Kudishany Kwishikumwish Kwakin

“Ukez kuyipandish in kwishikumwish.”—2 SAMWEL 22:28, NW.

1, 2. Chom ik chifanikena chikwetau ant avud a mangand?

JINZAY jijim ja mu Idjibit jiletin uman wa antu ayikela ngand yiniya pakur. Akwau asha yijingidij yau mu rusangu ra muntu adinga Senakerib wa ku Asiri, Alexandre le Grand wa ku Grèce, ni Kaisar Julius wa Rom. Anyikel inay awonsu adinga nich chom chimwing chifanikena. Kashap rusangu ra kwikal ishikumwishina chakin kamu.—Mateu 20:25, 26.

² Ov, ukutwish kutongin umwing wa ant ajimbwilau kwiur oku kwikal nich chaku cha kukimb mu want wend chakwel kuyitan ayimana mar aswiridina rongoj? Chakin kamu bwat! Ukutwishap kutongin anch ela kuya ku yikumbu ya pansh ya ayimana mar chakwel kuyikasikesh antu inay. Kushalijan mud ik pakach pa ngikadil yau pantaliken ni yitang ya antu ayimana mar nich ya Nyikel Mujim wa mangand, Yehova Nzamb!

Chilakej Chijim cha Kwishikumwish

3. Mutapu ik ukatay Nyikel wa Piur Nakash kuyisadil antwend?

³ Yehova upandaken kujimb ni udi wa piur nakash, chikwau kand “wendishil mes mend pansh pawonsu, chakwel ayimanyin apanyina michim yau yawonsu kudi ndiy.” (2 Jinsangu 16:9) Ni chom ik chikatay kusal Yehova anch wayitan in kwifukwil ikepishina amena mar muspiritu mud chibudikin cha yoziu kushalijan? Mu mutapu umwing wa kulond, ndiy ‘ushich’ pamwing nau antu inay kusutil ku spiritu wend utumbila chakwel ‘kupizuril spiritu wa in kwikepish ni kukasikesh michim ya ayimana mar.’ (Isay 57:15) Mwamu, in kumwifukwil end apizurilau adi awanyishinau nawamp kuchirikin kand mu mudimu nich musangar. Chakin Nzamb umekeshin kwishikumwish!

4, 5. (a) Nfund-a-kuseng wiyova nchik pa mutapu ukatay Nzamb kuyikel? (b) Chirumburikin ik kulond anch Nzamb ukat ‘kwishikumwish’ chakwel kumukwash ‘muntu mukemp’?

⁴ Kwikil muntu ap umwing mu mangand mawonsu wikepisha amwinend mu chilik chimwing mud Mwant Mwin Mangand chakwel kuyikwash antu akayitil. Nfund-a-kuseng wafunda anch: “[Yehova] udi piur pa michid yawonsu, uyaj wend piur pa maur. Nany udia mudi [Yehova], Nzamb wetu? Ukweta nkwas yend piur pa yawonsu, Pakwez ukat kutal mes pa yom yidia kwishin, ni kutal yom mudi muyidia mwiur ni pansh. Ukat kulangwish mukemp ku rufunfut, ukat kuzambwish kazwendj kulelay.”—Kuseng 113:4-7.

⁵ Shinshikin dizu ‘kwishikumwish.’ Padisambidinau pantaliken nau antu, dizu dined dikutwish kwikal nich chitongijok chiyimp, ‘kumekesh kwa ukurump pantaliken ni muntu mukemp ap muntu wakad chom.’ Ngikadil yiney ya kwitutul yidiap ya Yehova Nzamb, udia wishitwila ni utumbila ni wakad “kwibaz.” (Marko 7:22, 23, MM) Pakwez ‘kwishikumwish’ kukutwish kand kwikal nich chitongijok cha kushikumuk pansh mu chilik cha reng ra muntu mukemp ap kushirik kudiokal mu reng rey ap ulabu mu kusadil pamwing ni muntu udia mukemp. Mwamu, Mabibil mamwing makarumwin Kuseng 113:6 mud kulond anch Nzamb wishikumwishin amwinend. Chifanyidin mud ik kurumburil chitongijok cha Nzamb wetu utila muchim wa rukat ku maswir ma in kumwifukwil end akad kuwanyin!—2 Samwel 22:36.

