Ileja Kucha Ku Mes Kusutil Kudi Atwimbuy A Yesu

“Uchishangany ku mes pamwing ni yamam.”—MAT. 26:38.

1-3. Ov, mutapu ik wakanganyau atwimbuy kudandamen kucha ku mes pa uchuku wa nsudiel wa Yesu pa divu, ni chom ik chimekeshina anch ilejina kusutil ku chilim chau?

TONGIJOKIN bil pa mutapu wasuta yom pa uchuku wa nsudiel wa mwom wa Yesu pa divu. Yesu wez kal pa ndond pakatishinay, mu chir cha Getiseman, kwingangel kwa Yerusalem. Wezang kal mwinimwa ni atwimbuy end ashinshamena. Nich yitongijok yivud mu manangu ni mu muchim, Yesu waswiridina kutan ndond ya kwikal amwinend chakwel alembila.—Mat. 26:36; Yoh. 18:1, 2.

² Atwimbuy end asatu—Pita, Jakobu, ni Yohan—amutwalaku Yesu kulemp mu chir. Ndiy wayileja anch: “Shalany pinap, uchishangany ku mes pamwing ni yamam,” ni waya kwa amwinend chakwel alembila. Pachirikay, wayitan arund nend alel tul. Ndiy wayilej kand kakwau anch: “Chishany ku mes.” Chikwau kand, awiy, alala tul tupamp twaad! Kupwa uchuku wawiy umwing, atwimbuy awonsu akanganya kushal achila ku mes mu spiritu. Chawiy lel, achina ap kand ni kumusha Yesu!—Mat. 26:38, 41, 56.

³ Chakin kamu atwimbuy anenganana mulong wa kukangany kwau kudandamen kucha ku mes. Amakundj inay ashinshamena ilejina swa kusutil ku chilim chau. Mukand wa Bibil wa Midimu ulejen anch asha chilikej chiwamp nakash cha kudandamen kucha ku mes. Kushinshaman kwau kwafanyidina kuyibachik ambay nau in Kristu chakwel asala chilik chimwing. Nlel kupandakanamu pasak, tuswiridin kudandamen kucha ku mes. (Mat. 24:42) El tushinshikinany malejan masatu piur pa kudandamen kucha ku mes kutukutwisha kwilejin kusutil ku buku wa Midimu.

KUCHA KU MES MULONG WA UMUTAKEL PIUR PA NDOND YA KULEJAN

4, 5. Mutapu ik wamanay Paul ni ambay nend mu weny umutakel wa mwiku utumbila?

⁴ Kwinsambishil, atwimbuy ading achila ku mes mulong wa umutakel piur pa ndond ya kulejan. Mu rusangu rumwing, twilejin mutapu wasadilay Yesu mwiku utumbila, wamwikishay Yehova, mulong wa kumutakel kambuy Paul ni ambay nend a weny mu weny umwing wa pakampwil nakash. (Mid. 2:33) El tuchirikinamu bil piur pa mweny wau.—Tang Midimu 16:6-10.

⁵ Paul, Silas, nenday Timote asha musumb wa Listre kurul kwa Galatia. Kwinyim kwa machuku ashika mwi njil yijim ya in Rom yitwadila kurand ku teritwar udia antu avud wa distrik wa Aziy. Awiy asota kulondul njil yiney mulong wa kwendil misumb mwadinga tunan twa antu adinga aswiridina kutesh piur pa Kristu. Pakwez chom chimwing chayimika mu mweny wau. Verse wa 6 ulondil anch: “Asutila mwi ngand ya Frigi yinunganijadina ni ngand ya Galatia, mulong [M]mwiku [U]utumbila wayikangesha kurumburil mazu ma Nzamb mwi ngand ya Aziy.” Mu mutapu umwing wa ujindj, mwiku utumbila wayikangesha in mu weny kulejan mu teritwar wa Aziy. Chakin kamu Yesu wasota—kumutakel Paul ni arund end—mu jinjil kushalijan kusutil ku mwiku wa Nzamb.

6, 7. (a) Chom ik chamushikena Paul ni in mu weny akwau piswimp ni Bitiniy? (b) Chiyul ik chakwatau in kwilej, ni ov, nich chibudikin ik?

