Ov Usotil Kusal Yivud Nakash?

¹ Yesu wilikeja Want ni chipau cha usey ukash. (Mat. 13:​44-46) Mudimu wa kupalangesh rusangu ra Want chidi kand chipau chimwing cha usey nakash. Mudimu winou ufanyidin kwikal pa ndond ya kusambish mu miom yetu, ap anch kwipan sens mu mudimu winou kwitin chilik kanang cha kwitekin mipak. (Mat. 6:​19-21) Ov usotil kusal yivud nakash mu mudimu wa Want?

² Shinshikin Yitongijok Yiney ya Usey: Kudi yom kushalijan ya usey chakwel kujimbish mudimu wetu: (1) kwikal ajijamena kutek pa ndond ya kusambish mu mwom wetu yisakin ya Want (Mat. 6:33); (2) kwiyijidish ritiy ni kwengamin padiay Yehova (2 Kor. 4:​1, 7); (3) kukimb ukwash wa Yehova kusutil ku malembil ma kashinsh ni ma chisu ni chisu (Luka 11:​8-10); (4) kudandamen kulondul kamu ni kusadil kwambatan nich malembil metu.​—⁠ Jak. 2:​14, 17.

³ Mitapu Kushalijan ya Kujimbish Mudimu Wetu: Etu awonsu tukutwish kwitekin rutong ra dishin ra kusutish pakad kujing chisu kanang mu mudimu wa kulejan ngond ni ngond. ov washinshikidin nawamp mulong wa kukwat yisu yawonsu yimekena chakwel kupan uman wa kukashimun, kwikasikesh kusal mutapu wey wa kupan uman wikala urumburikina nawamp, kuvudish kuchirikinamu kwey kusu kusongishina mabuj, ni kusal usu chakwel kutakel malejan ma Baibel pakad kuziy? Ov ukutwish kwikal chibol nkwash ap wa rawonsu ap kusadil ndond yikweta kuswir kujim? Anch udi mukadivar mwin kubatishiu kal, ov ukutwish kuwanyish yitinau chakwel kwikal nkwash’a midimu ap mukurump? (1 Tim. 3:​1, 10) Ov ukutwish kujimbish mudimu wey nich kwizwish fomu mulong wa mudimu wa Betel, Shikol ya Mafundish ma Mudimu (École de formation ministérielle), ap kwilej umishoner ku Shikol ya Gilead?​—⁠Luka 10:⁠2.

⁴ Mukadivar umwing wadinga ni mudimu wa mujimbu wa chisu chawonsu ni wasutisha chisu chivud mu mijikit ya spor amukasikesha kwikal chibol wa rawonsu. Ndiy wasambisha kusal mudimu wa uchibol nkwash ni kupwa watenchika mikadil yend chakwel kwandam mu mudimu wa chisu chawonsu. Kupwa kand weza ku Shikol ya Mafundish ma Mudimu (École de formation ministérielle), shikol yamukwasha kwirijek mulong wa mudimu usadilay katat mud kalam wa munyimuku. Ukwet musangar nakash mulong wa kwitiy kukasikesh kwatambulay, ni ndiy ukwet ruchingej anch ang ukwet musangar ujim nlel, chidi mulong wakwata chiyul cha kusal yivud mu mudimu wa Want.

⁵ Yehova ukat kuyiyukish antu awonsu asotina ayinau kwikal tayad chakwel kusadil. (Isa. 6:​8, NW) Kangal walikin chom ap chimwing chikukangesha kujimbish mudimu wey ni kuman musangar ujim ni kwiswedish mud yibudikin.