Difukwil Ditiyijinay Nzamb

1. Mutapu ik tukeza kwisakin anch tukat kumwifukwil Nzamb mwi njil yitentamina?

YEHOVA NZAMB ukat kutubangin nakash ni usotin twisakina umutakel wend wa rukat. Anch twamwifukwil mwi njil yitentamina, tukez kusangar ni tukez kwiyep milong yivud mu mwom. Tukez kwikal kand nich chiyukish chend ni ukwash wend. (Isay 48:17) Pakwez, kudi, tunan ni tunan twa marelijon malondila anch makat kufundish uyakin piur pa Nzamb. Pakwez, mashalijadin nakash mu mafundish mau piur pa Nzamb udi nany ni yik yituchingejidinay.

2. Mutapu ik tukutwisha kwilej njil yitentamina ya kumwifukwil Yehova, ni chilikej ik chikutwisha kutukwash kutesh chom chinech?

² Ov, mutapu ik ukutwisha kujingunin njil yitentamina ya kumwifukwil Yehova? Uswiridinap kwilej ni kwisikesh mafundish ma marelijon mawonsu. Uswiridin kusu kwilej chifundishinay chakin kamu Bibil piur pa difukwil diakin. Chilikej: Mu jingand jivud, mudi mulong wa nfalang ja makasu. Anch akwinkish mudimu wa kusakul nfalang jinej ja makasu, mutapu ik ukutwisha kujijingunin? Ov, kusutil ku kulam mu manangu nfalang jawonsu ja makasu? Bwat. Chikez kwikal cha manangu kusambel bil kwilej mutapu udia nfalang jakin. Kupwa kwa kujingunin mujidia nfalang jakin, ukutwish kujingunin ja makasu. Chawiy chimwing, ang twilej mutapu wa kujingunin relijon wakin, tukutwish kujingunin marelijon ma makasu.

3. Kwambatan nend Yesu, chom ik tufanyidina kusal anch tusotil twitiyika kud Nzamb?

³ Chidi cha usey nakash anch tumwifukwila Yehova mu mutapu witiyijinay. Antu avud itiyijin anch marelijon mawonsu mamusangareshin Nzamb, pakwez Bibil kafundishinap mwamu bwat. Chiwanyidinap kwau kufa mu kan kwikal mwin Kristu. Yesu walonda anch: “Kadiap antu awonsu akata kwintazuk anch: ‘Nsalejetu, Nsalejetu’ akeza kwandam mu Want wa Mwiur, pakwez ching antu akata kusal mudi musotilay Tatukwam udia mwiur.” Chawiy lel, chakwel kwitiyik kud Nzamb, tufanyidin kwilej chitwitinay Nzamb ni kuchisadil. Yesu wayitazuka antu alikina kusal rusot ra Nzamb anch “antu ayimp!” (Mateu 7:21-23) Mud nfalang ja makasu, relijon wa makasu kakwetap usey wakin. Chipandakenamu kuyip, relijon winou udi chakin wa ubaj.

4. Mazu ma Yesu piur pa jinjil jaad marumburikin ik, ni kwisu kuyitwadila yimwing ni yikwau?

⁴ Yehova umwinkin muntu ni muntu udia pa divu mutapu wa kutambul mwom wa chikupu. Pakwez, pakwel anch twikala nich mwom wa chikupu mu Paradis, tufanyidin kumwifukwil Nzamb muchifanyidina ni kushakam kusambish katat mu mutapu witiyikina kud Nzamb. Cha ushon, antu avud alikin kusal mwamu. Chawiy chalonday Yesu anch: “Andamany mu kachis kiwongila; mulong chis chibwabumukina ni njil ya mukombil yiyil ku kujiy, akata kwandaminamu avudil. Mulong chis chiwongila ni kajil katentamina yitakedil ku kupand, akemp kusu akata kuyibudikin.” (Mateu 7:13, 14) Relijon wakin utwadil ku mwom wa chikupu. Relijon wa makasu utwadil ku kusheshik. Yehova kasotilap anch muntu ap umwing asheshika, ni chawiy chiyinkishinau antu awonsu kwi ndond kwawonsu kudiau mutapu wa kwilej piur pend. (2 Pita 3:9) Chakin kamu, mutapu tukata kumwifukwil Nzamb urumburikin kud etu mwom ap rufu.

