Kwikepish Kukasiken

CHIMEKEN kudi antu avud anch, ilel chitwishikinap kwikepish. Antu ayiyikedila akwau nawamp ni amekena mudi ayipandakenamu awiy akata kusot kwitek piur pa antu akwau, kwibaz, asotila kutan chawonsu chisotilau. Antu avud akat kwov ris ra mashakamin ma mpich ni ma muntu wijikena, kakatap kumwimburij muntu witudishina ni wikepishina. Antu atwishina mu mwom akat chisu ni chisu kwitutul anch atwishin mulong wa usu wau ayinau. Pa ndond pa kwikepish, itumbishin nich kwibaz anch chidi mulong wau ayinau washikenau ku kutwish.

Chikwau, mwin kukimbijol wa mu Canada wisambina piur pa “kupalangan kwa ngikadil ya ‘ching am kusu’” mwi ngand yend. Antu akwau atongining anch tushich mu chisak chisendinau nich usey nakash kwisangaresh kupandakanamu yisend ya mwom. Avud pakach petu akwitiyij anch ilel antu avud ibangidin ching awiy ayinau. Mu mangand mudi minam, chimeken anch kwikepish kudiap ngikadil yifanyidina kukasikeshin.

Chakin, antu akemp kusu kakwitiyijap chitongijok chilondila anch kwikepish kudi kuwamp kudi antu amwing kudiap kudi antu awonsu, mulong chiswapeling kushakam ni antu in kwikepish. Pakwez, mu mangand metu ma kuril, antu avud iyakamishin anch, anch asal nich kwikepish, akuyiman kudi antu akwau mudi aziyil.

Dizu dia Nzamb, Bibil, diabwaka anch mu chisu chetu antu avud akez kwikal: “in kwibaz, ni kwishimek.” (2 Timote 3:1, 2, Manswik Masu) Ov, witiyijinap anch uprofet winou uwanyidin? Ov, umen usey ap umwing wa kwikepish? Ap anch utongin anch muntu wikepishina ukumekan mudi uziyil, uswapela kwisakin?

Uyakin udi anch Bibil utwinkishin mayingishin mawamp mamekeshina usey wa kukudish kwikepish. Bibil uletin kuman kwisikena ni kuwamp kwa ngikadil yiney ni ulejen anch kwikepish kwakin kudi chijingidij cha usu, kudiap kuziy.

[Chipich chidia pa paj wa 3]

Mutapu ik tufanyidina kwiyov piur pa yom yitusadila?