Yesu Watwinkisha Chilik cha Kwikepish

“Am nakwinkishany kal chilik chakwel niyen ukez kusalany mudi munakusalanya kal en.”—YOH. 13:15.

OV, MUTAPU IK UKUTWISHA KWAKUL?

Ov, mutapu ik wamekeshay Mwan a Nzamb kwikepish kurutu ikala muntu?

Padingay muntu, ov, mutapu ik wamekeshay Yesu kwikepish?

Ov, yiyukish ik yadiokila ku mwikadil wa Yesu wa kwikepish?

1, 2. Pa uchuku wa nsudiel wa mwom wend pa divu, dilejan ik diayilejay Yesu atwimbuy end?

WAWIY uchuku wa nsudiel wa mwom wa Yesu pa divu, ni usutishin uchiku winou ni atwimbuy end mu kapalikany kadia kwiur kwa chikumbu mu Yerusalem. Pa yakudia ya urel, Yesu watumbuka watambul chitambal cha rusakish wikas. Chad watambul mem pa dilong dijim, wasambish kwov yidjatil ya in kwilej, wend uyikusul nich chitambal chidjitay. Mulong wak Yesu wasala chisal chinech cha kwikempish?—Yoh. 13:3-5.

² Yesu amwinend warumburila anch: “Ov, wovilany kurumburik kwa chom nakusalanganya? . . . Am Nsalejen ni Mulej wen nakoyishany kal yidjatil yen. Am nakwinkishany kal chilik chakwel niyen ukez kusalany mudi munakusalanya kal en.” (Yoh. 13:12-15) Kusutil ku kumekesh kwikal tayad chakwel kusal mudimu mudi winou wakad usey, Yesu wayinkisha atwimbuy end dilejan dikeza kushal nakash mu manangu mau ni kuyikasikesh chakwel kwikal ikepishina mu machuku ma kurutu.

3. (a) Ov, tupamp twaad, mutapu ik wamekeshay Yesu usey wa kwikepish? (b) Yom ik tukushinshikina mu mutu wa mulong winou?

³ Powishay Yesu yidiatil ya atwimbuy, kadingap kapamp ka kusambish kukasikeshin usey wa kwikepish. Pakusambish pamekeshau atwimbuy amwing chitongijok cha kubambel, Yesu washichika piswimp nend mwan mukemp umwing, ni wayileja anch: “Muntu mwawonsu ukumwaka mwan winou nawamp mu dijin diam, wangak kal am. Muntu mwawonsu ukwingaka am nawamp, wamwak kal kand wantuma am. Mulong muntu upandakenamu kukep pakach penen, ndiy upandakenamu kujimb.” (Luka 9:46-48) Chadingay wij anch afaris adinga asotin katumb, kupwa Yesu walonda mu mudimu wend anch: “Muntu mwawonsu ukez kwijimbish amwinend, akez kumushikumwish, pakwez muntu mwawonsu ukeza kwishikumwish amwinend, akez kumujimbish.” (Luka 14:11) Chimeken patok anch Yesu wasota in kwilej end ikala in kwitudish, chawiy, kwikepish mu manangu ni pakad kwibaz ni kwitutul. Nich chitongijok cha kumwimburij ndiy, el tushinshikinany nawamp chilakej chend cha kwikepish. Tukuman kand mutapu udia ngikadil yiney ya ukwash kangal kusu kudi muntu uyimekeshina pakwez kand kudi akwau.

“KINACHINAP KUYA KULEMP NENDENDIY”

4. Ov, mutapu ik wamekeshay Mwan kapokal wa Nzamb kwikepish mu mwom wend kurutu kwa kwez pa mangand mudi muntu?

⁴ Mwan kapokal wa Nzamb wamekesha kalimish ap kurutu kwa kwez pa divu. Mu mwom wend kurutu kwa kwikal muntu, Yesu wasala mivu yakad kutwish kuchind ni Tatukwend wa mwiur. Mukand wa Isay urumburil piur pa urund wa piswimp wadingay nich Mwan ni Tatukwend, ulondil anch: “Nsalejam [Yehova] wanleja yom ya kulond, chakwel nikutwish kukasikesh aziyina. Machuku mawonsu pamanch ukat kwinginkish impu ya kutesh malejan mend. [Yehova] wanginkisha ronganyin, niyam kinamubwambwilap ap kinachinap kuya kulemp nendendiy.” (Isay 50:4, 5) Mwan wa Nzamb wamekesha mwikadil wa kwikepish ni wata matu ku yom yadingau ni kumulej kudiay Yehova. Wading ni mushiku ni tayad mulong wa kwilej kudiay Nzamb wakin. Yesu wafanyina mud ik kuman nawamp nakash chilakej cha kwikepish cha Yehova mu kuyanaken antu akayitil!

