Ipuk Difukwil Dia Makasu!
“Chawiy en diokalany mukach mwau, aurikany kudi awiy, mwamu mwalonday Mwant, kangal wapukunany ku chom chijondila.”—2 KORINT 6:17.
1. Mu mwikadil ik mudiau antu avud piur pa milong ya Nzamb?
ANTU avud a kashinsh kijap kwau uyakin piur pa Nzamb ni machuku ma kurutu ma antu. Awiy ashich mu mididim ya kashinsh, mulong kamenap yakul yiswiridinau ku uyakin piur pa Nzamb ni mulong wa machuku ma kurutu. Tunan ni tunan twa antu adi mu uswik wa milong ya makasu, yifuk, ni misambu yikisinay Sakatang wetu. Pamwing ap, ukwet amutej ni anamakwey itiyijina karung ka misiny, anzamb asatu mwi Nzamb umwing, kuburen kufa kwa mupim, ap mafundish makwau ma makasu.
2. Yom ik yasadilau kal amakurump a yikumbu ya Nzamb, ni yom ik yimekena?
2 Yom ik yidia musul wa kuburen kwijik milong ya Nzamb kupalangena mwamu? Chishimokishin, anch relijon ndiy musul wa kuburen kwijik kwinoku, nakash kamu yirijek ya yikumbu ya Nzamb nau amakurump akat kufundish yitongijok yakad kwambatan nich ya Nzamb. (Marko 7:7, 8) Antu avud ayidimbola kal nich kwitiyij anch akat kumwifwil Nzamb wakin, oku akat kumusal chakin kamu Nzamb. Relijon wa makasu ndiy kamu musul wa mwikadil winou wa ushon.
3. Ov, nany mwin kupalangesh wa kusambish wa relijon wa makasu, ni mutapu ik umurumburilau mu Bibil?
3 Kudi muntu umwing wakad kumekan ujingamina kwinyim kwa relijon wa makasu. Paul wisambidin muntu winou, palonday anch: “Mulong anzamb [nzamb, NW] a mangand minam abwikil kal mes ma michim yau akat kwitiy, chakwel kakumanip kutok kwa katumb kawamp ka uyaj wa Kristu udia chifanikesh cha Nzamb.” (2 Korint 4:4) Satan Djabul ndiy ‘nzamb wa mangand.’ Ndiy mwin kupalangesh wa kusambish wa difukwil dia makasu. Paul wafunda anch: “Chinech kichidip chom cha kushimok, mulong Satan amwinend ukat kwikarumun mudi mwangel wa kutok. Chawiy kichidip cha kushimok anch atushalapol end akwikarumun ayinau mudi atushalapol atentamin.” (2 Korint 11:14, 15) Satan ukat kumekesh yom yiyimp mud yom yiwamp ni kuyidimb antu kwitiyij yom ya makasu.
4. Yom ik yalonda Chijil cha Nzamb kud in Isarel piur pa aprofet a makasu?
4 Choviken komb patok mulong wak Bibil ulikin relijon wa makasu! Chilakej, Chijil cha Moses chayilikisha antu a Nzamb kulondul aprofet a makasu. Muntu mwin mwawonsu wadinga ni kupalangesh mafundish ma makasu ni difukwil dia anzamb a makasu ‘afanyidina kumujip mulong ndiy ulejen kumubwambwil Yehova.’ Nzamb wayileja in Isarel ‘kudiosh kuyip kwadinga mukach mwau.’ (Kuvurik Yijil 13:1-5) Chakin, Yehova ukisin kamu nakash relijon wa makasu.—Ezekiel 13:3.
