Misangar ya Mudimu wa Chisu Chawonsu
Chiudia nsangarum, ukat kutongijokin chakin piur pa machuku mey ma kurutu. Jinswir 21:5 jitulejin anch “yitongijok ya mwin mushiku ya kusal yom yishikin ku kupit.” Chikez kwikal cha ukwash ku mutambu wey kutongijokin nakash piur pa jintong jey mu mwom. Chiwitenchikina mulong wa machuku ma kurutu, tongin kusambish kusal mudimu wa chisu chawonsu. Ov mulong wak?
2 Yipulap amakurump amwing asalap kal mudimu wa uchibol mu winsand wau yovil yau ni pakad kuswimp akez kulond awonsu chilik chimwing anch: “Yiniya yadinga mivu yipandikena kuwap ya mwom wam!” Mukadivar umwing wamana misangar ya mudimu wa chisu chawonsu kudiosh kamu mu winsand wend walonda mu kusut kwa machuku anch: “Anch navurik yisu ya winsand, nikat kwov musangar umwing ujim nakash ni nikutwish kulond anch kudi muntu watesha chiyul cha manangu chakwel anch: ‘Vurik Sakatang wey mu mivu ya winsand wey.’ ” (Mul. 12:1) Ansand nau ayangadim chiwapin kwitenchik katat, pamwing ni anvajen, anch usotinany kwandam mwi njil yikukutwishishanya kuman musangar wa mutapu winou mu mivu ya winsand wen.
3 Anvaj, Kasikeshinany Mudimu wa Chisu Chawonsu: Yehova, chidiay Tatuku ukata kubangin, ukulejinany chakin kamu njil ufanyidinany kulondul. (Isa. 30:21, NW) Mu kututakel mutapu winou wa rukat, ndiy ukwinkinany en anvaj in Kristu chilikej chimwing chiwamp. Pa ndond pa kuyilikidil anen atonda njil yitongidinau ayinau kwikal yiwamp, yinkishany nich manangu diyiy mwi njil yifanyidinau kulondul chakwel eza atambula yiyukish ya Yehova. Kupwa, anch apam, diyiy dien dikez kuyikwash “kwauril kuwap ni kuyip.” (Heb. 5:14) Antu amakurump ij kusutin ku yamanau kal anch kakutwishap kwikamen pa yitongijok yau; afanyidin kwikamen kamu padiay Yehova chakwel onana jinjil jau. (Jinsw. 3:5, 6) Chinech chiswiridikin kamu nakash kud ansand, mulong kijap yom yivud mu mwom.
4 Anvaj, chiyilau kusejin anen piswimp nich mivu ya winsand, ap anch asambish kal mivu ya winsand, isambany nau mu mutapu wakashinsh piur pa yitonginau kusal. In kupan yiyul mulong wa kutond shikol, alej, ni arund a shikol akez kupakish kuyibachik chakwel atonda, kulondul nakash jintong ja mapit ma mangand. Yikwashany anen kutond shikol yikutwisha kuyinkish diyiy difanyidina, dikeza kuyitwishish kuwanyish maswir mau ma ku mujimbu pakad kudiburil yisakin ya Want. (1 Tim. 6:6-11) Yisu yivud, shikol ya sekonder pamwing ni diyiy dia mudimu wa ukaliweny ap diyiy dia mudimu wa makas yikutwish kwikal yiswiridikina chakwel kuwanyish nawamp kamu yisakin ya muntu ni kusambish kusal mudimu wa uchibol wa rawonsu.
5 Yikasikeshany ansand kukudish chipan cha ujich. Anch mu kusut kwa machuku ez akwat mupak wa kwatan ap kwachik, akez kwikal tayad nakash chakwel kuwanyish nawamp yisend yijim ya uruu. (Tal paragraf wa 19 mwi wenjil wa Mudimu Wetu wa Want wa Kalol 2001, “Ov Ukutwish Kwikal Tayad Mulong wa Kusadil?”) Anch ukat kwisambinany mu mutapu uwamp piur pa mudimu wa uchibol, kusadil ndond kudia kuswir kujim kwa antwarubil, mudimu wa Betel, ni mujikit wa umishoner, ukat kwandjikany mu michim ya ansand kudiosh kamu pa wanikanch wau impu ya kusadil mwom wau mwi njil yimusangareshina Yehova, mulong wa kuwap kwa antu akwau, ni kukat kuyiletin ayinau musangar.
6 Ansand, Tekany Mudimu wa Chisu Chawonsu pa Ndond ya Kusambish: En ansand, ukwetanyap kuswir kwa kwiyipul anch mudimu wa uchibol ufaniken nich ik. Ukutwishany kupak ayinen mu chisu chikemp nich kwikal chibol nkwash chisu chin chawonsu anch chitwishikin mu chirung cha shikol ni mu chirung cha konje. Ukez kumanany mutapu mudimu wa uchibol udia chakin kamu mudimu wa musangar! Ov chitwishikin kud en kutenchik kurutu kwa chisu kwikal chibol nkwash kusambish katat ni kushiken kwisudiel kwa chishipu?
7 Anch udi mukadivar nsand mu dirijek dia Nzamb, tongin kand nakash kuwanyish yitinau chakwel kwikal nkwash’a mudimu. (1 Tim. 3:8-10, 12) Chikwau kand, kwat mupak anch usotin kwizwish fomu mulong wa mudimu wa Betel ap kuya ku Shikol ya Mafundish ma Mudimu, chisu ukeza kuwanyish chimbu cha mivu yitinau. Kusal mudimu wa uchibol kukukufundish mafundish ma usey, mud mutapu wa kulimish chisu, mutapu wa kwitenchik amwiney, mutapu wa kushakam pamwing ni antu akwau, ni mutapu wa kukudish ukaliweny wa kwikal nich yisend. Yom yiney yawonsu yikez kukutenchik mulong wa yisend yijim ya mudimu mu machuku ma kurutu.
8 Chidia cha usey nakash mu kupandakan mu mudimu wa chisu chawonsu chidi kwikal nich mushiku wa yom yambatena ni mudimu wa Nzamb. Mupostol Paul wakasikeshina mwikadil winou ni wamekesha yibudikin yiwamp yikata kumekan anch: ‘Ku midimu yawonsu yiukusalany, salany nich mushiku mudi muukata kumusadilany Yehova, . . . mulong vurikany anch, Yehova ukez kukwinkishany difut dien difanyidina.’ (Kol. 3:23, 24) Yehova akuyukishany nich misangar yivud mu mudimu wa chisu chawonsu!