MUTAPU WA KUJINGUNIN RELIJON WAKIN

5. Ov, mutapu ik tukutwisha kuyijingunin antu adia mu relijon wakin?

⁵ Mutapu ik tukutwisha kujingunin ‘njil yiyila ku mwom’? Yesu walonda anch relijon wakin ukez kumekan patok mu mwom wa antu adiamu. Ndiy walonda anch: “Ukez kayijikinany ku mabuj mau. Mutond uwamp ukat kusong mabuj mawamp.” (Mateu 7:16, 17) Mu mutapu ukwau wa kulond, antu adia mu relijon wakin akez kuyijingunin ku yitiyij yau ni ku mwikadil wau. Ap anch kadiap awanyidina ni akat kurumbukang, in kwifukwil akin chidi chisak chisotining kusal rusot ra Nzamb. El tushinshikin yom musamban yiyijingunina antu adia mu relijon wakin.

6, 7. Atushalapol a Nzamb amumening Bibil mutapu ik, ni mutapu ik washay Yesu chilikej pa mulong winou?

⁶ Mafundish ma atushalapol a Nzamb mengamidin pa Bibil. Bibil amwinend ulondil anch: “Mazu mawonsu ma Mukand wa Nzamb madiokala ku spiritu wa Nzamb, makutwish kuyilej antu kuyibabesh ni kuyitenchik, ni kuyilej kwirijek mu kutentam, chakwel muntu wa Nzamb ukwikal uwanyidina mu kusal mudimu wawonsu uwamp.” (2 Timote 3:16, 17) Kambuy Paul wayifundina ambay nend in Kristu anch: “Piwatambulanya dizu dia Nzamb kudi etu, kiwaditambulanyap mudi dizu dia muntu, pakwez mudi dizu dia Nzamb, mudi mudidia chakin, dikata kusadil mudimu mu en witiyilanya.” (1 Tesalonik 2:13) Chawiy lel, yitiyij ni yisal ya relijon wakin yengamidinap pa yitongijok ap yishankur ya muntu. Yidiokil kamu mu Dizu dipepidilau dia Nzamb, Bibil.

⁷ Yesu Kristu washa chilikej chiwamp kusutil ku kujamish mafundish mend pa Dizu dia Nzamb. Mu malembil mend kud Tatukwend wa mwiur, Yesu walonda anch: “Dizu diey diawiy uyakin.” (Yohan 17:17) Yesu witiyija Dizu dia Nzamb, ni yom yawonsu yafundishay yambatana nich Mifund. Chisu ni chisu Yesu walondanga anch: ‘Achifunda kal.’ (Mateu 4:4, 7, 10) Kupwa, Yesu wading ni kujimbulang yifundilau. Chawiy chimwing, antu a Nzamb nlel kakatap kufundish yitongijok yau ayinau. Itiyijin anch Bibil didi Dizu dia Nzamb, ni akat kujamish mafundish mau pa yilondila Bibil.

8. Kumwifukwil Yehova kwitin chom ik chikwau?

⁸ Antu adia mu relijon wakin akat kumwifukwil ching kusu Yehova ni akat kwijikish dijin diend. Yesu walonda anch: “ Ukamwifukwil Mwant [Yehova] Nzamb wey, ukamusadilang ndiy kusu.” (Mateu 4:10) Chawiy lel, atushalapol a Nzamb akat kumwifukwil ching kusu Yehova. Difukwil dined ditin kand kuyijikish antu dijin dia Nzamb wakin ni chidiay. Kuseng 83:18 ulondil anch: “Chakwel antu ijika anch ey, dijin diey [Yehova, NW], Yey kusu amwiney Upandakena Piur pa divu diawonsu.” Yesu washa chilikej mu kuyikwash antu akwau kumwijik Nzamb, mud mwalonday mu malembil anch: “Am namekesh kal dijin diey kudi antu wanginkisha am kuyidiosh mu mangand.” (Yohan 17:6) Chawiy chimwing, in kwifukwil akin nlel akat kuyifundish antu akwau piur pa dijin dia Nzamb, ya kushilamu yend, ni ngikadil yend.

