MUTU WA MULONG WA KWILEJ WA 7
MUMINY 15 Tumushimanany Mwan wa Kusambish wa Yehova
Dilikishin da Yehova Dirumburikin ik kud ey
“Dilikishin dakin did kud ey.”—KUS. 130:4, NWT.
MU WISWIMP
Mu mutu wa mulong winou tukwisambin yilakej yimwing yiwamp yilondinay Bibil piur pa mutapu ukatau kutulikishin kud Yehova, ni mwamu tukumujikitish Yehova nakash mulong wa dilikishin dend.
1. Mulong wak chikasikening kwijik mayingishin malondinangay muntu anch nakulikishin kal?
“NAKULIKISHIN KAL.” Tukat kwiyov kamu pee anch muntu watwel mwamu, pakampwil anch twij anch twalondin ap kusal chom chamutapina muntu ku muchim! Pakwez yisu yivud chikasikening kwijik mulong wak muntu walondang anch nakulikishin kal. Pamwing ap muntu ulondin mwamu mulong wa kumekesh anch uchidan kwen mu urund uwamp. Ap mazu minam makutwish kumekesh anch muntu kakatinap kand kulond piur pa yom yasadikina, pakwez urund wen ukwikalap kand mud mutapu mwawading pakur. Kulond anch nakulikishin kal kukutwish kurumburish yom yivud.
2. Mutapu ik urumburilau dilikishin da Yehova mu Bibil? (Tal kand mazu ma kwinshin.)
2 Kwikil muntu ukutwisha kumulikishin mukwau mud mutapu ukatay Yehova kulikishin. Nfund a Kuseng walonda piur pa Yehova anch: “Dilikishin dakin did kud ey, chawiy akez kukwov ey wom.”a (Kus. 130:4, NWT.) Inge, dilikishin da Yehova did ‘dilikishin dakin.’ Ndiy ukata kutumekeshin chirumburikina chakin kamu dilikishin. Mu maverse mamwing ma mifund ya Hebereu, in kufund a Bibil arumburil mutapu ulikishidiningay Yehova kusutin kusadin dizu dimwing dakad kusadinangau anch akimbin kulond piur pa dilikishin da antu.
3. Mulong wak dilikishin da Yehova dishalijadin ni detwetu? (Isay 55:6, 7)
3 Mutapu ulikishidiningay Yehova ushalijadin ni wa antu. Anch Yehova wamulikishin muntu, chinech chirumburikin anch wajimwangesh kal kamu chitil chend rawonsu. Ukutwish kudandamen kwikal mu urund wa piswimp ni ndiy. Chawiy tumujikitishin Yehova nakash mulong ukat kutulikishin kamu rawonsu.—Tang Isay 55:6, 7.
4. Mutapu ik utukwashinay Yehova kutesh kurumburik kwa dilikishin?
4 Anch dilikishin da Yehova dishalijadin ni detwetu, mutapu ik tukutwisha etu antu akad kuwanyin kutesh chirumburikina dilikishin dakin? Yehova usadidin yilakej yiwamp nakash mulong wa kutukwash kutesh mutapu ukatay kutulikishin. Mu mutu wa mulong winou, tukwisambinaku mamwing pakach pa mazu minam. Makutukwash kuman mutapu ukatay Yehova kujimwangesh yitil ni pa chisu chawiy chimwing, kuchirish urund washeshika mulong wa chitil. Kushinshikin mazu minam kukutukwash kumukat ni kumujikitish Tatukwetu muwamp, ukata kutulikishin mu mitapu yivud nakash.
YEHOVA UKAT KUDOSH YITIL
5. Yom ik yikata kushiken anch Yehova watulikishin yitil yetu?
5 Yisu yivud, Bibil ukat kufanikesh yitil ni chisend chilimina nakash. Mwant David walonda piur pa yitil yend anch: “[Yitil yam yasutil] kal piur pa mutu wam mudi chisend chilimina nakash padi am.” (Kus. 38:4, TMK.) Pakwez Yehova ukat kulikishin yitil ya antu akata kukarumuk. (Kus. 25:18; 32:5) Dizu da Hebereu dikarumwinau anch “kulikishin” dirumburikin “kuzambul” ap “kusend.” Chawiy anch Yehova watulikishin yitil yetu, ukat kudosh chisend chilimina chida pa mutu wetu. Chid mud twad tusendin chisend chilimina pa mutu wetu, ni ndiy ukat kutwambulach.
“Wanlikishidin” (Kus. 32:5)
6. Yehova ukat kudjibul yitil mu chilik ik?
6 Bibil usadidin kand dizu dikwau dimekeshina anch Yehova ukat kudjibul yitil yetu kulemp. Kuseng 103:12 ulondin anch: “Mudi mudia kwingangel kulemp ni kurand, mwawiy kand mwatwalay kuyip kwetu kulemp ni yetwetu.” Kwingangel kud kulemp nakash ni kurand. Mitambu yiney yaad yikutwishap kusankanijan. Chinech chirumburikin anch Yehova ukat kudjibul yitil yetu kulemp nakash kamu. Chinech chitwinkishin kashinsh anch Yehova ukat kulikishin yitil yetu rawonsu!
