‘Ikalany Ampich mu Midimu Yiwamp’

¹ Mu chirung cha mivu ya kwisudiel ya mujikit wend wa mushiku, mupostol Paul wadinga nich urund wa piswimp nakash nend Timote ni Titus. Kud muntu ni muntu wa pakach pau, wafunda mazu ma chilik chimwing ma dikasikesh. Wamuleja Titus anch “antu amwitiyila Nzamb” afanyidin kwikal ‘ababela ni kwipan kusal midimu yiwamp.’ (Titus 3:⁠8) Wamuleja Timote anch antu akata kutek ruchingej rau mudiay Nzamb afanyidin “kwikal ampich mu midimu yiwamp.” (1 Tim. 6:​17, 18) Chinech chidi chiyul chimwing chiwamp kud etu awonsu! Pakwez chom ik lel chikeza kutubachik kusal midimu yiwamp mu mwom wetu? Ni midimu ik tukutwisha kusal mu machuku ma kurutu?

² Chibachikin cha kwikal mpich mu midimu yitentamina chisambishidil ku chitiyij chetu ni rukat retu mulong wa Yehova, ni ruchingej ripandikena kuwap ratwinkishay. (1 Tim. 6:19; Titus 2:11) Nakash kamu mu chirung chinech cha muvu, akat kutuvurish anch Yehova watuma Mwanend pa divu chakwel anch Yesu amuchidija Tatukwend ni kwazuril njil ya mwom wa chikupu mulong wa antu awonsu afanyidina. (Mat. 20:28; Yoh. 3:16) Chinech akuchirumburil kamu patok ku musambu wa Chivurikish cha rufu ra Kristu pa Rish 28. Mu kwakul ku ruchingej tukweta ra kutambul mwom wa chikupu, ov chinech chitubachikinap kusal yawonsu tukutwisha kusal chakwel “kwikal ampich mu midimu yiwamp”? Chakin kamu anch mwawiy! Ov midimu ik lel tukutwisha kusal katat?

³ Midimu Yiwamp ya Kusal mu Rish ni Kurutu: Chakin kamu, tukez kukumangan ku Chivurikish​—⁠chinship chimwing cha pa muvu chipandikena usey kud Atuman’a Yehova mu mangand mawonsu. (Luka 22:19) Pakwez tusotin kwangan musangar wa chinship chinech nau antu akwau avud mud kamu chitwishikina. Tal rapor wa mudimu mu Annuaire 2002, ni ukez kuman anch muvu wasutina ou mwi ngand jivud kunyingumuk pa divu pawonsu, uvud wa antu akumangana ku Chivurikish wading tupamp tusatu, tunying, tutan ap tupamp tuvud nakash kusut uvud wa in kulejan. Chakin kamu chinech chitin kwikasikesh nich mushiku ku mutambu wa antu awonsu mu yikumangen chakwel kwangan mu mutapu ujim maladikij ma Chivurikish mu teritwar wau mwawonsu. Chawiy lel, tusotin kusutish chisu chivud nakash mud chitwishikina kusambish kamu katat djat ku Rish 28 mulong wa kuyitazuk antu kwez ku Chivurikish, kuyikwash kwilej piur pa ruchingej ra dipandish.

⁴ Ov mutapu ik tukutwisha kusadil nakash yisu yiney yiwamp mu kwikal “mpich mu midimu yiwamp”? Mu kudandamen kamu kusal nich chirungul mudimu wa kulejan rusangu ruwamp, kwikal nich ‘mushiku wa kusal midimu yiwamp.’ (Titus 2:14; Mat. 24:14) Anch watwishinap kusal mudimu wa uchibol nkwash mu Rish, ov ukutwish kuchisal mwi Ndol ni /ap mwi Ndol-Mem? Anch ukat kusal mudimu wa uchibol mu Rish, ov ukutwish kamu kudandamen?

