Difundish dia 10

Mutapu wa kuman difukwil diakin

Anch usotil kwikal murund nend Nzamb, ufanyidin kulondul difukwil ditiyidinay Nzamb. Yesu walonda anch “in kumwifukwil akin” awapidil kumwifukwil Nzamb mu “uyakin.” (Yohan 4:23, 24) Kudi kusu mutapu umwing wa kashinsh wa kumwifukwil Nzamb. (Efes 4:4-6) Difukwil diakin ditwadiling ku mwom wa chikupu, ni difukwil dia makasu ditwadiling ku kujiy.—Mateu 7:13, 14.

Ukutwish kujingunin difukwil diakin kusutil mu kutalang antu adilondwila. Mulong Yehova udi muwamp, antu adia in kumwifukwil end akin afanyidin kwikal antu awamp. Mud kamu dilalandj dibudishina malal mawamp, difukwil diakin dikat kubudish antu awamp.—Mateu 7:15-20.

Arund nend Nzamb alimishining nakash Baibel. Ij anch Baibel udiokil kwa Nzamb. Akat kwitiyang yilondilay Baibel anch yitakela mwom wau, yipwisha milong yikwetau, ni kuyikwash kwilej piur pa Nzamb. (2 Timote 3:16) Apakishining kusadil yikatau kulejan.

Arund nend Yehova amekeshining rukat umwing ku mukwau. Yesu wamekesha rukat mulong wa antu nich kuyifundish mulong wa Nzamb, ni kuyeril antu adinga ayedila. Antu akata kulondul difukwil diakin amekeshining kand rukat kud antunau. Mud Yesu, kakuyidjatilangap atuzwendj pansh ap antu a muchid ukwau. Yesu walonda anch antu akuyijikin in kwilejend ku rukat rikumekeshau umwing ku mukwau.—Yohan 13:35.

Arund nend Nzamb alimishining dijin dia Nzamb, Yehova. Anch muntu walik kusadil dijin diey, ov muntu winou ukwikal murund ney nakash? Bwat! Chisu tukweta murund, tukat kusadilang dijin diend ni tukat kumulondilang yom yiwamp kud antu akwau. Chawiy lel antu achingejina kwikal arund nend Nzamb afanyidin kusadil dijin diend ni kumwisambin kud antu akwau. Yehova usotil anch tusala chinech.—Mateu 6:9; Rom 10:13, 14.

Mud kamu Yesu, arund nend Nzamb akat kuyifundish antu mulong wa Want wa Nzamb. Want wa Nzamb udi winyikel wa mwiur ukusala divu dikala paradis. Arund nend Nzamb akat kulejanang rusangu ruwamp riner ra Want wa Nzamb kud antu akwau.—Mateu 24:14.

Atuman’a Yehova apakishining kwikal arund nend Nzamb. Alimishining Baibel ni akatijadin pakach pau. Akat kusadil kand dijin dia Nzamb ni kudilimish ni ayifundishining antu akwau mulong wa Want wa Nzamb. Atuman’a Yehova akat kusadil difukwil diakin pa divu nlel.