Chishikumwishinay Yesu

6. Chisal ik chadinga chijim cha kwishikumwish kwa Yehova?

⁶ Chisal chijim cha kwishikumwish ni cha rukat cha Nzamb chadinga kumutum Mwanend mukatish kabuzivumu avadika pa divu ni amulila mud muntu mulong wa dipandish dia antu. (Yohan 3:16) Yesu watuleja uyakin piur pa Tatukwend wa mwiur kupwa wapana mwom wend uwanyidina mulong wa kudiosh “yitil ya mangand.” (Yohan 1:29; 18:37) Wamumekesha muchifanyidina Tatukwend, pamwing ni kwishikumwish kwa Yehova, Yesu wadinga tayad kusal chawonsu chamwitau kusal kud Nzamb. Chinech chadinga chilakej chijim cha kwishikumwish ni cha rukat chakadau kusha kud muntu ap umwing watangau kud Nzamb. Kadiap antu awonsu asangera kwishikumwish kwa Yesu, ap akankuny nend amumana kwikal “muntu wishikumwishina nakash pakach pa antu.” (Daniel 4:17, NW) Chikalap nchik mwamu, kambuy Paul wajingunina anch ambay nend akaritiy afanyidin kumwimburij Yesu ni kwikal ishikumwishina mu kwisadil kwau umwing ni mukwau. (1 Korint 11:1; Filip 2:3, 4)

7, 8. (a) Mutapu ik wilejay Yesu kwishikumwish? (b) Diladikij ik diasalay Yesu kudiau antu akeza kwikal in kwilejend?

⁷ Paul wakasikeshina chilakej chijim cha Yesu, wafunda anch: “Ikalany ni chiyul chimwing chadinga kand mu Yesu Kristu; ndiy wading mu chilik cha Nzamb, pakwez kichindilap kwikal wilikena nend Nzamb mudi chom cha kubwitan, pakwez wilika amwinend, watambula chifu cha kashalapol, wikala mudi antu; ni pakarumukay muntu ndiy wikepisha amwinend, wikal mwin kuziyil ku rufu, inge ku rufu ra pa [mutond].”—Filip 2:5-8.

⁸ Antu amwing akutwish kutong anch, ‘Ov, mutapu ik wilejay Yesu kwishikumwish?’ Kwadinga kwisakin kushimokishina kwa urund wend wa piswimp ni Tatukwend wa mwiur mu chirung cha mivu yivud, pasalay mud “mwant wa mudimu” wa Nzamb pa kutang yom yawonsu. (Jinswir 8:30) Kwinyim kwa kubwambwil mu Eden, Mwan wa Nzamb watwisha kuman kwishikumwish kwa Tatukwend mu kuyisadil antu akayitil. Kwambatan nich, padingay pa divu, Yesu wamekesha kwishikumwish kwa Tatukwend ni waladikija: “Itwikany mpand yam, wingiyiyany am; mulong yam nitudishila ni kwikepishil mu muchim; ni en ukez kutanany kwipimish mipim yen.”—Mateu 11:29; Yohan 14:9.

9. (a) Chom ik chisangareshina chatanay Yesu mudiau anikanch? (b) Pasadilay mwanikanch, dilejan ik dialejanay Yesu?

⁹ Mulong Yesu wadinga chakin kamu wishikumwishina, chawiy anikanch kadingap ni kumwov wom. Pakwez, iyova kwikal apwitidinau kudiay ndiy. Ndiy, ku mutambu wend, wayikata anikanch nakash ni wata muchim wend kud awiy. (Marko 10:13-16) Chom ik chisangareshina chatanay Yesu mudiau anikanch? Chakin kamu, adinga nich ngikadil yisangareshina yadinga yiburedinau kusadil amakurump amwing adinga in kwilejend. Chijiken nawamp anch anikanch ayimening amakurump kwikal ajim. Ukutwish kuman chinech kusutil ku yipul yivud yikatau kwipul. Inge, kuyisikej ni amakurump avud, anikanch aswapel kwitiyij yiyilejinau ni kakwetingap ngikadil ya kwibaz. Dichuku dimwing, Yesu wamutonda mwanikanch umwing ni wayela in Kwilejend anch: “Chakin kamu nakulejany ching en wakarumukany kamu ni kwikal mudi mwanikanch, chamwamu kiukutwishanyip kwandam mu want wa mwiur.” Wawejinaku kand anch: “Mwawonsu ukeza kitudish amwinend mudi mwanikanch ou, ndiy kamu mwinau upandikenamu mu want wa mwiur.” (Mateu 18:3, 4) Yesu wateka mbil: “Mwawonsu ukwizambula akez kamushikumwish, ni ukwishikumwisha akez kamuzambul.”—Luka 14:11; 18:14; Mateu 23:12.