9, 10. Mutapu ik ukatau in Kristu akin kwimekeshin rukat umwing ni mukwau?

⁹ Antu a Nzamb amekeshin rukat rakad katond kud umwing ni mukwau. Yesu walonda anch: “Ku chinech kwawiy kukwijikinau antu awonsu anch en udiany in kwilej amam anch wakatijanany.” (Yohan 13:35) In Kristu a kusambish adinga nich rukat ra mutapu winou umwing ni mukwau. Rukat ra Nzamb rikwetap mipak ya ulomb wa chikit, ya reng, ni ya wan-a-ngand ni riyipwitidin antu pamwing ku moj wakad kutwish kukatuk wa ukadivar wakin. (Kolosay 3:14) Yid ya marelijon ma makasu yikwetingap rukat riner ra ukadivar. Ov, mutapu ik twija chom chinech? Akat kujipijan umwing ni mukwau mulong wa kushalijan kwa ngand ap kwa kabil. In Kristu akin kakatap kuzambul mat mulong wa kuyijip akadivar nau in Kristu ap muntu mukwau. Bibil ulondil anch: “Mu chinech mwawiy mwamekedinau anch anany adia an a Nzamb, ni an a Satan kand; wawonsu wakad kusal kutentam kadip wa Nzamb, ap ndiy wakad kumukat mwanamakwend. . . . Tuwapidil kukatijan umwing ni mukwau; kangal mudi Kain wading muyimp, wamujipa mwanamakwend.”—1 Yohan 3:10-12; 4:20, 21.

¹⁰ Chakin, rukat rakin rirumburikin yivud chidiap kusu kulik kujipijan umwing ni mukwau. Pakad choy in Kristu akin akat kusadil chisu chau, usu wau, ni mapit mau chakwel kukwashijan ni kukasikeshijan umwing ni mukwau. (Hebereu 10:24, 25) Akat kukwashijan umwing ni mukwau mu yisu ya yinship ya mar, ni akat kuyisadil antu akwau nich muchim utok. Chakin, akat kusadil mu mwom wau chiyul cha Bibil cha ‘kuyisadil antu awonsu nawamp.’—Galatia 6:10.

11. Ov, mulong wak chidi cha usey kumwitiyij Yesu Kristu mud ditenchik dia Nzamb dia dipandish?

¹¹ In Kristu akin amwitiyij Yesu Kristu mud muntu usadidilay Nzamb chakwel kutupandish. Bibil ulondil anch: “Dipandish kididip mu muntu mukwau; ap kwikil kand dijin dikwau mwishin mwa diur dipanyinau pakach pa antu mutukwipandishila etu.” (Midimu 4:12) Mud mutwamena mu Shapitre wa 5, Yesu wapana mwom wend mud difut mulong wa antu aziyidila. (Mateu 20:28) Chikwau kand, Yesu udi Mwant wa Want wa mwiur ukeza kuyikel pa divu diawonsu watondau kud Nzamb. Ni Nzamb uchingejin anch tumuziyila Yesu ni kusadil mafundish mend anch tusotil mwom wa chikupu. Chawiy chilondidilay Bibil anch: “Muntu mwawonsu umwitiyijina Mwan ukwet mwom wa chikupu. Muntu mwawonsu wakad kumuziyil Mwan kakez kwikalap nich mwom winou.”—Yohan 3:36, MM.

