Ov, Ukez Kwikal Chibol Nkwash?
1. Ov, mulong wak chisu cha Chivurikish chiding chisu chiwamp cha kutanduril mudimu wetu wa kulejan?
1 Chisu cha Chivurikish chiding chisu chiwamp cha kutanduril mudimu wetu wa kulejan. Chiding chisu chakutongijokin pa rukat ripandikena kujimb ra Yehova mu kupan kwa Mwanend mudi difut. (Yoh. 3:16) Chinech chituletidining kujikitish kukash mu michim yetu, chikasikeshining maswir metu ma kuyilej antu akwau piur pa Yehova ni piur pa yom yisadinay mulong wa antu. (Isay 12:4, 5; Luka 6:45) Chiding kand chisu tusangaredininga kampany wa pakampwil wa kuyitazuk antu twijikijadina nau ni antu adia mu teritwar chakwel akumangana netu ku Chivurikish. Kupwa, tusadining usu wa kukudish musangar wa antu akumangeninga. Ov, ukez kutanduril mudimu wey wa kulejan kusutil ku kusal mudimu wa uchibol nkwash pa chirung cha Rish, Ndol ap pa Ndol-Mem?
2. Ov, chom ik chikusala chakwel ngond wa Rish ikala pakampwil ngond muwamp wa kusal mudimu wa uchibol nkwash?
2 Salany Rish Ikala Ngond wa Pakampwil: Rish ukez kwikal pakampwil ngond muwamp wa kusal mudimu wa uchibol nkwash. In kulejan akwipana akutwish kutond kuwanyish asaa itinau pakach pa 30 ap 50. Anch kwendil kwa kalam wa munyingumuku kwashiken pa chirung cha pa Rish, ayibol ankwash akutwish kukumangan ku chikumangan chawonsu chikusalay pamwing ni ayibol a rawonsu ni a pakampwil. Kampany wa kupan maladikij ma Chivurikish chikeza kusadik Diakaad, pa Rish 26, 2013 amutenchikin mudi mu mivu yasutina ni ukez kusambish pa Rish 1. Chikwau kand, Rish ukez kwikal kamu ni ambing atan. Ov, mulong wak chidiap cha usey nakash kushinshikin anch ukutwish kwinung mu kusal chakwel ngond winou ikala wa usey wa pakampwil mu muvu winou?
3. Ov, mutapu ik tukutwisha kutenchik chakwel tutandurila mudimu wetu wa kulejan?
3 Tenchik Katat: Katat chidi chisu cha kushinshikin program wey ni kutal yitenchik ik uswiridina kutenchik chakwel usala mudimu wa uchibol. Kwovijan mu dijuku kukez kwikal kwa usey, chawiy itekina chisu cha Urel wa Kwifukwil mu Dijuku chakwel wisambinany jintong jen ja mu dijuku ni kusal program. (Jinsw. 15:22) Anch ukutwishap kusal mudimu wa uchibol nkwash, kangal waziy. Ov, ukutwish kutenchik program wey chakwel ulama machuku ukeza kusal mudimu winou? Ov, ukutwish kusal mudimu wa kulejan kuwejaku ni machuku makupwa kwa rubing?
4. Ov, yiyukish ik yimwing tukeza kutambul kusutil ku kutanduril mijikit yetu pa chirung cha Rish, Ndol ni Ndol-Mem?
4 Pitutanduril mijikit yetu pa chirung cha Rish, Ndol ni Ndol-Mem, tukez kujimbish musangar ni mazang tutambwilinga kusutil ku kumusadil Yehova ni ku kuyilej antu akwau. (Yoh. 4:34; Mid. 20:35) Cha usey nakash, usu wetu tusadina wa kwipan ukez kumusangaresh Yehova.—Jinsw. 27:11.