5. Mu mudimu wa Mikayel mukurump wa aruu a mwiur, ov, mutapu ik washay Yesu chilakej cha kwikepish ni kwijik mipak yend mu chisal chend pantaliken ni Djabul?

⁵ Yidiap yitang yawonsu mwiur yadinga ni chitongijok cha chilik chimwing ni cha Mwan kapokal wa Nzamb. Pa ndond pa kusot kwilejin kudiay Yehova, mwangel wikal Satan Djabul walikidila amwinend amubachika kudi chisal chidia chinyim ni kwikepish—kwiman amwinend kwikal ukweta usey ni kwitutul—ni chakin kumubwambwil Yehova. Ku mutambu ukwau, Yesu wading usangaredin ndond yend mwiur kasotap kusadil nayimp ulabu wend. Chidiay Mikayel mukurump wa aruu a mwiur, Yesu kamatikap mipak yimutekidinau ya ulabu wend pa chisu chatadikijanay ni Diabul mulong wa ‘mujimbu’ wa Moses. Ap mwamu, Mwan wa Nzamb wamekesha kwikepish ni kwijik mipak yend. Wasota chakwel Yehova, Nkalansambu Upandakenamu piur pa mangand mawonsu, apwisha milong yiney mu mutapu Wend ni pa chisu chend.—Tang Jud 9.

6. Mutapu ik wamekeshay Yesu kwikepish mu kwitiy mudimu wa kusal mudi Mesia?

⁶ Mu yom yilejay Yesu padingay kandikal eza pa divu mudi muntu mwading chakin kamu uprofet wasambela kulond piur pa yom kushalijan ya mwom wend pa divu mudi Mesia. Chawiy lel, wading wij chakin kurutu kwa chisu anch yom yakad kusangaresh yimuchingedin. Pakwez, Yesu witiya mudimu wa kushakam pa divu ni kufa mudi Mesia washilaumu. Mulong wak? Mu kukasikeshin pa kwikepish kwa Mwan kapokal wa Nzamb, kambuy Paul wafunda anch: “Kudiokal ku disambishil ndiy wading nich winzamb, pakwez karilap kwilikan pamwing nend Nzamb. Ndiy washa ndond yend ku rukat rend amwinend, watambul ndond ya ukashalapol. Wafanakana mudi antu, chad wamekana mu chifu cha muntu.”—Fil. 2:6, 7.

MUDI MUNTU, “WIKEPISHA”

7, 8. Mutapu ik wamekeshay Yesu kwikepish padingay mwanikanch ni mu mudimu wend pa divu?

⁷ Paul wafunda anch: “Pakarumukay muntu ndiy wikepisha amwinend, wikal mwin kuziyil ku rufu, inge ku rufu ra pa [mutond].” (Fil. 2:8) Kusambish ku wanikanch wend, Yesu washa chilakej cha kwikepish. Ap anch amulila kudi anvaj akad kuwanyin—Josef ni Mariy—Yesu nich kwikepish “wading ni kuziyil kudi awiy.” (Luka 2:51) Chidi chilakej chiwamp mud ik mulong wa an akemp, akuyukishau kudi Nzamb mulong wa kusanger kuziyil kwau kudi anvajau!

⁸ Pikalay mukurump, Yesu wamekesha kwikepish kusutil ku kutek kurutu kusal kwa rusot ra Yehova, kangal rusot rend amwinend. (Yoh. 4:34) Padingay mu mudimu wend, Yesu Kristu wasadila dijin dia Nzamb ni wayikwasha antu akin kutambul ronganyin ra kin ra ngikadil ya Yehova ni rutong Rend mulong wa antu. Yesu washakama kand kulondulijan nich yom yadingay ni kulejan piur pa Yehova. Mu malembil mend ma chilakej, dinans diakusambish diajimbulay Yesu diading anch: “Tatukwetu udia mwiur, dijin diey aditumbish.” (Mat. 6:9) Chawiy lel Yesu wayileja in kwilej end kubangin chakusambish pa kutumbish kwa dijin dia Yehova. Amwinend washakama mutapu winou. Kwinsudiel ya mudimu wend pa divu, Yesu watwisha kulembil kudiay Yehova anch: “Am nadijikish kal dijin diey kudi awiy [atwimbuy], nikez kadijikish kand.” (Yoh. 17:26) Chikwau kand, mu mudimu wend Yesu wamwinkisha Yehova katumb mulong wa yom yasalay pa divu.—Yoh. 5:19.

