Yehova Uyikwatin Nich Usey Atushalapol End Ikepishina

1. Yehova ukat kwiyovang mutapu ik piur pa antu ikepishina? Rumburil.

YEHOVA uyikatining antu ikepishina. Ching kusu antu ikepishina kamu chakin awiy akutwisha kwikal mu urund wa piswimp ni Yehova. Kumutambu ukwau, “in kwibaz ukat kuyitadil kulemp.” (Kus. 138:6, NWT) Etu awonsu tukatil kumusangaresh Yehova ni tukatil anch atukata, chawiy tukwet mayingishin mawamp ma kwilej mutapu wa kukudish mwikadil wa kwikepish.

2. Yipul ik tukwakula mu mutu wa mulong winou?

² Mu mutu wa mulong winou tukwakul ku yipul yisatu ey: (1) Kwikepish chom ik? (2) Mulong wak tufanyidin kukudish mwikadil winou? (3) Ni chisu ik chikutwisha kutukasiken kwikal ikepishina? Mudi tukumana, anch twakudish mwikadil wa kwikepish, tukat kusangaresh muchim wa Yehova ni tukat kutaninamu kand ayinetu.​—Jnsw. 27:11; Isay 48:17.

KWIKEPISH CHOM IK?

3. Kwikepish chom ik?

³ Muntu wikepishina kakutongangap anch udi wa usey nakash kuyisutamu antu akwau ap kakwetingap chibud. Bibil ulejen anch muntu wikepishina ukweting chitongijok chiwamp piur pa urund wend ni Yehova ni urund wend nau antu akwau. Muntu wikepishina wijing anch antu akwau amupandikenamu mu yom kanang.​—Fil. 2:3, 4.

4-5. Mulong wak tukutwish kulond anch kwikepish kwakin kikwawiyap kumekening ku mes?

⁴ Antu amwing amekening mudi ikepishin, pakwez bwat. Mu chivadik chau akutwish kwikal in usany ap akad kulondolang nakash. Ap akutwish kuyilimish antu akwau mulong wawiy mutapu wayililau. Pakwez, anch twayishinshikin nawamp akutwish kumekan anch adi antu in kwitutul nakash. Katat ap mu kusut kwa chisu, akutwish kumekesh patok chidiau kamu chakin.​—Luka 6:45.

⁵ Ku mutambu ukwau, antu akwau amekening mudi ichingejidining ni alondining yom yitonginau, pakwez kusal mwamu kumekeshinap kamu anch adi in kwitutul. (Yoh. 1:46, 47) Pakwez, antu akad kwikal ni usany afanyidin kubabal nakash chakwel kangal achingejin pa ukaliweny wau wa chivadik. Twikala antu akweting usany ap bwat, etu awonsu tufanyidin kusal usu wa kwikal antu ikepishina kamu chakin.

6. Kukwatijan ni 1 Korint 15:10, yom ik tukutwisha kwilejin ku chilakej cha kambuy Paul?

⁶ Tushinshikinany chilakej cha kambuy Paul. Amusadina nakash kudi Yehova mulong wa kusambish yikumangen yisu mu misumb kushalijan. Wasala kand yom yivud nakash mu mudimu wa kulejan kusutamu atwimbuy akwau a Yesu Kristu. Pakwez, Paul katongap anch ndiy udi wa piur kuyisutamu atwimbuy akwau. Nich kwikepish walonda anch: “Am nidi mukemp nakash kupandakan atwimbuy a Yesu awonsu. Kiniwanyidinap [kwintazuk] anch kambuy wa Yesu, mulong am nayizengola in [chikumangen] cha Nzamb.” (1 Kor. 15:9) Kupwa, kambuy Paul walonda anch wading ni urund uwamp ni Yehova kadiap mulong wa mikadil yend yiwamp ap mulong wa midimu yading yasadinay kal, pakwez chading mulong wa ranaken ra Nzamb. (Tang 1 Korint 15:10.) Paul wading chilakej chiwamp nakash cha kwikepish. Chisu chayifundinay in Kristu a ku Korint mukand, Paul kibazap ap anch antu amwing mu chikumangen ading akatin kwimekesh mudi adi a piur kumusutamu ndiy.​—2 Kor. 10:10.

