Kukolik Mu Yilemb Ya Mwin Kuwishan

“[Yehova] ukez kukukamunin mu chilemb cha in kuwishan.”—KUSENG 91:3.

1. Ov, nany mwin “kuwishan,” ni mulong wak udiay muyimp nakash?

IN KRISTU awonsu akin aril tutaku ni mwin kwozan, umwing ukweta manangu ni ubabela kuyipandakanamu antu. Mu kuseng 91:3 amujimbwil mudi mwin “kuwishan.” Ov, nany mukankuny winou? Kusambish nich nimero wa Kalol 1, 1883, gazet winou wajingunina anch kadiap mwindjing ndiy kusu Satan Djabul. Mukankuny winou mukash nich kubabal usadil usu wawonsu mulong wa kuyidimb ni kuyoz antu a Yehova mudi mukatay kupakish mwin kukwat atujil kumwoz kajil.

2. Ov, mulong wak umufanikeshinau Satan ni mwin kukwat atujil?

² Mu yisu ya pasak, atujil adinga ni kuyikwat mulong wa miminy yau yiwamp, mulong wa ulombu wa mavuj mau, ni mulong wa kuyidia ni kuyipesh. Pakwez, atujil niyau ababeling, yitang yikwetinga wom yibabeling nakash, yikasiken pa kuyikwat. Chawiy lel, mwin kukwat atujil pa chirung chafundau Bibil chadinga chimufanyidin bil kwilej nawamp yisal ni yaku ya muchid wa atujil asotilay kukwat. Kupwa, ukusadil milad ya manangu mulong wa kuyikwat. Pamufanikeshinau Satan ni mwin kukwat atujil, Bibil utukwashin tutesha nkeu jend ja manangu. Djabul ukat kutwilej umwing ni umwing. Ukat kujingunin yaku ni yisal yetu kupwa kuta yilemb yijingamina mu kupakish kwend chakwel kutwoz aom. (2 Timote 2:26) Kwoziu kudi Satan kurumburikin kusheshik kwetu mu spiritu ni kukutwish kututwal ku kusheshik kwetu chikupu. Chawiy lel, mulong wa diking dietu, tuswiridin kujingunin yitongijok kushalijan ya mwin “kuwishan.”

3, 4. Chisu ik chidinga nkeu ja Satan mudi ja ntambu? ap mudi ja ntok?

³ Pasadilay yom yimekena chakwel kufanikesh nich, nfund a kuseng wafanikesha kand nkeu ja Satan mudi ja mwan a ntambu ap mudi ja ntok. (Kuseng 91:13) Mudi ntambu, yisu yimwing Satan ukat kurishish patok kamu, kurishish kwa pa mes patok kusutil ku kuzengol ap yijil ya guvernema pantaliken ni antu a Yehova. (Kuseng 94:20) Kurishish kwinoku mudi kwa ntambu, kukutwish kuyibachik antu avud kudiokal kudi Yehova. Pakwez, chisu chivud, kurishish kwinoku kwa patok kuding nich yibudikin yindjing ni kukat kuyinung mu uumwing antu a Nzamb. Ov, chidi nchik lel piur pa nkeu ja kurishish nich ja Satan ja ujindj mudi ja ntok?

⁴ Djabul usadidil manangu mend mapandakenamu ma antu mulong wa kusambish kurishish kwa kutwamb makasu ni kujipan mudi kwa ulemb wa nnak ujingamina mu dibuku. Mwinjil yiney, upandaken nakash mu kutek ulemb mu manangu ma antu a Nzamb, kuyidimb ni kuyishikij ku kusal rusot rend pa ndond pa kusal rusot ra Yehova, chibudikin chiyimp mudi ik. Cha musangar, tuvuramedinap yitenchik ya Satan. (2 Korint 2:11) Tushinshikinany katat yilemb yend yinying yijipena nakash yikatay kusadil ‘mwin kukwat atujil.’

