BIBLIOTEK Udia pa Kapend
BIBLIOTEK
UDIA PA KAPEND
Uruund
  • BIBIL
  • MIKAND
  • YIKUMANGAN
  • km 3/03 map. 3 ​-​ 6
  • Ikal Nich Mushiku wa Kusal Yom Yiwamp!

Kwikil video ukimbina

Video winou umukimbinap amboku nawamp.

  • Ikal Nich Mushiku wa Kusal Yom Yiwamp!
  • Mudimu Wetu Wa Want—2003
  • Yom Yifanakena
  • ‘Tulejanany Sens Dizu dia Nzamb’
    Mudimu Wetu Wa Want—2002
  • “[Lejanany] Rusangu Ruwamp”
    Mudimu Wetu Wa Want—2008
  • Dandamen Kulejan Midimu Yishimokishena ya Yehova
    Mudimu Wetu Wa Want—2004
  • Ov Ndol 2000 ukwikal ngond wetu upandakena kuwap?
    Mudimu Wetu Wa Want—2000
Tal Yom Yivud
Mudimu Wetu Wa Want—2003
km 3/03 map. 3 ​-​ 6

Ikal Nich Mushiku wa Kusal Yom Yiwamp!

1 Pitwashikena kal pa chirung cha Chivurikish cha 2003, tukwet yiyingish yivud ya kwikal in ‘mushiku wa kusal yom yiwamp.’ (1 Pi. 3:13) Diyingish dipandakenamu didi difut dia Yesu Kristu. (Mat. 20:28; Yohan 3:16) Pa chinech, mupostol Pita wafunda anch: “En wijany anch akukwolanya ku yaku yamwamu yiwaswananya ya anshankuren. Kakukwolanyap nich yom yikata kushadish usey mudi utad wa argent, ap wa or, pakwez en akukwolanya nich mash ma Kristu makweta usey ukash. Ndiy wading mudi mwan a mukoku wa kupesh wakad kapad ap chitaj.” (1 Pi. 1:​18, 19) Kujikitish mulong wa chisal chinech chimekeshina rukat ra pakampwil kwawiy kutubachikina kukwatakan nakash ayinetu mu kusal yom yiwamp, nich kujingunin anch Yesu “wipana amwinend mulong wa kutukamunin etu ku kuyip kwawonsu, ni kutwikadish etu zwang, antwend a pa kampwil, antu akweta mushiku wa kusal yom yiwamp.”​—⁠Titus 2:14; 2 Kor. 5:​14, 15.

2 Pitukata kusal chom chisangareshina ku mes ma Nzamb, tukat kusanger kwikal nich urund uwamp nend ndiy ni tukat kwikalang mwishin mwa diking diend dia rukat. Pita walonda kand anch: “Muntu mwawonsu ukatila kusanger mwom uwamp, . . . Chifanyidin ndiy kukarumuk kudiokal ku kuyip, chad asala yom yitentamina [yiwamp, NW], adandamen kand kusurab chisambu. Mulong mes ma Nsalejetu [Yehova, NW] mayitadil in kutentam, ni matu mend makat kutesh kulembil kwau.” (1 Pi. 3:​10-12) Mu yisu yiney ya mar, chidi chiyukish mud ik kwijik anch mes ma Yehova matutadil ni udi tayad chakwel kutukwash, chakwel “[kutulam] mudi kanadis ka dis diend.”​—⁠Kuv. 32:10; 2 Jins. 16:​9, NW.

3 Yikalap nchik yoziu yarishau nich, in Kristu a kusambish afundinau kud Pita ading izwila too nich mushiku wakad kutwish kwimik, ni alejana rusangu ruwamp mu mutapu ujim utwishikina. (1 Pi. 1:6; 4:12) Chidi kand chakin ku mutambu wa antu a Nzamb nlel unou. Ap anch tudi mu “machuku ma kwisudiel ma mar nakash,” kujikitish mulong wa kuwap kwa muchim wa Yehova kukat kutubachik kusal nich mushiku rusot ra Nzamb. (2 Tim. 3:1; Kus. 145:⁠7) Tushinshikinany yimwing ya midimu yiwamp yitukeza kukwatakan nich mu chirung cha Chivurikish.