⁶ Ov, kwisu kwayau in kuya mu weny inay a mushiku? Verse wa 7 ulejen anch: “Chashikau ku mwimbu wa ngand ya Misiy, awiy apakisha kwandam mwi ngand ya Bitiniy, pakwez [M]mwiku wa Yesu wayikangesha.” Mulong ayikangesha kulejan mu Aziy, Paul ni ambay end akarumuka kuya kwindum, nich chiyul cha kulejan mu musumb wa Bitiniy. Pakwez, pashikau piswimp, Yesu wasadila kakwau mwiku utumbila mulong wa kuyikangesh. Pa chisu chinech, amakundj inay afanyina kwikal arumbangeshinau. Ading ija yom ya kulejan ni mutapu wa kulejan, pakwez kadingap ija ndond ya kulejan. Tufanyidin kusal chinech mu mutapu unou: akokala ku chis chitwadila ku Aziy—pakwez chamwamu. Akokala ku chis chitwadila ku Bitiniy—kakwau kand chamwamu. Ov, alika kukokal? Bwat kudiau in kulejan inay a mushiku!

⁷ Pa chinech, amakundj inay akwata mupak ukutwisha kumekan wakad kwovakan. Verse wa 8 utulejin anch: “Awiy asuta zupu mwi ngand ya Misiy, chad aya djat ni ku Trowas.” Chawiy lel, in mu weny inay akarumuka aya kurand ni enda kulep kwa 563 km, asuta misumb ni misumb djat ni pashikau ku chau cha Trowas, pamwing ap ku chis cha Masedon. Kapamp ka kasatu, kwinikwa, Paul ni ambay nend akokala ku chis, pakwez pa chisu chinech, chanzurika nakash! Verse wa 9 ulejen yasadika kurutu: “Chikwajala uchuku wa dichuku dinidia, Paul wamana chishimushimu. Wamumana mwin Masedon wiminy ukat kumulembijek anch: ‘Ez ku Masedon mulong wa kutukwash!’” Kupwa, Paul wijika ndond yafanyidinay kuya kulejan. Pakad kulab, amakundj inay aya swa ku Masedon.

8, 9. Yom ik tukutwisha kwilejin kusutil weny wa Paul?

⁸ Yom ik tukutwisha kwilejin ku rusangu riner? Shinshikin anch mwiku wa Nzamb wamukangesha ching kusu kupwa kwa Paul kusambish kuya ku Aziy. Kupwa, Yesu wayikangesha ching kusu kupwa kwa Paul kushik piswimp ni Bitiniy. Ni kupwa, Yesu wamuleja kuya ku Masedon ching kusu kupwa kwa Paul kushik ku Trowas. Chidiay Mutu wa chikumangen, Yesu ukutwish kutusadil mu mutapu wa chilik chimwing. (Kol. 1:18) Chilakej, ukutwish watongidin kal piur pa kusal mudimu wa uchibol wa rawonsu ap kuya kwin ndond kudia kuswir kujim kwa in kulejan. Pakwez chikutwish kusal anch ching kusu kupwa kweyey kushiken rutong rey anch Yesu, kusutil ku mwiku wa Nzamb, ukez ku kutakel. Chilakej: Mwin kwendish motak ukutwish kutwal motak wend ku chikas cha katatuku ap cha kamaku ching kusu anch motak wendil. Chilik chimwing, Yesu ukutwish kututakel mu kujimbish mudimu wetu pakwez ching kusu anch tukat kusal—anch tusadil usu chakwel kuwanish.

⁹ Pakwez chikwikal nchik anch usu wetu tusadila usonginap mabuj kapamp kamwing? Ov, ufanyidin kulikap, ni kulond anch mulong mwiku wa Nzamb kakatap kukutakel? Chiwamp, vurik anch Paul niyend wamana yikangesh yivud. Chikwau kand, ndiy wadandamena kukimb ni kukokal kushik ni patanay chis chanzurikina. Chilik chimwing, anch wadandamen mu kukimb ‘chis chijim chazurilau chakwel kusal mudimu ukash,’ ukutwish chilik chimwing kuyuk.—1 Kor. 16:9.

KUBABAL MU KULEMBIL

10. Chom ik chimekeshina anch kwikal ababela mu kulembil kudi kwa usey chakwel kudandamen kucha ku mes?

¹⁰ Katat, tushinshikinany difundish dia kaad piur pa kucha ku mes tukutwisha kwilejin kusutil kudi akadivar netu in Kristu a mu chitot cha kusambish cha mivu: Ading ababela mu kulembil. (1 Pita 4:7) Kudandamen mu kulembil kudi kwa usey chakwel kudandamen kucha ku mes. Vurik anch mu chir cha Getiseman kurutu kwa kumukwat, Yesu wayileja atwimbuy nend asatu: “Chishany ku mes, chad lembilany.”—Mat. 26:41.