12. Kulik kwiyandjik mu milong ya mangand kurumburikin ik?

¹² In kwifukwil akin kiyandjikiningap mu yom ya mangand. Pamupakau kud Pilat nyikel mwin Rom, Yesu walonda anch: “Want wam kiudip wa mangand minam.” (Yohan 18:36) Chikalap nchik mwi ngand mushichau, in kwilej a Yesu akat kuziyil ku Want wa mwiur ni kakatap kwiyandjik mu milong ya chipolitik ya mangand. Kakatap kwiyandjik mu kupwitijan kwa mangand. Pakwez, in kumwifukwil Yehova kakatap kwiyandjik mu yom yitondinau antu akwau kusal piur pa kwinung nich chisak cha chipolitik, kuril chitwamu cha kuyikel, ap kutond (kuvot). Ap anch alikining kwiyandjik mu milong ya chipolitik, in kumwifukwil Nzamb akin akat kuziyilang ku chijil. Ov, mulong wak? Mulong didi Dizu dia Nzamb diyinkishin mbil ya “kuziyil” kudi akata “kuyikel piur.” (Rom 13:1) Anch kwikal kupwitijan pakach pa yichingejinay Nzamb ni yichingejina ditenchik dia chipolitik, in kwifukwil akin akat kulondul chilikej cha atwimbuy, alonda anch: “Etu tufanyidil kumuziyil Nzamb chipandakena antu.”—Midimu 5:29; Marko 12:17.

13. Mutapu ik umeningau In kwilej akin a Yesu Want wa Nzamb, ni chom ik lel chikatau kusal?

¹³ In kwilej akin a Yehova akat kulejan anch Want wa Nzamb wawiy ruchingej rimwing kusu ra antu. Yesu wasambela kulond anch: “Chifanyidin Rusangu Ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.” (Mateu 24:14, MM) Pa ndond pa kuyikasikesh antu akarumukin kud anyikel a antu chakwel ayipwishin milong yau, in kwilej akin a Yesu Kristu alejen Want wa mwiur wa Nzamb mud wawiy ruchingej rimwing kusu ra antu. (Kuseng 146:3) Yesu watufundisha kulembil mulong wa winyikel winou uwanyidina palonday anch: “Want wey weza. Rusot rey arusala pansh mudi mwiur.” (Mateu 6:10) Dizu dia Nzamb diasambela kulond anch Want winou wa mwiur “ukez kukasikesh want ukwau wakad kwez kwikal nich disudiel chikupu. Kakez kuukwatap want winou, pakwez ukez kushesh mant makwau mawonsu, chad wawiy ukez kushakam chikupu.”—Daniel 2:44.

14. Chisak ik cha relijon witiyijina anch chiwanyishin yitinau mulong wa difukwil diakin?

¹⁴ Pa dishin dia yom yitwashinshikina kal ey, iyipula anch: ‘Chisak ik cha relijon chikata kwengamishin mafundish mach mawonsu pa Bibil ni chikata kwijikish dijin dia Yehova? Chisak ik chimekeshina rukat ra winzamb, chimwitiyijina Yesu, chakad kwiyandjik mu milong ya mangand, ni chikat kulejan Want wa Nzamb anch wawiy ruchingej rimwing kusu ra antu? Ku marelijon mawonsu madia pa divu, wisu umwing uwanyishina yom yiney yawonsu?’ Uman umekeshin kamu patok anch ching kusu Atuman a Yehova.—Isay 43:10-12.

YOM IK UKUSALA?

15. Yom ik yikwau yitinay Nzamb pa ndond kusu pa kwimen pa kwitiyij kwikalaku kwend?

¹⁵ Kumwitiyij kusu Nzamb kuwanyidinap chakwel kumusangaresh. Ap Bibil ulondil anch, ayilembil niyawiy itiyijin anch Nzamb udi kwaku. (Jakobu 2:19) Pakwez, choviken patok anch awiy kakatap kusal rusot ra Nzamb ni kayitiyinap. Chakwel kwitiyik kud Nzamb, kitufanyidinap kusu kwitiyij kwikalaku kwend pakwez tufanyidin kand kusal rusot rend. Tufanyidin kand kwaurik kudiokal mu relijon wa makasu ni kwak difukwil diakin.

