Mulong wak Tukwet Mwom?
Chakul cha Bibil
Chipul chitadina mulong wa mwom akutwish kuchipul mu mitapu kushalijan, mud mulong wak tudia pa divu? ap ov, mulong wak antanga? Bibil umekeshin anch atutanga mulong wa kuta urund ni Nzamb. Shinshikin uyakin umwing wa pa dishin ulejenau mu Bibil.
Nzamb ud Sakatang wetu. Bibil ulondin anch: “Ndiy Nzamb! Ndiy kwend watutanga.”—Kuseng 100:3; Kujingunik 4:11.
Yom yawonsu yatangay zamb, kuwejaku niyetu antu, kud diyingishin diayitanginay, kayitangap chamwamu.—Isay 45:18.
Nzamb watutanga nich “kuswir kwa yom ya Nzamb,” kuwejaku kand ni kuswir kwa kwijik diyingishin diatutanginau. (Mateu 5:3) Usotin anch tuwanyish maswir minam.—Kuseng 145:16.
Tukutwish kuwanyish maswir metu ma mu spiritu kusutil kuta urund nend Nzamb. Ap anch antu amwing atongining anch chikasiken kuta urund ni Nzamb, pakwez Bibil utukasikeshin anch: “Sejany piswimp kudi Nzamb, chad niyend ukusej piswimp ni yenen.”—Jakobu 4:8; 2:23.
Mulong wa kwikal arund a Nzamb, tufanyidin kushakam kukwatijan ni rusot rend. Bibil ulejen rusot riner mu Mulej 12:13 ulondina anch: “Mulimisha Nzamb, ziyil ku malejan mend, mulong . . . chom chinech chawiy chamutangilau muntu.”
Mu machuku ma kurutu tukutwish kuman chad nawamp rusot ra Nzamb mulong wa antu pakudioshay mar ni pakuyinkishay arund nend amwifukwidina mwom wa chikupu.—Kuseng 37:10, 11.