Ov Ndol 2000 ukwikal ngond wetu upandakena kuwap?
1 Diakasatu urel, Ndol 19, dikwikal dichuku dimwing dijim dia muvu wetu wa mudimu. Dichuku dined, pa kuzwek kwa muten pa divu pawonsu, chikumangen ni chikumangen ni yisak ya Atuman’a Yehova mu mangand mawonsu yikusutish Chivurish cha rufu ra Kristu. Yikalap nchik ndond yitushicha, kuvurik yakupesh ya Yesu Kristu kukwikal chisu chimwing cha pakampwil cha muvu. Dichuku dia Chivurish adifundin pa Calendrier de Témoins de Jéhovah 2000.
2 Ngond mwawonsu wa Ndol utwinkishin chisu chiwamp nakash cha kumekesh nich mupim wetu wawonsu kujikitish kwetu mulong wa ranaken ramekeshay Yehova kusutin yakupesh ya Mwanend. Mutapu ik? Mupostol Paul wafunda anch: “Rukat ra Kristu rawiy rituyikedila, mulong twij nawamp anch, muntu umwing wayifila antu awonsu, chawiy antu awonsu afa kal. Ndiy wayifila antu awonsu chakwel awiy adia aom kakwikalap kand aom mulong wa ayinau kusu, pakwez mom yau yikwikal yendendiy wayifila, chad wavumbuk wikal kand mwom mulong wa kuyambat awiy.” (2 Kor. 5:14, 15) Mwaning, mwi Ndol tukutwish kumekesh anch, tushichap mulong kusu wa ayinetu, pakwez mulong wendendiy watufila etu, ni kusal ngond winou ikala ngond wetu upandakena kuwap mud atushalapol a Want!
3 Kwat chiyul cha kwikal chibol nkwash mwi Ndol: Mupostol Paul watushila chilikej chimwing chiwamp nakash palonday anch: “Pakwez kinichingejinap anch mwom wam ukwet usey kudi am amwinam. Nisotil kusu kuwanyish chisend ni kupwish mudimu wanginkishau kudi Nsalejetu Yesu. Mudimu winou udi wa kurumburil rusangu ruwamp ra ranaken ra Nzamb.” (Mid. 20:24) Twitapidil nlel dilau dia chilik chimwing dia kupan uman ujim piur pa Yehova Nzamb. Pa chinech, tusotin tusala Ndol ikala ngond wetu upandakena kuwap mulong wa mujikit wa uchibol nkwash!
4 Nich mbing jitan jikwetay, Ndol 2000 ukwikal ngond muwamp nakash kud avud chakwel kusal mudimu wa uchibol. Mu Kalol 1997, pitwashikena kuvul kwetu kupandakena kwa ayibol ankwash mu République démocratique du Congo, antu 8 260 asala mudimu winou adinga ni kumekesh kusu antu 9 pa chitot mu kuvul kwa in kulejan awonsu. Mivu yaad kwinyim, kuvul kwawonsu kwa in kulejan atudila rapor 1999 kwiwejidinaku nich antu 6 pa chitot. Chinech chirumburikin anch tukwet ruchingej rijim ra kutwish kusut kuvul kwetu kwa ayibol ankwash kwa machuku ma kwinyim. Chikwau kand, kuvul kwa asaa akukepishin kal, chakwel chiyiswapedil avud mu chikumangen kusal mudimu wa uchibol. Mwin kulejan mwawonsu wababatishau kal ukutwish kutongin chinech mu malembil anch ukutwish kusal mudimu wa uchibol nkwash mwi Ndol.
5 Nich kusadil ngond wa Ndol udia pa Calendrier 2000, rijek program wey wa ngond ukwezap ou katat. Kwat chiyul cha kwijik machuku ik ukutwisha kubudikin mu chingand, ni kutongin asaa awonsu utongina anch ukutwish kusutish mu mujikit wa kulejan mu chirung cha ngond. Wejinamu ni chisu ukutwisha kusutish mu kupan uman kud akwau mud chidinga kal chaku ni mu mutapu wa kukashimun. Ov kuvul kwawonsu kushikedinap pa kuvul kwa asaa 50 a ayibol ankwash? Anch uburedin asaa aswiridikina, ov ukutwish kurijek mutapu ukwau program wey chakwel kulam chisu cha kusal mudimu wa uchibol nkwash? Ukwet kuswir kusu kwa saa umwing ni aminit piswimp 40 dichuku ni dichuku chakwel ushikena asaa 50 kwi ngond.
