Dilejan dia 13
Ov Ukutwish Nchik Kujingunin Relijon Wakin?
Ov madi marelijon mawonsu makata kpumusangareshang Nzamb, ap udi ching umwing? (1)
Mulong wak kudi marelijon mavudi mwamu malondila anch madi ma Ukristu? (2)
Ukutwish nchik kwijik Akristu akin? (3-7)
1. Yesu wasambisha relijon wa Ukristu wakin umwing. Chawiy nlel kufanyidin kwikalaku kwau chikumangen chimwing, ap chisak, cha in kwifukwil akin a Yehova Nzamb. (Yohan 4:23, 24; Efesus 4:4, 5) Baibel ufundishin anch kudi kusu antu akemp adamu mu kanjil ka kuya ku mwom.—Mateu 7:13, 14.
2. Baibel wasambela kulejan anch, kwinyim kwa rufu ra apostol, malejan mayimp ni yisaljok yakad ya ukristu yikezang kwandam pakemp pakemp mu chikumangen cha Ukristu. Antu akez kapwitin kwinyim kwau akaritiy kuyilondul awiy pa ndond ya kulondul Kristu. (Mateu 7:15, 21-23; Midimu 20:29, 30) Chawiy lel tumena marelijon mashaljadina mavud mwamu makata kulondang anch madi ma Ukristu. Mutapu ik tukutwisha kujingunin Akristu akin?
3. Chimekesh chijikena nakash cha Akristu akin chidi anch akwet chakin rukat pakach pau ayinau. (Yohan 13:34, 35) Kayifundishinap kutong anch awiy adi awamp kusut antu a ulomb wa yikit ukwau ap michid yikwau. Ap kapamp kamwing kayifundishinap kukis antu a ngand jikwau. (Midimu 10:34, 35) Chawiy kakwandamangap mwi njit. Akristu akin akat kutaljan umwing ni mukwau mud akadivar ni anambaz.—1 Yohan 4:20, 21.
4. Chimekesh chikwau cha relijon wakin chidi anch antwend akwet kalimish kakurikina mulong wa Baibel. Akat kumwitiy mud Dizu dia Nzamb ni kwitiyij yilondilay. (Yohan 17:17; 2 Timoteu 3:16, 17) Akat kuman Dizu dia Nzamb mud diding dia usey ujim nakash kusut yitongijok ni yishankuru ya ukauntu. (Mateu 15:1-3, 7-9) Ikasikeshin kusadin Baibel mu mwom wau wa pichukupichuku. Chawiy kakatap kombil rubil chom chimwing ni chad kwijiyil chinying.—Titus 1:15, 16.
5. Relijon wakin ufanyidin kand kulimish dijin dia Nzamb. (Mateu 6:9) Yesu wijikisha dijin dia Nzamb, Yehova, kud antu akwau. Akristu akin afanyidin kusal chilik chimwing. (Yohan 17:6, 26; Rome 10:13, 14) Antu ik mwi ndond ushichinga akata kuyilej akwau piur pa dijin dia Nzamb?
6. Akristu akin afanyidin kutwa rubil piur pa Want wa Nzamb. Mwamu mwasalay Yesu. Walondanga piur pa Want pichukupichuku. (Luka 8:1) Wita in kwilej end kutwa rubil ra uruu wa mutapu umwing pa divu diawonsu. (Mateu 24:14; 28:19, 20) Akristu akin itiyijin anch ching kusu Want wa Nzamb ukeza kalet chisambu chakin ni zoong pa divu dined.—Kuseng 146:3-5.
7. In kwilej a Yesu kafanyidinap kwikalamu mu mangand mayimp minam. (Yohan 17:16) Kakat kwandamap mu milong ya politik ni mu matend ma mitapu ya kushakamin. Akat kwipuk ngikadil, yisaljok, ni yitongijok yiyimp ya antu avud mu mangand. (Yakob 1:27; 4:4) Ov ukutwish kujingunin chisak chimwing cha relijon mwi ndond yey akweta yimekesh yiney ya Ukristu wakin?
[Caption on page 27]
Akristu akin akatijadin, alimishin Baibel, ni akat kutwa rubil piur pa Want wa Nzamb