“Tuyisadilany Antu Awonsu Nawamp”

¹ ‘Tulejanany Sens Dizu dia Nzamb’ ni ‘Ikalany Ampich mu Midimu Yiwamp’ yiney yidi mitu ya milong twisambina mwi wenjil wa Mudimu Wetu wa Want wa Kasan ni Rish 2002. (Kol. 1:25; 1 Tim. 6:18) Mitu ya milong yiney yatukasikesha kusal usu wetu wawonsu mulong wa kuyikwash antu in kusanger kukumangan ku Chivurikish, kuyikwash antu akad kutulang rapor kwikal kand nich yivud ya kusal pamwing ni chikumangen, ni kuyikwash anetu ni in kwilej a Baibel awanyishina yitinau chakwel kusambish kulejan rusangu ruwamp. Chakin kamu anch twasangera kupandakan kanang mud chibudikin cha mushiku wetu. Katat, “yisu yawonsu yitumena nawamp chifanyidin etu kusal nawamp kudi antu awonsu.”​—⁠Gal. 6:⁠10.

² Yitazukany Kand Kwez Kukumangan: Mu teritwar wa Mutiy wetu utadila a Congo awonsu aad, antu 450 000 ni kusut akad kal kwikal in kulejan rusangu ruwamp akat kukumangan ku Chivurikish muvu ni muvu. Mulong kwikalaku kwau kumekeshin chilik kanang cha kusanger, ov chom ik lel tufanyidina kusal chakwel kuyibachik antu inay awonsu adia ‘tayad mulong wa kutambul mwom wa chikupu’ chakwel ikala in “kwitiyij”? (Midimu 13:48) Tuyikasikeshany kwez ku yikumangan ya chikumangen mud chitwishikina.

³ Ov mulong wak kulik kumutazukap muntu kanang umekeshina kusanger kwez kukumangan ku Dilejan dia Buku dia Chikumangen chakwel asangera misamb ya uprofet wa Isay? Anch mwanamakwey ap muntu wa chijiken ni udi ku program wa kupan misamb ku Shikol ya Mudimu wa Uteokras ya rubing ra kurutu, ukutwish kumwit muntu winou kwez atesha misamb yey. Sambel bil kumwijikishamu mitu ya milong ya madiskur makezau kupan mu ambing a kurutu. (Program wa katat wa madiskur ufanyidin kumutek kwi ndond ya kukudikin yijikish.) Kimbany mitapu yawonsu ya kuvuvurish mudiay muntu impu ya kumwifukwil Yehova. Ni chakin kamu, anch kand kal asambisha kwilej Baibel ni muntu kanang udia mu chikumangan, ukutwish nich masip kumwit kwilej nend.

⁴ Dandamenany Kuyikasikesh Antu Akad Kutulang Rapor: Avud pakach pa antu akata kukumangan ku Chivurikish ipana kal ayinau kud Yehova. Pakwez, chisu chimwing awiy imika mushiku wau wa kulejan rusangu ruwamp. Pa chinech, Paul utukasikeshin ‘kusal nawamp . . . pakwez kupandakan kudi anamakwetu in ritiy.” (Gal. 6:10) Chawiy lel, antu akad kutulang rapor afanyidin kwikal antu a kusambish kutongin.

⁵ Pamwing ap amwing pakach pau akwil nawamp ku kukasikesh kwa amakurump ni antu akwau mulong wa kwipan kand mu mudimu wa kulejan. Anch akwinkish kud amakurump kusal ni mwin kulejan umwing uchirishina kand usu wend wa kulejan, ijik anch rukat rey mulong wa Yehova ni mulong wa mudimu wa chingand yikez kutung kand ruchingej mu muntu winou. Muleja mutapu wipanina mu milad kushalijan ya mudimu chakwel akutwish kutanamu musangar, ukez kudandamen nich mudimu wa kulejan, ni ukutwish kuman yiyukish ya Yehova.

⁶ Yinkishany in Kulejan Asu Mutapu Uwamp wa Kusambish: Chijikay mband umwing mwin kusanger kand kal pasuta machuku mavud anch watan kal dirijek diakin dia Nzamb, ndiy wasota kapamp kamwing kusambish mudimu wa kulejan. Kupwa kwa kwilej yitinau ku mutambu wend, ndiy walonda anch: “Nisotin kamu kusambish katat.” Anch muntu wasambishina nend dilejan dia Baibel katat amwitiyijin kal kusambish mudimu wa chingand, mukwasha amana kuswir kwa “kwikal nich yivud ya kusal mu mudimu,” ni kwikal chad lel mwin kulejan musu nich disambishil diwamp. Mukwasha kukudish chaku cha kwirijek mulong wa kubudikin pakad kujing mu mudimu wa chingand rubing ni rubing.

⁷ Anch mwaney udi mwin kulejan musu wakad kubatishiu, salany mudimu pamwing nend mulong wa kumukwash kuya kurutu kwambatan nich chimbu cha mivu yend ni ukaliweny wend. Nich ukwash ukemp udiokila kud en, ukutwish kukukashimwishany nich mutapu ukutwishay kusambish mambamb ni muntu kanang, kutang mu Baibel, ni kupan mukand. Chikezay kutan muntu umekeshina kusanger mu mudimu wa chingand, mwijidisha kuchirikinamu kusu ni kulondul kusanger swa.

⁸ Jimbishany Mudimu Wen: Ov mikadil yey yikutwishishin kujimbish mutapu wey wa kusadil mu mudimu wa kupan uman ap kwinyim kwa chirung cha Chivurikish? Ov ukutwish amboku kuwejinaku saa umwing ap aad ku asaa ukata kusutishang mu mudimu rubing ni rubing? Ov ukat kushinshikin pa kalandrie chakwel kutal chisu ukeza kusal kand mudimu wa uchibol nkwash? Ap kand, ukutwish kutenchik mwikadil wa mwom wey chakwel kwandam mu mudimu wa chisu chawonsu? Usu wawonsu tukata kusal mu mudimu ukutwish kumukwash muntu kanang kwitiy uyakin! (Midimu 8:​26-39) Pitutadila machuku ma kurutu, ‘tusotany yisu yawonsu mutapu wa kusal kuwap pakach petu ni kud antu awonsu.”​—⁠1 Tes. 5:⁠15

[Caption on page 3]

[Picture on page 3]

Dandamenany Kuyikwash:

[Caption on page 3]

[Picture on page 3]

□✔ Antu akumangena ku Chivurikish

□✔ In kulejan asambishina kand kulejan

□✔ In kulejan asu akad kubatishiu