4 Kuyitazuk Antu Akwau Kwez ku Chivurikish: Njil yimwing tukutwisha kumekeshin kujikitish kwetu mulong wa chipan cha pakampwil cha difut yidi kwikalaku ku chivurikish cha kapamp kamwing pa muvu cha rufu ra Yesu, chikeza kusadik muvu unou Diakasatu, Ndol 16, kupwa kwa muten kuzwek. (Luka 22:​19, 20) Muvu wasutina ou, yikumangen 94 600 mu mangand mawonsu yaletin rapor way, twikadin nich uvud ujim wa in kukumangan 15 597 746! Kwiwejidin antu 220 000 kupandakanamu uvud wa muvu wasutina ou.

5 Ov mutapu ik ukukumanganau antu avud muvu unou? Kukumangan kwau kukwengamin nakash pa usu tukusala nich mushiku mulong wa kuyikasikesh antu akwau kukumangan netu pamwing. Sambish nich kufund dilondurish dia majin ma antu in awonsu usotila kutazuk. Kwinsambishil kwa dilondurish kufanyidin kwikal majin ma antu a mu dijuku diey. Ang ukwet murund wakad kwitiyij, mekesh yovil ya muchim wey ya kusot anch niyend akumangana pamwing ney. Ikundj umwing wakad kwitiyij walonda anch ndiy wakumangana ku Chivurikish muvu wasutina ou mulong wading kwend ni kusot kuman mutapu ik kwikalaku kwend kukutwisha kumusangaresh nakash mukajend. Cha kaad pa dilondurish diey pafanyidin kwikal majin ma anamakwey, amutej ney, arund ney a mudimu, ap arund ney a shikol. Ikal nich kashinsh ka kuyitazuk antu ukata kwilej nau Baibel.

6 Kupwa kwa kufund dilondurish diey, itekina chisu cha kumutwadil muntu ni muntu diladikij. Sadil dipaper dia diladikij dia Chivurikish. Chakwel kuyikwash antu kuvurik chisu ni ndond kukusadikina Chivurikish, fund chisu ni ndond ku chikusadikina kwishin kwa dipaper dia diladikij. Mulong Ndol 16 washejin kal piswimp, yivurisha antu akweta majin pa dilondurish diey, sal usu wa kumanijan nau ap kusutin ku telefon. Tuyikwashany antu avud mud chitwishikina chakwel eza ku chinship chinech chitumbila nakash.

7 Yikwasha Antu Akumangena ku Chivurikish: Urel wa Chivurikish uding chisu chin chawonsu urel umwing wa musangar. Tukweting chisu cha kuyak antu akad kukumanganang netu chisu ni chisu ku yikumangan yetu. Irijeka chakwel kwez kurutu kwa chisu ni kuchirik kwinyim kwa antu awonsu, mud muchitwishikina kulondulijan nich mikadil ya pol pen. Ikal wa kusambish kusot kwijikijan nau antu asu adia mu antu akukumangana. Ikal mwin chirungil ni mwin kwakan.​—⁠Rom 12:⁠13.

8 Ov chitwishikin kuyikwash antu amwing akumangena ku Chivurikish kuya kurutu muspiritu kusutil ku dilejan dia Baibel? Sal usu wa kwijik majin ni maadres ma angendj amwing akadiau kwendil katat chakwel anch umana mutapu wa kuyikwash. Nich ukwash wa rukat, amwing pakach pa antu inay akutwish kuya kurutu kushik ni ku kuwanyish yitinau chakwel kwikal in kulejan akad kubatishiu kurutu kwa Chivurikish cha muvu ukwezap ou. Piuyilany ni kuyendil antu akumangena ku Chivurikish, yitazukany kwez ku diskur dia pakampwil dikusadika pa Ndol 27.

