong wa kuyilam in kusal mudimu wa mangand mawonsu yidi chilik chimwing nich ya dijuku dia Betel. Chidi chisend mud ik chikwetau akadivar ni anambaz inay cha kusadil mu mulad winou wa mudimu mulong wa kumushiman Yehova!

Musadila Yehova Nich Mupim Wey Wawonsu

Kumusadil Yehova yidi njil yimwing yipandakena kuwap ya kusadil mwom wey. Ov mulong wak kulik kushinshikin rutong rey ra kumusadil Nzamb chisu chawonsu? Ambambinany piur pa mudimu wa chisu chawonsu ni anvaj ey, amakurump a chikumangen chen ni kalam wa munyimuku. Anch usotin kuya ku Betel, Gilead ap Shikol ya Mafundish ma Mudimu, kumangan ku yikumangan mulong chitwishikin utambula mafomu makatau kulet ku yikumangan ya munyimuku ni yikunguril ya distrik.

Chidi chakin anch, kadiap awonsu akutwisha kuwanyish yitinau chakwel kutwish kusal mudimu wa chisu chawonsu. Yisu yimwing yikokujol ya ukash wa mujimbu, mikadil yikash ya mutapu wa kuman nfalang ni yisend ya dijuku yikat kutek mimbu ku yikutwishay muntu kusal. Pakwez, in Kristu awonsu ipanina afanyidin kuta matu ku chijil cha Baibel: “Mukata Yehova Nzamb wey nich muchim wey wawonsu, ni mupim wey wawonsu, ni manangu mey mawonsu.” (Mateu 22:37) Yehova witin anch usala chipandakena kuwap mud kamu mukutwishishina mikadil yey kusal. Chawiy lel yikalap nchik mwikadil wey, sal kumusadil Yehova kwikala chom cha kusambish mu mwom wey. Itekina jintong ja kashinsh mu mudimu wa Nzamb. Mwawiy, “Vurik Sakatang wey chisu uchidia nsand”—ni ukez kuyukishiu chikupu mulong wa kusal mwamu!