6 Katat mutapu wapungurilau kuvul kwa asaa a ayibol a rawonsu, ov utongidin kusal mudimu wa chisu chawonsu? Ov mulong wak kuchingel kushik ku konje wa Kafunfut? Ndol ukwikal ngond muwamp kusambish! Anch utongin anch ukutwishap kwey kusal asaa 70 ayitinau ayibol a rawonsu, ov mulong wak ukutwishap kusal uchibol nkwash mwi Ndol ni kwitekin rutong ra kushiken asaa 70? Anch waman anch ukutwish kuchisal, ukutwish kamu kusal usu wa kusadil chakwel kwikal pa mulong wa ayibol a rawonsu mu machuku ma kurutu mud kamu chitwishikina. —Tal Notre ministère, paj 113-14.
7 Twinunginaku sens mud in kulejan a rusangu ruwamp: Etu awonsu, in kulejan nau ayibol, rukat retu ra muchim utok mulong wa Nzamb ni mukwetu muntu ritubachikin kusal mudimu wa Yehova nich mupim wetu wawonsu kulondulijan ni mwikadil wetu. (Luka 10:27) Tukakumekesh chad lel anch ‘tukat kusal mudimu ukash ni kurish mulong tukwet ruchingej tutekila padi Nzamb mwom, ndiy kamu Mupandish wa antu awonsu, nakash kusu ching antu amwitiyijina.’ (1 Tim. 4:10) Chawiy tufanyidina kuchingej kuman antu 100 pa chitot akusala mudimu wa chingand mwi Ndol, muntu ni muntu ukubudikin nakash mu mudimu wa Want.
8 Kangal twavuramenany dikasikesh dia Yesu anch: “Yakwangul yidi yivud, pakwez in mudimu wa kwangul adi akemp. Mulembilany mwin chir chakwel ukutum in mudimu wa kwangul avud.” Kapamp kamwing kamu kwinyim kwa kulond mwamu, Yesu wayinkisha apostol end 12 mbil ni kuyitum kuya ni kulejan. (Mat. 9:37, 38; 10:1, 5, 7) Chipasuta piswimp muvu umwing, kupwa kwa kuyifundish nawamp a 12 mudimu wa kulejan, Yesu “watonda kand in kwilej akwau makum sambwad,” ni kuyinkish yiyul ya chilik chimwing anch: ‘Yakwangul yidi yivud, . . . Chawiy en lembilany kudi Mwant wa chir chakwel ayituma in kwangul avud.’ (Luka 10:1, 2) Buku wa Baibel wa Midimu ulejen mutapu wakulay Yehova ku malembil minam. Kudiosh mu Pentekot wa muvu wa 33 C.C. (pa chirung chetu), kuvul kwa in kwilej kwiwejinaku piswimp nich antu 120. Kupwa, kwiwejina kand in kwilej akwau 3 000, ni akwau 5 000. (Mid. 1:15; 2:41; 4:4) Kwinyim kwa chinech, “chisak cha in kwilej chajimba nakash.” (Mid. 6:7) Chilik chimwing kand ni nlel, tufanyidin kudandamen kulembil Mwant chakwel ayituma in kulejan a Want avud! Kulondulijan nich malembil metu, mwin kulejan wa chikumangen umwing ni umwing ufanyidin kurijek mutapu ufanyidina wa kubudikin mu chingand ngond ni ngond.
