Dandamen Kulejan Midimu Yishimokishena ya Yehova
1. Yisu midimu yimwing yishimokishena ya Yehova yiukata kusanger pakampwil?
1 Kwikil muntu ap umwing wilikena ni Nzamb wetu mujim, Yehova! David wafunda anch: ‘A Yehova, Nzamb wam, midimu yivud ya ufun yiwasala kal Ey, ni yitongijok yiutongila kudi etu; kwikil ukwilikana ney.’ (Kus. 40:5) Mu midimu yishimokishena ya Yehova mudi mangand matangay, Want wa Mesia, yisal ya ranaken pa antwend, ni mudimu wa kulejan pa mangand mawonsu. (Kus. 17:7, 8; 139:14; Dan. 2:44; Mat. 24:14) Kumukat kwetu Yehova ni kusanger yom yawonsu yasalay yitubachikin kuyilej antu akwau rusangu rend. (Kus. 145:5-7) Pa Rish, Ndol, ni Ndol-Mem, tukwikal nich dilau dia kulejan chipandikenamu.
2. Mutapu ik tukata kutaninamu ayinetu mu uchibol nkwash?
2 Mud Chibol Nkwash: Ov, ukutwish kutenchik program wey chakwel kusal asa 50 mu mudimu mwi ngond umwing ap avud mu angond inay a mujikit wa pakampwil? Chakin kamu yitenchik yawonsu ukusala mu program wey yikwikal ya usey. (Ef. 5:16) Antu avud amen anch kusal mudimu wa uchibol nkwash kwayikwashin kuwapish mudimu wau. Ikala ayifuvu mu kulejan ku yis ni mu kusadil Baibel. Kusutish chisu chilemp mu mudimu kukat kuswapej kuyichirikin antu atanau amekeshina kusanger, ni amwing ading akad kutakel dilejan dia Baibel asambisha kutakel pasalau uchibol nkwash. Mulong uchibol nkwash witin kwipan kwetu ayinetu chakwel kuyikwash antu akwau, udi mujikit wa musangar nakash.—Midimu 20:35.
3. Ov, mutapu ik watwishau amwing kusal uchibol nkwash yikalap nchik milong ya mikadil?
3 Kangal walond swa anch mikadil yey yikutwishishinap kusal uchibol nkwash. Mukurump umwing wasala uchibol nkwash muvu wadiap ou ukwet an aad ni mudimu wa chisu chawonsu. Mutapu ik wasalay mukadivar winou ukwatikena mwamu? Mutapu wasalangay mudimu mu rubing, watonda kulejanang kwinsudiel kwa mbing, kusambishin kulejan mu mikombil pa 7:00 pamanch Diampos din diawonsu. Antu avud mu chikumangen ading mu mikadil mud yiney asala uchibol nkwash, ni akwashijana ni kukasikeshijan umwing ni mukwau. Mu chikumangen chikwau, nambaz wa mivu 99 wakwata mupak wa kusal uchibol pa Ndol-Mem pamuladikijau kud mwanend mband kushakam nend. Akwau mu chikumangen amukwasha nambaz ipal winou kuyang ku chis ni chis ni ku malejan ma Baibel ni kumubachik mwi nkwas ya chilangumun. Walejena kand kwi nshing, mu mukombil, ni ku kufund mikand. Ndiy witiyija anch mudimu winou kausalap ku usu wend amwinend pakwez wausala ku ukwash wa Yehova. —Isa. 40:29-31.
4. Yom ik tufanyidina kushinshikin pitusadila program wa uchibol nkwash?
4 Pakish kutek program ukwatijadina nich mikadil yey. Sampul wa maprogram madia mwinomu am makutwish kukukwash. Ov, ukat kusal mudimu wa chisu chawonsu anch uyiling ku shikol? Ukutwish kusadil chakusambish program wa kwinsudiel kwa mbing. Anch ukwet yikokujol ya ukash wa mujimbu ni usu wey ukukangeshin kusal mudimu machuku mavud, program witina asa akemp dichuku ni dichuku ukutwish kwikal muwamp nakash. Yilejamu akwen maswir mey ma kusal mudimu wa uchibol nkwash. Pamwing ap asotil niyau kwitekin rutong ra kuusal.