11, 12. Mulong wak ni mutapu ik Herod wayimeshay mar in Kristu, pamwing ni Pita?

¹¹ Pita, wadingau pa chisu chinicha, wimenap amwinend mu kusut kwa machuku ukash wa malembil ma mushiku. (Tang Midimu 12:1-6.) Mu maverse ma kusambish ma rusangu riner, twilejin anch chakwel itapila dilau dia in Yuda, Herod wayimesha in Kristu mar. Pamwing ap wading wij anch Jakobu wading kambuy ni wading kand mwanamakwend a Yesu. Chawiy lel, Herod wamujipa Jakobu “kwi mpak ya musamun.” (Verse wa 2) Chikumangen chashadisha kamu kambuy mukatish. Kwading kupakiu mud ik kudiau akadivar!

¹² Kupwa kwa chinech chom ik chasalay Herod? Verse wa 3 urumburil anch: “Chamanay anch chom chinech chayisangarish kal in Yuda, ndiy waya kand wamukwat Pita.” Pakwez ma rukan kimadingap ni kulamang chisu kadingap chisu chilemp atwimbuy, pamwing ni Pita. (Mid. 5:17-20) Herod chitwishikin wading wij mwamu. Mwin mafef winou kakwatap mupak kapamp kamwing. Wamupana Pita kumulam kudi “amasalay a yisak yinying akweta pa chisak chimwing amasala aying. Herod warijeka mutapu wakumurumburishin mukach mwa antu pakupwishau musambu wa kusut kwa [Yehova].” (Verse wa 4) Tong bil! Herod wamuteka Pita ku muyolal pakach pa atulam aad, nich atulam 16 amulamina uchiku ni muten chakwel ikala nich kashinsh anch kambuy winou kakezap kuchin. Chitongijok cha Herod chading cha kumupan Pita kudi antu kwinyim kwa Musambu wa Kusut kwa Yehova, kumufish nich rufu chakwel ayisangaresha yisak ya antu. Mu mikadil yikash mudi yiney, ov, chom ik chatwishau kusal ambay nend a Pita in Kristu?

13, 14. (a) Ov, chom ik chasala chikumangen pamutekau Pita mu rukan? (b) Yom ik tukutwisha kwilej kusutil ku chilakej chashay ambay nend a Pita in Kristu piur pa malembil?

¹³ Chikumangen chading chij nawamp chom cha kusal. Tutangin mu verse wa 5 anch: “Chawiy Pita ading amulamidin mu rukan, pakwez in chikumbu cha Nzamb [chikumangen] ading ni kumulembidin nakash kudi Nzamb.” Mwaning, malembil mau mulong wa mukadivar wau mukatish mading makash, ni ma kashinsh. Chawiy lel rufu ra Jakobu rashadishap ruchingej rau; ni rayibachikap chakwel amana malembil mudi ma cha mwamu. Chinyim ni chinech, ading ij anch malembil ma atushalapol ashinshamena mading ma usey nakash kudiay Yehova. Anch malembil mudi minam malondulijadin ni rusot rend, nich ukat kumakul.—Heb. 13:18, 19; Jak. 5:16.

¹⁴ Chom ik tukutwisha kwilej kusutil ku mutapu wasalau ambay nend a Pita in Kristu? Kudandamen kucha ku mes kwitin kulembil kangal kusu mulong wetwetu ayinetu pakwez kand mulong wa akadivar ni anambaz. (Efes 6:18) Ov, wij mbay mwin ritiy udia mu yoziu yikash? Amwing akutwish pamwing ap kujijaman rupompat, kujidik kwa anyikel, ap yinship ya chitangil yisheshina. Ov mulong wak yikutwishap kwikal mutu wa mulong wa malembil mey? Ukutwish kwijik antu akwau adia mu yikokujol yakad kumekan nakash. Chitwishikin akasikeshin chakwel kurish nich milong ya mu dijuku, kuziy, ap mayej. Mulong wak kulik kutongin piur pa antu kanang ukutwisha kujimbul pa majin mau piuwambambina ni Yehova, ukata “Kutesh kulembil”?—Kus. 65:2.

15, 16. (a) Rumburil mutapu wamukamuninau Pita kudiay muruu wa Yehova mu rukan. (Tal chipich chidia mwinshin.) (b) Mulong wak chikasikeshin kushinshikin pa mutapu wamukamuninau Pita kudiay Yehova?