7. Mutapu ik wamekeshay mukadivar umwing wa mu chirung chetu mwikadil wa kwikepish?

⁷ Atuman a Yehova avud akat kwikal akasikeshinau nakash kusutil rusangu ra mwom ra mukadivar Karl F. Klein, wasala mudi chid mu chisak chitakedila. Mu rusangu rend ra mwom, mukadivar Klein wisambidin nich kwikepish piur pa milong yivud yarishay nich mu mwom wend mu mivu yivud. Chilakej, wapakisha kulejan ku chikumbu ni chikumbu kapamp ka kusambish mu muvu wa 1922. Chamukasikena nakash chawiy wimika kusal mwamu mu mivu piswimp yaad. Kupwa, pading pasadidinay ku Betel, mukadivar umwing wamwinkisha chiyul pakwez ndiy wadandamena kumujimen mukadivar winou mu chisu kanang kupwa kwa kutambul chiyul. Chikwau kand, wayela mayej ma kuziy mu manangu, kupwa wayerika. Pakwez, wading kand ni yisend yivud ya usey ni yisangareshina. Tongin piur pa kwikepish kwadingay nich mukadivar Klein, ap anch wading wijiken nakash pakwez warumburila amwinend patok piur pa kurumbok kwend! Akadivar nau anambaz avud akat kuvurik nich musangar win kashinsh wa Mukadivar Klein umekena patok mu rusangu rend ra mwom.b

MULONG WAK TUFANYIDIN KUKUDISH MWIKADIL WA KWIKEPISH?

8. Mukand wa 1 Pita 5:6 utukwashin nchik kwijik anch kwikepish kukat kumusangaresh Yehova?

⁸ Diyingishin dijim tukweta dia kukudish mwikadil wa kwikepish didi mulong mwikadil winou ukat kumusangaresh Yehova. Kambuy Pita wovikesha nawamp chitongijok chinech. (Tang 1 Pita 5:6.) Pisambidinay piur pa mazu ma Pita, buku “ Viens, suis-moi ” ulondin anch: “Kwitutul kudi mudi ulemb. Yibudikin yikutwish kwikal yiyimp nakash. Muntu witutwila ap anch wikalap nchik ni ukaliweny upandikena kakwetap usey ku mes ma Nzamb. Ku mutambu ukwau, mwikadil wa kwikepish ukutwish kumusal muntu umekena mudi wakad usey ikal wa usey nakash ku mes ma Yehova. . . . Yehova ukwikal ni musangar nakash wa kukufut anch udi muntu wikepishina.”c Chakin kamu, chom chiwamp nakash tukutwisha kusal kudi kumusangaresh Yehova.​—Jnsw. 23:15.

9. Mulong wak antu akwau akatining kutusejin piswimp anch twikepishin?

⁹ Anch twakudish mwikadil wa kwikepish, tukat kumusangaresh chakusambish Yehova ni tukat kutaninamu kand yiyukish yivud nakash. Kwikepish kukat kusal anch antu akwau atusejin piswimp. Mulong wak? Tong amwiney piur pa antu ukatining kwikal nau pamwing. (Mat. 7:12) Tukatiningap kamu kwikal pamwing nau antu akad kuteshang yitongijok ya antu akwau ni akatining anch ching antu akwau asala yom yikatilau awiy. Pakwez, chitusangareshining nakash kwikal pamwing nau akadivar ni anambaz akata ‘kwitek pa ndond ya antu akwau, kumekesh rukat ra ukadivar, ranaken, ni kwikepish.’ (1 Pita 3:8) Anch twayisejin antu a mutapu winou, niyau akutusejin​—anch twadandamen kwikal ikepishina.