⁵ Antu amwing akata kusal midimu ya ku mujimbu akat kuman anch akutwish kusutish saa umwing ap asaa avud mu mudimu payilau ku mudimu, end apan uman wa mu balibal ap kuyendil antu akata kusal mudimu wa wingend-a-mushing akata kusambishang pamanch nakash. Akwau ni yawiy akat kwitenchik kupan uman pa chisu chau cha kudia pa midi. Amwing ni yawiy amena anch chitwishikin kutakel dilejan dia Baibel pa chisu cha kupim ni murund usadilau nend mudimu pamwing. Anambaz avud ikadila kal amaku atwishin kwitekin chisu mulong wa mudimu wa chingand chisu chidiau an ku shikol. Akat kulank pamanch nakash machuku mamwing chakwel kusal midimu yau ya ku chikumbu ya pichuku pichuku, akat kuman chisu chivud mu chirung cha dichuku mulong wa mudimu wa kulejan ni kufundish.​—⁠Efe. 5:​15, 16.

⁶ Ap anch ukutwishap kusal mudimu wa uchibol nkwash, chitwishikin anch utwisha kutenchik program wey amwiney chakwel kwipan nakash mu mudimu wa kulejan, ni kusal yawonsu ukutwisha ‘chakwel kusal yom yiwamp, ni kwikal mpich mu midimu yiwamp, kwikal mwin makas monikina, ni kuyikwashap akwau’ nich uyakin.​—⁠1 Tim. 6:⁠18.

⁷ Vurikany Mudimu Uwamp wa Kwikadish in Kwilej: Muvu ni muvu kudi antu in kusanger akata kwez ku Chivurikish. Ov chitwishikin kud antu amwing mu chikumangen kuyishinshikin antu akata kukumangan pakwez kand kal asambisha kwilej ni katat Baibel? Ov ukutwishany kuya ni kuyital nich rutong ra kuyikwash chakwel aya kurutu muspiritu? Chitwishikin anch amwing pakach pa antu inay akata kukumangan ku Chivurikish ikala anamakwau a Atuman. Akwau ni yawiy akutwish kwikal antu ileja pakur ni achikwet kal ni katat kuswir kwa dikasikesh mulong wa kuchirikin kand kwilej ni kukumangan ku yikumangan wakad kujing. Chikez kwikal cha musangar mud ik kud etu kuyiman antu inay kwikal atushalapol akweta mushiku a Yehova pamwing netu!

⁸ Anch twawejinaku mujikit wetu mu mudimu wa kulejan mu chirung cha Rish ni kuya kamu kurutu, chimeken kamu patok nakash anch tukez kuyitan antu avud asangaredina tukutwisha kuchirikin kuya ni kuyital. Tupakishany kuyishil chipul. Kupwa tuyikana kwez ni kwisambin chakul chisu tukweza kand. Anch twasal mwamu, tukutwish kubol njil mulong wa kuchirikinamu kand. Anch twachirikinamu swa wakad kusutish chisu chilemp nakash, chikutwish kwikal chiwamp kupandakan. Anch twatwishinap kusambish kapamp kamwing dilejan chisu twaya kapamp ka kusambish, tusotin kupakish kusambishap dilejan dimwing mu chisu cha kuchirikinamu kwa kaad anch chitwishikin.

⁹ Anch twasambish kupan uman wa mu balibal, tufanyidin kwijik anch tuwapidil kupakish kusambish misamb ni antu. In kulejan avud ayinkisha majin, maadres ni manimero ma telefon kud antu asangaredina asankanijanau nau chisu chadingau ni kupan uman wa mu balibal. Anch muntu wisambina nend kashichingap mu teritwar wen, mwijikisha kalam a ujindj wa chikumangen, ndiy ukez kumupan ku chikumangen cha mu teritwar mushichingay muntu. Anch kalam a ujindj kakutwishap kusal mwamu, ukutwish kumutum ku biro wa mutiy mulong wa kumushinshikin. Mu mutapu winou, tukutwish kukudish kusanger.

