Mudimu wa Uchibol​—⁠Disadil dia Manangu dia Chisu Chetu!

¹ “Nikwet kal yivud ya kusal! Ov chikwikal cha manangu anch nisambisha mudimu wa uchibol pa chisu chinech?” Mwamu mwatongay nambaz umwing padingay ni kutesh, ku chikunguril cha sirkwit, mwin kulond umwing, wadinga mukurump ni chibol, wadinga ni kupan diskur dikweta mutu wa mulong: “Tuyany Kurutu mu Mudimu wa Uchibol.” Mukadivar umwing nsand wadinga nindiy ku chikunguril chinech, wading ni kutong anch: “Ov mutapu ik usadinay mulong wa kwikal chibol? Nidap mukurump, ni mwom wam winzwil kal mijikit!”

² Pa chisu kanang mukurump chadingay ni kupan diskur diend diadinga ni kwisambin yiyukish ya mudimu wa uchibol, wasutisha interview wa ayibol kanang a mu sirkwit piur pa yikarumun yasadilau chakwel kusal mudimu winou ni mutapu wayiyukishinay Yehova mu usu wasadilau. Umwing pakach pau wading uyedin, mukwau mukajend kadingap kaman ni mukwau walika midimu ya mujimbu, pakwez wading ni kutwish kudimukin nswir jend jifanyidina ja mujimbu. Chateshau mutapu watwishau ayibol inay nich ukwash wa Yehova, mukadivar ni nambaz ashinshikina mutapu wau wa kuman yom ni mwikadil wau. Tukwitin niyey kusal chilik chimwing, nakash kamu mulong kukepish kwa asaa ayitinau ayibol kudi kuyitadila antwarubil avud a rusangu ruwamp.

³ Twij anch Yehova udi Sakatang ni Mwant wa mangand ni mwom wetu udiokil kud ndiy. (Dan. 4:17; Midimu 17:28) Chidi patok kud etu anch Yehova usadidil dirijek dimwing kusu. Twitapidil dilau dia kusadil pamwing ni dirijek dined, ni kukwash “kashalapol wakin ukweta manangu” mu kupan uman wa Want kurutu disudiel dishika. (Mat. 24:45; 25:40; 1 Pita 2:⁠9) Chitwashikena kal kulemp mu “machuku ma kwisudiel,” tujingunin anch chisu chitushadidilaku mulong wa kulejan chashal kal chikemp. (2 Tim. 3:⁠1) Oku tufanyidin kudimukin nswir ja dijuku dietu. (1 Tim. 5:⁠8) Pakwez difut (nfalang) dikata kumekan mulong wa kudish dijuku diding dikemp anch kwisikej ni mutapu chadinga pasak. Chitwishikin kand ukash wetu wa mujimbu udap mud chiwadinga pasak. Kupwa kand, anch tulond kamu chakin, tusotin kwikaliku ni chisu ni yom ya kwikwash nich. (Mul. 3:​12, 13, NW) Chawiy lel tukutwish kwiyipul anch chidi chakin chiyul cha manangu kwitiy diladikij dia kusal mudimu wa uchibol.

⁴ Chidi chisend cha muntu ni muntu kushinshikin nawamp mwikadil wend ni kwikwatin chiyul. (Rome 14:12; Gal. 6:⁠5) Chikasikeshin kuman uvud wiwejidinaku wa antwarubil itiyina diladikij dined. Yikalap nchik yipwichik ni matat ma machuku minam ma kwisudiel, rapor wa mujikit wetu, wapalangeshinau mu Annuaire 1999 ulejen anch antu a Yehova akwet piswimp ayibol 700000 ayila kurutu. Yikalap nchik mikadil yimwing yikash ya mutapu wa kuman nfalang, kuburen mwa kwendil, mayej, matat makwau ni yoziu, akadivar ni anambaz inay kachirikidinap kwinyim mu kusal yom yiwamp, ni afanyidin kamu kubazin. (Gal. 6:⁠9) Itiyidin mazu ma Yehova malonday anch amupima. (Mal. 3:​10, NW) Atongin chakin anch kwikal chibol yidi njil ya manangu ya kusadil chisu chau, chikemp, ni mapit mau makemp, ni amen anch Yehova ukat kuyiyukish chakin mulong wa yikarumun yafanyidinau kusal mulong wa kusambish ni kushal mu mudimu wa uchibol.