9 Ov Ukutwish Kwikal Chibol Nkwash pa Rish ni Ndol? Muvu ni muvu mushiku wetu mulong wa Yehova ukat kutubachik kwipan nakash mu mudimu wa kulejan pa chirung cha angond a mujikit wa pakampwil wa uteokras. Usu wa chikumangen ukungidinau pamwing chakwel kulejan rusangu ruwamp nich mushiku pa chirung cha Chivurikish ukutwish kwikal nich yibudikin yiwamp.

10 Chikumangen chimwing cha in kulejan 107 ni ayibol a rawonsu 9 chashimunina anch ngond wa Ndol wasutina ou wadinga “ngond umwing wa pakampwil”, chadinga ni ayibol ankwash 53, pakach pau amakurump ni ankwash’a midimu awonsu. Mutapu ik washikenau amakurump ku kukudish kusanger kusal mudimu wa uchibol nkwash pa ngond winou? Asambela kurutu kwa chisu kuvuvurish kusanger kwau, ayikasikesh antu avud mud chitwishikina kufundish majin mau. Yikumangan ya mudimu wa chingand yasadika pa yisu kushalijan muten wa kabuj kwambatan nich chisu cha antu awonsu adia mu chikumangen. Akasikeshina nakash uman wa ku telefon, nakash kand mulong wa ayibid.

11 Nambaz umwing ukweta mivu 86, chading chimukasikedin kwend mulong wa mayej, wizwisha fomu wa uchibol nkwash. Kusambish kamu pamanch, ndiy watwisha kusal asaa aad a kupan uman wa ku telefon pashichay ku tebur mwi mpish, wiswedishaku asaa akemp, ni kupwa wachirik kand ni kusambish kand kupan uman ku telefon. Muntu umwing wisambay nend wafisha nfumwend ni anend amakundj aad a dikum dia mivu mu mivu yaad yasutina ni katwishap kutesh mulong wak Nzamb ulikin yom yiyimp mud yiney yishikena. Wapana uman umwing uwamp, ni kusambish dilejan dia Baibel. Uman wa ku telefon pa yisu ya urel ni pa yisu yikwau yidi njil yimwing yiwamp ya kwisamb ni antu ashichinga mu yikumbu yijim ap mu miab yakad kutwish kushik. Kukat kand kuyitwishish in kulejan kwisamb ni antu akad kwikalang kwol kwau pa yisu ya muten.

12 Amakurump apwisha rapor wau nich kulond anch: “Twikala nich chisu chinech chisangareshina ni tusanger mulong wa chisend chinech cha pakampwil ni yiyukish yatwishishinay Yehova mulong wa muntu umwing ni umwing wa pakach petu.” Nich kutenchik program muwamp, chikumangen chen ni chawiy chikutwish kand kusanger yiyukish mud yiney.

13 Ikasikesha Mulong wa Kusadil Chisu Chawonsu mu Mudimu: Rukat retu pantaliken nend Nzamb ni mutej netu ritubachikin kwitekin chisu ngond ni ngond cha kulejan rusangu ruwamp kud antu akwau. (Mat. 22:​37-39) Atulam a Dilejan dia Buku dia Chikumangen ni ankwash au afanyidin kusal usu chakwel kuyikwash antu adia mu chisak chau chakwel kusadil pamwing mu mudimu ngond ni ngond. Njil yiwamp ya kusal mwamu yidi kusutil ku kwitenchik kurutu kwa chisu chakwel kusadil pamwing mu mudimu ni antu kanang a mu chisak. Pa ndond pa kuchingel djat kwisudiel kwa ngond chakwel kusal mwamu, chiwapidil kusambish kamu kurutu kwa chisu. Chinech chikez kukwinkish yisu yivud ya kupan ukwash wa rukat.

