Ov Ukutwish Kwikal Tayad Mulong wa Kusadil?
1 Mu muvu wa 778 K.C.C. kwamekana chinship chimwing chishimokishina. Muprofet Isay, wamana mu chishimushimu “Yehova, ushich pa nkwas ya piur ni yizambukina.” Isay watesha lel aserafim akat kutwa rubil ni kupwitin yitongijok ku uyaj wa Yehova, end alond anch: “Utumbila, utumbila, utumbila udi Yehova wa yisak.” Chadinga cha kushimokish mud ik! Pa chinech, Yehova wipwil chipul chikash anch: “Ov nany nikeza kutum, ni nany ukeza kuya pa ndond yetu?” Karumburilap mulad wa mudimu ap yikezay kutambul muntu ukeza kwipan kusal mudimu winou. Pakwez, pakad ap kwidjidjek, Isay wakwil anch: “Yam unou! Ntumany.”—Isa. 6:1, 3, 8, NW.
2 Spiritu winou wa kwipan kusal chom chawonsu chitinay Yehova chidi chijingidij cha antwend. (Kus. 110:3) Ni katat kudi kand rubil ra pakampwil kud antu akutwisha kwikal tayad mulong wa kusadil. Ov udi tayad kwitiy nich spiritu wa kwipan, mud wadingay nich Isay?
3 Kud kuswir kuyila mu kwiwejinaku kwa akadivar chakwel kusadil ku Betel. Chinech chitin ku mutambu wau kwikal ni kuswir kujim kwa kutek pa ndond ya kusambish yisakin ya Want ni kusot kusal yawonsu yikutwishau kuyit mulong wa kukwatikesh mudimu wa kulejan wa mangand mawonsu. (Mat. 6:33) Chawiy lel, kusadil mud chid cha dijuku dia Betel kukat kumwinkish muntu mutapu umwing wa pakampwil wa kumusadil Yehova nich mupim wend wawonsu. Mwi njil ik?
4 Mudimu Ukatau Kusal ku Betel: Tonginap bil midimu yawonsu yikatau kusal chisu ni chisu mu yikumbu yisatu yijim ya Betel yidia mu États-Unis, ku Brooklyn, ku Patterson, ni ku Wallkill, New York. Akadivar nau anambaz 5 730 asadila dijuku dia Betel mu jindond jinej jisatu akwet chisend cha kwikal kamu piswimp mu kukwatikesh chisak cha kashalapol wakin ukweta manangu ni Chisak chend Chitakedila midimu ya Atuman mu kubudish kwa Mabaibel ni mikand yengamidina pa Baibel mulong wa kuyisadil mu mudimu wa chingand mu mangand mawonsu ni mu dilejan dia muntu ipend. (Mat. 24:45) Chilikej, muvu wa mudimu wasutina ou, abudishin ni kutum mud chibudikin cha usu ukunginau pamwing wa dijuku dia Betel dia États-Unis, abuku 24 346 670, abuku akemp akemp ni mabroshir 39 813 464, magazet 270 528 000, ni maband kaset 1 271 041. Akat kusal usu wa kashinsh chakwel kukimb ni kutond “mazu masangareshina ni mutapu wa kufund salal mazu ma uyakin” mulong wa mikand yiney. (Mul. 12:9, 10, NW) Akat kand kuyitakel in kukarumun 1 900 ni kusut mu mangand mawonsu akata kukwash kukarumun mikand mu jindim 300 ni kusut. Kudi yom yivud yisadilau chakwel kutakel mudimu uwanyishinau mu mitiy 111 mu mangand mawonsu, kuwejinaku ni yikumangen yivud kusut 11 500 yidia mu États-Unis. Kudi kand ukwash upaninau ku mitiy mu ukaliweny wa kutung yikumbu ya kushakam ya Betel ni Yot ya Yikunguril ni katat kudi kand kuswir kwa Yot ya Want 15 248 mu mangand makweta dipit dikemp. Tukwet kuswir kwa yitot ya in kwipan kusal mudimu wa kwikatin chakwel kusadil ku kuchap mikand (mudimu wa kuchap) ni kutum mikand, kukomb, kurijek yom ya kusal nich mudimu, kwisuk yakudia, kuland yom, kulam ukash wa mujimbu (amingang), ni midimu yikwau yivud yisadiningau ku Betel.
