Lejan ni Dandamen Kupan Uman
1 Mud “ntakel ni kalal,” Yesu wayifumba in kwilejend mulong wa mudimu ujim wa kulejan wadinga uyichingedina kurutu. (Isa. 55:4, NW; Luka 10:1-12; Midimu 1:8) Mupostol Pita warumburila mudimu wayinkishau kud Yesu mu mazu manam: “Ndiy watuleja etu kurumburil Rusangu Ruwamp kudi antu, ni kumekesh uman wetu anch, ndiy kamu winou watondau kudi Nzamb, mulong wa kuyirumburish antu aom ni afu.” (Midimu 10:42) Ov mutapu ik tukutwisha kudandamen kupan uman?
2 Tukutwish kwilej yom yivud anch twashinshikin chilikej cha mupostol Paul. Chisu chakumanganay ni amakurump adiokala ku chikumangen cha Efes, ndiy wayivurisha anch: “Pinading ni kukurumburilany mazu ma Nzamb ni kukulejany pakach pa antu ap mu yikumbu yen, nakulejanya yom yawonsu yikutwisha kukukwashany, kinashakup chom, bwat. Nayibabesha in Yuda nau antu a michid yikwau wakad kasolikany, chakwel akarumuka kudiokal ku yitil yau, eza kudi Nzamb ni kumwitiyij Nsalejetu Yesu.” Yikalap nchik yoziu yarishay nich, Paul wasala mudimu ukash chakwel kuyishiken antu avud mud chitwishikina nich rusangu ruwamp. Kadingap ni kusanger kusu kuyilej antu adinga ni kumutesh uyakin wa pa dishin, pakwez ndiy wasota kuyilej in kumutesh end “yom yawonsu yatenchikay Nzamb.” Chakwel kuwanyish chom chinech, ndiy wadinga ni kusot kwiyijidish amwinend ni kwipan. Weza kulond kand anch: “Kinichingejinap anch mwom wam ukwet usey kudi am amwinam. Nisotil kusu kuwanyish chisend ni kupwish mudimu wanginkishau kudi Nsalejetu Yesu. Mudimu winou udi wa kurumburil Rusangu Ruwamp ra ranaken ra Nzamb.”—Midimu 20:20, 21, 24, 27.
3 Mutapu ik tukutwisha kwimburij chilikej cha Paul nlel? (1 Kor. 11:1) Kusutin kuyikimb antu afanyidina umwing ni umwing ni majuku ap anch ayinetu turishin nich mikadil yikash, mu kwikasikesh kuyishiken antu a michid yawonsu ni a jindim jawonsu nich rusangu ruwamp, ni kukudish nich mushiku kusanger kwa antu tukata kutan. (Mat. 10:12, 13) Chinech chitining chisu, usu, ni rukat pantaliken nau antu.
4 Ov Ukutwish Kusadil mud Chibol Nkwash? Rish ni Ndol chikutwish kwikal chisu chimwing chiwamp cha kudandamen kupan uman kusutin kusal mudimu wa uchibol nkwash. Muvu wapwila ou chading chikasikeshin mud ik pa kuyiman antwarubil avud asala usu wa pakampwil mulong wa kusal mudimu wa uchibol nkwash!
5 Nambaz umwing ukweta mivu 80 wadinga nich milong yivud ya ukash wa mujimbu amukasikesha nakash kusutin dikasikesh dipaninau mu dirijek dia Yehova. Wafunda anch: “Dikasikesh dined diavuvurisha kand impu nadinga nich mu muchim wam mu chisu chilemp nakash, ni dianginka rusot rikash ra kusal mudimu wa uchibol nkwash.” Wakwata mupak wa kwitekin rutong ra kusambish pa Rish. Ndiy walonda anch, “Chom cha kusambish kusal, chadinga kushakam pansh ni kuchind usey wa yom yawonsu. Twisambina piur pa program winou pamwing ni mwanam mband mulong nading niswiridin ukwash wend. Wankashimwisha pa kumuman niyend wizwishang kal fomu wend mulong wa kusal mudimu wa uchibol nkwash.” Pa chirung cha ngond winou, nambaz winou ipal wasutisha asaa 52 mu mudimu wa kulejan. “Nalembilang chisu ni chisu kud Yehova chakwel kumwit anchirishina kand usu wam pinadinga ni kutesh anch uyil ni kupwa. Kwisudiel kwa ngond, nasangara nakash ni kuzangam, ni kumujikitish Yehova tupamp tuvud mulong wa kwinkwash kwankwashay. Nisotin kupakish kand kakwau kusal mudimu wa uchibol nkwash.” Kutesh uman wa musangar wovay mulong wa usu wasalay kukutwish kuyikasikesh antu akwau asotina chakin kamu kusal mudimu wa uchibol nkwash yikalap nchik milong yikash ya ukash wa mujimbu yikwetau.
