Mubomb Umwing wa Mikand Yovijadina

“Mulong kwikil kubwak kwadiokala kusu ku rusot ra muntu, pakwez aruu a Nzamb alondanga [anch] mazu madiokalanga kudi Nzamb payitakelangau kudi Mwiku Utumbila.”—2 PITA 1:21.

MUTAPU IK USHALIJADINAY BIBIL NI MIKAND YIKWAU? Ap mikand yafundau pa chirung chimwing pasak yikat kutadikijan yisu yivud umwing ni ukwau. Anch mabuku amafundin kudi antu kushalijan, mwin ndond yishalijadina, ni ya yisu yishalijandina chikasikening chakwel yom yafundau yikwatijadina yawonsu. Pakwez, Bibil ulondil anch mikand yend yawonsu 66 yikwet Nfund umwing kusu.—2 Timote 3:16.

CHILAKEJ CHIMWING: Moses, kafung wa mu chitot cha mivu cha 16 K.C.C., wafunda mu mukand wa Bibil wa kusambish anch “mbut” yikez kuyikwol antu. Kupwa mukand winou wasambela kulond anch mbut yiney yikwikal mwan wa mu dijuku dia Aburaham, Isak, ni Jakob. (Disambishil 3:15; 22:17, 18; 26:24; 28:14) Pasuta mivu 500, muprofet Natan wajingunina anch mbut yikwikal mu dijuku dia mwant David. (2 Samwel 7:12) Mivu kanan kupwa kwa chinech, kambuy Paul warumburila anch mbut yadinga Yesu ni chisak cha in kwilej end atondau. (Rom 1:1-4; Galatia 3:16, 29) Kupwa, kwinsudiel kwa chitot cha mivu chakusambish C.C., mukand wa nsudiel mu Bibil wapana uprofet anch yid ya mbut yikupan uman piur pa Yesu pa mangand, kusanguk kuya mwiur, ni kuyikel pamwing nend mu mivu 1000. Mbut yiney yibombakena yikez kumushesh Djabul ni kuyikwol antu.—Kujingunik 12:17; 20:6-10.

YILONDINAU IN KURUMBURIL BIBIL: Kupwa kwa kushinshikin nawamp mikand 66 ya Bibil, Louis Gaussen wafunda anch wading ushimokin mulong wa “uumwing ujim wa mukand winou, wafundau mu chirung cha yitot dikum ni yitan ya mivu kudi in kufund avud, . . . alondula plan umwing ni wa chilik chimwing, ni adandamena kuya kurutu, mud anch ayinau ateshil chinech, pantaliken ni disudiel dijim dined, rusangu ra pasak ra dizu kukol kusutil kudi Mwan a Nzamb.”—Théopneustie ou Inspiration Plénière des Saintes Écritures.

OV, CHOM IK UTONGINA? Ov ukutwish kuchingejin mukand wafundau pasutin kal mivu 1500 ni kusutil kudi antu kanang 40 ashalijadina kwikal wovijadina mwawonsu? Ov, Bibil udi buku wa pakampwil?

[Tablo wa jinsangu udia pa paj wa 7]

“Anch atek pamwing mikand yiney yafundau, yisadil mukand umwing . . . Kwikil mukand ap umwing ukutwish kwikal mudi mukand winou, ap kufaniken nend pakach pa mikand yawonsu yafundau.”—THE PROBLEM OF THE OLD TESTAMENT, WAFUNDAU KUDI JAMES ORR