5 Kusal mudimu winou wawonsu kwitin kand usu pakwez udi mudimu wa muspiritu usangareshina. Kwijik anch tukat kusadil usu wetu wawonsu ni ukash wetu mulong wa kukwatikesh mujikit wa kulejan ni kufundish kukat kuletang musangar ujim nakash. Mujikit wa Betel utukwashin kamu kwijik nawamp dirijek dia Yehova mu yom yivud nakash. Akat kutuvurish anch mwin kuseng wayikasikeshina in Isarel konganyin nawamp kamu chishin cha umutakel wa uteokras pa divu diawonsu mu chirung chau.—Kus. 48:12, 13.
6 Yiyukish ya Mudimu wa Betel: Ov mutapu ik umeningau in kusadil ku Betel yisend yau ya mudimu? Shinshikin kushimunin kulondwila oku kwa ansand nau amapal adia yid ya dijuku dia Betel. Nambaz umwing chid cha dijuku dia Betel witapila dilau dia kusal mivu yisatu mu mudimu wa Betel ushimunin anch: “Kwikal ku Betel kwakasikesha urund wam nend Yehova. Mu chilik nisadidila kunoku nikat kwilej mutapu ukata kusal Betel, Betel ukat kwinfundish yivud piur pa untu wa Yehova. Mudimu wa Betel wanfungwil kand mes chakwel kuman anch Yehova ukat kuyisadil antu—antu a mitapu yawonsu. Ni ufanyidinap kwikal uwanyidina chakwel kwikal witiyikina kud ndiy.”
7 Mukadivar umwing nsand uvurikin anch: “Nivurikin pinadia ni kutongang amwinam, ‘Chikez kwikal chom chiwamp mud ik kwandam mu mangand masu ni kuyishimunin amakundj ashinshamena a pakur anch nasadila mivu yivud ku Betel, nasadilap mulong wa kupit nfalang.’ ”
8 Mukadivar nsand utongidin pa kwiyijidish (kufumb) kwa mudimu kwatambwilay anch: “Kwilej piur pam amwinam ni yinifanyidina kusal ni kuyikudish ngikadil yiney kwikadil chiyukish chimwing chijim. Niyovin katat anch nikutwish kamu kumusadil Yehova nawamp. Nimen anch nidiaku bil mwin kushimpish muchim, nikwetaku kwilam, ni nikutwish kumekesh rukat mu chilik chijim.”
9 Nambaz umwing ukat kutongin yiyukish yatambulay djat ni katat: “Maprogram ma muspiritu ma kunoku manfundishin yivud piur pa Yehova ni mutapu nikutwisha kumwilikej nawamp kamu mu chitongijok, chovil, ni yisalijok. Ni chakwel kwilej kukat kuya kurutu, chidi kamu chiyukish chidandamedina.”
10 Mukadivar umwing wasutisha kal mivu 59 mu mudimu wa chisu chawonsu, mu mivu yiney wasalamu mivu 43 ku Betel, walonda anch: “Betel kadiap mud kuvan wa amwimpel bwat, mud chikutwishau kutong antu amwing. Tukat kuwanyishang yom yivud mulong wa mulad wetu wa mwom ukweta program. . . . Kand kal kwikalap dichuku ap dimwing dinasalap kal mudimu ni kuburen kusanger chom nadinga ni kusal. Ov mulong wak? Mulong anch twipan nich mupim wetu wawonsu kud Yehova, tukwet musangar wa kwijik anch ‘twasadil kusu chom twatwishina kusal’ ”—Luka 17:10.