¹⁰ Anch kud nimero wa telefon pakwez kwikil adres, sal kuchirikinamu kusutin kumutazuk muntu ku telefon. Rijek kurutu kwa chisu yiusotina kwambambin. Ikal nich buku wey Comment raisonner piswimp mulong wa kutan referans swa. Antu amwing amen yibudikin yiwamp ya kwilejang ni antu kusutin ku telefon, pamwing ni antu adinga akasikena kuyitan kwol kwau. Nambaz umwing wayita amband amwing adinga amekeshina kusanger manimero ma telefon asankanay mu mudimu wa ku chikumbu ni chikumbu, ni mud chibudikin ndiy watwisha kusambish malejan maad ma Baibel.

¹¹ Sadilany Pamwing ni Amakurump mu Kuyikwash Antu Akad Kutulang Kand Rapor: Amakurump asangaredin nakash mu kuta muchim nich rukat kud antu akad kutulang kand rapor. Avud nakash pakach pa antu inay, kusutin ku rukat rau ayinau, asambishin kal kand kukumangan ku yikumangan ya chikumangen. Awiy akat kwov kuswir kwa kukimb urund wa piswimp nakash ni dirijek dia Yehova chakwel kutan diking dia muspiritu dirumburilau mu Kuseng 91. Amwing pakach pau adi katat tayad kusadil kand pamwing mu midimu ya chingand. Anch antu akwau akad kutulang kand rapor akumangan ku Chivurikish ngond winou, akutwish kwitiy kwikal nich dilejan dia Baibel dia muntu ipend. Anch mwamu chidia, amakurump akez kusal yitenchik mulong wa kuman muntu kanang wa kwilej ni antu inay asotina ukwash. Anch akwit kupan ukwash mwi njil yiney, kusadil kwey pamwing kukez kwikal kwa usey nakash. ​—⁠Ro. 15:​1, 2.

¹² Dandamenany “Kusal Midimu Yiwamp”: Antu avud asadila mudimu wa uchibol nkwash mwi ngond umwing ap angond avud amana anch mujikit wau wa chingand wiwejinaku mu angond alondula kupwa kwa angond inay. Awiy asankana antu adinga akweta kuswir kwa kuyichirikin kuyital. Chinech chayibachika kusal usu wa kashinsh chakwel kubudikin mu midimu ya chingand chisu ni chisu chakwel kutanijan kand ni antu asangaredina. Amwing asambisha malejan, ni chinech chayikwasha kwikal ap in kusadil nakash mu mudimu wa kulejan.

¹³ Djat ni katat antu akwau atana musangar ujim mu kusadilang nakash mu mudimu wa kulejan ni kwikadish in kwilej mu chilik chakwel anch chinech chayikasikesha kushinshikin yom yipandikena usey. Mud chibudikin, amwing atwisha kuswimp mudimu wa ku mujimbu ni kwikal chisu chin chawonsu mud ayibol ankwash. Akwau ni yawiy atwisha kwandam mu mudimu wa uchibol wa rawonsu. Awiy atwisha kutek ruchingej rau mutapu ujim nakash mudiay Nzamb pa ndond pa kuritek mu yom yipanina mangand. Awiy amana anch kwikal ‘in kuyikwashap akwau nich mapit mau,’ kuletining yiyukish yijim ya Yehova ni chinech chakasikesha ruchingej rau ra kwikal ni “mwom udia wakin.” (1Tim. 6:​18, 19) Mwawiy, anch antu avud asal mudimu wa uchibol, chikumangen chawonsu cha kabuj chikat kutaninamu ukwash. Ayibol asotin kwisambin piur pa uman wau ni kuyit antu akwau kusadil nau pamwing mu mujikit, ni mwikadil winou wa kuwap kwa muchim ukat kusambul ngikadil ya muspiritu mu chikumangen.

¹⁴ Tusalany etu awonsu chitwishikina chakwel “kwikal ampich mu midimu yiwamp” mu chirung chinech cha Chivurikish ni kuya kamu kurutu mu kuwejinaku kusadil kwetu mu mujikit wa Ukristu. Tumekeshany kujikitish kwetu mulong wa yasalay Yehova mu kutwinkish ruchingej ra mwom wa chikupu pa divu disu ditentamina.​—⁠2 Pita 3:13.