Tulejanany Kuwap Kupandakena Kwa Yehova

1. Yom ik yitubachikina kulejan kuwap kwa Yehova?

¹ “A! [Yehova], kujimb, ni ukash, ni uyaj, ni kupandakan, ni kuwap, yawonsu yidi yeyey, mulong yawonsu yidia mu maur ni yidia pansh yidi yeyey.” (1 Jins. 29:11) Rukat retu ni kujikitish mulong wa Yehova yitubachikin kusal ik? Yitubachikin ‘kumekesh kuwap kwendendiy wa tutazuka kutudiosh ku mididim, ni kutulet ku kutok kwend kwa kushimok.’ (1 Pi. 2:9) Tukutwishap kulik kuyilej antu akwau piur pa Nzamb wetu mujim! Tukwikal nich chisu cha pakampwil cha kulejan kuwap kwa Yehova mwi ngond wa Rish, Ndol, ni Ndol-Mem.

2. Ov, Kampany ik wa pakampwil urijekinau mulong wa kulejan Chivurikish, ni nany ukutwisha kwipan?

² Kampany wa Kulejan Chivurikish: Diamond, Ndol 2, tukez kutongin pa kuwap kwa Yehova pitukuvurika Yakudia ya Urel ya Mwant. Diladikij dimwing dia pakampwil ku chinship chinech cha usey akez kudipan mwi ngand yawonsu kusambishil mwi ngond wa Rish 17 djat ni kwi Ndol 2. Antu awonsu ayikasikeshin kwipan nakash. Yikwikal chisu chiwamp kud antu asu chakwel kusambish kulejan rusangu ruwamp anch awanyishin yitinau. Anch ukwetany in kwilej Bibil ap an akutwisha kuwanyish yitinau, kwatany chiyul cha kuyilej amakurump.

3. Yom ik tukutwisha kulond chakwel kuyitazuk antu eza ku Chivurikish?

³ Kampany winou ukez kwikal wa chilik chimwing ni win wasadika wa Chitentam cha Distrik “Kukolik Kudi Piswimp!” Chikumangen chikez kutum mapaper ma diladikij mavud chakwel mwin kulejan ni mwin kulejan atambula mapaper 50 ni chibol umwing ni umwing ukutwish kutambul mapaper 150. Sal anch chakumenaku chey chikala chiswimp, ukutwish kulond anch: “Dined didi diladikij diey ku chinship cha usey cha muvu. Akez kukwak nich chirungul. Jinsangu jikwau jidi pa diladikij.” Mutu wa mulong wa wenjil piur pa Yakudia ya Urel ya Mwant udia mu buku Chifundishinay Bibil usambishina pa paj wa 206 ukutwish kwikal wa ukwash pa mulong winou. Kupwa kwa rubing, tukez kupan magazet ma katat pamwing nich diladikij dia pakampwil. Fund piur pa antu awonsu asangeridina, ni irijeka chakwel kuyichirikin.

4. Ov, mutapu ik mapaper ma diladikij dia pakampwil dia Chivurikish afanyidin kumapalangesh?

⁴ Anch chitwishikin, diladikij dined dia pakampwil chifanyidin kudipan kudi muntu ni muntu ipend. Chawiy lel, fund majin ma antu akad kutan ku yikumbu ni pakish kuyichirikin. Yikumangen yikweta mapaper mavud ma diladikij yikutwish kuyishilam antu akad kwikal ku yikumbu yau mu rubing ra nsudiel ra Chivurikish, pakwez kangal kurutu kwa rubing riner. Shinshikin anch antu uchirikidina kutal, in kwilej Bibil, anamakwey, ambay ney a ku mudimu, amutej ney, ni antu wija ni yawiy afanyidin kutambul diladikij.

5. Mulong wak tufanyidin kusambish katat kamu kwirijek chakwel kusal mudimu wa uchibol nkwash?

⁵ Kusal Mudimu wa Uchibol Nkwash: Ov, ukutwish kulejan chisu chawonsu kuwap kwa Yehova anch wasal mudimu wa uchibol nkwash mwi ngond wa Rish, Ndol, ni Ndol-Mem? Kusal mwamu kukez kutwit kutenchik program wetu wa pichuku-pichuku. (Ef. 5:15-17) Ukutwish kwikal nich kashinsh anch kusal usu wa kusal yivud mu mudimu wa Yehova kukez kulet musangar ni chiyukish cha Yehova. (Jinsw. 10:22) Mulong chisu cha Chivurikish chidi piswimp, katat chawiy chisu cha kusambish kwirijek.—Jinsw. 21:5.