¹⁵ Chawiy lel, mutapu ik waswimpa yom ku mutambu wa Pita? Pa uchuku wend wa nsudiel mu rukan, padingay ulel tul pakach pa atulam aad, Pita wamana yom yivud yamushena. (Tang Midimu 12:7-11.) Tong bil yom yashikena: Kapamp kamwing, chimunyik chatokisha mu kapalikany kend. Muruu wa mwiur wimana pinipa, pakad kumuman kudi atulam, ni wamwela Pita anch swapal lank. Ni jimbwambu jamukasau ku makas mend jaswuboka! Kupwa muruu wa mwiur wamubudisha pol pa rukan, asuta chisak cha amasalay akusambish, asuta kand chisak cha kaad, ashika ku chis cha utad chanzurika “ichinach.” Pabudikau pol pa rukan, muruu wa mwiur waya wamusha. Amukamunina Pita!

¹⁶ Ov, chikasikeshinap ritiy retu pa kushinshikin dikand dia Yehova dia kuyipandish atushalapol end? Chakin kamu, tumuchingejidinap Yehova chakwel atupandisha mu chilay pa chisu chinech. Pakwez, tuchingejin sens anch ukat kusadil dikand diend pantaliken ni antu end nlel. (2 Jnsg. 16:9) Kusutil ku usu wa mwiku end utumbila, ukutwish kusal anch tupandakana yoziu yawonsu tukutwisha kurish nich. (2 Kor. 4:7; 2 Pita 2:9) Piswimp ap, Yehova ukez kumwinkish Mwanend usu wa kukamunin mamiliyon ma antu makad kuchind ku rukan rikash nakash, rufu. (Yoh. 5:28, 29) Ritiy retu mu kushilamu kwa Nzamb rikutwish kutwinkish usu ukash piturishina nich yoziu nlel unou.

KUPAN UMAN CHIKALAP NCHIK YIKANGESH

17. Mutapu ik washay Paul chilakej chipandakena kuwap mu kulejan nich mushiku ni kuswapej?

¹⁷ Dined diawiy dilejan dia kasatu piur pa kucha ku mes tukutwisha kwilej kusutil kud atwimbuy: Awiy adandamena kupan uman chikalap nchik yikangesh. Kulejan nich mushiku ni kuswapej kudi kwa usey chakwel kudandamen kucha ku mes. Kambuy Paul wading chilakej chipandakena kuwap pa chinech. Wasala amwinend nich mushiku, waya mu weny kulep nakash ni wateka yikumangen yivud. Wajijamana mikadil ya yikokujol yikash, pakwez kashadishap ap pakemp mushiku wend pa chitongijok chend cha kuswapej.—2 Kor. 11:23-29.

18. Mutapu ik wadandamenay Paul kupan uman padingay mu rukan mu Rom?

¹⁸ Tushinshikinany pakemp kapamp kansudiel piur pa Paul mu mukand wa Midimu, mud mufundilau mu Midimu shapitre wa 28. Paul washika mu Rom, kwafanyinay kuya kurutu kwa Nero. Amukwata, pamwing ap amukasa muyolal kudi atulam end. Pakwez, kwikil muyolal wela kumuninetish kambuy winou mwin mushiku! Paul wadandamena kutan mutapu wa kupan uman. (Tang Midimu 28:17, 23, 24.) Kupwa kwa kwitekin amwinend machuku masatu chakwel kwiswedish mulong wa weny wayay ku Rom, Paul wayitazuka amakundj a usey a in Yuda mulong wa kuyilej uman. Kupwa, pa dichiku diatonday, ndiy wapana uman. Verse wa 23 ulondin anch: “Chawiy ovijana nend Paul dichuku dia kukumangan, chad pa dichuku dinidia chisak chijim cha in Yuda eza kwi ndond kwadingay Paul. Kudiokal pamanch kushik djat ni uchuku, Paul wayirumbilanga rusangu rend ra Want wa Nzamb. Ndiy wasambisha ku Yijil ya Moses ni ku mazu mafundau aruu a Nzamb, chakwel apakisha kukarumun yitongijok yau mulong wa Yesu.”

19, 20. (a) Mulong wak Paul watwisha mu kupan uman? (b) Mutapu ik wasalany Paul pa kuman anch kadiap antu awonsu itiya rusangu ruwamp?