10. Mulong wak chimuswapedining muntu wikepishina kujijamen milong yikata kushiken mu mwom?

¹⁰ Kwikepish kukat kuwapish mashakamin metu. Chakin kamu, yisu yimwing yom tutongina anch yidi yakad kutentam yikutwish kutushiken. Mwant Salomon, ikundj wading ni manangu nakash walonda anch: “Namana kand aswik akat kwendil pa atubar, ni ant akat kwend pansh mudi aswik.” (Mul. 10:7) Antu akweting ukaliweny nakash kakatap kutambul ntumb chisu chawonsu. Pakwez yisu yimwing antu akweting ukaliweny ukemp akat kwikal ni ntumb nakash ni antu akat kuyishinshikin. Ap mwamu, Salomon wajingunina anch tufanyidin kwitiyij mashakamin mutapu madia pa ndond pa kujiman piur pa mutapu usadikina yom mu mashakamin metu. (Mul. 6:9) Anch twikepishin, chikutuswapel kwitiyij mutapu udia mashakamin metu​—ap anch madiap mutapu tukatina.

CHISU IK CHIKUTWISHA KUTUKASIKEN KWIKAL IKEPISHINA?

11. Yom ik tufanyidina kusal anch atuyul?

¹¹ Dichuku diawonsu, tukwet mitapu yivud ya kumekesh kwikepish. Tushinshikinany yilakej yimwing. Anch atuyul. Tufanyidin kwijik anch ang muntu kanang wasal usu wa kutuyul, chimeken anch twarumbukang nakash pakad ayinetu kujingunin. Pa yisu mudi yiney, tukutwish kuman anch chitongijok chetu chakusambish chikwikal cha kulik chiyul. Tukutwish kulondol nayimp piur pa muntu watuyulang ap piur pa mutapu watuyulangay. Pakwez anch twikepishin, tukusal usu wa kwikal ni chitongijok chiwamp.

12. Kukwatijan ni Jinswir 27:5, 6, mulong wak tufanyidin kumujikitish muntu watwinkishang chiyul? Let chilakej.

¹² Muntu wikepishina ukat kujikitishang anch amuyul. Chilakej: Tong bil anch udi ku chikumangan. Kupwa kwa kwambamb nau ambay in Kristu avud, umwing pakach pau wakupwitin kuns ni wakulej anch ukwet yipapal ya yom wadiang mu mazeu. Pakad kwidjidjek, ukwovaku kamu usany. Pakwez, ukumujikitish mulong wakulejang patok. Chakin kamu, ukutong anch ing muntu mukwau wasambelang kukulej! Chilik chimwing, tufanyidin kwikepish ni kujikitish anch mukadivar ap nambaz watwinkish chiyul. Tufanyidin kumuman muntu winou mudi murund, kangal mudi mukankuny.​—Tang Jinswir 27:5, 6; Gal. 4:16.

13. Mutapu ik tukutwisha kumekesh kwikepish anch antu akwau atambul yisend?

¹³ Anch antu akwau atambul yisend. Mukurump wa chikumangen utazukinau anch Jason ulondin anch: “Anch naman antu akwau akat kutambul yisend, niyipwiling yisu yimwing anch mulong wak kantondangap am.” Ov, niyey wiyovilap kal mwamu? Chiding chiwamp kukat kusal yivud mu mudimu wa Yehova. (1 Tim. 3:1) Pakwez, tufanyidin kubabal nakash piur pa yom tutongina. Anch tubabelap, tukutwish kukudish chibud mu muchim wetu. Chilakej, ikundj mwin Kristu ukutwish kutong anch ndiy uwanyidina kusal mudimu kanang kusutamu akadivar akwau. Ap mband mwin Kristu ukutwish kutong anch ‘Nfumwam ukutwish kusal nawamp nakash mudimu winou kusutamu akadivar akwau!’ Pakwez, anch twikepishin chakin, tukwipuk yitongijok mudi yiney ya kwibaz.