6. Ov, chom ik tukutwisha kwilejin ku yom yamushikena nambaz umwing wa mivu 90 wasala mudimu wa uchibol nkwash muvu wasutina ou?

⁶ Nambaz umwing wa mivu 90 wasala mudimu wa uchibol nkwash muvu wasutina ou. Ndiy walonda anch: “Ap anch nikatining chakin kamu kudim ni nasambisha kukun, namana anch nadinga nich kuswir kwa kutek yom ya usey pa ndond ya kusambish. Chinadinga nich rusot ra kutek yisakin ya Want pa ndond ya kusambish, nakwata chiyul cha kusal mudimu wa uchibol nkwash mu Rish.” Ov, amuyukisha mulong wa usu wasalay? Ulondin anch: “Niyova kwikal piswimp nakash ni chikumangen, ni chinech chanshejisha piswimp ni Yehova.” Ov, tukutwish kushinshikin yom ya usey ni kuyitenchik mu mutapu winou anch chiswiridikin?

7. Ov, chikasiken kusal mudimu wa uchibol nkwash?

⁷ Kuwanyish asaa 50 itinau mulong wa uchibol nkwash kukutwishap kukukasiken mudi mu utongina. Shinshikin mijikit yey ya pichuku-pichuku mu malembil, sal program, ni yifunda pa program wey wa yom ya mu spiritu. Wij mikadil yey nawamp. Anch uburedin ukash wa mujimbu ni kujijaman, pamwing ap ukutwish kusal mudimu wa kulejan mu asaa aad dichuku ni dichuku. Anch usadining chisu chawonsu ap anch uyiling ku shikol, ukutwish kwikal chibol nkwash anch ukat kusal mudimu wa kulejan urel ap kwisudiel kwa mbing.

8. Chom ik chayikwasha ambay amwing a uruw kusal mudimu wa uchibol nkwash?

⁸ Antu avud atwishin kusal mudimu wa uchibol nkwash pamwing mu dijuku. Mu mivu yau ya kusambish ambay amwing a uruw idjidjeka pa kusal mudimu wa uchibol nkwash mulong atonga anch mikadil yau yikutwishap kusal anch atwisha kusal mudimu wa uchibol nkwash. Ov, chom ik chasalau mulong wa kutwish? “Twamulembila Yehova chakwel atukwasha kuwanyish chom twading tusotina kusal pamwing mu chisu chilemp nakash.” Nich kwirijek kuwamp awiy atwisha kuwanyish rutong rau. Alonda kand anch: “Chading chipandikena kuwap. Atuyukisha kamu nakash yivud pamwing. Chiyul chetu chidi anch pakish kuusal. Anch dijuku dietu dia usala, ni yey kand ukutwish kuusal.”

9. Chom ik ufanyidina kusal chisu cha dilejan dia dijuku chakwel kwirijek mulong wa chirung cha angond a pakampwil a mujikit?

⁹ Ukutwishanyap witekinany chisu pa dilejan dia dijuku chakwel kushinshikin mutapu ukutwishany en awonsu kuvudish mujikit wen mu angond a kurutu? Ap anch dijuku dien diawonsu dikutwishap kusal uchibol nkwash, pamwing ap muntu umwing ukutwish kusal mwamu nich ukwash ni kovijan kwa yid yikwau ya dijuku. Anch chitwishikinap, dijuku dien dikutwish kwitekin rutong ra kusutish chisu chikwau mu mudimu wa kulejan mu chirung chinech cha angond a pakampwil a mujikit.

10. Mulong wak tufanyidina kuyilej antu akwau anch tusotin kusal mudimu wa uchibol nkwash mu chirung cha Chivurikish?

¹⁰ Kwashijanany Umwing ni Mukwau: Kuzangurok kukat kusamburik. Lejan rusot rey ra kusal mudimu wa uchibol nkwash. Chinech chikutwish kuyikasikesh antu akwau kusal usu. Chikwau kand, antu asala mudimu wa uchibol pasak akutwish kukwinkish yiyul yikeza kukukwash kutenchik yom yey ni program wey chakwel uwanyisha rutong rey. (Jinsw. 15:22) Anch ukutwish kusal uchibol nkwash, ov, ukutwishap kumwit mwin kulejan mukwau, pamwing ap muntu kanang ukwet mikadil mudi yeyey, kwibomb ney mu mudimu winou usangareshina?