6 Mukadivar umwing wadioshau ku mudimu wa ku mujimbu pakad kuchingejin wasadila mwikadil winou chakwel kusal mudimu wa uchibol nkwash. Ngond wasalay mudimu wa uchibol nkwash, ndiy wikala nich mushiku ukash mulong wa mudimu wa kulejan, ni kwisudiel kwa ngond, wasambisha dilejan dia Baibel disu. Patonginay pa uman winou, ndiy walonda anch: “Winou udi ngond wa chiyukish mud ik!” Wikala nich musangar ujim mud ik mulong wa kwikal nich umutakel wa Yehova ni ukwash wend! Mwaning, Yehova wamuyukisha nakash mukadivar mulong wa usu wa pakampwil wasalay mu mudimu wa kulejan, ni ukez kukuyukish niyey chilik chimwing.—Mal. 3:10, NW.
7 Kud antwarubil avud, kusal mudimu wa uchibol nkwash kuswapelap bwat. Ap mwamu, yikalap nchik yisend ya mudimu wa ku mujimbu ni ya dijuku pamwing nich yikokujol ya chimuntu, akadivar ni anambaz avud atwisha kusal mudimu wa uchibol nkwash. Kudandamen kupan uman kwitin kupan chisu chetu cha usey ni usu wetu, pakwez yiyukish tukata kutaninamu yidi yakad kwilikan.—Jinsw. 10:22.
8 Rish ni Ndol chidi chisu chimwing chiwamp nakash cha kusal mudimu wa uchibol nkwash. Rish ukwet mbing jitan jifanyidina. Kwisakin mbing jinej ni kusadil kuwamp kwa yisu ya urel kukutwish kuyikwash antu amwing akata kusalang mudimu wa ku mujimbu wa chisu chawonsu kusal mudimu wa uchibol nkwash. Chikwau kand, ukutwish kand kusadil yisu ya konje pa ngond wa Ndol. Amwing akutwish kwikal nich konje ku shikol ni ku mudimu wa ku mujimbu, chom chikutwisha kuyikwash kuwanyish asaa 50 itinau. Chakwel kusal program wa kuwanyish asaa 50 mu mudimu pa Rish ni Ndol, ov ukutwish kusadil chimwing cha yilikej ya program wa uchibol nkwash udia mu mutu wa mulong winou? Isambina piur pa program wey ni antu akwau; ukutwish kuyikasikesh antu amwing kwinung ney mu mujikit. Ang ukutwishap kusal mudimu wa uchibol nkwash, itekina rutong rimwing mulong wa angond inay, ni yikwasha antu akutwisha kusal mudimu wa uchibol. Tenchik maprogram mey katat mulong wa kulejan nakash pa chirung cha Rish ni Ndol.
9 Mekesh Kujikitish Kwey Mulong wa Chivurikish: Muvu ni muvu pa chirung cha Chivurikish, kujikitish mulong wa difut kukat kubachik tunan ni tunan twa antu ‘kwilamin chisu’ cha kwikal ayibol ankwash. (Ef. 5:15, 16) Muvu wasutina ou mu Congo-Kinshasa, mwading ayibol ankwash 5879 pa Rish ni 6507 pa Ndol. Chinech chisadil mwayen wa ayibol ankwash 6193 asadila mu umwing ni umwing wa angond inay aad. Uvud winou upandiken nakash uvud wa mwayen wa ayibol ankwash 3298 asala mudimu mu chirung cha angond asambela mu muvu winou wa mudimu. Muvu wasutina ou mu Congo-Brazzaville, mwadinga ayibol ankwash 424 pa Rish ni 199 pa Ndol. Chinech chisadil mwayen wa ayibol ankwash 312 asadila mu umwing ni umwing wa angond inay aad. Uvud winou upandiken nakash uvud wa mwayen wa ayibol ankwash 129 asadila mudimu mu chirung cha angond asambela mu muvu winou wa mudimu. Chirung chinech cha Chivurikish chidi chisu chikwau chiwamp cha kumekesh kujikitish kwetu kwa kashinsh mulong wa yakupesh ya difut dia Kristu kusutin ku kuwejaku nakash mujikit wetu mu mudimu wa chingand.