5. Ov, ntong ik jikutwishau kwitekin ansand pa Rish, Ndol, ni Ndol-Mem?
5 Mitapu Yikutwishau Ansand Kusadil: Yehova ukat kusangar palejenau ansand midimu yend yishimokishena. (Kus. 71:17; Mat. 21:16) Anch udi nsand wabatishiwa kal, pamwing ap ukutwish kusal mudimu wa uchibol nkwash mwi ngond wa konje. Anch ukutwishap kusal mud chibol nkwash, ov, ukutwishap kwitekin ntong ja pakampwil ja kuwapish ukaliweny wey wa mudimu wey mwa angond inay? Anch ukat kusal mudimu nau anvajey pakwez udiap ntwarubil wakad kubatishiu, katat chikwikal chisu chiwamp cha kuwanyish yitinau. Uswiridinap kwiyov anch ufanyidin kwikal mwin nkeu mu kwakul yipul ya Baibel ap kwikal wija yivud mud amakurump abatishau kal. Ov, wovil kurumburik kwa malejan madishin ma Baibel? Ov, wambatijadin nich yany yiwamp ya Baibel? Ov, usotil akwijik mud umwing wa Atuman’a Yehova? Anch mwamu yileja anvajey. Akutwish kwitenchik kuyiman amakurump chakwel kwijik anch uwanyishin yitinau. —Tal buku Notre Ministère, mapaj ma 98-99.
6. Ov, mutapu ik tukutwisha kuyikwash in kwilej Baibel ikala in kulejan rusangu ruwamp?
6 Yikwasha Antu Akwau Kulejan: In kwilej Baibel akutwish kuwanyish yitinau chakwel ibomba netu mud in kulejan mwa angond ezina kurutu a mujikit wa pakampwil. Anch ukwet mwin kwilej Baibel uyila kurutu, it ukwash kud kalam’a dilejan dia buku ap kalam’a mudimu. Umwing wau ukutwish kwibomb ney ku dilejan chakwel kutal kupam kwa mwin kwilej. Anch mwin kwilej uwanyishin yitinau ni uswiridin kwikal mwin kulejan, kalam ntakel ukutwish kutenchik amakurump aad amanijan ney pamwing ni mwin kwilej. (Tal Tour de Garde wa Kalang 15, 1988, paj wa 17.) Anch amwitiyij, sambish kapamp kamwing kumufumb mu mudimu.
7. Mutapu ik tukutwisha kuyikwash in kulejan akata kusal pa chipatu ni akad kusal mudimu kudiosh palemp?
7 Atulam’a malejan ma buku afanyidin kubangin pakampwil muntu mwawonsu wakad kusalang kand mudimu ni ukata kusal pa chipatu mu chirund chau. Yiladikija amwiney pakampwil chakwel uya nau mu kulejan. Anch alika kal kusal mudimu kudiosh palemp, chidi cha manangu amakurump aad isamb nau chakwel kuman anch awanyishin yitinau. (Tal Yakul ku Yipul Yen mu Mudimu Wetu wa Want wa Kalang 2000.) Mushiku wa chikumangen wa kulejan mwa angond inay a mujikit wa pakampwil ukutwish kuyikasikesh kand kusal mudimu wa kulejan pakad kujing.
8, 9. Yom ik yifanyidinau amakurump kusal chakwel kukasikeshin kuzangurok mulong wa mujikit wa pakampwil?
8 Irijeka Katat Mulong wa Mujikit Ujim: Amakurump, sambishany kamu katat kukasikesh kuzangurok mu chikumangen mulong wa mudimu wa uchibol nkwash. Ukutwishany kuyikasikeshin nakash ku kulond kwen ni ku chilikej chen chiwamp. (1 Pi. 5:3) Ov, chikumangen chashikedin ayibol ankwash inch muvu wadiap ou? Ov, ukutwishap kusut muvu unou? Atulam’a malejan ma buku nau ankwash au afanyidin kukimb mitapu ya kuyikasikesh awonsu mu chirund kuwejinaku mujikit wau. Atulam’a mudimu akutwish kuwejinaku program wa yikumangan ya mudimu wa chingand. Ijikish chikumangan kurutu yarijekinau. Shinshikany anch in kulejan ayifuvu ayitonda chakwel kutakel yikumangan ya mudimu kusambish ni kupwish pa chisu. (Tal Yakul ku Yipul Yen mu Mudimu wetu wa Want wa Mwinses 2001.) Kalam’a mudimu ufanyidin kand kurijek teritwar uwanyidina, magazet, ni mikand.
