Ov chis cha uchibol achifungwil katat kudi ey?
Rutong: ayibol a rawonsu 10 000!
Mufund wetu wa muvu wa 1999 utuvurishin anch tuchidi mu “dichuku dia dipandish” dia Yehova. (2 Kor. 6:2) Pakwez dichuku diend dia dipandish dikushiken katat kamu ak kwisudiel. Chad lel “dichuku dia dirumburish” diend dikusambish. (2 Pi. 2:9) Yehova pachishidilay ukamuntu chisu cha dipandish, chisangarishin kuman mutapu wakwilau tunan twa antu!
2 Antu a Yehova asadining usu wa kuyishiken antu akata kwitiy kurutu chisu chikala cha kuchelew. Kudau antwarubil a Want avud, chinech chirumburikin kusal mudimu wa uchibol. Ov chis cha uchibol achifungwil katat kudi ey? Ov, mulong wak twipwila mwamu?
3 Kusanger kwamekeshinau: Mud chachijikishau mu Mudimu Wetu wa Want wa Chiwong 1999, kuvul kwa asaa ayitinau mwaad wau ayibol a rawonsu ni ayibol ankwash akukepishin. Chakwel kushiken yiyitinau katat, ayibol a rawonsu aswiridin kusutish asaa 70 mu mudimu wa kulejan ngond ni ngond mud kuvul kwa asaa 840 ku muvu wa mudimu. Ayibol ankwash akusutish asaa 50 mu mudimu ngond ni ngond. Tal kusanger kumwing kwamekeshinau antu atambwila kulimunin kwinoku:
“Chidi chipan chiyukishina mudi ik cha Tatukwetu wa mwiur!”
“Niburedin mazu ma kumekesh nich musangar wam, rukat ni kujikitish mulong wa ditenchik dined!”
“Chinech chikuswapesh nakash program wetu!”
“Dilembil dietu didi anch avud akusal katat mudimu wa chisu chawonsu ni kuman yiyukish yidiokila ku kumusadil Yehova mutapu ujim.”
4 Pitushejidina kwisudiel kwa dichuku dia dipandish dia Yehova, chidi patok anch Yehova usotin anch antwend apana dipumb dia kushiman dia nsudel, dijim diovikena kwawonsu. Kuvul ni kujimb kwa uruu winou kwiwejidinaku (1) nich kuvul kwiwejidinaku kwa antwarubil a Want ni (2) nich kukimb kwa muntu ni muntu kuwejin yikutwishay kusal mu mudimu wa Want wa kulejan. Yehova, “mwin kukudish,” waletin kupandakan mu mitapu yawonsu yaad nich kuyukish spiritu wa rusot ra antu awonsu itiyidina dipandish.—1 Kor. 3:6, 7; Kus. 110:3.
5 Kangal washadish rutong ra dichuku dined: Chading kwambatan nich dichuku dia dipandish dia Yehova payibabeshay Paul ambay in Kristu anch: “Mulong etu tukat kusal mudimu pamwing nend Nzamb [Yehova, NW], twakulembijekany chakwel kangal washadishany ranaken ra Nzamb chamwamu.” Tukushadishap “rutong rau” anch twaman chinech mud “chawiy kamu chisu chawanyina kal ilel” kusal mudimu mulong wa kuyipandish antu akwau chisu chawonsu. (2 Kor. 6:1, 2) Nlel, mazu ma Paul makat kushiken nich kuswakal kumwing kujim. In Kristu amekeshina rukat ra muchim umwing mulong wa Yehova achimening mud dilau ditapidilau kusal mudimu uyinkishinay mud kamu chitwishikina. Ov, ukutwish katat kusal mudimu wa kulejan mud chibol wa rawonsu?