11 Mukadivar mukwau, wasadila ku Betel mivu 62, walonda anch: “Nitiyin chakin anch Betel yidi ndond yimwing kusu yipandakena kuwap pa divu kushakam chakwel kuchingel kwez kwa Paradis. Nikatap kwinan ap pakemp mulong wa kusal mudimu wa chisu chawonsu kwikal mudimu wa mwom wam wawonsu. Udi musangar mud ik kwinungin ku kukul kwa dirijek dia Yehova dia pa divu! Chidi chiyul cham, nich ukwash wa Yehova, kudandamen kusal Betel kwikal chikumbu cham ni kusadil mwom wam wawonsu mulong wa kuyish kurutu yisakin ya Want.”
12 Yid yiney ya dijuku dia Betel yilejen yikemp kusu ya mu yiyukish yivud yiukutwisha kusanger anch udi tayad mulong wa mudimu wa Betel. Chawiy lel mud chidia chakin pa kutambul chisend ap chisu cha mudimu, ufanyidin bil kuwanyish yitinau. Ov yom ik yimwing yitinau chakwel kusadil mud chid cha dijuku dia Betel?
13 Yitinau Chakwel Kusadil ku Betel: Yitinau kud antu asotina kusadil ku Betel ayilejen mu kamushet. Chikwau kand, chidi cha usey anch ikala in kusot kusal mudimu nakash pakad usweral, akad kwikal in “kukat yom ya kwisangarish.” (2 Tim. 3:4; 1 Kor. 13:11) Yid ya dijuku dia Betel yifanyidin kwikal amakundj nau amband akash muspiritu akudishina kal yaku yiwamp ya kwilej ni kwijidish manangu mau ku “kwauril kuwap ni kuyip.” (Heb. 5:14) Kukul kwau kwa Ukristu kufanyidin chisu chin chawonsu kwikal kumekeshinau mu mitambu yawonsu ya mwom, kuwejaku mutapu wau wa kudjal, kwileng, ni kutond kwau kwa mizik ni kwiswedish. Muchim wa kwipan wa yid ya dijuku dia Betel ukat kuyikwash kusadil ndond yawonsu yikutwishau kwikal nau kuswir. Ansand akat kuyinkishang chisu chivud midimu mud ya makas, mudimu wa kuchap, kutum ni kusend mikand, kurijek kwa yom ya midimu, kurijek ni kukomb yikumbu, kutut maswin, ni kwisuk yakudia. (Jinsw. 20:29) Pakwez chinyim nich midimu ya ku mujimbu, mudimu ni mudimu uletin musangar ujim mulong udi mudimu utumbila ni ukat kulet uyaj kud Yehova.—Kol. 3:23.
14 Kushakam kwa machuku makemp mulong wa antu atazukinau chakwel kusal mudimu wa Betel kudi kwa muvu umwing. Chinech chikat kuyitwishish kwikal iyijidishina chakwel kwikal in kusal mudimu akata kusongish mabuj. Ruchingej ridi anch atwisha kusal Betel kwikal chikumbu chau. Rukat mulong wa Yehova rawiy rikata kuyibachik yid ya dijuku dia Betel kutek mudimu wa Want pa ndond ya kusambish kusut yisakin yau ayinau, chinech chikat kumusangaresh Yehova.—Mat. 16:24.
15 Nswir ja Katat: Mulong wa mulad wa mudimu ukatau kusal ku Betel, tukwet katat kuswir nakash kwa akadivar ajich. Ap anch chidiap chom chitinau kamu nakash, tukwet bil kuswir kwa antu adia ayibol a rawonsu, mulong awiy adi kal kamu mu mudimu wa chisu chawonsu. Yisu yimwing chitwishikin kwikal kuswir kwa anambaz ajich ni ambay a uruu akweta chilik cha mivu 19 kushik 35 akutwisha kwikal nich ukaliweny kanang ukwetau nich kuswir ku Betel. Chikwau kand, akadivar nau anambaz amwing akutwisha kwikal nich chilik cha mivu chisutina pakemp 35 ni akweta ukaliweny wa pakampwil ni diyiy (kwifumb) dikutwishau kusadil ku Betel tuyikasikeshin kwizwish fomu. Chilikej, antu adia amingang a mazeu, a dokter, antu ileja shikol ya ruchind (comptabilité), antu ija kutung, ankaliweny, amingang, in kurijek miotak (mécaniciens), ap in kurijek yisaj mud maradio, (électroniciens), yiney yidi yilikej yikemp twajimbula kal. Pakwez, tuyikasikeshinap antu kutambul kwikal ni mafundish ma pakampwil ap diyiy (kwifumb) nich chitongijok cha kwel anch chinech chikuyitapish dilau dia kuyitazuk ku Betel. Antu atambwila kal kwiyijidish (kufumb) kwa mudimu kanang, chitwishikin ap kurutu kwa kwijik uyakin, akutwish kufund mukand wa kurumburil nawamp kamu mu wiswimp ni kuulamik ku fomu wa kwandam ku Betel.