16. Chom ik chifanyidina kusal piur pa kwikal mu relijon wa makasu?

¹⁶ Kambuy Paul walejana anch kitufanyidinap kwikal mu difukwil dia makasu. Ndiy wafunda anch: “Nzamb walonda kand anch: ‘Chawiy diokalany, aurikany nau. Kangal wapukunany ku yom yijondila, chad am nikez kukwakany.’” (2 Korint 6:17; Isay 52:11) In Kristu akin akat kwiyep chom chin chawonsu chikwatikena nich difukwil dia makasu.

17, 18. “Babilon Mujim” chom ik ni mulong wak chifanyidin ‘kudiokal’ swa kudiay ndiy?

¹⁷ Bibil ulejen anch milad yawonsu ya relijon wa makasu yidi yikunku ya “Babilon mujim.”a (Kujingunik 17:5) Dijin dined dituvurishin musumb wa pakur wa Babilon, kwawiy kwasambishina relijon wa makasu kwinyim kwa Mabeb ma pa chirung cha Nowa. Mafundish mavud ni yisalijok yivud yipalangena katat mu relijon wa makasu yasambisha pakur mu Babilon. Chilikej, in Babilon adinga kwifukwil usatu wa anzamb. Nlel, chitiyij chijim cha marelijon mavud chidi Usatu. Pakwez Bibil ufundishin patok anch kudi ching kusu Nzamb umwing wakin, Yehova, ni anch Yesu Kristu udi Mwanend. (Yohan 17:3) In Babilon itiyijanga kand anch antu akwet mupim wakad kufang ukata kupand ku rufu ni ukutwish kuman mar mwi ndond ya mar. Nlel, ritiy mu mupim ap mu spiritu wakad kufang ukutwisha kuman mar mu karung ka misiny arifundishin mu marelijon mavud.

¹⁸ Mulong difukwil dia Babilon mukur dipalangen pa divu diawonsu, chitwishikin nawamp win kamu kumujingunin Babilon Mujim wa katat mud want wa pa mangand wa relijon wa makasu. Ni Nzamb wasambela kulond anch nsudiel ya want winou wa relijon wa makasu yikez kushiken kwa kukashimwish. (Kujingunik 18:8) Ov watesh kal mulong wak chidia cha usey ujim anch wiyaurila kudiokal ku chikunku chin chawonsu cha Babilon Mujim? Yehova Nzamb ukusotin ey ‘udiokal kudiay ndiy’ swa pikuchidia chisu ap.—Kujingunik 18:4.

19. Chom ik ukeza kwisakin kusutil ku kumusadil Yehova?

¹⁹ Mud chibudikin cha mupak wey cha kulik kwikal mu relijon wa makasu, antu amwing akukatul urund ney. Pakwez, kusutil ku kumusadil Yehova pamwing ni antwend, ukez kwak yivud kupandakanamu yiukushadisha. Mud muchadinga kud in kwilej a Yesu a kusambish asha yom yikwau mulong wa kumulondul, ukez kwikal nau akadivar ni anambaz avud a muspiritu. Ukez kwikal chid cha dijuku dijim dia pa mangand mawonsu dia mamiliyon ma in Kristu akin, akukatina chakin. Ni ukez kwikal nich ruchingej ripandakena kuwap ra mwom wa chikupu “mu mangand masotila kwez.” (Marko 10:28-30) Pamwing ap mu kusut kwa chisu, antu akukwipuka mulong wa yitiyij yey akez kukarumukin ku yom yifundishinay Bibil ni kwikal in kumwifukwil Yehova.

20. Ov, machuku ma kurutu mayilamidin antu adia mu relijon wakin yom ik?

²⁰ Bibil ufundishin anch Nzamb ukulet piswimp ap kamu nsudiel ya ditenchik dined diyimp dia yom ni ukudiswinkesh nich mangand masu matentamina makwikala mwishin mwa umutakel wa Want wend. (2 Pita 3:9, 13) Makez kwikal mangand mawamp mud ik! Ni mu ditenchik dined disu ditentamina, mukez ching kusu kwikal relijon umwing, mulad umwing wa difukwil diakin. Ov, chidiap cha manangu ku mutambu wey kusal nzau jiswiridikina chakwel winunga nau in kwifukwil akin kusambish kamu katat?