Mutapu wa Kutanduril Mudimu Wetu
1 Pasutil kal mivu 40 ni kusut, chikunku chimwing chikweta mutu wa mulong “Ov Usadiling Usu Wey Wawonsu?” chabudikina mu Tour de Garde wa Kalol 1, 1955. Chikunku chinech chamekesha nawamp mutapu ukutwishau atushalapol a Yehova kusal usu nakash mu chingand mulong wa kuwejin mujikit wau wa Want. Chiyul chinech chiwamp chidi kand cha kusadil nlel kud etu, pitudandamedina kusal usu wetu wawonsu.
2 Mudimu wetu wawonsu ufanyidin kwikal ubachikinau nich chijil chipandikena kujimb: “Ukamukata Mwant Nzamb [Yehova] nich muchim wey wawonsu, nich mupim wey wawonsu, nich manangu mey mawonsu, nich usu wey wawonsu.” (Mako 12:30) Tumekeshining rukat retu rujim mulong wa Yehova pitukata kusadil yisu yawonsu yimekena kud etu mulong wa kuyish kurutu mudimu wa Want. Tushinshikinap milad yimwing ya kutanduril mudimu wetu.
3 Twitwikany Yisend Yetu: Akadivar akutwish kusal usu wa kuwanyish yitinau mulong wa kwikal ankwash’a midimu ni chad lel kwikal amakurump. Yikunku “Ov Usotin Kwikal ni Chisend?” ni “Ov Uwanyidin Mulong wa Kusadil?,” mu Tour de Garde wa Mwinses 1, 1990, yabachikin akadivar avud kusal usu mulong wa kwikal awanyidina mulong wa yisend mu chikumangen. Yipula amakurump a chikumangen chen yiyul yifanyidina mulong wa kuya kurutu ni kuwanyidin.
4 Amakurump ni ankwash’a midimu achidia ambalak ayitin kutongin nakash kwizwish fomu wa kwitin kwilej Shikol ya Mafundish ma Mudimu (EFM). Ukutwishany kwiyijidish nich shikol yiney kusutin kutang mareferans mu ma Index ma mikand ya Sosait Watch Tower (1986-1990, 1991-1994, ni 1996), pa mulong “École de formation ministérielle.” Ov umenany ‘chis chijim cha mudimu’ chikufungwidilanyau? (1 Kor. 16:9a) Akadivar avud andamina mwi njil yiney ading kand kal atonginap yisend yawonsu yiney ya mudimu pa kuyilondul. Pakwez nlel, asadidil ku Betel ap adi ayibol a pakampwil, amishoner ap kand atulam in kwendangan.
5 Tusotany Kusal Mudimu wa Chisu Chawonsu: Ansand apwishina shikol, amaku, ni amakurump atambwila kal panshon awapidil kutongin nakash kusal mudimu wa chibol. Shinshikinany wenjil wa Mudimu Wetu wa Want wa Kafumpul-Mashind 1998, kupwa isambany ni ayibol adinga ni mikadil ya chilik chimwing ni yiukwetany. Chitwishikin anch chinech chitubachika kutanduril mudimu wetu ni kwikal chibol, mud awiy. (1 Kor. 11:1) Ov chom ik ufanyidina kusal chakwel usutisha asaa 70 ngond ni ngond mu mujikit ni kwikal chad lel chibol wa rawonsu?
6 Akadivar nau anambaz 17000 ni kusut akat kusadil katat mu Mabetel kushalijan. Mudimu Wetu wa Want wa Mwinses 1995 wisambidin yitinau mulong wa kusal mudimu mud winou. Ov mulong wak ukutwishanyap kutang wenjil winou ni kuman anch ukutwishanyap kuwanyish yitinau mulong wa dilau dined dia pakampwil?
7 Tusadilany Ndond Kudia Kuswirin Kujim: Ov tushich mu teritwar mukatau kulejan chisu ni chisu, ndond kudia akadivar avud akweta yisend? Ov watongidinany kutanduril mudimu wen mulong wa kuya ndond kudia kuswirin kujim? Chitwishikin anch kushemunik kwinoku kwikala kwa kuya ku makunku madia piswimp kuswiridinau in kusal mudimu. (Mat 9:37, 38) Chinech chidap chom cha kusal maumau. Chifanyidin kuchishinshikin mu malembil. (Luka 14:28-30) Twisambinany mwikadil wetu ni amakurump ni kalam’a sirkwit. Akutukwashany kuman anch chidi cha manangu kukas weny mud winou katat ap kwirijek chakwel kuchisal mu machuku ma kurutu. Anch tutongin kufundin Sosait mulong wa kutambulaku yiyul piur pa ndond yitukutwisha kuya, mukand wa Komite wa Mudimu ufanyidin kubachikij mukand wetu.
8 Turijekany Mulad wa Mudimu Wetu: Etu awonsu tukutwish kwinungin sens mu chingand nich kurijek kuwap kwa mudimu wetu. Ov tusadiling mitambu yawonsu ya mudimu, uman wa ku chikumbu ni chikumbu ni wa kukashimun, kuchirikinamu kusu ni malejan ma Baibel? Anch tutakedil dilejan, ov tukutwishap kurijek mutapu wetu wa kufundish? Chikwikal chiwamp kuchirikin wenjil wa Mudimu Wetu wa Want wa Kafunfut 1996 chakwel tumanaku yiyul ya kusadil mulong wa kuyikwash antu twilejininga nau Baibel kushiken ku kwipan ni kubabatishiu.
9 Misamb yivud ya milad ya kutanduril ni kulimunin mudimu wetu yidi mu shapitre 9 wa buku Organisés pour bien remplir notre ministère. Etu awonsu tusotin chakin kusal yawonsu tukutwisha mu mudimu wa Nzamb. Ov mulong wak tukutwishap kutongin nakash jintong jetu ja muspiritu? Tusalany mud mutulejinau mu 1 Timoteu 4:15 anch: “Lamat ku mudimu winou; sok mu yom yiney; chakwel kujimb kwey kumekan kud antu awonsu.