6 Ridi rutong rifanyidina: Mu République démocratique du Congo, tukwet rutong ra kuman ayibol a rawonsu 10 000 kudiosh pa Mwinses 1. Kwikalap nchik mikadil ya njit mu Congo Brazzaville, tuchingejin kuman ayibol 400 kudiosh kamu mwi ngond wa chidivu. Tuchingejin anch riner ridi rutong rifanyidina ni ritukutwisha kushiken. Ov, mulong wak tukweta ruchingej nakash? Mu muvu wa mudimu wadap ou, kwading piswimp ayibol a rawonsu 8722 ni ayibol ankwash 4089 mu Congo-Kinshasa ni piswimp ayibol a rawonsu 322 ni ayibol ankwash 164 mu Congo-Brazzaville. Ayibol ankwash asadil asaa 63,8—kuwejiku kusu asaa 6,2 chakwel kushiken kuvul kwa asaa a chibol wa rawonsu! Pa antu asadila mudimu wa chibol nkwash muvu wa mudimu wasutina ou, anch kusu antu 1300 mu Congo-Kinshasa ni antu 80 mu Congo-Brazzaville ita kusal mudimu wa chibol wa rawonsu kurutu kwa nsudel ya muvu wa mudimu winou, tukutwish kusambish Mwinses nich ayibol a rawonsu akwau 10000 ni kusut mu Congo-Kinshasa ni ayibol a rawonsu 400 mu Congo-Brazzaville!
7 Chiwapidil kwikal ni program: Ov, chitongijok cha asaa 70 kwi ngond chichimeken mud chom chimwing chiwakad ey kutwish? Chitwishikin anch kutongin mutapu wa kushiken asaa 17 ku rubing kukukwash. Nich kusadil sampul wa program udia pa paj ulondwila, pakish kwitekil program wa chibol wa rawonsu ukwambatana ni mwikadil wey. Anch warijek program wey, isamba nau ayibol ayifuvu chakwel kutambwilaku yiyul piur pa mutapu usadidinau wisikan pakach pa mudimu wa chibol ni yisend yau ayinau ni ya dijuku. Mwipula kalam a sirkwit wen mutapu ukatau kurijek ayibol adia mu sirkwit mudimu wau rubing ni rubing. Chad lel mwita Yehova chakwel ayukisha yiutongidina kusal mulong wa kusambish mudimu wa uchibol.—Jnsw. 16:3.
8 Chisalany chikala rutong ra dijuku: Ov, watongidinany kusal mudimu wa chibol kwikal rutong ra dijuku dien? Ov, mulong wak ukutwishanyap kushakam pamwing mu dijuku ni kwisambin yikutwisha kukwash chid chimwing cha dijuku ap yaad kwikal chibol anch wirijekany nawamp ni kusadil pamwing nawamp? Chakin kamu, amwing akuman anch ashinshikin mutapu wa kashinsh mikadil yau, anch kakutwishap kwikal ayibol a rawonsu katat. Anch mwamu chidia, itekinany rutong ra kuusal machuku ma kurutu. Pakwez sambishany kutongin kusal mudimu winou, ni kwitekin machuku ma ngond mafanyidina kuusambish. Chitwishikin anch usambish kusal mudimu wa chibol nkwash tupamp tuvud ku muvu chakwel kushiken pakemp pakemp ku mudimu wa chibol wa rawonsu.
9 Ayibol a rawonsu 8700 ni kusut adia mu Congo-Kinshasa ni 320 ni kusut adia mu Congo-Brazzaville akwet mikadil kushalijan. Awonsu kakwetap ukash wa mujimbu uwamp, ni avud pakach pau amen mar nich mutapu wa kuman dikut ni mikadil ya njit. Chikalap nchik mwamu, adandamedin kujijaman ni kutek ruchingej rau mudi Yehova. Ambay a uruu ayibol akata kusadil mu musumb wa Brazzaville, musumb mudia njit afunda mazu minam anch: “Ov twinanin mulong wa kwilambul kutwilambula mulong wa kumusadil Yehova? Bwat kwau! Pa ndond pa kuchirikin kwinyim ni kwinan mulong wa yom yitwashadishina, tujingunin anch yawonsu twatwishina kulambul yipandakenap chom ap chimwing mu kwisikej ni chiyukish tukweta nlel ni chituchingedina mu machuku ma kurutu. Mudimu wetu ni mukajam uchidi kwaku mu mudimu wa chisu chawonsu.”—Luka 9:62; Filp. 3:8.