5. Kubabesh ik tufanyidina kutesh nlel?
5 Yesu Kristu nau atwimbuy end amekesha yitongijok yin kamu ya Yehova piur pa relijon wa makasu. Yesu wayileja in kwilejend anch: “Yibabelany aprofet a makasu, akwez kudi en ibwikil yikit ya amikoku pakwez mukach adi atwingol ayidiany.” (Mateu 7:15; Marko 13:22, 23) Paul wafunda anch: “Mulong ujim wa Nzamb wamekana mwiur kudi antu awonsu akad Nzamb ni akad kutentam, kudi antu akata kukangesh uyakin mulong wa kupengam kwau.” (Rom 1:18) Chidi cha usey anch in Kristu akin atesha kubabesh kwinoku ni kwipuk muntu mwin mwawonsu ukangeshina uyakin wa Dizu dia Nzamb ap upalangeshina mafundish ma makasu!—1 Yohan 4:1.
Diokal mu “Babilon Mujim”
6. Mutapu ik umufanikeshinau “Babilon Mujim” mu Bibil?
6 Tal mutapu urumburilau relijon wa makasu mu mukand wa Bibil upidilau anch Kujingunik. Afanikeshin relijon wa makasu ni mband wa kusotan ukweta usu piur pa mant mavud ni antu au. Mband winou wa chifanikesh ukat kusotan nau ant a pansh avud ni ukwachikin ni kuzel kwa mash ma antu a in kumwifukwil Nzamb akin. (Kujingunik 17:1, 2, 6, 18) Pa mpal pend apafundil dijin dikwatijadina kamu nakash ni yaku yend yijondila. Dijin diend “Babilon mujim, nvaj wa in kusotan ni wa tuyimp twa pansh.”—Kujingunik 17:5.
7, 8. Mutapu ik wasochika difukwil dia makasu, ni yom ik yabudikinaku?
7 Mutapu urumburilay Bibil Babilon Mujim ufanyidin kamu nich chisak cha mangand mawonsu cha difukwil dia makasu. Ap anch tunan ni tunan twa marelijon twibombinap pamwing mu mutapu umekena mud dirijek dimwing dia pa mangand mawonsu, mawonsu makwet ntong ni yisalijok ya chilik chimwing. Mud muchimekeshinau kud mband mwin kusotan wisambidinau mu mukand wa Kujingunik, difukwil dia makasu dikwet usu nakash piur pa mant. Mud mband wakad kushishaman ku uruw wend, difukwil dia makasu dikat kusotan nich kusuk manswik ni mant mavud ma politik. Mwin kwilej Yakob wafunda anch: “En antu akad kushishaman, kiwijanyip anch urund wa mangand udi ukankuny ni Nzamb? Chawiy wawonsu ukukwata urund ni mangand wiyikadish kal amwinend mukankuny ni Nzamb.”—Yakob 4:4.
8 Kubombakan kwinoku kwa difukwil dia makasu ni mant kwayiletidin kal antu mar mavud nakash. Dr Xolela Mangcu, mwin kushinshikin milong ya politik, wa mu Afrik walonda anch: “Rusangu ra mangand rizwil nich yilakej yivud ya kujipijan kwa antu avud nakash mulong wa kubombakan kwa difukwil ni milong ya politik.” Jurnal umwing walondil kamu katat anch: “Kutembijan kwa ubaj nakash ni kujipeshina antu nlel . . . kwimedin pa milong ya difukwil.” Tunan ni tunan twa antu ashadishin mwom wau mulong wa matend makasikeshinau kud in kwifukwil. Babilon Mujim ukat kuzengol ni kujip atushalapol akin a Nzamb, ukwachikin nich kuzel kwa mash ma antu awonsu ajipau.—Kujingunik 18:24.