14 Ov kudi in kulejan ayibid mu chisak chey cha dilejan dia buku amena anch chiyikasikedin nakash mutapu wa kubudikin mu mudimu wa kulejan? Ang amwing adi mu yikumbu ya kulamin ayibid ap anch ashich kwol kwau, choviken kamu nawamp anch yisu yau ya kupan uman yikwikal yikemp. Pakwez anch akat kusadil yisu yau yikemp mulong wa kulik kutok kwau kumunyika, akutwish kuyibachik antu amena midimu yau yiwamp chakwel kumekesh kusanger mu uyakin. (Mat. 5:16) Atulam a dilejan dia buku afanyidin kushinshikin anch antu inay ij anch niyawiy akutwish kupan rapor wa mudimu wa chikunku ap cha aminit 15. Kutwish kupan rapor wa chisu chisutishinau mu kupan uman kukat kuyikasikesh in kulejan inay ashinshamena, ni kukat kuyisangaresh nakash. Chikat kukwash kand kushinshikin anch rapor wa mangand mawonsu wa mijikit ya antu a Nzamb udi wa kashinsh.

15 Ansand Akwatikena Nakash mu Kusalang Yom Yiwamp! Chisangareshin mud ik kuyiman ansand in Kristu pasadidilau usu wau mu mudimu wa Yehova! (Jinsw. 20:29) Ang udi nsand, ov mutapu ik ukutwisha kumekesh mushiku wey mulong wa Yehova mu chirung chinech cha angond a pakampwil a mijikit?

16 Ang kand kal wikala mwin kulejan wakad kubatishiu mu chikumangen, ov ukutwish kusal usu wa kushiken chisend chinech? Iyipula amwiney yipul yilondwila ey: ‘Ov nikwet ronganyin ra pa dishin ra uyakin wa Baibel? Ov nisotin kusadil pamwing mu mudimu wa Want? Ov nidi chilikej chiwamp mu mwikadil wam? Ov nikutwish amwinam kulejan patok ritiy ram kusutil ku kuyilej antu akwau rusangu ruwamp? Ov muchim wam winbachikin kusal mwamu?’ Ang ukutwish kwakul anch inge ku yipul yiney, isamba komb ni anvajey piur pa kusot kwey kwikal mwin kulejan. Anvajey akutwish kwisamb ni umwing wa amakurump adia mu komite wa mudimu.

17 Ang wikadil kal mwin kulejan wa rusangu ruwamp, ov ukutwish kwisakin konje ku shikol chakwel kujimbish kusadil kwey mu mudimu? Nich program muwamp pamwing ni ukwash wa anvaj ni wa antu akwau, ansand avud abatishau kal atwishin kusal mudimu wa uchibol nkwash. Ang chinech chitwishikinap, ikwatina chiyul cha kukudish kusadil kwey mu mudimu wa chingand. Itekina rutong rey amwiney. Ku rutong ra kusutish asaa kanang mu mudimu wa chingand, itekina kand rutong rikwau ra kuwapish ngikadil ya mudimu wey. Pamwing ap ukutwish kwikasikesh chakwel kwisambin mufund ap umwing ku chis ni chis, wapish ngikadil ya kuchirikinamu kwey kusu, sambish dilejan dia Baibel, ap kujimbish mudimu wey chakwel kuwejinaku kupan uman wa ku telefon ap milad yikwau ya mudimu. Ov chidi nchik piur pa rutong ra kwikal ni mutej, murund wa kushikol, ap mwanamakwey ukutwisha kutazuk chakwel kuya ney pamwing ku Chivurikish cha muvu unou? Anch wasal kamu nakash mijikit ya uteokras chinech chikez kwikal chipitishina ni kuyikasikesh chakin kamu antu akwau adia mu chikumangen.​—⁠1 Tes. 5:⁠11.

18 Yikwasha Antu Asu Kuya Kurutu: Mu muvu wa mudimu wasutina ou, mwayen wa malejan ma Baibel matekedilau ngond ni ngond mu Congo-Kinshasa wading wa 224318, ni mwayen wa 14192 mu Congo-Brazzaville. Pa kusut kwa chisu, avud pakach pa in kwilej inay akez kuya kurutu kushik ni ku kwipan ni kubatishiu. Pakwez, kurutu kwa kushiken rutong riner, tufanyidin kuyikwash chakwel awanyisha yitinau chakwel kwikal in kulejan a rusangu ruwamp. Riner ridi rizau rimwing ra usey nakash mu kuyilej antu asu chakwel kwikal in kwilej a Yesu Kristu. (Mat. 9:9; Luka 6:40) Ov ukwet mwin kwilej Baibel udia piswimp ni kushiken rizau riner?