10. Yipul ik tukushinshikina?

¹⁰ Uyakin winou ulangwishin yipul ya usey. Ruchingej retu ra kutambul mwom wa chikupu rimanyidin mu mutapu umwing pa kukudish kwetu kwishikumwish kwakin, pakwez, ov, mulong wak yisu yimwing chiyikasikedining in Kristu kwikal ishikumwishina? Ov, mulong wak chidi chikash kudi etu kudjatil kwibaz kwetu pansh, ni kwakul ku yoziu nich kwishikumwish? Ni chom ik chikeza kutukwash chakwel kutwish mu kukudish kwishikumwish kwakin?—Yakob 4:6, 10.

Mulong Wak Chikasiken Kwikal Ishikumwishina

11. Ov, mulong wak chidiap cha kushimok anch tukat kusal usu nakash chakwel kwikal ishikumwishina?

¹¹ Anch wiman amwiney anch ukat kura tutaku chakwel kwikal wishikumwishina, urishinap kwey amwiney. Kwinyim mu muvu wa 1920, gazet winou wisambina chiyul cha Bibil pa maswir ma kwishikumwish, warumburila anch: “chawiy lel pitumena mutapu wakwatay Nsalejetu kwishikumwish nich usey ujim chifanyidin kuyikasikesh in kwilej akin awonsu kukudish ngikadil yiney pichuku-pichuku.” Kupwa gazet winou walonda mazu manam makin: “Chikalap nchik yiyul yiney yawonsu ya Mifund kuburen kuwanyin kwa chiuntu kumeken kwikal mud anch antu ikala a Nsalejetu ni achipa kulondul njil yiney ameken kutan yikokujol yivud, kukakalijan kukash, nakash pa mulong wa kwishikumwish kupandakanamu mu ngikadil yikwau.” Chom chinech chikasikeshidin diyingish dimwing dilejena mulong wak in Kristu akin afanyidin kusal usu nakash chakwel kwikal ishikumwishina—mwikadil wetu wa untu wa chitil usotil ntumb yakad kufanyin. Chinech chidi mulong tudi an a ambay a uruw akayitil, a Adam ni Eve, awila mu ris ra yifu.—Rom 5:12.

12, 13. (a) Mangand madi nchik chikangesh cha kwishikumwish kud in Kristu? (b) Nany ukata kusal kukudish kwishikumwish kwetu kwikal chom chikasikena nakash?

¹² Diyingish dikwau tukutwisha kutan anch chikasiken kumekesh kwishikumwish didi anch atwombilamu kudi mangand mayikasikeshina antu kuril kwikal ajim kuyipandakanamu antu akwau. Mukach mwa ntong ja mangand mudi kuril mulong wa kusangaresh “maku [ma yitil] ma mujimbu wa mbij, maku ma mes, kwibaz kwa yom.” (1 Yohan 2:16) Pa ndond pa kwikal ayikedilau kud maku minam ma mangand, in kwilej a Yesu alamin dis diau zwang ni kuditadish pa kusal rusot ra Nzamb.—Mateu 6:22-24, 31-33; 1 Yohan 2:17.

¹³ Diyingish dia kasatu disadila anch kukudish ni kumekesh kwishikumwish kwikal kukasikena didi anch musul wa kwibaz, Satan Djabul, uyikedil mangand. (2 Korint 4:4; 1 Timote 3:6) Satan ukasikeshidin ngikadil yend yiyimp. Chilakej, wasota anch Yesu amwifukwil chakwel amwinkisha “mant mawonsu ma mangand ni uyaj wau.” Nich kwishikumwish, Yesu walika chipan cha Djabul nich kujijaman. (Mateu 4:8, 10) Chawiy chimwing kand, Satan ukat kuyipak in Kristu chakwel kukimb uyaj wau ayinau. Pakwez, in Kristu ishikumwishina akat kusal usu chakwel kulondul chilakej cha Yesu, ni kupan ntumb ni uyaj kud Nzamb.—Marko 10:17, 18.

Kukudish ni Kumekesh Kwishikumwish Kwakin

14. ‘Kwishikumwish kwa makasu’ kurumburikin ik?

