Mulong Wak Antu Alondin Anch Nzamb Udi Mwin Chisum?

OV, UMEN anch chipul cha pa chibur cha gazet winou chiyipin nakash? Mwamu mutonginau antu amwing, pakwez antu avud nlel akat kwiyipul anch Nzamb udi mwin chisum—ap itiyin anch udi mwamu. Mulong wak?

Antu amwing amena mar ma chitangil akat kwipulang anch: “Mulong wak Nzamb ulikidil yom yiney yishikena nlel? Ov, udiwilaku? Anch udi mwin chisum?”

Akwau chilik chimwing akamin pakatau kutang Bibil. Awiy akat kwisambin yom yimwing piur pa Nowa nich mabeb, ni akat kwiyipul, ‘Mulong wak Nzamb wa rukat wajiyisha antu inay awonsu? Ov, udi mwin chisum?’

Ov, yisu yimwing ukat kwiyipul niyey chipul chinech? Ap, ov, ukatap kutwish amwiney kuyakul antu iyipwila anch Nzamb udi mwin Chisum? Pa chinech, shinshikin bil chipul chishalijadina chikutwisha kukwash.

MULONG WAK TUKISINING CHISUM?

Tukisining chisum mulong tukwet manangu, ma kwijik uwamp ni uyimp. Tushalijadin ni kulemp ni anam mu chom chinech. Sakatang wetu watutanga “mu chifu chend amwinend.” (Disambishil 1:27) Ov, chirumburikin ik? Watwinkisha usu wa kumekesh ngikadil yend ni kulam yijil ya piur yitentamina, chitongijok chend cha kuwap ni kuyip. Shinshikin pa chinech: Anch twatambula chitongijok cha kuwap ni kuyip kudi Nzamb ni twasot kukis chisum, ov, chinech chimekeshinap anch Nzamb uchikisin niyend?

Chakin mulong anch etu tukisining chisum Nzamb ufanyidin kuchikis kupandakanamu, mulong mu Bibil, utwinkishin kashinsh anch: ‘Njil jam jidi piur nakash kupandakanamu njil jen, ni yitongijok yam yidi piur nakash kupandakanamu yitongijok yen.’ (Isay 55:9) Ov, anch twamurumburish Nzamb kwikal mwin chisum, ov, tukezap kulond yom yishalijadina ni yilejenau mu Bibil, ni kulond anch njil jetu jidi piur nakash kupandakanamu jendend? chikez kwikal chakin kamu cha manangu nakash kutongijokin pa yom yivud kurutu kwa kulond mwau. Pamwing ap tukutwish kwiyipul anch, ap anch Nzamb kadiap mwin chisum, pakwez mulong wak yisal yend yimwing yikutwish kumekesh kwikal mwin chisum. Mulong wa kutukwash, shinshikin bil amboku chirumburikina chakin kamu “chisum”.

Pitukata kumutazuk muntu kanang anch mwin chisum, tushinshikidin anch ukwet yitongijok yiyimp. Mwin chisum udi muntu umwing ukata kusangarang mulong wa mar ma antu akwau ap wakad kubangaku runeng rau. Chawiy lel, tatuku ukata kumupup mwanend mulong usangaredin kumumesh mar udi mwin chisum. Pakwez tatuku umupupina mwanend chakwel kumulej ap kumuking udi muntu muwamp. Mulong twijap yisu yivud yiyibachikina antu akwau kusal chom kanang, chiswapel kuburen kutesh yitongijok yau.

Tushinshikinany bil amboku mayingish maad mayibachikina antu kutond anch Nzamb udi mwin chisum—mar ma chitangil tumena nlel ni rusangu ra Bibil piur pa mutapu wayipupau antu kudi Nzamb. Ov, yom yiney yimekeshin chakin anch Nzamb udi mwin chisum?