19 Ang ukwetap kashinsh ka kuya kurutu kwa mwin kwilej ney, kimb ukwash kud kalam wa dilejan dien dia buku ap kud kalam’a mudimu. Pamwing ap ukutwish kumutazuk kwinung ney pa chisu wilejinany ni mwin kwilej. Akadivar inay akwet ukaliweny ufanyidina ukutwishau kusadil chakwel kwilik kuya kurutu kwa muspiritu kwa mwin kwilej. Akutwish kwikal nich yiyul yikutwisha kumukwash mwin kwilej kuya kurutu muspiritu.

20 Ang mwin kwilej wamekesh kusanger kwikal mwin kulejan wakad kubatishiu ni anch waman anch wawanyish kal yitinau, isamba nend kalam-ntakel. Ndiy ukutenchik chakwel amakurump isamba ney pamwing ni mwin kwilej mulong wa kushinshikin anch uwanyish yitinau, nich kusadil jinsangu jidia pa paj wa 98-99 mu buku Notre ministère. (Tal Tour de Garde wa Kalang 15, 1988, paj wa 17.) Ang amwitiyij mwin kwilej kwikal mwin kulejan, ufanyidin kamu kusambish ku mwijidish mu mudimu wa kulejan kudiosh kamu pinipa. Ang wapan kapamp ka kusambish rapor wa mudimu wa chingand, akwijikish chikumangen anch mwin kwilej wikal kal mwin kulejan wakad kubatishiu. Tuchingejin anch tunan ni tunan twa in kulejan asu, ansand ni amapal awonsu, akutwish kushiken pa chilik chinech mu kukul kwau kwa muspiritu mu chirung cha angond inay a pakampwil a mujikit.

21 Kwitenchik Kukwashin Chakwel Kuwanyish Yom Yipandakena Kuwap: Kusambel kwitenchik kurutu kwa chisu kukez kukwash nakash kutwish kusal mijikit yetu ya uteokras mu chirung cha Chivurikish. (Jinsw. 21:⁠5) Kudi yom yivud yifanyidinau amakurump kuta muchim ku mutambu wau.

22 Chakwel kukwash chikumangen kusal mutapu ujim mu mudimu wa chingand, amakurump afanyidin kusal yitenchik yifanyidina chakwel kusal yikumangan mulong wa midimu ya chingand mu chirung cha rubing rawonsu ni pa dichuku Diampos ni Diarubing. Kalam’a mudimu ndiy, ufanyidina kutakel mu kusal yitenchik yiney. Ov kudi kuswir kwa kutenchik kusadik kwa yikumangan yikwau ya mudimu pamanch nakash, ap urel nakash? Chifanyidin kwijikish chikumangen mulong wa yitenchik yiney. Chikutwish kwikal cha ukwash nakash ang program winou amulamik ku tablo wa yijikish.

23 Amakurump afanyidin kushinshikin anch yitenchik mulong wa Chivurikish ayitenchikin nawamp kurutu kwa Ndol 16. Mu yitenchik yiney mudi kand kurijek mutapu wa kusadil Chot cha Want pamwing ni yikumangen yikwau yikutwisha kukumangenamu, kukomb Chot cha Want, kutond in kwak angendj ni in kusutish mukat ni nviny, ni kwikal nich yijingidij. Chifanyidin kwijikish chikumangen chisu ni ndond yikusadinau Chivurikish ni yikarumun yin yawonsu piur pa program wa yikumangan ya rubing rinira. Kuwanyish yom yiney yawonsu nich mushiku kukez kutwishish ‘kusadik nawamp kwakad kurumbangan’ kwa chivurikish.​—⁠1 Kor. 14:⁠40.