⁵ Ayibol Ayiyukishin: Nambaz umwing mu Cameroun ukweta mwan mband mukemp, urumburil anch: “Kudiosh kunamuvadina, nikakuyang nend chisu chawonsu mu mudimu wa kulejan. Padingay kand kal asambisha kwend, nading ni kumupap nich mpapu. Dichuku dimwing pamanch chinadinga ni kulejan, nimana ku chintamb cha mwin kulandish umwing. Mwanam mband wasenda mamagazin mu sakosh wam ni kushemunikang kamu. Waya pakemp pakemp djat ni ku chintamb chadinga piswimp. Ap anch kadingap utwishina kulond yivud, pakwez wapwita yitongijok ya mband umwing ni kumulej magazin. Mband washimoka nakash pa kuman mwan mukemp mud winou ukat kusal mujikit winou. Witiya kapamp kamwing mamagazin ni dilejan dia Baibel!”

⁶ Chakwel kwitiy ku diladikij dia kukimb ayibol ankwash avud, mukurump umwing mu Zambia, wadinga ni mudimu wa ku mujimbu wa kujingish muten ni tatuku wa dijuku, wakwata chiyul cha kusal mudimu wa uchibol nkwash ikalap nchik program wend ukwatikena. Wasota kupan chilikej ku chikumangen ni ku dijuku diend. Mu yisu yimwing, wadinga ni kwimik motak wend kuns kwa balibal ni kutesh band wa buku Le secret du bonheur familial. Wading ni kuyit antu adinga ni kusut kwez ni kutesh band. Mwi njil yiney wapana abuku Bonheur familial 16 ni abuku Connaissance 13, ni wasambisha malejan ma Baibel maad.

⁷ Spiritu umwing muwamp wa uchibol wameken kand mu Zimbabwe. Mu Ndol 1998, mu chikumangen chimwing cha antwarubil 117 mwadinga ayibol ankwash 70 ni ayibol a rawonsu 9. Mu chikumangen chikwau cha antwarubil 94 mwadinga ayibol ankwash 58. Mu chikwau kand cha antwarubil 126, mwading antu 58 akwata chiyul cha kusal mudimu wa uchibol nkwash pamwing ni ayibol a rawonsu 4. Muvu wa mudimu wasutina ou wameken kwikal muvu umwing wa pakampwil mu Zimbabwe. Ap anch akadivar ading akwatiken nich milong ya dijuku, mijikit mu chikumangen, ni midimu ya kutung ya mutiy, asadil usu wa kusadil nich manangu chisu chau mu mudimu wa kulejan.

⁸ Ayibol ajingunin anch kusambish mudimu wa uchibol ni kudandamen kuusal kwengamidinap kusu usu wau ayinau bwat. Yikalap nchik yikutwishau kusal, ajingunin chakin anch yawonsu yitwishikin mulong wa ‘usu uyinkishinau kudi Nzamb.’ (1 Pita 4:11) Ritiy rau riyitwishishin kusal mudimu wau wa kulejan dichuku ni dichuku. Pa ndond pa kukimb kufanyin kwau ni kuwap kwau ayinau, ayibol akweta mabuj ijing nawamp anch chakwel kuya kurutu, chiyifanyidin “kurish kuvud,” pakwez atambwiling yiyukish yivud!​—⁠1 Tes. 2:⁠2.