Wom wa Muntu

5. Ov, mulong wak “wom wa muntu” udi mupit ukash?

⁵ Mwin “kuwishan” wij maku mamutangau nich muntu ma kusot kwikal mu urund ni antu akwau. In Kristu kayikanginap pantaliken nich yitongijok ni yovil ya antu ayombilamu bwalakan. Chijay mwamu, Djabul ukusot kusadil maku mau piur pa yitongidinau antu pa yom yiney. Chilakej, ukat kuyiwish antu amwing a Nzamb kusutil ku chilemb cha “wom wa muntu.” (Jinswir 29:25) Anch mulong wa wom wa muntu, atushalapol a Nzamb inung ni antu akwau mu kusal yom yijidikinay Yehova ap kuyikangesh kusal yilondila Dizu dia Nzamb anch yawiy yifanyidinau kusal, ayikwat kal kudiay mwin “kuwishan.”—Ezekiel 33:8; Yakob 4:17.

6. Chilakej ik chilejena mutapu ukutwishay nsand kufa mu chilemb cha mwin “kuwishan”?

⁶ Chilakej, nsand ukutwish kuwil mu chipwichik cha arund nend a ku shikol ni ukutwish kuna ruwand. Kandikal atonginap mu manangu mend kuna ruwand pa chisu chadiokalangay ku shikol pa dichuku dined. Pakwez, kukashimuk wasambish kusal chom chidia cha ubaj ku ukash wa mujimbu wend ni chikisinay Nzamb. (2 Korint 7:1) Mutapu ik washikenangay ku kuwa? Pamwing chidi mulong ukwet arund ayimp ni wova wom anch akumulik. En ansand, kangal wamushilany mwin “kuwishan” akudimbany ni kukukwatany! Chakwel kwipuk kukwachik aom, ilamany chinyim nich kurumbuk ap pakemp kusu. Teshany chiyul cha Bibil cha kuyilik arund ayimp.—1 Korint 15:33.

7. Mutapu ik usadiningay Satan chakwel anch anvaj amwing ashadish kwisikan kwau?

⁷ Anvaj in Kristu ij yisend yau yiyinkishinau kudi Bibil ya kubangin majuku mau. (1 Timote 5:8) Pakwez, rutong ra Satan ridi ra kuyisal in Kristu ashadisha kwisikan kwau pa mulong winou. Pamwing ap akat kujingol ku yikumangan mulong akat kuwil mu yipwichik ya amakurump a midimu yau ya kuyit kusal asaa akwau a mudimu. Akutwish ov wom wa kwit konje chakwel aya kukumangan ku yikunku ya chitentam cha distrik mulong wa kumwifukwil Yehova pamwing ni akadivar nau. Diking chinyim nich mupit winou didi ‘kumuchingejin Yehova.’ (Jinswir 3:5, 6) Chikwau, kuvurik anch tudi etu awonsu yid ya chikumbu cha Yehova ni anch washilamu kal amwinend kutulam kukez kutukwash kulam kwisikan kwetu. Anvaj, ov, umwitiyijinany Yehova anch ukez mwinjil yimwing ap yikwau kukulamany pamwing ni majuku men anch wasalany rusot rend? Ap, ov, Djabul ukez kukwozany aom ni kusadish rusot rend mulong wa wom wa muntu? Tukwitinany ulembilany nakash chakwel ushinshikinany milong yiney.

Chilemb cha Mapit

8. Mwinjil ik musadidilay Satan usu wa kudimban wa mapit?

⁸ Satan usadidil kand usu wa makasu wa mapit mulong wa kutwoz. Chisu ni chisu ditenchik dia winsak dia mangand minam dipalangeshin mitapu ya kupit swa yikutwisha pamwing ap kuyidimb antu a Nzamb. Pa yisu yimwing, chitwishikin kuyikasikesh antu ku: “kusal mudimu ukash. Anch wikal nich nfalang jivud, ukutwish wipuwangesh ni kusanger mwom. Ukutwishap kusal mudimu wa uchibol.” Mazu mudi minam makutwish kukuletin yitongijok yakad kwisikan ya antu amwing akata kwisakin ukwash wa nfalang ja ambay nau in Kristu adia mu chikumangen. Tongin nawamp pa mitapu yiney ya kukupitish swa. Ov, yilejenap yitongijok ya muntu mpich “chisup” wisambinay Yesu mu chilakej chend?—Luka 12:16-21.