9. Wisu wadinga uprofet wa Zakariy piur Mesia, ni mutapu ik wawanyishau uprofet winou kudi Yesu?

⁹ Piur pa Mesia, uprofet wa Zakariy walonda anch: “Sangarany, sangarany kwen, en, in Sion! Barokany nich musangar, en, in Yerusalem! Talany, Mwant wen ukat kwez kudi en! Wezil nich katumb ni ulabu wa kupandakan, pakwez witushin, wezidil pa chimbur, wezidil pa musamb a chimbur.” (Zak. 9:9) Mazu minam mawanyina kurutu kwa Pentekot wa mu muvu wa 33 C.C. pandamay Yesu mu Yerusalem. Yisak ya antu yala maswin mau ni akwau yifukis ya mitond mwi njil. Chakin, musumb wawonsu wanyikeka pandamay. Ap anch amutazuka kudi antu anch Mwant, Yesu wading wikepishin.—Mat. 21:4-11.

10. Chom ik chamekesha kuziyil kwa Yesu kushik ni ku rufu?

¹⁰ Kwikepish kwa Yesu Kristu ni kuziyil pa divu kwashikena pa rufu rend pa mutond wa mar. Chawiy lel wamekesha pakad kwidjidjek anch antu akutwish kushal ashinshamena kudi Yehova ap anch ayipak mu chilik chipandakenamu nakash. Yesu wamekesha kand anch Satan wading mukamakasu pa kulond anch antu akat kumusadil Yehova mulong wa mayingishil ma choy. (Job 1:9-11; 2:4) Rusangu ra Kristu ra kushinshaman kuwanyidina rikasikeshin kand ukinakin wa ukaleng wa mangand mawonsu wa Yehova. Yehova chakin wasangara pa kuman kushinshaman kukash kwa Mwanend mwin kwikepish.—Tang Jinswir 27:11.

11. Ov, chakupesh cha difut cha Yesu chaleta ruchingej ik kudi antu itiyijina?

¹¹ Nich rufu rend pa mutond wa mar, Yesu wafuta kand usey wa difut mulong wa antu. (Mat. 20:28) Chinech chayinkisha akayitil mutapu wa kushakam chikupu ni chawanyisha yitiyijinau mulong wa kutentam. Paul wafunda anch: “Chawiy chimwing kand, chisalijok chimwing chitentamina cha muntu umwing, Yesu Kristu, chalet kuying kukata kulet mwom kudi awonsu.” (Rom 5:18) Rufu ra Yesu raleta ruchingej ra mwom wakad kufa mwiur kudi in Kristu azizidilau nich spiritu ni mwom wa chikupu pa divu kudi “amikoku akwau.”—Yoh. 10:16; Rom 8:16, 17.

AM “NISHIMPISHIN MUCHIM”

12. Mu kushakam ni antu akad kuwanyin, ov, mutapu ik wamekeshay Yesu kwitudish ni kwikepish?

¹² Yesu wayitazuka antu awonsu ading ‘aziyina’ chakwel eza kudi ndiy. Ndiy walonda anch: “Itwikany mpand yam, wingiyiyang am, chad mwamu mipim yen yikwiswedish, mulong am nishimpishin muchim ni kwitudish.” (Mat. 11:28, 29) Mikadil ya kwikepish ni kwitudish yamubachika Yesu chakwel ikala muwamp ni wakad kasolikany pasadinay yom ni antu akad kuwanyin. Ndiy kayitap in kwilej end yom yikasikena kusal. Yesu wayileja ni kuyikasikesh. Ndiy kasalap anch iyova anch kakutwishap ap kawanyidinap. Yesu kadingap mukash ap mwin kuyipompat. Pakwez, ndiy wayikasikesha in kwilej end kusutil kuyipwitin kudi ndiy ni ku kusadil malejan mend, awiy ela kwiswedish, mulong mpand yend yading yiswapel ni chisend chend chipipela. Amakundj ni amband ni antu a chimbu chawonsu cha mivu asangara pamumanau.—Mat. 11:30.

13. Ov, mutapu ik wayovilay Yesu riy antu amena mar?

¹³ Padingay ni antu amwing in Isarel, Yesu wayovila riy mulong ading ayimen mudi antu a chamwamu, ni wadinga ukat kushinshikin nich rukat pa maswir mau. Piswimp ni Yeriko, ndiy watana mputames umwing mwin kwit dijin diend Bartime ni murund nend mukwau mputames. Awiy adandamena kumwit Yesu chakwel ayikwasha, pakwez antu avud ayibarokina chakwel anineta. Chading chiswapel mud ik kudiul yadingau ni kwit kudi amputames! Pakwez, Yesu wita anch ayitwala kudi ndiy, ni wayovila riy, kupwa wayoka asambish kuman. Mwaning, Yesu wamwimburija Tatukwend, Yehova, mu kumekesh kwikepish ni mu kuyovil riy akayitil itudishina.—Mat. 20:29-34; Mar. 10:46-52.