⁹ Chilikej cha Paul Chidi cha Kulondul: Baibel ulejen yasalay Paul mu mudimu wa kulejan ni ukwash upandikena kuwap wapanay kud antu avud. Pakwez, anch kwadinga muntu wadinga ni yivud ya kusal, muntu winou wading Paul. Wajijamena kuzengol ni mar mulong wa kulejan rusangu ruwamp ni kukasikesh yikumangen. Wafanyidina kand kurish nich mulong ujim wa mayej. (2 Kor. 11:​21-29; 12:​7-10) Wajijamana kusadil chisu chend nich manangu. Walonda anch midimu yend yawonsu yasalay wayisala nich ukwash wa Yehova. (Filp. 4:13) Kwikil muntu ap umwing, pakach pa antu akwashay Paul wadinga ni diyingish dia kulond anch chisu chend ni usu wend mu mudimu wa Yehova yading yamwamu ap wela kutwish kuyisadil mutapu uwamp kupandikan. Chakin, djat ni nlel muten tuchisakidin disadil dined dia manangu! Pa chirung chinech chikash, tukwet musangar wa kwikal ni yiyul yend yipepidilau yikata kutukwash kutenchik yitufanyidina kutek pa ndond ya kusambish ni kushal alamatina ku uyakin.

¹⁰ Katat, ‘kwashal kal chisu chiswimp cha kulejan rusangu ruwamp.’ (1 Kor. 7:29; Mat. 24:14) Chawiy lel, chiwapidil kwiyipul anch: ‘Anch mwom wam ufanyidin kusul diamashik ni dichadia, ov nikutwish kumulej Yehova nlel anch nasadidil chisu cham nich manangu?’ (Yak. 4:14) Ov mulong wak ukutwishap kwisamb katat kamu ni Yehova mu malembil, kumulej rusot rey ra kusadil nich manangu chisu chey mud umwing wa Atuman end? (Kus. 90:12) Tumwitany Yehova atukwasha kutenchik nawamp mwom wetu. Ap anch twakwata kal chiyul cha kulik kwikal ayibol, ov chitwishikin katat tumana anch chinech chitwishikin kud etu?

¹¹ Twisakinany Mwikadil Wetu Wawonsu: Chakin, mulong wa mikadil, awonsu asotina kwikal ayibol kakutwishap kushiken asaa 70 kwi ngond mu mudimu wa chibol wa rawonsu. Pakwez, antwarubil avud akutwish kwirijek mulong wa kwikal ayibol ankwash, chawiy kulond kusutish asaa 50 kwi ngond mu mudimu wa chingand chisu chimwing ni chikwau pichitwishikina ap kudandamen kuusal. Anch mwikadil wey ukutwishishinap katat kwikal chibol nkwash ap wa rawonsu, kangal wachirikin kwinyim. Dandamen kulembil pa chinech. Pakwez katat, anch chitwishikinap kusal yikarumun, ikasikesha chiwija anch Yehova usangeridin yiusadila nich mupim wey wawonsu. (Mat 13:23) Wij anch wengamidin sens ku mutambu wend ni wij kand anch usadil usu wa kwikal ntwarubil ushishamena wakad kulik ngond wisutil pakad kwisakin yisu ya kupan uman. Chitwishikin anch usala mudimu wa kupan uman mutapu umwing ukubudisha mabuj, kuya kurutu mu chilik cha kwikal ntwarubil umwing chifuvu ni mulej wa rusangu ruwamp.​—⁠1 Tim. 4:⁠16.

¹² Nich “dichuku dijim diamushena” dia Yehova didia piswimp, chitufanyidin kusadil chisu chishadilaku nich manangu anch tusotin kupwish mudimu watwinkishau. (Yoel 2:​31, NW) Satan wij anch kwamushadil kal kachisu kakemp, kupandikan yisu yawonsu, upakishin yawonsu yikutwishay chakwel kukadangesh mwom wetu ni kuusal utukasikena chakwel tulika kuta muchim pa yom yipandikena chakin usey. (Filp. 1:10; Kubur. 12:12) Kangal twapipej kulam kutulaminay Yehova. Ukutwish kutukwash kulimunin mwom wetu ni kushiken kusal usu wetu wawonsu mu mudimu wa kulejan. (Kus. 145:16) Nich musangar, avud akat kuman, mu kushinshikin mwikadil wau, anch akutwish kwinungin ku mulong wa ayibol ankwash ap a rawonsu. Chakin, ayibol akwet musangar ujim mu kusadil nich manangu chisu chau. Ov ukwikal umwing wau?