14. Yom ik tukutwisha kwilejin ku mutapu wasalay Moses patambulau antu akwau yisend?

¹⁴ Tukutwish kwilejin ku mutapu wasalay Moses chisu chatambulau antu akwau yisend. Moses wasangera chisend chend cha kutakel muchid wa Isarel. Mutapu ik wasalay Moses payinkishay Yehova antu akwau usu wa kusal midimu yimwing yasalangay Moses? Moses kovap mukau. (Kuch. 11:24-29) Wading wikepishin ni witiyija anch antu akwau amukwasha kusal mudimu wa kurumburish antu. (Kub. 18:13-24) Mwamu in Isarel ikala ni anzuj avud afanyina kuyikwash kupwish milong pa ndond pa kuchingel chisu chilemp. Chinech chimekeshin anch Moses washinshikina pa kuyikwash antu pa ndond pa kushinshikin pa yisend yend. Chilakej chiwamp mudi ik tufanyidina kwimburij! Tufanyidin kuvurik anch ang tukimbin anch Yehova atusadin nakash, chidi cha usey kwikal ikepishina nakash kusutamu kutakej ukaliweny kurutu. Ap anch “Yehova udi wa piur nakash, ukat kuyishinshikin antu ikepishina.”—Kus. 138:6, NWT.

15. Mutapu ik waswimpina mashakamin ma akadivar ni anambaz avud?

¹⁵ Anch mashakamin metu maswimp. Mu mivu yasutila ey, akadivar ni anambaz avud amusadidina kal Yehova mu mivu yivud yisend yau yaswimpin. Chilakej, mu muvu wa 2014, atulam a distrik nau akajau ayitumin mu mulad ukwau wa mudimu wa chisu chawonsu. Mu muvu wawiy umwing, kwikadil mbil yilondina anch atulam a munyingumuku kakutwishap kudandamen ni chisend chau anch awanyish mivu 70. Ni amakurump a chikumangen akweta mivu 80, kakutwishap kand kusal mudi ntakel wa chisak cha amakurump. Chikwau kand, mu mivu yasutina ey akadivar ni anambaz avud adia asadina ku Betel ayitumin mu teritwar mulong wa kulejan mudi ayibol. Akwau imikin mudimu wa pakampwil wa chisu chawonsu mulong wa mayej, yisend ya dijuku ap yishiken yikwau.

16. Mutapu ik wamekeshau akadivar ni anambaz kwikepish chisu chading chirishinau mulong wa kwijidin mashakamin mau masu?

¹⁶ Kuswimp kwinoku kwadingap kuswapela kudi akadivar ni anambaz inay. Mulong ading akatin nakash yisend yau yikur yasadinau kal mu mivu yivud. Amwing pakach pau arisha ni yovil ya “ushon” padandamenau kwijidin mashakamin mau masu. Mu kusut kwa machuku, atwisha kwijidin mashakamin masu. Mulong wak? Mulong wa rukat rau kudi Yehova. Ading ij anch ipana kudi Nzamb—kipanap ku mudimu, ku mwaz ap ku chisend. (Kol. 3:23) Akwet musangar wa kudandamen kumusadin Yehova nich kwikepish mu chisend chin chawonsu chikuyinkishau. Akat ‘kulet yakamish yau yawonsu kudi ndiy,’ mulong ij anch Yehova uyilamin.—1 Pita 5:6, 7.

17. Mulong wak tujikitishina pa kwijik anch Dizu dia Nzamb ditukasikeshin kukudish mwikadil wa kwikepish?

¹⁷ Tujikitishin nakash mulong Bibil utukasikeshin kwikal antu ikepishina. Anch twikal antu ikepishina antu akwau akat kusangar nakash kwikal pamwing netu. Tukat kutwish kujijamen nawamp milong yikata kushiken mu mwom. Cha usey nakash tukat kumusejin Tatukwetu wa mwiur. Musangar mudi ik tukweta wa kwijik anch ap anch udi Nzamb “Utumbila wa Piur,” pakwez, uyikatining ni uyikwatining atushalapol end ikepishina nich usey!​—Isay 57:15.