9. Mutapu ik umekeshina mukand wa Kujingunik kukis kukisinay Yehova difukwil dia makasu?
9 Yilondilay Bibil anch yikumushiken Babilon Mujim yimekeshin kamu patok anch Yehova ukisin nakash difukwil dia makasu. Kujingunik 17:16 ulondil anch: “Misengu dikum yiwamana ni nnam wa chidiany, akez kumukis mband wa kusochik. Akez kumubuu yom yawonsu, amusha kanzikis. Akez kudia mbij jend, chad akumwosh kasu.” Cha kusambish, nnam winou wa chidiany ukez kamujip ni ukez kudia mbij jend. Kupwa, yawonsu yikushalaku akez kuyosh kasu. Chilik chimwing kand, piswimp ap kamu mant ma mangand makez kushesh difukwil dia makasu. Nzamb ukuyibachik kusal mwamu. (Kujingunik 17:17) Babilon Mujim, chisak cha mangand mawonsu cha difukwil dia makasu, ufanyidin kamu kujiy. “Kiukez kumekanap kand.”—Kujingunik 18:21.
10. Mutapu ik tufanyidina kuman difukwil dia makasu?
10 Mutapu ik ufanyidinau in kwifukwil akin kuman Babilon Mujim? Bibil ulondil kamu patok anch: “Ezany, antwam, diokalany kudiay ndiy, kangal wibombany pa yitil ni kutambul yipupu yend.” (Kujingunik 18:4) Antu asotina kupand afanyidin kudiokal mu difukwil dia makasu pikuchidia chisu ap. Yesu Kristu padingay panap pansh, walejana anch mu machuku ma kwisudiel, avud akez kufa mu kan anch akat kumulondul ndiy. (Mateu 24:3-5) Ndiy uyilejin antu inay anch: ‘Kand kal nikwijikanyip; ndiokalany kwa, udiany antu ayimp.’ (Mateu 7:23) Yesu Kristu, Mwant wadidina kal want katat, walikin kal difukwil dia makasu.
Mutapu ik Tukutwisha Kwipuk Difukwil dia Makasu?
11. Yom ik tufanyidina kusal chakwel kwipuk difukwil dia makasu?
11 In Kristu akin alikining difukwil dia makasu ni mafundish ma difukwil dia makasu. Chinech chirumburikin anch tufanyidinap kutal ap kutesh jinsangu jilondilau ku radio ap ku televizion, tufanyidinap kutang mikand yipalangeshina makasu piur pa Nzamb ni Dizu diend. (Kuseng 119:37) Chidi kand cha manangu kud etu kulik kuya ku yikumangan ni mijikit yirijekinau kud dirijek ap dimwing disadina pamwing ni difukwil dia makasu. Chikwau kand, tufanyidinap kukwash difukwil dia makasu mwi njil ap yimwing. (1 Korint 10:21) Kwipuk kusal yom yiney kukat kutuking kuwil ‘mu mupit wa manangu ma antu ma kudimban makad usey. Yom yikata kudiokal ku malejan makatau kutambul antu mu majuku ma angakau, ni ku miku yiyimp yikata kuyikel pa mangand, pakwez kiyikat kudiokalap kudi Kristu.’—Kolosay 2:8.
12. Mutapu ik ukutwishay muntu kudiokal mu difukwil dia makasu?
12 Ing anch muntu usotina kwikal Kaman wa Yehova uchidi ni katat ni dijin mu buku wa yid ya difukwil dia makasu? Chisu chivud, chiding chiwamp kufund mukand wa kwijikish anch muntu winou kasotinap kand kwikal chid cha difukwil dia makasu. Chidi cha usey anch muntu winou akwata mupak winou mulong wa kwipuk kwijondish nich difukwil dia makasu. Yisalijok ya muntu usotina kwikal Kaman wa Yehova yifanyidin kumekesh patok kwadiay ni kulembil ni kud amwija anch walikinap kal kubombakan kwin kwawonsu ni difukwil dia makasu.
13. Chiyul ik chitwinkishina Bibil piur pa kwipuk difukwil dia makasu?
13 Kambuy Paul wafunda anch: “Kangal wabombakanay nau antu akad ritiy. Ov, uyakin ukutwish nchik kwovijan nich kuyip? Ap, ov, chimunyik chikubombakan nchik nich mididim? Ov, Kristu ukwovijan nchik nend [Belial, TMK], ap ov, mwin ritiy ukufanakan nchik nend muntu wakad ritiy? Ov, Chikumbu cha Nzamb chikwovijan nchik nau akish? . . . Chawiy diokalany, aurikany nau. Kangal wapukunany ku yom yijondila.” (2 Korint 6:14-17, MM) Anch tukat kwipuk difukwil dia makasu, chimeken anch tuteshin mazu minam. Ov, chiyul cha Paul chitwitin kand kwaurik nau in kwifukwil a makasu?