24 Mitu ya majuku yikutwish kusot kusadil chisu chikatau kusal dilejan dia dijuku diau chakwel kwisambin mutapu ukutwisha dijuku kusadil pamwing mu mujikit ujim pa chirung cha Chivurikish. Ov dijuku diey diawonsu dikutwish kusal mudimu wa uchibol nkwash? Ap anch dijuku dikutwish kumukwash chid chimwing ap yivud kusal mudimu wa uchibol nkwash? Ang chinech chitwishikinap, itekinany mipak yifanyidina mu dijuku chakwel kusutish chisu chivud mu mudimu wa kulejan. Ov kudi mwanikanch mu dijuku, ukutwisha kuwanyish yitinau mulong wa kwikal mwin kulejan wakad kubatishiu, kusutin ku dikasikesh dikemp ni ukwash ukemp? Ov dijuku diey dikutwish kutazuk antu inch kwez ku Chivurikish cha muvu unou? Kwitenchik kuwamp kukez kulet yiyukish yivud ni musangar ku dijuku diey.

25 Isakina Sens Chisu Chishadilaku: Payifundinay in Kristu a mu mivu chitot ya kusambish, mupostol Pita wayivurisha kuswakal kwa yisu mulong disudiel dia ditenchik dia yom dia in Yuda diadinga diasejin kal piswimp nakash. (1 Pi. 4:⁠7) Nlel uman wawonsu ulejen anch disudiel dia ditenchik dia yom diawonsu dia katat diasejin kal piswimp. Dichuku ni dichuku, mashakamin metu mafanyidin kumekesh kwitiyij kwinoku. Chitudia atushalapol a Yehova akweta mushiku, tufanyidin kwasin nakash pa kuswakal kwa mudimu wa kulejan rusangu ruwamp.​—⁠Titus 2:​13, 14.

26 Katat chawiy chisu cha kumekesh mushiku ni cha kusal! Tongijokin pa chom chasalay Yehova mulong weyey, mulong wa dijuku diey, ni mulong wa chikumangen. Ap anch tukutwishap kumufut mulong wa mitapu yivud yatuyukishay, tukutwish kumwifukwil Yehova nich mupim wetu wawonsu. (Kus. 116:​12-14) Usu wetu wa mushiku ukez kwikal uyukishinau kud Yehova. (Jinsw. 10:22) Twikalany etu awonsu nich ‘mushiku wa kusal yom yiwamp’ pa chirung chinech cha pakampwil cha mujikit ujim, “chakwel mu yom yawonsu antu akumushiman Nzamb mu Yesu Kristu.”​—⁠1 Pi. 3:13; 4:⁠11.

[Caption on page 3]

[Picture on page 3]

Uvud wa Antu Akumangena ku Chivurikish mu Mangand Mawonsu

1999 14088751

2000 14872086

2001 15374986

2002 15597746

[Caption on page 4]

[Picture on page 4]

Ov Nany Ukutazuka ku Chivurikish?

□ Anamakwey

□ Amutej ney ni antu a chijiken

□ Arund a mudimu ni a shikol

□ Antu ukata kwendil ni in kwilej a Baibel

[Caption on page 5]

[Picture on page 5]

Yikwasha Antu Akumangena ku Chivurikish

□ Yaka nich chirungil

□ Dandamen kuyendil

□ Yita kwilej nau Baibel

□ Yitazuka kwez ku diskur dia pakampwil

[Caption on page 6]

[Picture on page 6]

Ov Yom ik Utongidina Kusal pa Chirung cha Chivurikish?

□ Kutazuk muntu kanang kwez kukumangan ku Chivurikish

□ Kuwanyish yitinau chakwel kwikal mwin kulejan wa rusangu ruwamp

□ Kusutish uvud wa asaa kanang mu mudimu

□ Kuya kurutu mu milad yikwau ya mudimu

□ Kusal mudimu wa uchibol nkwash

    Mikand ya Uruund (1999-2025)
    Budik
    Andam
    • Uruund
    • Kwangan
    • Yom ukatina
    • Copyright © 2025 Watch Tower Bible and Tract Society of Pennsylvania
    • Mbil ja Kusadin
    • Mbil ja Ujindj
    • Paramètres de confidentialité
    • JW.ORG
    • Andam
    Kwangan