9. Ov, mulong wak ufilingau in Kristu amwing mu chilemb cha yom yisotilau?

⁹ Satan usadidil ditenchik diend diyimp mwinjil yimwing yikweta usu pa maku ma yom ya antu. Maku minam makutwish pamwing ap kushesh mwom wa mwin Kristu, makusus dizu ni kudikadish diakad “kusong mabuj.” (Marko 4:19) Bibil utukasikeshin tusangera yakudia ni yakudjal yitukweta. (1 Timote 6:8) Pakwez, avud ayoza kal kudi mwin “kuwishan” mulong kakatap kusadil chiyul chinech. Ov, pamwing ap chibud chawiy chayishikija ku kwiyov anch afanyidin kulondul mulad kanang wa mwom? Ov, chidi nchik ku mutambu wetu ayinetu? Ov, maku metu ma kusot kwikal nich yom makat kutubachik tuteka yisakin ya difukwil diakin pa ndond ya kaad? (Hagai 1:2-8) Cha ushon, pa yisu yikasikeninga kuman nfalang, antu amwing ashesha mwikadil wau wa mu spiritu mulong wa kusot kwikal nich mashakamin ma mwom madingau nich. Manangu minam ma kusot mapit makat kumusangaresh mwin “kuwishan”!

Chilemb cha Kwipuwangesh Kwijondila

10. Kwishinshikin ik kufanyidinay kusal mwin Kristu umwing ni umwing?

¹⁰ Nkeu yikwau ya mwin “kuwishan” yidi kuyipish chovil cha chivadik cha antu piur pa kuwap ni kuyip. Chaku mudi chadinga mu Sodom ni Gomora chandamin kal mu masengan ma kwipuwangesh mavud. Ap jinsangu jipalangeshinau ku televizion ni mu magazin jikasikeshidin mu kusanger mu masandj. Yom yivud yidia mu masengan ma kwipuwangesh kusutil ku jinjil ja kupalangesh jinsangu yikat kuyipuputish antu manangu ma “kujingunin [nich] kuwap ni kuyip.” (Hebreu 5:14) Pakwez vurikany, mazu malonday Yehova kusutil kudi Isay anch: “Riyind kudi en ukat kutongany anch, kuwap kudi kuyip, ni kuyip kudi kuwap!” (Isay 5:20, NW) Ov, mwin “kuwishan” wayipishin kal manangu nich kwipuwangesh kwijondila mu mutapu ujingamina? Chidi cha usey anch twishinshikina ayinetu.—2 Korint 13:5.

11. Dibabesh ik piur pa mateyatre masutishinau pa televizion didia mu magazin winou?

¹¹ Pasutil kal piswimp mivu 25, nich rukat Chinong cha Kalam chababesha chikumbu cha ritiy piur pa maprogram ma televizion.a Chijikish chinicha chadinga mulong wa chibudikin chijingamina cha kulondul maprogram ma mateyatre ku televizion: “Kusot rukat kudi mulong wa kuyingish mwikadil win wawonsu. Chilakej, changadim umwing waka madikaj pakad kwachik wamuleja murund nend anch: ‘Nimukatin Victor. Niyakamishinap. . . . Kuval nend mwan chom chijim nakash kudi am!’ Mizik yitudila yasala anch chikal chikash kuman anch mwikadil wend uyipin. Niyey mukata Victor. Mwanakena changadim. Ov, ‘uteshin. Chamushen kuman mutapu wa kutong,’ mwamu mwalonday mwin kutal umwing wachirisha manangu mend. ‘Twij anch masandj mayipin. . . . Neza kwijik mu muchim anch nadinga ku mutambu wend.’”

12. Yom ik yilejena kufanyin kwa dibabesh dia katat piur pa program wa televizion?

¹² Kudiosh kwapalangeshinau mitu ya milong yiney, maprogram minam mayimp mavulijadin kal. Mu jindond jivud, maprogram minam akat kumasutish dichuku dia kabuj. Amakundj, amband, ni ansand avud chisu ni chisu izwishin mu manangu ni mu michim yau kwipuwangesh kwa mutapu winou. Niyetu kitufanyidinap kwidimb ayinetu nich yitongijok yiyimp. Chikwikal chiyimp kutongin anch kwipuwangesh kwijondila kupandakenamwap kuyip yitumena mu mangand. Ov, chakin kamu mwin Kristu ukutwish kuyingish kutong amuyiya kudi mulad wa antu akadiay kutongin kuyitazuk kwol kwend?