16 Anch wizwishin fomu ni kakutazukinap chakwel kusadil ku Betel, kangal waziy bwat. Ufanyidin kushinshik kuchirikin kwizwish fomu wey muvu ni muvu kapamp kamwing. Akadivar amwing akweta ukaliweny ni kwiyijidish (kufumb) kwa pakampwil kukutwishau kwikal nich kuswir ku Betel iteka tayad kusadil pa chisu chikemp mu mudimu wa kwikatin ayinau ku Betel. Akutwish kwizwish fomu wa kusadil ku Betel chisu chikemp rubing rimwing, mbing jaad, jisatu ap jinying ap angond asatu. Kalam’a ujindj wa chikumangen ukwet mafomu ma kwitin mudimu wa kwikatin wa chisu chikemp mulong wa antu asotina kukwash mwi njil yiney. Akutwish kand kwitin mafomu ma kwitin mudimu wa kwikatin wa chisu chikemp ku Fomu wa Kwitin Mikand.
17 Kumusadil Yehova pamwing nau anamakwend In Kristu chidi chisend chimwing cha pakampwil kudi antu akata kusadilang ku Betel. Chisak Chitakedila mudimu chikat kuman nich usey spiritu wa kwipan wa antu awonsu adia tayad mulong wa kusadil nswir ja ukadivar wetu wa mangand mawonsu.—Filp. 2:20-22; 2 Tim. 4:11.
18 En Ansand—Irijekany Katat Chakwel Kusadil ku Betel: Kwirijek kukat kusambishinang kamu kurutu kwa kuwanyish chilik cha mivu 19 yitinau chakwel kusadil ku Betel. Ov yom ik yikutwishau kusal ansand chakwel kwirijek mulong wa kusadil ku Betel? Yesu walonda anch: “Nany wa mukach mwen, anch wasot kutung chikumbu walik kushakam pansh ni kuchind usey, anch ukwet ya kupwish nich?” (Luka 14:28) Mulong kwirijek ni kutongin ya kurutu yidi ya usey nakash chakwel kutwish kuwanyish chitongijok chin chawonsu cha kusal, chidi cha usey ujim anch ansand ata muchim ku mutapu utunginau mulong wa machuku mau ma kurutu mu mudimu wa Yehova! Dinguj dikash difanyidin kuditek kamu mu mivu ya wanikanch mu mwom chakwel awiy kutwish kuwanyish jintong ja muspiritu. Mud nsand, ov mutapu ik utekina dinguj diey? Anch ukatin kusadil ku Betel, ukez kutan ukwash nich kushinshikin nawamp kamu yilondwila ey.
19 “Kwitiy” Chisend cha Mudimu Chinech cha Pakampwil: Mud muchifundilau mu Mateu 19:12, Yesu wayikasikesha in kwilej end “kwitiy” kushakam ajich. Ov mulong wak? Chidiap mulong wa yiyingish yau ayinau bwat, pakwez chidi “mulong wa kwipan ku want wa mwiur.” Paul niyend wakasikesha mulad winou wa ‘kwipan nich michim yawonsu ku mudimu wa Nsalejetu wakad kuzuwol.’ (1 Kor. 7:32-35) Pakwez, antu avud akat kuburen kwau chisend cha kusadilang mud amakundj ajich ku Betel mulong wa kwat mu mivu ya kusambish. Tukatin kuyikasikesh akadivar ansand kusadil usu wau mulong wa kusal mudimu wa chisu chawonsu pachidau akad yisend ya dijuku. Chad lel, anch mu kusut chisu akwat chiyul cha kwatan, akez kwikal amakundj (anfum) awamp nakash mulong atambwil kal ukaliweny kanang mu mwom ni mu mudimu wa Ukristu. Kupwa kwa kusadil mivu kanang ku Betel, amwing atana ni adandamedin kusadil ku Betel mud ambay a uruu. Anch kupwa ikal nich yisend yikwau, mud mudimu wa sirikwit ap mudimu wa umishoner, awiy kakwinanap mulong wa chisu chasutishau ku kwitiy mudimu wa Betel.