¹⁴ Mu mukand wend wayifundilay in Kolosay, kambuy Paul wayibabesha pantaliken nich kwishikumwish kwa kusot kuyikashimwish antu. Paul warumburila chinech mud ‘kwishikumwish kwa makasu.’ Antu akata kwimekesh mud in kwishikumwish kwa makasu kadiap antu a muspiritu. Pakwez, amekeshin patok anch awiy adi chakin in “kwibaz.” (Kolosay 2:18, 23) Yesu wisambina yilakej yiney ya kwishikumwish kwa makasu. Wayifisha nich Afaris mulong wa malembil mau ma patok ni mutapu wadingau ni kumekesh yifu yinenganena ni ya ushon chakwel ayimana kud antu. Chinyim ni chinech, chakwel anch malembil ma ku ujindj mitiyika kud Nzamb, chifanyidin kumalond nich kwishikumwish.—Mateu 6:5, 6, 16.

15. (a) Chom ik tufanyidina kusal chakwel kulam kwishikumwish mu manangu? (b) Yisu yilakej yimwing yiwamp ya kwishikumwish?

¹⁵ Ayikwashining in Kristu kulam kwishikumwish kwakin kwa mu manangu kusutil kushinshikin yilakej yipandikena ya kwishikumwish, Yehova Nzamb ni Yesu Kristu. Kusal mwamu kwitin dilejan dia Bibil diakad kujing ni dia mikand yikwashina dilejan dia Bibil yitenchikinay “Kashalapol ushishamena ni kubabal.” (Mateu 24:45) Dilejan mud dined didi dia usey kud atulam in Kristu, ‘chamwamu michim yau yikez kwibazin akadivar nau.’ (Kuvurik Yijil 17:19, 20; 1 Pita 5:1-3) Tongijokin pa yilakej yivud ya antu ayukishau mulong wa ngikadil yau ya kwishikumwish, mud Rut, Hana, Elizabet, ni akwau avud. (Rut 1:16, 17; 1 Samwel 1:11, 20; Luka 1:41-43) Tongin kand, pa yilakej yikwau yiwamp ya amakundj adinga nich ntumb ashala ishikumwishina mu mudimu wa Yehova, mud David, Jozias, Yohan Mubabatish, ni kambuy Paul. (2 Jinsangu 34:1, 2, 19, 26-28; Kuseng 131:1; Yohan 1:26, 27; 3:26-30; Midimu 21:20-26; 1 Korint 15:9) Ni chidi nchik piur pa yilakej yivud ya kwishikumwish ya katat yidia mu Chikumangen cha Ukristu? Kusutil ku kutongijokin pa yilakej yiney, in Kristu akin akez kuyikwash kwikal nich “kwitudish [kwishikumwish mu] kumusadil muntu ni mukwau.”—1 Pita 5:5.

16. Mujikit wa Ukristu utukwashining nchik kwikal ishikumwishina?

¹⁶ Kusal mujikit wa Ukristu pakad kujing kukutwish kutukwash kwikal ishikumwishina. Kwishikumwish kwa mu manangu kukutwish kutwikadish in kusong mabuj pitwisambina nau angendj tutanina ku chikumbu ni chikumbu ni mu jindond jikwau. Pakampwil anch in chikumbu alik kusanger uruu wa Want ni chibeng kapamp ka kusambish. Chisu ni chisu antu kakatap kwitiy yitiyij yetu, ni kwishikumwish kukutwish kumukwash mwin Kristu kudandamen kwakul ku yipul “nich kwitudish ni kalimish.” (1 Pita 3:15) Atushalapol ishikumwishina a Nzamb asokina ku materitwar masu ni ayikwasha antu akweta yaku ni yany ya mashakamin kushalijan. Atushalapol inay nich kwishikumwish arisha ni midimu yikash ya kwilej rudim risu chakwel kuyikwash nawamp antu asotinau kulej rusangu ruwamp. Chidi cha kujikitish mud ik!—Mateu 28:19, 20.

17. Yisend ik ya Ukristu yitina kwishikumwish?

¹⁷ Nich kwishikumwish, antu avud awanyisha mijikit yau ya Ukristu, ateka yisakin ya antu akwau kurutu kwa yisakin yau ayinau. Chilakej, chimwitin tatuku mwin Kristu kwishikumwish chakwel kwitekin chisu cha kusal yom yend mulong wa kurijek ni kutakel dilejan dia Bibil disongina mabuj ni anend. Kwishikumwish kuyikwashin kand an kuyilimish ni kuyiziyil anvajau, adia akad kuwanyin. (Efes 6:1-4) Chisu ni chisu amband akweta anfumwau akad kwitiyij arishin nich mikadil yiyitina kwishikumwish mulong asotil kuyipandakan ambay nau a uruw nich ‘yaku yiwamp ni kalimish kakurikina.’ (1 Pita 3:1, 2) Kwishikumwish ni kwipan kwa rukat yidi ya usey nakash pitukata kubangin maswir ma anvaj ayej ni ananapina kal nich rukat.—1 Timote 5:4.