13, 14. Yom ik yalondau antu amwing ataninamu palondulau yibabesh piur pa televizion?

¹³ Antu avud isakidin pakatau kusadil dibabesh dia “kashalapol ushinshamena ni kubabal.” (Mateu 24:45-47) Kupwa kwa kutang chiyul chidia zwang, chimedina pa Bibil, antu amwing afunda mulong wa kulejan mutapu mitu ya milong yadinga nich usu padi awiy.b Muntu umwing walonda anch: “Mu mivu 13 nadinga muswik wa mateyatre ma ku televizion. Nadinga ni kutong anch nidi mu diking mulong nadinga ni kukumangan ku yikumangan ya Ukristu ni pachipatu nadinga ni kulejan. Pakwez nikala ni manangu ma mateyatre ma mangand ma ku televizion anch, ang nfumwey ukulamin nayimp ap anch wiyov anch kakukatinap, kusal masandj kukwetap mulong—ikundj ndiy okova usany. Ni chawiy niyova anch ‘niyingin’ nich nasala masandj ni nasala chitil kudi Yehova ni kudi nfumwam.” Mband winou amwopata mu chikumangen. Chakin, wachirisha manangu mend, wakarumuka, ni amuchirisha. Mitu ya milong yibabeshen piur pa maprogram ma mateyatre ma ku televizion mamukasikesha kumulikin Yehova ndond amufumba kusutil ku yikisinay.—Amos 5:14, 15.

¹⁴ Muntu mukwau wayitanga wakwachika mu mwom walonda anch: “Nashikoka kudil panatanga mitu ya milong yiney, mulong najingunina anch muchim wam kiwadingap wawonsu kudi Yehova. Nashilamu kudi Nzamb wam anch ni kwikalap kand muswik wa maprogram minam.” Kupwa kwa kumekesh kujikitish kwend mulong wa mitu ya milong yiney, mband umwing mwin Kristu witiyija uswik wend ni wafunda anch: “Natonga anch . . . anch urund wam ni Yehova wela kuyip. Ov, mutapu ik nikutwisha ‘kuyikadish in kusal masengan minam’ mudi arund ni kwikal kand murund wa Yehova?” Anch masengan minam ma pa televizion mayipisha michim mu kusut kwa mivu 25, mikadil kal ni usu ik ilel? (2 Timote 3:13) Tufanyidin kudimukin chilemb cha Satan cha kwipuwangesh kwijondila mu mitapu yawonsu, chikala kusutil ku mateyatre ma ku televizion, masengan ma chisum ku video, ap mizik ya masandj ku mavideo.

Chilemb cha Milong ya Chiuntu

15. Djabul uyozining nchik antu amwing aom?

¹⁵ Satan ukat kusadil milong ya chiuntu mudi chilemb mulong wa kuyauril antu a Yehova. Tukutwish kufa mu chilemb chinech chikalap nchik yisend ya mudimu yitukweta. Amwing ayozin aom kudiay Djabul mulong alika milong ya chiuntu yishesha chisambu ni uumwing ni kushakam kuwamp kwa mu spiritu kwaletay kal Yehova.—Kuseng 133:1-3.

16. Mutapu ik wa ujindj usadidilay Satan mulong wa kuvundangesh uumwing wetu?

¹⁶ Pa chirung cha Njit ja Mangand ja 1, Satan wapakisha kunongish chikunku cha pa divud cha dirijek dia Yehova kusutil ku kurish mes ni mes, pakwez wakanganya. (Kuburik 11:7-13) Kudiosh pinipa, ukat kusal mu ujindj mulong wa kushesh uumwing wetu. Pitukata kulikin milong ya chiuntu yitwaurila, tukat kumushil mwin “kuwishan” ndond. Tukutwish pamwing ap kukangesh mwiku utumbila wa Nzamb kusal nawamp mu mwom wetu pamwing ni mu chikumangen. Anch yom yiney yashiken, Satan ukez kusangar mulong wa kuvundangesh kwawonsu chisambu ni uumwing wa chikumangen ni kukangesh mudimu wa kulejan.—Efes 4:27, 30-32.