20 Kangal Kwikal Uzuwodilau Nich Kulondul Dipit dia Mujimbu: Nsand mwin mwawonsu uwapidil kwiyipul anch: ‘Ov rutong ram kupwa kwa kutambul diplom dia shikol ya piur ridi ra kulondul mudimu wa chisu chawonsu wa ku mujimbu ap ridi ra kumusadil Yehova chisu chawonsu?’ Chakin, kulondul njil ya kaad kukez kwit kwipan. Pakwez komb ukez kulondul midimu ya ku mujimbu! Ni kwisudiel, njil ik yikeza chakin kamu kulet mwom wa chikupu ni chibudikin chiwamp? Yesu waleta chakul chiwamp. Mud muchifundilau mu Mateu 6:19-21, walonda anch: “Kangal wikumangejinany mapit ma pansh pa mangand, padia musu, ni ankal akat kushesh, ni aij akata kwandam ni kwiy. Pakwez kumangejinany mapit men mwiur mwakad musu ni ankal akata kushesh, ap aij akata kwandam ni kwiy. Mulong kudia mapit mey, kwawiy kand kukwikala muchim wey.” Michim yetu kangal yatutwal ku kulondul midimu ya ku mujimbu ap mapit ma ku mujimbu pa ndond ya kumusadil Yehova nich mupim wetu wawonsu. Etu awonsu tufanyidin kujingunin anch rutong rumwing kusu ra usey rifanyidina kulondul ridi urund uwamp nend Yehova, chakwel kusangaresh muchim wend. (Jinsw. 27:11) Anch twamutek Yehova pa ndond ya kusambish mu mwom wetu wawonsu wa winsand, tumekeshin kwisu kudia yom yetu ya usey ni usey ukweta Want kudi etu. Vurikany, ‘Chiyukish cha Yehova—chawiy chikata kulet dipit, ni ndiy kakuwejangikup ushon.’ (Jinsw. 10:22) Ansand akwet ndond yiwamp nakash ya kumekesh kwisu kudia michim yau nich kupan chom chimwing cha usey nakash kud Yehova mulong wa yawonsu yayinkishay. Mudimu wa Betel upanin ndond yiwamp mud yiney kud antu awanyishina yitinau.
21 Antu Asadila ku Betel Afanyidin Kwikal ni Ngikadil Yiwamp: Mwin kufund kuseng wipula anch: “Nsangarum ukez kutokish njil yend nchik?” Wakula anch: “Ku kubabal ni kulondul dizu diey.” (Kus. 119:9) Chinech chirumburikin kwipuk chom chawonsu chambatena nich ngikadil yijondila ya ditenchik dia yom dia Satan. Pornografi wa pa Internet, ngikadil yakad kufanyidin ni muntu wa mujimbu ukwau (ikundj ap mband), mizik yiyimp, kwipuwangesh kuyimp, ni kunawol maar kwa wanikanch yidi kamu yimwing ya mipit yikatay kusadil Satan chakwel kuyikangesh ansand etu kushiken ku jintong ja muspiritu. Kuswiridin kujijaman kukash chakwel kurish nich yoziu yiney. Mud nsangarum, anch waman anch ukatin kwiyandjik mu yom mud yiney, lejan kud amakurump mu chikumangen chen ni kupwish milong yiney kurutu kwa kwizwish fomu chakwel kusadil ku Betel. Kwikal nich kom katok chidi cha usey chakwel kumusadil nakash Yehova.—1 Tim. 1:5.