9 Tushinshikinany amboku Ndol pa Calendrier 2000. Mulong machuku maad ma kusambish ma ngond madi Diampos ni Diarubing, ov ukutwishap kwirijek mulong wa kubudikin mu chingand kwisudiel kwa rubing rinira, ni kusambish kulejan kurutu kwa chisu mwi ngond winou? Ov ukutwishap kukwatikesh “Dichuku dia Magazet” din diawonsu mu chirung cha ngond pamwing ni chirund chen cha Dilejan dia Buku dia Chikumangen? Ov ukutwishap kusal saa umwing ap avud Diarubing ni Diarubing mu chingand? Ov ukutwishap kwirijek chakwel kupan uman urel kanang? Ni kangal wavuramen kwisakin yisu yawonsu yiukweta chakwel kupan uman wa kukashimun ku mudimu, ku shikol, ap pa chisu chiusadina mijikit ya dichuku ni dichuku. Fund machuku ukutwisha kusutish chisu kanang mu chingand, ni kusadil kalandrier mulong wa kufund chisu usadina kwi ngond.
10 Ndol ukwikal chisu chifanyidina kud awonsu awanyishina kal yitinau ni itiyidinau kud amakurump kusambish kusadil mud in kulejan akad kubabatishiu. Anch ukakwilej Baibel ni muntu kampand, ov muntu winou wayil kal kurutu mu mutapu ufanyidina chakwel kwisamb ni kalam-ntakel ni kumwit anch amushinshikina mud mwin kulejan wakad kubabatishiu? Anch ukwet an akad kubabatishiu, ov wisambidin kal kuya kwau kurutu muspiritu nau amakurump? Ov chinech chikwikalap chisu chiwamp kud awiy kusambish kubudikin mu chingand?—Tal Notre ministère, paj 97-100.
11 Mu usu wetu wa kusal Ndol 2000 ikala ngond wetu upandakena kuwap, etu awonsu tufanyidin kubudikin mu chingand ni kutul rapor wetu wa mudimu kwisudiel kwa ngond. (Tal Marko 6:30.) In kulejan asu akad kubabatishiu abudikidina mu chingand kapamp kau ka kusambish afanyidin kuyikasikesh kufund rapor wau wa mudimu pa chisu chifanyidina. Anch twasal yitukutwisha, tukutwish kuwejin mu mutapu uwamp kupandakan ku rapor wa Ndol ni ku kushiman kujim kutukupana kud Yehova kusutin usu tukusala mulong wa kupan uman.
12 Yang ni akwen ku chivurish: Ov chikusangarishap kuman kuvul kukwau kusu ku Chivurish cha rufu ra Kristu cha 2000? Mwaning! Chikutwish kurumburik anch antu avud kand ezap pamwing kumekesh kujikitish kwau mulong wa rukat ratumekeshinay Yehova Nzamb ni Yesu Kristu! (Yoh. 3:16; 15:13) Sal yawonsu yifanyidina chakwel chom ap chimwing kangal chakukangesh ey ni dijuku diey kukumangan ku Chivurish.
13 Katat chidi kamu chisu cha kusambish kuyitazuk antu akwau mulong wa kwez ku Chivurish. Sal list wa antu awonsu usotina anch eza ni kukumangan. Wejinamu muntu mwawonsu wadinga ni kwilej Baibel pasak, antu ilejina katat, ni antu awonsu ukata kwendil pa chisu cha kuchirikinamu kusu. Pa list winou wejinap antu a chijikan ku mudimu, ku shikol, antu ushichanya nau piswimp, ni muntu mwin mwawonsu ukatany kusal nend midimu ya kwisak. Kangal wavuramen kuwejinaku antu akwau a chijikan nau anamakwey. Anch wapwish kufund list winou, sambish kusal usu wa kashinsh, mulong wa kutazuk muntu ni muntu. Lejan patok chisu ni ndond yikusadilau Chivurish. Ndol 19 chikalay kal piswimp, yivurisha antu adia pa list wey, ni kumanijan nau ap kusutin telefon. Yileja anch ukwez ni kuyisend dichuku dinidia urel chakwel atwisha kuya ney pamwing ku Chivurish urel winiwa.
14 Kulondulijan nich yany ya kusambish ya Sosait, chisak cha amakurump chikusal usu wa pakampwil chakwel kuyikasikesh in kulejan akad kutulang rapor (inactifs) awonsu adia mu teritwar wau kwez ku Chivurish. (Mat. 18:12-14) Amakurump akusot kuchirikin mukand wa Sosait wa Kasan 2, 1999. Kalam’a ujindj wa chikumangen ufanyidin kusal list wa in kulejan awonsu akad kutulang rapor, ni kalam’a mudimu ukuya ni kuyendil ni kuyit kwez ku Chivurish. Chitwishikin anch ayendil mulong wa kuyikasikesh kud amakurump, kapamp kamwing kamu, in kulejan inay akad kutulang rapor akutwish kuyikwash kwikal kand antu akata kutul rapor wau, ap mwi Ndol. Chikuyikasikesh anch ayitazuk kwez kubudikin mu chingand pamwing ni mwin kulejan umwing chivufu .