17. Chom ik chifanyidinau kusal antu alikina kwovijan mulong wa kupwish milong yau?

¹⁷ Chom ik ufanyidina kusal anch wapwitijan ni mbay ney mwin Kristu? Chakin, mulong ni mulong ushalijadin umwing ni ukwau. Pakwez, kwikalap nchik mayingishin mavud maletina milong, kwikil diyingish dikusala anch kupwitijan kwinoku kulika kupwa. (Mateu 5:23, 24; 18:15-17) Chiyul chidia mu Dizu dia Nzamb achipepila, chiwanyidin. Anch ayisadil, yijidik ya Bibil yikangeningap. Yikweting chisu chawonsu yibudikin yiwamp!

18. Ov, mulong wak kumwilakej Yehova kukat kutukwash kupwish milong yetu?

¹⁸ Yehova “witenchikin mu kulikishilan,” ni ukat kupan “dilikishil” diakin. (Kuseng 86:5; 130:4) Tukumekesh anch tudi an akatinay Yehova anch twamwilikej. (Efes 5:1) Etu awonsu tudi akayitil ni etu awonsu tuswiridin dilikishin dia Yehova. Chawiy, tufanyidin kudimuk anch twiyov anch tudingap tayad kuyilikishin antu akwau. Tukutwish pamwing kwikal mudi muswik wisambinay Yesu mu chishimu walika kumulikishin mbay nend muswik dibaz dimwing diadinga dikemp nakash kwilakej nich dibaz diamulikishinau ndiy. Nsalejend pateshay mwamu, wamuteka muswik wakad kulikishinang mu rukan. Yesu wapwisha chishimu chinech nich kulond anch: “Chawiy kand chikez kasalay Tatukwam udia mwiur kudi en, anch walikany kuyilikishilany anamakwen ku michim yen.” (Mateu 18:21-35) Kutongijokin ku chishimu chinech ni kutongijok tupamp tuvud tukatay Yehova kutulikishin chamwamu kukez chakin kamu kutukwash pa chisu tusotila kupwish milong ya chiuntu anch twapwitijan ni mukadivar netu!—Kuseng 19:14.

Mu Diking dia “Mwi Ndond ya Kujingamin Yend Ndiy Udia Piur”

19, 20. Mutapu ik tufanyidina kuyiman “ndond ya kujingamin” ni “mwizuzwimb” wa Yehova pa chirung chinech chikash?

¹⁹ Tushich mu chirung cha yisu yikash. Chakin kamu Satan ukusot kutunongish etu awonsu anch kitwadingap mu diking dia rukat dia Yehova. Chakwel kwipuk kufa mu chilemb cha mwin “kuwishan,” tufanyidin kushal mwi ndond ya diking ya chifanikesh, “mwi ndond ya kujingamin yend Ndiy Udia Piur, . . . mwishin mwa mwizuzwimb wend [mwin] Dikand Diawonsu.”—Kuseng 91:1.

²⁰ Tukwatany katat yivurish ni umutakel wa Yehova mudi diking, kididiap dia kutukoj kusal yom. Etu awonsu turil tutaku nend mwin kuturishish ukweta manangu kupandakanamu ma antu. Pakad ukwash wa rukat ra Yehova, kwikil muntu ukutwisha kwiyep chilemb. (Kuseng 124:7, 8) Tumulembilany Yehova ukez kutukol mu yilemb ya mwin “kuwishan”!—Mateu 6:13.

[Mazu madia kwishin kwa paj]

Ov, Uvurikin?

• Ov, mulong wak “wom wa muntu” udi chilemb chijipena?

• Mutapu ik usadidilay Djabul makasu ma usu wa mapit?

• Mutapu ik wayikwatay Satan antu amwing mu chilemb cha kwipuwangesh kwijondila?

• Chilemb ik chisadidilay Djabul mulong wa kushesh uumwing wetu?

[Chipich chidia pa paj wa 29]

Antu amwing ayikwata kal mu chilemb cha “wom wa muntu”

[Chipich chidia pa paj wa 30]

Ov, ukat kusanger yom yawonsu yikisinay Yehova?

[Chipich chidia pa paj wa 31]

Chom ik ukutwisha kusal anch

upwitijadinany ni mbay mwin Kristu?