Difundish dia 11
Djibwil kulemp difukwil dia makasu!
Satan nau ayilembil end kasotilap anch umusadila Nzamb. Asotil kumukarumun muntu mwawonsu adiokala kud Nzamb anch akutwish. Ov mutapu ik ukatau kusal mwamu? Njil yimwing yikatau kusadil didi difukwil dia makasu. (2 Korint 11:13-15) Difukwil didi dia makasu anch difundishinap uyakin udia mu Baibel. Difukwil dia makasu didi mudi nfalang ja makasu—nfalang jinej jikutwish kumekan mud chom cha kashinsh, pakwez jidi kwau jakad usey. Jikutwish kukuletil matat nakash.
Makasu ma difukwil makutwishap kumusangarish Yehova, Nzamb wa uyakin. Yesu padingay panap pansh, kwadinga chisak chimwing cha difukwil chasota kumujip. Atonga anch mutapu wau wa kwifukwil wadinga wakin. Alonda anch: “Tumukwet Tatuku umwing, ndiy Nzamb.” Ov Yesu wayitiya? Bwat! Wayileja anch: “En udiany ayen a tatukwen Satan [Djabul, NW ].” (Yohan 8:41, 44, TMK) Nlel antu avud atongining anch akat kumwifukwil Nzamb, pakwez amusadidil chakin Satan nau ayilembil end!—1 Korint 10:20.
Mud kamu mutond uyimp chiukata kubudish mabuj mayimp, difukwil dia makasu dikat kubudish antu asadila yom yiyimp. Mangand mizwil too nich matat mulong wa yom yiyimp yisadilau antu. Kudi masandj, matend, wij, wintany (kumeshan mar), winjipan, ni dilakul. Antu avud akata kusal yom yiyimp yiney akwet difukwil kanang, pakwez difukwil diau diyibachikinap kusal yom yiwamp. Kakutwishap kwikal arund nend Nzamb ching kamu anch alik kusal yom yiyimp.—Mateu 7:17, 18.
Difukwil dia makasu dikat kuyifundish antu kulembil akish. Nzamb ulikishin kulembil akish. Chinech choviken. Ov chikukukatish anch muntu kisambiningap ney ap pakemp, pakwez ukakwisambang kusu ni chipich chey? Ov muntu mud winou ukutwish kwikal murund ney wa kashinsh? Bwat, kakutwishap. Yehova usotil anch antu isamba nend, kasotilap isamba ni kapwany ap chipich, chakad mwom.—Kubudik 20:4, 5.
Difukwil dia makasu difundishin anch chiwapin kuyijip antu akwau mu chisu cha njit. Yesu walonda anch arund nend Nzamb afanyidin kukatijan umwing ni mukwau. Tukujipangap antu tukatina. (Yohan 13:35) Chiyipin ap kud etu kujip antu ayimp. Akankuny a Yesu pezau ni kumukwat, ndiy kayinkishap in kwilejend mbil ya kubulijan mulong wa kumulam ndiy.—Mateu 26:51, 52.
Difukwil dia makasu difundishin anch antu ayimp akuman mar mu ruteng. Baibel ufundishin anch chitil chitwadil ku rufu. (Rom 6:23) Yehova udi Nzamb umwing wa rukat. Ov Nzamb wa rukat ukutwish kuyimesh antu mar chikupu? Chakin anch bwat! Mu Paradis mukez kwikal difukwil dimwing kusu, difukwil ditiyidinay Yehova. (Kujingunik 15:4) Yifukwil yawonsu yengamidina pa makasu ma Satan akuyidioshaku.