15 Kasikeshin ukwash wa awonsu mwi Ndol! Chiwapidil kusadil pamwing kuwamp ku mutambu wa amakurump, ankwash’a midimu, ni mitu ya majuku chakwel kusal Ndol 2000 ikala ngond wetu upandakena kuwap. Amakurump awapidil kujijaman kurijek yom yawonsu nawamp ni kwikal pa mulong wa kusambish. (Heb. 13:7) Kwirijek mutapu ufanyidina kuswiridikin mulong wa yikumangan ya mudimu wa kulejan ya machuku ma rubing ni ya kwisudiel kwa rubing. Akutwish kand kurijek yikumangan yikwau ya mudimu wa kulejan kwinyim kwa midi ni urel kurutu kwa muten kuzwek. Program mwawonsu wa yawonsu yirijekinau mulong wa Ndol chifanyidin kumulamik ku tablo wa yijikish. Chiwapidil kutond muntu kampand ukutakela chikumangan ni chikumangan cha mudimu wa kulejan. Chiwapidil kulet teritwar ufanyidina mulong wa nswir ya chirund ni chirund.
16 Mwi Ndol tukupan Tour de Garde ni Réveillez-vous! Mulong wa kusal usu wa kusambish malejan ma Baibel, tukupan broshir Nzamb Witin kud awonsu amekeshina kusanger. Chawiy lel, chiwapidil kwikal ni magazet ni mabroshir mavud.
17 Kwisudiel kwa ngond, antakel awonsu a dilejan dia buku ni ankwash au awapidil kumukasikesh muntu ni muntu mu chirund chau kutul rapor kapamp kamwing kamu anch ngond wapwa. Chinech akutwish kuchisal ap Diarubing, Ndol 30. Chad lel kalam’a ujindj pafundinay marapor, anch waman anch in kulejan amwing kaletinap rapor wau, ukutwish nich rukat kuyivurish kuchisal kurutu kwa Ndol-Mem 6, chisu chifanyidinay kutum rapor wa chikumangen ku Sosait. Ukutwish kuyilej in kutakel dilejan dia buku kumukwash kwipul in kulejan akad kutul rapor.
18 Chisu cha Chivurish chidi chirung chimwing chijim nakash cha muvu kud antu a Nzamb. Chifanyidin kwikal chirung chimwing cha mijikit yivud kud etu awonsu mu mudimu wa Yehova. Mwamu kamu chikwikala anch muntu ni muntu winungaku sens mud kamu chitwishikina mud mwin kulejan wa rusangu ruwamp, anch antu akutwisha kusal mudimu wa uchibol nkwash achisal, ni anch tujijamen kuyitazuk antu akwau kwez ku Chivurish cha rufu ra Kristu. Tulembilany nich muchim utok chakwel kutambul chiyukish cha Yehova pitusadila usu wa kusal Ndol 2000 ngond wetu upandakena kuwap, yawonsu mulong wa kumushiman ni kumutumbish Nzamb!—Heb. 13:15.
[Caption on page 3]
[Box on page 3]
Ayibol Ankwash
Kuvul Kwetu Kupandakena:
Congo-Kinshasa: 8 260
(Kalol 1997)
Congo-Brazzaville: 472 (1995)
[Caption on page 4]
[Box on page 4]
Kuvul kwa in Kulejan
Kuvul Kwetu Kupandakena:
Congo-Kinshasa: 114 071 (Mwinses 1999)
Congo-Brazzaville: 4 001 (Mwinkind 1998)
[Caption on page 5]
[Box on page 5]
Uvud wa Antu Akumangena ku Chivurish
Kuvul Kwetu Kupandakena:
Congo-Kinshasa: 574 736 (1997)
Congo-Brazzaville: 20 144 (1997)