“MUNTU MWAWONSU UKEZA KWISHIKUMWISH AMWINEND, AKEZ KUMUJIMBISH”

14. Ov, yiyukish ik yidiokila ku mwikadil wa Yesu wa kwikepish?

¹⁴ Mwom wa Yesu Kristu wa kwikepish ukat kulet musangar ni udi wa usey nakash. Yesu wasangara pa kumuman mwanend mukatish ukat kuziyil amwinend nich kwikepish mulong wa kusal rusot ra Nzamb. Atwimbuy ni in kwilej adinga akasikeshinau kudi kwitudish ni kushimpish muchim kwa Yesu. Chilakej chend, malejan mend, ni chiyul chend chamushena chayikasikesha chakwel aya kurutu muspiritu. Antu amena mar atana yiyukish mu kwikepish kwa Yesu mulong atambula ukwash, malejan, ni dikasikesh diend. Katat, antu awonsu afanyidinau kukol akez kutambul yiyukish mu machuku ma kurutu kusutil ku chakupesh cha difut dia Yesu.

15. Ov, mutapu ik watanay Yesu yiyukish ya kwikepish?

¹⁵ Ov, chidi nchik piur pa Yesu? Ov, ndiy watambula yiyukish ya kwikepish kwend? Mwaning, Yesu wayileja in kwilejend anch: “Muntu mwawonsu ukeza kwishikumwish amwinend, akez kumujimbish.” (Mat. 23:12) Mazu minam mamekana kwikal ma kashinsh ku mutambu wend. Paul ulejen anch: “Nzamb wamujimbisha [Yesu], wamutek piur pa yom yawonsu, wamupil kand dijin dipandakena majin mawonsu. Chad mwamu awonsu a mwiur, ni a pansh, ni a kwishin kwa divu akwas manungun pansh, mulong wa kwifukwil dijin dia Yesu. Chawiy awonsu akez kwitiyij anch, Yesu Kristu ndiy Nsalejau, chakwel awonsu akupan uyaj kudi Nzamb Tatuku.” Mulong wa mwikadil wa Yesu wa kwikepish ni kushinshaman pa divu, Yehova Nzamb wamujimbisha Mwanend, ni kumwinkish uyaj pa yitang yidia mwiur ni pa divu.—Fil. 2:9-11.

YESU UKEZ ‘KUPANDAKAN MU UYAKIN NI KWIKEPISH’

16. Ov, chom ik chimekeshina anch kwikepish kukez kudandamen kumekan mu mijikit ya Mwan a Nzamb?

¹⁶ Kwikepish kukez kudandamen kumekan mu mijikit ya Mwan a Nzamb. Patakelay kulejan yikezay Yesu kuyisal akankuny nend pakezay kwikal pa ndond yend ya uyaj mwiur, nfund a kusend wawanga anch: “End kwey mu katumb ka want, end mu kupandakan mu uyakin ni kwitudish ni kutentam.” (Kus. 45:4) Nich uyakin ni kutentam, Yesu Kristu ukez kupandakan mulong wa kukasikesh kwikepish ku Harmagedon. Ni chom ik chikeza kushiken kwinsudiel kwa Mivu Kanan ya Winyikel wend pakezay Mwant Mesia “kushesh kuyikel kwa mitapu yawonsu”? Ov, ukez kumekesh kwikepish? Mwaning, mulong ukez ‘kupan Want kudi Nzamb Tatuku.’—Tang 1 Korint 15:24-28.

17, 18. (a) Ov, mulong wak chidi cha usey kudi atushalapol a Yehova kulondul chilakej cha Yesu cha kwikepish? (b) Ov, chom ik tukeza kwisambin mu mutu wa mulong ulondwilaku?

¹⁷ Ov, chidi nchik kudi etu? Ov, tukez kulondul chilakej chinech kusutil ku kumekesh kwikepish? Ov, mutapu ik tukeza kupand pakezay Mwant Yesu Kristu kulet dirumburish diend ku Harmagedon? Mulong mutapu ukatay kusal yom, umekeshin anch ukez kuyipandish kusu antu ikepishina ni atentamina. Chawiy lel, kukudish kwikepish kwetu kudi kwa usey mulong wa dipandish dietu. Chikwau kand, mudi mutapu waleta mwom wa Yesu Kristu wa kwikepish yiyukish kudi ndiy ni kudi antu akwau, kwikepish kwetu kukez kulet yiyukish mu mitapu kushalijan.

¹⁸ Ov, chom ik chikutwisha kutukwash chakwel tulondula chilakej cha Yesu cha kwikepish? Mutapu ik tukutwisha kwikasikesh chakwel twikepish chikalap nchik mar makutwisha kutushiken? Yipul yiney akez kuyishinshikin mu mutu wa mulong ulondwilaku.

[Chipich chidia pa paj wa 15]

Ov, mutapu ik tukutwisha kutaninamu mu chilakej cha kwikepish cha Yesu?

[Chipich chidia pa paj wa 16]

Riy ra Yesu rading chilakej chijim