9 Muvu wadiap ou amakurump a chikumangen chimwing asambisha kuzangurok mu Rish, Ndol ni Ndol-Mem chakwel kukasikesh mudimu wa uchibol nkwash, avud pakach pau izwisha mafomu. Atenchika yikumangan ya mudimu wa chingand yikwau—chimwing pa 5:30 pamanch mulong wa kupan uman wa mwinjil, chikwau pa 3:00 kupwa kwa midi mulong wa ansand a shikol, ni cha kasatu pa 6:00 urel mulong wa adiokila ku mudimu. Awejinaku ni kutenchik yikumangan yisatu ya mudimu wa chingand pa machuku ma Diampos. Chikumangen chikala nich ayibol ankwash 66 mwi Ndol!
10. Ov, mutapu ik majuku makutwisha kwirijek chakwel kuwejinaku mujikit wau?
10 Ov, ukutwishanyap kurijek program pa chisu cha kwilej kwa dijuku kwambakedinap chakwel kutek ntong ja kusadil angond a kurutu? Nich kwovijan kuwamp ni kwitenchik, amwing ap awonsu mu dijuku akutwish kusal uchibol nkwash. Anch chikasiken, itekina ntong ja kuwejinaku mujikit wey kupandikan muukata kusal pa yirung ap wejinaku yisu ya kulejan. Lembil pa mulong winou ni dijuku diey. Ikal nich kashinsh anch Yehova ukuyukish usu wey.—1 Yoh. 3:22.
11. (a) Yom ik yishimokishena yawanyisha yakupesh ya Kristu? (b) Ov, chisu ik ni ndond ik ya kusadil Chivurikish pol pen?
11 Mudimu wa Nzamb Ushimokishena Chipandikena: Chimekesh chipandikena kujimb cha rukat ra Yehova yidi yakupesh ya Mwanend mud difut mulong wetwetu. (1 Yoh. 4:9, 10) Difut dia kupesh didi dishin dia kukolik ku chitil ni rufu kwa antu . (Rom 3:23, 24) Mash ma Yesu michika mimika manswik masu, kwayitwishisha antu akad kuwanyin kwikal an a Nzamb nich ruchingej ra kuyikel mud ant mu Want wa mwiur. (Jer. 31:31-34; Mar. 14:24) Cha kusambish, kuziyin kuwanyidina kwa Yesu kwatumbisha dijin dia Yehova. (Kuv. 32:4; Jinsw. 27:11) Diarubing, Ndol 4, pa kwandam kwa muten, kukez kwikal kuvurik Chivurikish cha rufu ra Kristu mu mangand mawonsu.
12. Ov, mutapu ik kukumangan ku musambu wa Yakudia ya Urel ya Mwant kukuyikwasha antu asangaredina?
12 Musambu wa Yakudia ya Urel ya Mwant utumbishin midimu yishimokishena ya Yehova. Minsamb yikasikeshin kurumburik ni kujikitish kwa yom yasalay Yehova mu kutenchik difut. Amekeshina kusanger akumangena akutwish kuman midimu yikwau yishimokishena ya Nzamb. Akutwish kuman umwing ni rukat ra chirungul riyifundishinay Yehova antwend kumekesh. (Ef. 4:16, 22-24; Jak. 3:17, 18) Kukumangan pa chisu chinech cha usey kukutwish kwikal nich usu pa kutong kwa muntu, komb tusotin antu avud ikalaku.— 2 Kor. 5:14, 15.
13, 14. Ov, nany tufanyidina kuladikij ku Chivurikish, ni mutapu ik?
13 Yiladikija Antu Akwau Kukumangan: Sambish katat kurijek dipang dia antu ukuladikija. Pa dipang diey pafanyidin kwikal majin ma in dijuku diey akad kwitiy, ansulangan ney, antu wijikijadina nau ku mudimu ap ku shikol, in kwilej Baibel asu ap akuru, ni antu asu uyila ni kutal. Atulam’a dilejan dia buku afanyidin kufund pa dipang diau in kulejan awonsu akad kusalang kand mudimu.
14 Sadil mapaper ma diladikij ma Chivurikish machapinau kal ni kufundap chisu cha kusambish ni ndond ya kusadil Chivurikish. Ap ukutwish kusadil diladikij didia pa chibur cha nsudiel cha Tour de Garde wa Rish 15, 2004, ap Réveillez-vous ! wa Rish 22, 2004. Chisejinay Ndol 4 piswimp, yivurisha antu adia pa dipang diey, yang uyital ap kwisamb nau ku telefon.