10 Ndol 16 chishejidinay piswimp, shinshikin chirumburikina Chivurikish kud ey. Tongijokin piur pa yinship yashikija ku rufu ra Kristu ni yitongijok yadingay ni kukakalijan nich mu manangu mend ni mu muchim. Tongijokin kand, piur pa musangar wadinga umutekidinau Yesu kurutu ni mutapu wamukwasha kujijaman mu kuzengol kuyimp kwinoku. Tongijokin piur pa ndond yend ya katat mud Mutu wa chikumangen, wimanyidina mudimu wa kulejan ni wa kwikadish in kwilej. (1 Kor. 11:3; Heb. 12:2; Kuj. 14:14-16) Chad lel mekesh kujikitish kwey mulong wa yom yawonsu yasalay Kristu kusutil ku kusal nakash mudimu wa kulejan anch mikadil yey yikutwishishin.
11 Yikasikesha Antu Akwau Kudandamen Kupan Uman: Kusutil kusal mudimu wa uchibol nkwash, amakurump ni ankwash’a midimu akat kwikal nich chisu chiwamp cha kuyikasikesh yid yikwau ya chikumangen. Pasadilau mudimu pamwing nau in kulejan mu mudimu wa chingand ni pasadilau mudimu wa ukafung, akwet mutapu uwamp wa kuyikwash antu akwau chakwel kusal nakash mumujikit winou wa pakampwil. Tuchisalany etu awonsu kwikal mulong wa kutek mu malembil metu, ni kuwejin chad lel usu ku usu tusadila pamwing mu kudandamen kupan uman.
12 Ap anch amakurump ni ankwash’a midimu awonsu akez kusadil pamwing kwambatan nich yitenchik ya chikumangen mulong wa kujimbish mujikit mwi ngond wa Rish ni ngond wa Ndol, kalam’a mudimu ndiy kamu ufanyidina kusal yitenchik yifanyidina mulong wa mudimu wa kulejan rusangu ruwamp. Chimufanyidin kurijek ndond ja kusadil yikumangan ya mudimu, machuku, ni yisu yifanyidina mulong wa antu avud pakach pa in kulejan ni kuyijikish chisu ni chisu ku yikumangan ya mudimu. Akutwish kutenchik chakwel kukumangan mu yisu kushalijan pa dichuku, mulong wa kuyitwishish awonsu adia mu chikumangen kusadil mu milad kushalijan ya kupan uman. Milad yiney kushalijan yikutwish kwikal mutapu wa kupan uman mu mwab wa angend-a-mushing, kupan uman mu balibal, kuya ku chikumbu ni chikumbu, kusal kuchirikinamu kusu, ni kupan uman wa ku telefon. Chikwau kand, ufanyidin kwirijek mulong wa kwikal nich mikand yiwanyidina, magazet, ni teritwar udia tayad mu chirung cha angond inay.
13 Pa rish tukez kupan buku Ronganyin, nich rutong ra kusambish malejan ma Baibel. Yiyul yiwamp piur pa kupan buku Ronganyin yidi mwi wenjil wa Mudimu Wetu wa Want wa Chiwong 2002. Pa Ndol tukez kupan magazet Tour de Garde ni Réveillez-vous! Pakish kwiyijidish nich kusadil chiyul cha mazu ma kusambish nich misamb chidia mu “Yitukutwisha Kulond Piur pa Magazet.” Antu awonsu afanyidin kwitekin chisu cha kwirijek nawamp mulong wa kupan uman.
14 Tuyukin mud ik pitusadidila mwishin mwa umutakel wa Mutu wa chikumangen, Kristu Yesu, ni kwikal nich chisend cha kuyilej antu akwau rusangu ruwamp! Pashejina piswimp ngond wa Rish ni wa Ndol, twikasikeshany kand kakwau kuyisal angond inay kwikal angond etu apandikena kuwap pituziyidila mbil ya Kristu ya kulejan ni kupan uman.
[Caption on page 4]
[Picture on page 4]
Maprogram Kushalijan ma Kusadil Mulong wa Kusal Mudimu wa Uchibol Nkwash Pa Rish ni Ndol 2003
[Caption on page 4]
[Picture on page 4]
Dichuku Asaa
Diamond 1 2 — — 2 —
Diakaad 1 — 3 — — —
Diakasatu 1 2 — 5 — —
Diakanying 1 — 3 — — —
Diakatan 1 2 — — — —
Diampos 5 4 3 5 6 7
Diarubing 2 2 3 2 2 3
Rish 56 56 54 55 50 50
Ndol 50 50 51 53 — —
[Caption on page 4]
[Picture on page 4]
Ov program ik umwing ukufanyidina ey pa maprogram minam?