22 Ileja Kushakam Pamwing ni Antu Akwau: Chom chimwing chijim nakash chitinau chakwel kutwish mudimu wa Betel chidi kwilej kushakam pamwing ni antu akwau. Dijuku dia Betel dia mu États-Unis dikwet tunan twa akadivar nau anambaz akweta ndond kushalijan mu mwom. Kushalijan kwinoku kwa untu kukat kuwejinang kuwap kwa muspiritu kwa Betel, yisu yimwing chikutwish kand kwikal chikash. Anch ukat kushinshikin mudimu wa Betel, uwapidil kwiyipul anch: ‘Ov nikat kujimanang swa anch antu kanang kateshinap chitongijok cham? Ov antu akwau amen anch chiswapel kud am kushakam ni antu akwau?’ Anch ukwet kuswir kwa kurijek ku mutambu winou, sambish kamu katat kwirijek ku mulong winou. Kusal kwey mwamu kukez kukukwash kurijek nawamp kamu kushakam ni kusal mudimu pamwing ni yid ya dijuku dia Betel.
23 Sal usu nakash wa kwikal muntu umwing wa muspiritu nich kukudish urund wa piswimp nend Yehova. Kudish program umwing muwamp wa dilejan dia muntu ipend, program ufanyidina kuwejin kutang Baibel dichuku ni dichuku. Ikal mwin kusal pamwing ni antu akwau mudimu wa kulejan rusangu ruwamp. Anch wasadil yom yiney, ukez kusal kukul kwey kwa muspiritu kumekana. (1 Tim. 4:15) Ridi ruchingej ruwamp mud ik riyichingedina antu akata kwirijek katat mulong wa kusal mudimu wa chisu chawonsu mu mwom wau wawonsu!
24 Anvaj, Yifumbany Anen: Ov chom ik chikutwishau kusal anvaj chakwel kuyikasikesh ansand kulondul mudimu wa chisu chawonsu? Yesu walonda anch: ‘Nsand a shikol mwawonsu, pakupwishay malejan mend, ukez kwikal mudi mulej wend.’ (Luka 6:40) Nsand a shikol ufumbinau kamu nawamp ukutwish kumekesh ngikadil yiwamp ya kwipan kwa mulej wend. Anvaj In Kristu afanyidin kulam chijil chinech mu manangu pikasikeshinau kuyifumb anau “kwilej yom ya mwom wa kumulondul Nzamb.” (1 Tim. 4:7) Mulong an akat kulondulang chilikej cha anvajau pantaliken nich yom ya muspiritu, anvaj awapidil kwiyipul anch: ‘Ov tumening usey wa mudimu usadilau ku Betel mulong wa kuyish kurutu yisakin ya difukwil diakin dia Yehova? Ov tukat kujingunin chiyukish cha Yehova piur pa ditenchik dia Betel? Ov twitiyin anch kusutish mwom mu mudimu wa Yehova udi mudimu uwamp nakash ukutwishau kutond anetu kusal?’ Kujikitish kwetu kwa muchim umwing mulong wa mudimu wa Betel ni mudimu usadinau kwinikwa ukez kutukwash ku kulangwish kusanger kwa anetu mudimu winou.
25 Elikana nend Hana ading akwet kalimish kajim pantaliken ni difukwil diakin. Awiy asha chilikej chimwing chiwamp kud anvaj In Kristu nlel. Mu Isarel wa pasak, ching kusu amakundj in Isarel adinga afanyidina ‘kwimekesh kurutu kwa Nsalejetu wakin, Yehova’ ku dizang tupamp tusatu pa muvu. Pakwez, Elikana wayanga weny wa ma akilometre 30, chimeken kamu anch radinga ra pansh, ni dijuku diend diawonsu “muvu ni muvu” mulong wa kulambul kwi ndond yiney ya difukwil diakin dia Yehova. (Kub. 23:17; 1 Sam. 1:3, 4, 9, 19; 2:19, NW) Chimeken anch ikundj winou, mutu wa dijuku wadinga ni kusot anch dijuku diend diawonsu disadila pamwing piur pa yom ya muspiritu yiyitadina.