“Shakamany Nich Manangu”
14. Ov, tufanyidin kuyipuk kamu antu adia mu difukwil dia makasu? Rumburil.
14 Ov, in kwifukwil akin afanyidin kwipuk antu in awonsu adia mu difukwil dia makasu? Ov, tufanyidin kwipuk antu akad kwikal ni ritiy mud ritukweta? Bwat! Chijil cha kaad mu yijil yaad yipandakena kujimb chilondil anch: “Ukamukata mukwen mudi ey amwiney.” (Mateu 22:39) Pitukata kuya ni kulejan rusangu ruwamp ra Want, tumekeshining chakin rukat mulong wa amutej netu. Tumekeshining kand anch tuyikatin pitukata kwilej nau Bibil ni kuyilej kuswir kwa kwipuk difukwil dia makasu.
15. Kulik kwikal “a mangand” kurumburikin ik?
15 Ap anch tukat kuyishimunin amutej netu rusangu ruwamp, mud chasalau in kwilej a Yesu, etu ‘tudiap a mangand.’ (Yohan 15:19) Mu mufund winou dizu “mangand” disambidin chisak cha antu alikina kumulondul Nzamb. (Efes 4:17-19; 1 Yohan 5:19) Tudiap a mangand mulong tulikin yaku, mutapu wa kulond, ni ngikadil yikisinay Yehova. (1 Yohan 2:15-17) Chikwau kand, kulondwish nich chijidik chilondila anch: “Urund uyimp ukat kuyipish yaku yiwamp,” tulikin kuta urund nau antu ashicha pakad kulondul yijil ya Ukristu. (1 Korint 15:33) Kulik kwikal a mangand kud kushal ‘ilamina ku manans ma yitil ya mangand.’ (Yakob 1:27) Chawiy lel, kulik kwikal a mangand kurumburikinap anch tuyipuka antu in awonsu.—Yohan 17:15, 16; 1 Korint 5:9, 10.
16, 17. Mutapu ik ufanyidinau in Kristu kuyiman antu akad kwijik uyakin udia mu Bibil?
16 Mutapu ik lel tukutwisha kuyiman antu akad kwijik uyakin udia mu Bibil? Paul wafundina chikumangen cha Kolosay anch: “Shakamany nich manangu nau antu akad kwikal in Kristu, sotany chisu cha kusal yom yiwamp. Chifanyidin mazu men mikala ma kalimish yisu yawonsu, ambambany nawamp nau antu akwau, ijikany mutapu wa kuyakul antu awonsu nawamp.” (Kolosay 4:5, 6) Kambuy Pita wafunda anch: “Pakwez mutumbishany Kristu mu michim yen, ndiy kwend Nsalejen. Machuku mawonsu ikalany awanyidina kumwakul muntu mwawonsu ukukwipulany kurumburil mulong wa ruchingej riukwetany mu michim yen.” (1 Pita 3:15) Paul wayiyula in Kristu anch “kangal ikal in matungu, ap in matend, pakwez ikal in kudimuk ni in kumekesh kwitudish kwakin kudi antu awonsu mu yisu yawonsu.”—Titus 3:2.
17 Chitudia Atuman a Yehova, tukat kwipuk kusadil mazu ma kuchirilan kud antu akwau. Tufanyidinap kusadil mazu ma masaal mulong wa kurumburil mutapu udiau antu a difukwil dikwau. Pakwez, tudi adimukina, ap anch muntu mwin chikumbu, mutej netu, ap mukwetu tukata kusal nend mudimu pamwing waturumbukin ap kusadil mazu ma masaal.—Kolosay 4:6; 2 Timote 2:24.