Kwishikumwish Kukat Kupwish Milong

18. Ov, kwishikumwish kukutwish kutukwash mutapu ik kupwish milong?

¹⁸ Atushalapol awonsu a Nzamb adi akad kuwanyin. (Yakob 3:2) Yisu yimwing, milong ap kulik kwovijan kukutwish kulank pakach pa in Kristu aad. Umwing ukutwish kwikal nich diyingish diakin dia kwinanin pantaliken ni mukwau. Chisu chawonsu, chitwishikining kuyipwish milong yiney nich kusadil chiyul ech: “Kangal wajimanijadinany muntu ni mukwau, ilikishijadinany anch kudi muntu ukweta mulong ni mukwau; mudi Mwant [Yehova] chakulikishilanyay en ni yen salany kand mwamu.” (Kolosay 3:13) Chakin kamu, chiswapelap kusadil chiyul chinech, pakwez kwishikumwish kukumukwash muntu kuchisadil.

19. Chom ik tufanyidina kuvurik chisu twisambina ni muntu waturumbukinang?

¹⁹ Yisu yimwing mwin Kristu ukutwish kwiyov anch ukwet diyingish dia kwinan ni kakutwishap kulikishin. Chawiy lel, kwishikumwish kukumukwash kumwendil muntu wamurumbukinang nich chitongijok cha kuchirish chisambu. (Mateu 18:15) Diyingish dimwing disadilinga anch chikasikana kupwish milong pakach pa in Kristu didi anch umwing ap pamwing awonsu akwet chibud nakash mu chilik cha kulik kwitiyij kurumbuk kwau. Ap win wasambela kukwat chiyul cha kumwendil mukwau ukutwish kusal nich kumekesh kutentam kwend, mu mutapu umwing wa kumunyinyit mukwau. Chinyim ni chinech, ngikadil ya kwishikumwish kwakin yikwikal mutapu uwamp wa kupwish milong yivud.

20, 21. Wisu umwing wa ukwash ujim nakash wa kwikal mwin kwishikumwish?

²⁰ Rizau ra kusambish mu kukudish kwishikumwish ridi kumulembil Nzamb atukwasha nich spiritu wend. Pakwez vurikany anch, “Nzamb . . . ukat kumwanaken mwin kwitudish.” (Yakob 4:6) Chawiy anch ukwet mulong nend mbay mukaritiy, lembil kudiay Yehova akukwasha nich kwishikumwish kwitiyij kurumbuk kwey kwikala kukemp ap kujim. Anch akurumbukinang ni mwin kukurumbukin walond nich uyakin anch, “Nlikishinaku,” nich kwishikumwish mulikishina. Anch chikasiken kusal mwamu, lembil nakash mulong wa kukimb ukwash wa Yehova chakwel kubwit mu muchim wey yovil yawonsu ya chibud.

²¹ Kutesh yiyukish yivud yidiokiling ku kwishikumwish kufanyidin kutubachik kukudish ni kulam ngikadil yiney yiwamp. Pa chinech, yilakej yipandakena kuwap mud ik yitukweta mudiay Yehova Nzamb ni Yesu Kristu! Kangal kuvuramen amboku mazu minam ma Nzamb anch: “Ku kwitudish [kwishikumwish] ni kumwov [Yehova] wom kwawiy kwa kupitil dipit, ni katumb, ni mwom.”—Jinswir 22:4.

Manans ma Kutongijokin

• Anany adia yilakej yipandakena kuwap ya kwishikumwish?

• Ov, mulong wak chikasiken kukudish kwishikumwish?

• Yom ik yikutwisha kutukwash kwikal ishikumwishina?

• Ov, mulong wak chidi cha usey kushal mwin kwishikumwish?

[Chipich chidia pa paj wa 17]

Yesu wadinga chakin kamu wishikumwishina

[Chipich chidia pa paj wa 19]

Mangand makat kuyikasikeshin antu kurish chakwel ikal ajim kuyipandakanamu akwau

[Dizu dirumburila]

WHO photo by L. Almasi/K. Hemzǒ

[Chipich chidia pa paj wa 20]

Kwishikumwish kutukwashin kwisamb nau angendj mu mujikit wetu

[Chipich chidia pa paj wa 21]

Kusutil ku kwishikumwish kwetu tukutwish kupwish milong chisu ni chisu ni kuyibwik mu rukat