10 Ov ufanyidin kuswapejaku mwom wey? Kuswapej mwom wey kukutwish kwikal chishin chikufungwidila chis mulong wa kusal mudimu wa chibol. Ov mwom wey udi mudi chikumbu chimwing chijim chikweta tupalikany twakad ukwash ni chizwila too nich yom, yitina chisu chivud, nfalang, ni midimu yivud? Anch mwamu chidia, ukutwish kwikal chibol anch wakepish mijikit yey yiukata kusalang mu mwom wey. Ov, ukutwish kukepish kuvul kwa asaa ukata kusutish mu mudimu wa ku mujimbu? Ov, ukutwish kulam chisu chiukata kusutish ku mijikit yakad kwikal ya usey ap kumekesh kwisikan kujim mu chisu chiukata kusutish mu kwiswedish?
11 Mu 1 Timote 6:8, Baibel utubabeshin anch: “Chawiy chifanyidin etu kusangar anch tukwet yakudia ni yidjal.” Kusanger yikemp yitukweta chidi chom chimwing chipandikena usey mu kusal usu wetu wawonsu mu mudimu wa Yehova ni chiswapel kutul yisakin ya muspiritu pa ndond ya kusambish. (Mat. 6:22, 33) Pa paj 104 wa Annuaire 1998, mu rapor wa Japon, apanin yiyul yivud ni mulong wak mwi ngand yiney mudi spiritu muwamp nakash wa uchibol. Talap chimwing: “Chidi chakin anch yikumbu ya mu Japon yiding kwau yikumbu yimwing yimekeshina kwikepish, ni chinech chitiningap chisu chivud mulong wa kuyirijek, antu akwet mwom umwing uswapela.” Ov, dined didiap dirumburik dia kashinsh dia 1 Timote 6:8?
12 Pa mangand pawonsu, atushalapol a Nzamb akat kulejan rusangu ruwamp nich mushiku ujim kurutu dichuku dia dipandish dia Yehova dishika kwisudiel. Chisangarishin kuman anch muvu wadap ou piswimp antu 700 000 inungidin mu mulad umwing ni kanang wa mudimu wa chibol ngond ni ngond. Ov, ukutwish kurijek mwom wey chakwel wikala umwing wau? Tukwitin kushinshikin piswimp nakash mu malembil mikadil yey piwakwila ku chipul: Ov chis cha uchibol achifungwil katat kudi ey?
[Mutu wa mulong udia pa paj wa 1]
Program wa chibol wa rawonsu—Kuswir: asaa 17 ku rubing
[Mutu wa mulong udia pa paj wa 1]
Dichuku dimwing ku rubing ni kwisudiel kwa rubing
Dichuku Asaa
Diakatan 8
Diampos 6
Diarubing 3
Kuvul kwa Asaa: 17
[Mutu wa mulong udia pa paj wa 1]
Machuku maad ku rubing ni diampos
Dichuku Asaa
Diakaad 7
Diakanying 7
Diampos 3
Kuvul kwa Asaa: 17
[Mutu wa mulong udia pa paj wa 1]
Machuku masatu ku rubing ni diarubing
Dichuku Asaa
Diamond 5
Diakasatu 5
Diakatan 5
Diarubing 2
Kuvul kwa Asaa: 17
[Mutu wa mulong udia pa paj wa 1]
Maurel maad ni kwisudiel kwa rubing
Dichuku Asaa
Diamond 3
Diakasatu 3
Diampos 8
Diarubing 3
Kuvul kwa Asaa: 17
[Mutu wa mulong udia pa paj wa 1]
Isadina amwiney program wey wa chibol
Dichuku Asaa
Diamond
Diakaad
Diakasatu
Diakanying
Diakatan
Diampos
Diarubing
Kuvul kwa Asaa: 17