¹⁹ Mulong wak Paul watwisha mwamu mu kupan uman? Shinshikin anch verse wa 23 ulejen chakin kamu mayingishil mavud. (1) Ndiy wateka manangu mend pa Want wa Nzamb ni padiay Yesu Kristu. (2) Ndiy wapakisha kuyit in kumutesh end kusutil ku “kukarumun yitongijok yau.” (3) Ndiy watongijokina piur pa Mifund ya Bibil. (4) Wamekesha mwikadil wa kwipan amwinend, kulejan uman “kudiosh pamanch kushik urel kamu.” Paul wapana uman ukash, pakwez kadiap antu awonsu itiya. Verse wa 24 ulondin anch: “Antu amwing akarumuna yitongijok yau mulong wa mazu mend, pakwez antu akwau alika kwau kwitiyij.” Kupwitijan kwasambisha kapamp kamwing, ni antu aurika.

²⁰ Ov, Paul waziya anch mulong antu awonsu kitiyap rusangu ruwamp? Bwat kwau! Midimu 28:30, 31 (TMK), ulondin anch: “Ndiy washakama mivu yaad ya kabuj, wisokil mu chikumbu ichend ni kumufut mwin chikumbu, wend uyak ading nikwez kudiay ndiy, wend ulejan mazu ma want wa Nzamb, ni kulejan yom ya Mwant Yesu Kristu ni kujijaman kwawonsu, kwikil muntu wamukoja.” Mukand winou upepidilau wa Midimu, aupwishin nich mazu minam ma chirungul.

21. Chom ik tukutwisha kwilej kusutil ku chilakej cha Paul padingay mu rukan?

²¹ Chom ik tukutwisha kwilej kusutil ku chilakej cha Paul? Padingay mu rukan, Paul kadingap nich want ipau wa kupan uman ku chikumbu ni chikumbu. Pakwez, walama chitongijok chiwamp, cha kupan uman kudi antu awonsu. Chilik chimwing, antu a Nzamb avud nlel alamin musangar wau ni kudandamen kulejan chikalap nchik kasolikany ka kuyitek mu rukan mulong wa ritiy rau. Akadivar netu akatish amwing adi kwau ayinau, pamwing ap ashich mu yikumbu ya kulamin amapal mulong wa upal ap mayej. Anch chitwishikin, awiy akat kuyilej amingang ni antu a mudimu, in kuyendil, ni antu akwau ezina kudiau. Rusot ra muchim wau ridi ra kupan uman piur pa Want wa Nzamb. Tusangaredin mud ik chilakej chipaninau!

22. (a) Chom ik chitukwashina chakwel tutambula ukwash udiokila ku mukand wa Bibil wa Midimu? (Tal mushet udia kwiur oku.) (b) Wisu mupak wen piuchingedinanya nsudiel ya ditenchik dined dikur dia yom?

²² Choviken anch, kudi yom yivud ya kwilej piur pa kucha ku mes kwa atwimbuy ni in Kristu akwau a pa chitot cha kusambish cha mivu ajimbwilau mu mukand wa Bibil wa Midimu. Pituchingedila nsudiel ya ditenchik dined dia yom, tukwatany mupak wa kuyimburij in Kristu inay a mu chitot cha kusambish cha mivu mu kupan uman pakad wom ni mushiku. Katat kwikil chisend chijim tukutwisha kwikal nich kupandakanamu ‘kurumburil’ piur pa Want wa Nzamb!—Mid. 28:23.

YOM IK UKUTWISHA KWILEJ PIUR PA:

․․․․․

Kucha ku mes mulong wa umutakel piur pa ndond ya kulejan?

․․․․․

Kubabal mu kulembil?

․․․․․

Kupan uman chikalap nchik yikangesh?

[Kamushet kadia pa paj wa 17]

“MUKAND WA MIDIMU UKEZAP KWIKAL WA CHILIK CHIMWING KUDI AM”

Patangay buku ‘ Rends pleinement témoignage au sujet du Royaume de Dieu ’, kalam umwing mwin kwendangan walejana yovil yend mwamu: “Mukand wa Midimu ukezap ap nchik kwikal wa chilik chimwing kudi am. Nading ‘nisutin’ mu rusangu ra Midimu pa yisu yivud pakwez mudi kusu muntu wadinga ukimbina chom nich buji ni udjit makalash mayimp. Katat niyovil anch nikwet chiyukish cha kuman katumb kau mu kumunyik kwa muten.”

[Chipich chidia pa paj wa 16]

Muruu wamutakela Pita ku chis chijim cha chikung