15. Ov, mutapu ik tukutwisha kuyak nawamp antu urel wa Chivurikish?
15 Ku Chivurikish: Pakish kushik kurutu kwa chisu urel wa Chivurikish. Yakany aeny ni kuyinkish moy wa chirungul. (Rom 12:13) Ukwet chisend cha pakampwil mulong wa angendj waladikijang. Yaka nawamp, ni yijikisha kud antu akwau a mu chikumangen. Pamwing ukutwish kushakam nau piswimp. Anch kakwetap Baibel ap buku wa miminy, irijeka chakwel atanga ney pamwing ap ni muntu mukwau. Kupwa kwa musambu, irijeka chakwel kwakul yipul yawonsu yikwetau. Anch amwing kadi kapamp ka kusambish, yipula anch asotil kwilej yivud piur pa Dizu dia Nzamb ni rutong rend. Yileja ya kwilej nau Baibel ku chikumbu.
16. Ov, yom ik tufanyidina kusal chakwel kuyikwash akumangena kuya kurutu mu spiritu?
16 Dandamen Kuyikwash Antu Akumangena: Mwi mbing jambakedinap Chivurikish, antu akumangena akutwish kuswiriken ukwash nakash. Kudi kand antu adinga kukumangan nich mushiku ku yikumangan, pakwez katat ezin pa chipatu ku chikumangen. Amakurump akez kutal anch antu inay kayivuramedinap. Awapidil kwijik mulong wak kayilap kurutu mu spiritu. Yikasikeshinany pa mulong wa chisu chiyila swa. (1 Pi. 4:7) Yikwashany awonsu kuman usey wa kuziyin dikasikesh dia Mufund diengamidina pa kukumangan pamwing nau antu a Nzamb pakad kujing.—Heb. 10:24, 25.
17. Ov, mulong wak tufanyidina kudandamen kulejan midimu yishimokishena ya Yehova?
17 Midimu yishimokishena ya Yehova yidi yikash kud etu kutesh kurumburikin nawamp ap anch twashakam chikupu. (Job 42:2, 3; Mul. 3:11) Chawiy lel, kitukezap kuburen yom ya kumutumbish nich ndiy. Tukutwish kumekesh kujikitish kwetu pa chirungu chinech cha Chivurikish mulong wa midimu yishimokishena ya Yehova ku kusal usu wa pakampwil wa kujimbish mujikit wetu.
[Caption on page 1]
[Study Questions]
[Caption on page 5]
Ov Ukutwish Kusal Uchibol Nkwash Nich Kusadil Umwing wa Maprogram minam?
[Picture on page 5]
Rish
[Picture on page 5]
Diar. Dia M* Dia Kaad* Dia Dia Dia Katan Diampos Ngond
Kasatu *Kanying Uvud
Dichuku ni Dichuku 2 1 1 1 1 1 5 51
Machuku Maad 0 5 0 5 0 0 0 50
Nsudiel ya Rubing Kusu 5 0 0 0 0 0 8 52
Nsudiel ya Rubing ni Machuku Maad pa Rubing 2 0 0 2 0 2 6 50
[Picture on page 5]
Ndol
[Picture on page 5]
Diar Dia M Dia Kaad Dia Dia Dia Katan* Diampos Ngond
Kasatu Kanying* Uvud
Dichuku ni Dichuku 2 1 1 1 1 1 5 50
Machuku Maad 0 0 0 0 5 5 0 50
Nsudiel ya Rubing Kusu 5 0 0 0 0 0 8 52
Nsudiel ya Rubing ni Machuku Maad pa Rubing 2 0 0 2 0 2 6 50
[Picture on page 5]
Ndol-M.
[Picture on page 5]
Diar* Dia M* Dia Kaad Dia Dia Dia Katan Diampos* Ngond
Kasatu Kanying Uvud
Dichuku ni Dichuku 2 1 1 1 1 1 4 51
Machuku Maad 0 5 0 0 0 0 5 50
Nsudiel ya Rubing Kusu 3 0 0 0 0 0 7 50
Nsudiel ya Rubing ni Machuku Maad pa Rubing 2 0 0 2 0 2 5 51
[Picture on page 5]
*Matan kwi ngond