26 Hana wasadila pamwing ni nfumwend mu yisakin ya difukwil diakin. Hana wasangera chisend chend kupan mulambu chakwel kukwatikesh difukwil diakin ku dizang. Hana wachipa anch, ang Yehova wamwinkish mwan ikundj, ndiy ukez kumulet mulong wa kumusadil ku dizang. (1 Sam. 1:11, NW) Chijil cha Moses chading kumwinkish ikundj mbil ya kujip kuchip kwakad kufanyin kwa mukajend. (Kuch. 30:6-8) Pakwez, chimeken anch Elikana witiya kuchip kwa Hana, ni kumekesh anch ni ndiy wadinga ni kukwatikesh difukwil diakin!—1 Sam. 1:22, 23, NW.
27 Ov mwanau Samwel wamana ukwash wa muchim wa kusanger ni muchim uwamp wa anvajend? Chakin kamu. Chadingay nsangarum, nich muchim utok ni kushinshaman Samwel walama midimu yamwinkishau ni amufumba mulong wa yisend yikwau ya mudimu wa Nzamb. Kusanger kwamekeshau Elikana ni Hana mu mudimu wa Samwel ku dizang kwimanyinap kusu pa kusal midimu yend. Awiy adinga ni kwez ni kumutal chisu ni chisu ni kumukasikesh ni kumukwash padingay ni kusal mudimu wa chisu chawonsu.—1 Sam. 2:18, 19, NW.
28 Chidi chilikej chiwamp mud ik chashau Elikana ni Hana kud anvaj In Kristu nlel! Anch anetu ateshin misamb yiwamp piur pa chisend cha mudimu wa Betel ni kuman spiritu wa kwipan tumekeshina mu kuyish nakash yisakin ya Want, ni awiy akez kukudish muchim wa kuyisadil antu akwau. Anvaj avud atwishin kwandjik mu manangu ma anau chitongijok chinech chiwamp. Changadim umwing wa mivu sambwad wafunda anch: “Anch nakul, nikez kuya ku Betel, ni nikwet yom yikemp nisotina kuya ni kusal kwinikwa. (1) Kufund magazet Tour de Garde ni Réveillez-vous!, (2) kusal mudimu mu department wa kutek ulombu, (3) kubam maswin matutinau. Midimu yawonsu yikwikalaku. Kwikil kwau mulong.” Chisangareshin kuman spiritu wa kwipan mud winou chikudilay mu muchim wa anetu!
29 En ansand, vurikany anch “mangand mayil ni kusut pamwing ni yom yawonsu yikwetau nich antu ris, pakwez muntu mwawonsu ukata kusal rusot ra Nzamb ukez kupand chikupu.” (1 Yoh. 2:17) Dandamenany kulondul jintong ja muspiritu, kuwejaku ni chisend cha pakampwil cha mudimu wa Betel. Anvaj, londulany chilikej cha antu ashinshamena a pasak, antu ayikasikesha anau kukudish wom wa kumwakam Nzamb. (2 Pit. 3:11) Etu awonsu tusalany yitukutwisha kusal muntu ni muntu mulong wa kuyikwash akadivar nau anambaz etu adia ansand kumusadil Sakatang wetu Mujim mu mutapu umwing ujim mud chitwishikina, mulong ku “mwom winou kudi kushilamu kwa mwom wa katat ni kwa mwom ukeza kwez.” —1 Tim. 4:8; Mul. 12:1.
[Caption on page 4]
[Box on page 4]
Yitinau Chakwel kusal Mudimu wa Betel
● Mwin kubatishiu pasutin kal muvu umwing
● Muntu wa muspiritu ni umukatina nakash Yehova ni dirijek diend
● Kwikal mukash mu spiritu, manangu, yitongijok, ni ukash wa mujimbu
● Mwan-a-ngand ap muntu ushichinga kwambatan nich mbil ya Congo-Kinshasa ap Congo-Brazzaville
● Wija kutang, kufund, ni kulond nawamp Inglish
● Kwikal ni chilik cha mivu 19-35