Ov, “Mwin Kristu” Mwawonsu Udi Chakin Kamu Mwin Kristu?

IN KRISTU adi inch katat? Kulondulijan ni buku ufundinau anch (Atlas de la chrétienté dans le monde mu Inglish), mu muvu wa 2010 ading piswimp mamiliyon 2,3 pa mangand mawonsu. Pakwez buku winou ulejen kand anch in Kristu inay adi a mu marelijon 41000 ni kusut—relijon ni relijon ukwet yitiyij ni yijil yend ya mashakamin. Nich kanvundangesh kinak ka marelijon ma “in Kristu,” choviken anch antu amwing awila mu kanvundangesh ni asambisha kuziy. Akutwish kwiyipul anch, ‘Awonsu alondin anch adi in Kristu, ov, adi chakin kamu in Kristu?’

Tushinshikinany amboku pa mulong winou kusutil chitongijok chishalijadina. Muntu uyila mu weny ufanyidin yisu yivud kwijikish ngand yend kudi kalal udia ku mupak wa ngand. Ufanyidin kand kulejan kusutil ku kart kanang, pamwing ap pasepor anch ndiy kamu mudi ulondinay. Chilik chimwing, mwin Kristu wakin ufanyidin kusal kand yom yivud pa ndond pa kwimedin ching kusu pa kulond anch utekin ritiy mudiay Kristu. Ufanyidin kumekesh yom yikwau mulong wa kwiyijikish. Ov, chinech chikwikal mutapu ik?

Dizu “in Kristu” asambisha kudisadil kapamp ka kusambish kupwa kwa muvu wa 44 C.C. Luka mwin kwilej jinsangu ja pasak ja Bibil wafunda anch: “Ku Antiosh kwawiy kwinikwa kwa sambishinau kuyipil in kwitiyij dijin anch, in Kristu.” (Midimu 11:26) Antu adingau ni kutazuk anch in Kristu adinga in kwilej enday Kristu. Ov, chom ik chimusadila muntu kwikal mwin kwilej wa Yesu Kristu? Ndinguril wa in Allemagne wa teoloji (Theologisches Begriffslexikon zum Neuen Testament) urumburil anch: “Kumulondul Yesu mudi mwin kwilej kurumburikin kwipan rawonsu kwa [muntu] kwa mwom wakabuj . . . mulong mwom wend wakabuj.” Chawiy lel, mwin Kristu wakin udi muntu ulondwila mafundish ni yany ya Kristu, Musul wa win Kristu, rawonsu ni pakad chikangesh.

Ov, chitwishikin kutan antu a mutapu winou pakach pa antu avud alondina anch adi in Kristu nlel unou? Chom ik chalonday Yesu amwinend chikeza kutukwash chakwel tuyijingunina in kwilejend akin? Tukwitin kushinshikin mutapu wakwilay Bibil ku yipul yiney. Mu mutu wa mulong ulondwila, tukushinshikin mazu matan malonday Yesu mamekeshina ni makwashin kuyijingunin in kwilejend akin. Tukushinshikin mutapu wamekeshau in Kristu a pa chitot cha kusambish cha mivu anch akwet ngikadil yiney. Tukukasikeshin kushinshikin anany pakach pa avud alondina kwikal in Kristu nlel awanyishina ngikadil yiney.