Yakul Ku Yipul Yen

◼ Ov Anvaj afanyidin kusadil nchik kubabal pabudikidinau ni aanau akemp mu mudimu wa kulejan?

Anvaj in Kristu ayiling pamwing ni aanau mu mudimu wa chingand, chakwel ayifundish mwa kulejen rusangu ruwamp ra Want. Chakwel kuchisal, chiyifanyidin kuyilam aanau akemp mulong wa yak yikutwisha kubudikin mu teritwar, ap mu jindond jimwing mudia “zoong.” Chisu chivud, aan ading asidinau nakash nich ubaj ni kuyiyipish mulong wa kuvulijan kwa upwepu ni winsotan upandikena kuyip mu “machuku minam makash” mutushicha. (2 Tim. 3:​1-5) Anvaj afanyidin kubabal nakash chakwel kuchidij aanau akemp ku antu akutwisha kuyoz. Chom ik chikutwishau kusal?

Baibel uyudil nich manangu anch tubabala ni kutongin yak yikutwisha kubudikin kurutu. (Jnsw. 22:3; Mat. 10:16) Chirumburikinap anch tufanyidin kutek yijil, pakwez chidi cha manangu kud tatuku, maku, ap mukurump mukwau kumubachikij mwan payilay ni kulejan. Anch ansand aad antwarubil ayifuvu alejen pamwing, nvaj ap mukurump mukwau uwapidil kuyital chisu chawonsu. Chakin, chikudilay mwan ni kumekesh anch wakul kal, anvaj akutwish kuman anch chiswiridikinap kand anch amulama chisu chawonsu.​—⁠Tal kand Mudimu Wetu wa Want wa Kasan 1993, Yakul ku Yipul Yen.

Chidi kand cha manangu kuvurik chisu chawonsu dichidij difanyidina pitukandamina mu motak ap pituyila ra pansh. Kubabal kufanyidina chisu chivud kukat kwipukish chak ni runeng rujim, kufutol nfalang ja rupital, ni kwikal ni chisend mu kubund mulong mu mangand minam makata kuswapal kushikij milong ku matribinal.

Chiwapin anch ansand ‘ashimana dijin dia Yehova.’ (Kus. 148:​12, 13) Mazu mau mapwitina ni ngikadil yau yiwamp mu chingand yikweting usu nakash padi antu ni yimulimishining Yehova. Anvaj, salany usu wen wawonsu mulong wa kuyikwash aanen kwinungin pichuku pichuku mu mudimu wa kulejan rusangu ruwamp ni kuyichidij ku yak yawonsu yikutwisha kubudikin!