11. Mutapu ik ukutwishau amakurump kuvuvurish kuzangurok mulong wa mudimu wa uchibol nkwash mu angond akweza?

¹¹ Amakurump avud akwatin kal yitenchik yifanyidina chakwel kwipan mu mulad wa mudimu wa pakampwil. (Heb. 13:7) Chinech chikasikeshining chakin kamu chikumangen! Amakurump ni yawiy akat kuvuvurish kuzangurok kusutil ku mambamb mau pamwing ni antu akwau. Mazu makemp makasikeshina ap yiyul yimwing ya ukwash yikutwish kwikal chakin kamu yiswiridinau chakwel kuyibachik antu amwing kusal mudimu wa uchibol nkwash. Kalam wa mudimu ukez kutenchik yikumangan yikwau ya mudimu wa chingand chakwel antu awonsu atwisha kwipan mu kulejan pamwing ni akwau, ap kupwa kwa mudimu ap kwa shikol, chifanyidin kwijikish yitenchik yiney chisu chawonsu. Ukez kushinshikin kand anch antu awonsu akwet teritwar uwanyidina ni mikand.

12. Chom ik ukutwisha kusal anch utwishinap kusal mudimu wa uchibol nkwash?

¹² Ap anch mikadil yikukangeshin kusal mudimu wa uchibol nkwash, ukutwish kuyikasikesh antu ipanina, ni ukutwish kulembil mulong wa awiy. (Jinsw. 25:11; Kol. 4:12) Pamwing ap ukutwish kwirijek chakwel kusal nau pamwing mu mudimu wa kulejan dichuku dikwau mu rubing ap kushakam nau chisu chilemp kupandakan chiukata kushakamang nau.

13. Ov, rutong ik ritekidinau mu Congo, ni mutapu ik chikumangen chen chikutwisha kwipan?

¹³ Rutong ra Kwikal nau Ayibol 22750 Mwi Ndol: Mu Congo-Brazzaville uvud wa ayibol nkwash mu muvu wa 2000 washikena pa 556 ni mu Congo-Kinshasa mu 1997 wading wa 8260. Chawiy lel, rutong rakin ra kusadil mwi ngond wa Ndol ukweza ridi ra kwikal nau ayibol ankwash 750 mu Congo-Brazzaville ni 22000 mu Congo-Kinshasa. Tukutwish kuwanyish uvud winou anch mwin kulejan 1 pakach pa in kulejan 6 mu chikumangen ni chikumangen wasal mudimu wa uchibol nkwash. Chakin kamu, yikumangen yimwing yikez kwikal ap ni in kulejan avud akweta mikadil yiyitwishishina kusal mudimu wa uchibol nkwash. Rutong riner ra chikumangen riswapel kuwanyish mu yikumangen yivud. Tonginap bil musangar ukeza kwikal mu chikumangen chen ni chibudikin chiwamp chikumekana mu mudimu wa kulejan mu teritwar wey!

14. Mulong wak Ndol udi ngond upandikena kuwap mulong wa kusal mudimu wa uchibol nkwash?

¹⁴ Mulong wak Ndol udi ngond upandakenamu kuwap chakwel kusal mudimu wa uchibol nkwash? Chivurikish chikez kusadik kwisambishil kwa ngond, ni kutwinkish chisu cha kuyichirikin antu akeza kukumangan. Tukez kupan magazet, nich rutong ra kupan buku Chifundishinay Bibil pitukeza kuyichirikin antu ni kusambish malejan ma Bibil. Chawiy lel, kusal mudimu wa uchibol nkwash mwi Ndol kukez kalet yisu ya kusambish malejan ma Bibil. Ngond wa Ndol ukwet machuku ma Diampos matan ni dichuku dia konje, yikata kuyikwash antu asadina mudimu wa ku mujimbu ni akata kuya ku shikol mulong wa kufundish majin mau.

15. Mulong wak tufanyidina kwikal nich chitongijok cha kuswapej pashejina chirung cha Chivurikish?

¹⁵ Chirung ni chirung cha Chivurikish chisutina chitutwadil ku muvu udia piswimp ni nsudiel ya ditenchik dia yom dined. Chisu chashalaku kal cha kuyilej antu akwau piur pa Nzamb wetu mujim chidi chikemp. (1 Kor. 7:29) Anch chirung chinech cha Chivurikish chasut, tukwikal nich yisu yiwamp ya kumushiman Tatukwetu wa mwiur chikupu. Twirijekany katat amboku chakwel kusal yawonsu tukutwisha kusal mu Rish, mwi Ndol, ni mwi Ndol-Mem mulong wa kulejan kuwap kupandikena kwa Yehova!

[Picture on page 4]

Ov, Tukutwish Kwikal Nau Ayibol Nkwash 22750 Mwi Ndol?

[Picture on page 4]

◼ Shinshikin yom utekina pa ndond ya kusambish

◼ Isambina ntong mu dijuku

◼ Yileja antu akwau yom utongidina kusal