Yakul ku yipul ya Bibil

Ov, mutapu ik ukutwishau kulikishin yitil yetu?

Bibil ulejen anch, antu awonsu adi akayitil. Etwawonsu twavadika nich chibachikin cha chitil kusutil kudi muntu wa kusambish, Adam. Chawiy lel, tusadining uyimp yisu yivud, ni kupwa twasambish kunenganan pa yom twasala. Yesu Kristu, Mwan a Nzamb, wafuta mulong wa yitil yetu pafay mulong wetwetu. Chakupesh chend cha difut chasala anch dilikishin dined dikalaku. Chidi chipan chidiokila kudi Nzamb.—Tang Rom 3:23, 24.

Antu amwing asala yitil yikash ni ading akat kwakam anch Nzamb ukutwish kuyilikishin. Pakwez, Dizu dia Nzamb dilejen anch: “Mash ma rufu ra Mwanend Yesu matutokisha ku yitil yetu yawonsu.” (1 Yohan 1:7) Yehova ukat kutulikishin ap yitil yikash anch tukwet mwikadil uwamp wa kukarumuk.—Tang Isay 1:18.

Ov, chom ik tufanyidina kusal chakwel atulikishina?

Anch tusotin anch Yehova Nzamb atulikishina, tufanyidin kwilej piur pend—chakwel twijika jinjil jend, malejan mend, ni yom yitinay. (Yohan 17:3) Yehova wayilikishina nich muchim wend wawonsu antu aswimpa mwikadil wau uyimp ni ikasikesha chakwel akarumuka.—Tang Midimu 3:19.

Chitukasikedinap kutambul dilau dia Nzamb. Mulong Yehova wij kuziy kwetu. Ndiy udi muwamp ni ukwet riy. Ov, rukat rend ridimukina risadinap anch usota kwilej yom yivud piur pa mutapu wa kumusangaresh?—Tang Kuseng 103:13, 14.