“Londul Chilik cha Mazu Makin”
18. Mwikadil ik uyimp udingau nich antu achirikidina ku difukwil dia makasu?
18 Chikwikal cha ushon anch muntu wilejina uyakin wa Bibil achirikina kand mu difukwil dia makasu. Bibil ulejen yom yiyimp yikutwisha kushiken anch twasal mwamu palondilay anch: “Anch antu iyepina kal ku yaku yiyimp ya mangand mulong amwijikin kal Nsalejetu, ndiy kamu Mupandish wetu Yesu Kristu, chad anch yaku ya mangand yayikwat kand ni kuyipandakan, kwisudiel mulong wau ukwikal uyimp kupandakan wa kusambish. . . . Mazu makin mafundau mu jinswir mashikedin padawiy anch: ‘Kabu ukat kuchirikin ku yirik yend amwinend, ni, chibond woyishangau kal mem wachirik kand kakwau kwisamp mu yisampisamp.’”—2 Pita 2:20-22.
19. Mulong wak chidi cha usey kubabal anch chom ap chimwing kangal chatek mu ubaj kumulondul kwetu Nzamb?
19 Tufanyidin kubabal anch chom ap chimwing kangal chatek mu ubaj ngikadil yetu ya kumulondul Nzamb. Chifanyidin kamu kubabal mulong kudi ubaj nakash! Kambuy Paul ubabeshin anch: “Mwiku [u]tumbila ulondil patok anch: ‘Mu yirung ya kwisudiel antu amwing akez kulik ritiy rau. Akez kuziyil ku miku ya kudimban ni kubangaku malejan ma ayilembil.” (1 Timote 4:1) Tushich mu “yirung ya kwisudiel.” Antu alikina kwipuk difukwil dia makasu akutwish ‘kwikal kand mud anikanch akusendolau kudi mambek, ap akupwepolau kudi rinkind kuya mutambu ni mutambu. Ndiy rinkind wa malejan ma antu in kudimban akat kuyikak antu akwau ku kurumbuk mulong wa yom yitenchikinau ya makasu.”—Efes 4:13, 14.
20. Mutapu ik tukutwisha kwilam ku usu upandakena kuyip wa difukwil dia makasu?
20 Mutapu ik tukutwisha kwilam ku usu upandakena kuyip wa difukwil dia makasu? Shinshikin yawonsu yiletinay Yehova. Tukwet Dizu dia Nzamb, Bibil. (2 Timote 3:16, 17) Yehova uletin kand yakudia yivud ya muspiritu kusutil ku chisak cha “kashalapol ushishamena ni kubabal.” (Mateu 24:45) Chituyila kurutu mu uyakin, tufanyidin kukudish maku ma kusot ‘yakudia yikash yidia ya antu akudila kal’ ni kusot nakash kuya ku yikumangan kutukata kwilej uyakin piur pa Nzamb. (Heb 5:13, 14; Kuseng 26:8) Tujijamanany kwisakin yakudia yiletinay Yehova chakwel tutwisha ‘kulondul chilik cha mazu makin’ mitwatesha. (2 Timote 1:13) Mwamu tukutwish kwipuk difukwil dia makasu.
Yom ik Wileja Kal?
• “Babilon Mujim” yom ik?
• Chom ik tufanyidina kusal chakwel kwipuk difukwil dia makasu?
• Yom ik yidia ya ubaj ku mwikadil wetu wa muspiritu yitufanyidina kwipuk?
[Chipich chidia pa paj wa 14]
Ov, wij mulong wak umufanikeshinau “Babilon Mujim” ni mband wa kusochik?
[Chipich chidia pa paj wa 15]
“Babilon Mujim” ufanyidin kamu kujiy
[Chipich chidia pa paj wa 17]
Tukat kumekesh “kwitudish ni kalimish” kud antu akad kwitiy yitiyij yetu