“Mudi mudia kwingangel kulemp ni kurand” (Kus. 103:12)
7. Yom ik yilondinay Bibil piur pa mutapu ukatay Yehova kulikishin yitil yetu? (Mike 7:18, 19)
7 Ap anch Yehova ukat kudjibul yitil yetu mu mutapu wa chifanakesh, ov, chinech chirumburikin anch ukat kuyilam? Bwat. Mwant Ezekias wafunda piur pa Yehova anch: ‘Ey ukat kudjibul yitil yam yawonsu kwi nyim kwey.’ (Isay 38:9, 17) Mazu minam mamekeshin anch Yehova ukat kudjibul yitil ya antu akarumukina ni kakatap kand kuyivurik. Mazu minam akutwish kand kumakarumun anch: “Ey wasala anch [yitil yam] yikal mud yadingapaku kwau.” Bibil ukasikeshidin pa chitongijok chinech pasadidinay dizu dikwau dida mu Mike 7:18, 19. (Tang.) Mu maverse minam Yehova ulondin anch ukat kudjibul yitil yetu mu difut dikurikina da karung. Pakur, chading chikasiken nakash kud muntu kunon chom chadjibwilangau mu difut dikurikina da karung.
‘Yitil yam yawonsu wayidjibwila kwinyim kwey’ (Isay 38:17)
‘Ukez kadjibwil yitil yetu mu difut dikurikina da karung’ (Mike 7:19)
8. Yom ik twileja kal kushik pinap?
8 Kusutin mazu minam, twilej kal anch, ang Yehova watulikishin, ukat kudosh chisend cha yitil yetu. Chakin kamu, mud mwalonday David “Ayuk kwau antu alikishidinau kal yisal yau yiyimp ni abwikidinau kal yitil yau; wayuk kwend muntu wakadau kuchindin chitil chend kud Yehova.” (Rom 4:7, 8) Dawiy dined dilikishin dakin!
YEHOVA UKAT KUJIMWANGESH YITIL
9. Bibil utukwashin nchik kuman mutapu ukatay Yehova kutulikishin kamu rawonsu?
9 Yehova usadidin mazu makwau mulong wa kutukwash kuman mutapu ukatay kujimwangesh yitil ya antu akarumukina kusutin yakupesh ya difut. Bibil ulondin anch Yehova ukat kowish ni kukusumwon yitil yiney. Chinech chid chibudikin cha kumushitwish muntu wasala chitil. (Kus. 51:7, TMK; Isay 4:4; Jer. 33:8) Yehova amwinend urumburil yibudikin ya yisal yiney anch: Ap anch “yitil yen yasuzap nchik, yikez kikal yitok mudi mbundu. Anch yasuzap nchik mudi mash, yikez katok too mudi ndand [mutok].” (Isay 1:18) Chikasikening nakash kukusul chitaj chisunz pa disun. Pakwez, kusutin dizu dined Yehova utwinkishin kashinsh anch yitil yetu akuyitokish chakwel kangal kand yimekana.
“[Ap anch] yitil yen yasuzap nchik, yikez kikal yitok mudi mbundu.” (Isay 1:18)
10. Dizu ik dikwau disadidinay Yehova mulong wa kumekesh mutapu ukatay kulikishin?
10 Mud mulejenau mu mutu wa mulong wasambelang ou, yitil yid mud mabaz. (Mat. 18:32-35) Chawiy chisu chawonsu tukata kumurumbukin Yehova, chid mud dibaz detu dikat kujimb nakash. Tukwet chisend cha kumufut usey uvud nakash! Pakwez anch Yehova watulikishin, chid mud ukat kulikishin dibaz twafanyina kumufut. Kakatap kand kwit chakwel tumufut mulong wa chitil chalikishinay kal. Mud mutapu ukatay muntu kwov musangar anch amulikishin dibaz dend, niyetu tukat kwov musangar anch Yehova watulikishin yitil yetu!
“Tulikishina yitil yetu” (Mat. 6:12)
11. Kukwatijan ni Bibil, kujimangesh yitil kurumburikin ik? (Mid. 3:19)
11 Yehova kakatap kwend ching kusu kulikishin mabaz ap yitil yetu, ukat kuyijimwangesh. (Tang Midimu 3:19, TMK.) Mulong wa kutesh nawamp chom chinech, tong bil mud anch muntu wajip uvud wa nfalang wada ufanyidina kumwinkish nich mufund. Pakwez, antu akutwish kwau kuman uvud winou wa nfalang ap anch aujipin kal nich mufund. Pakwez chinech chishalijadin ni kujimwangesh chom. Mulong wa kutesh nawamp dizu dined, tufanyidin kuvurik anch pakur asadinang ankre wading uswapela kujimwangesh ni mem. Antu ading akwet mutapu wa kujimwangesh yom yafundau nich shifong utalela. Chawiy “palikishinangau” dibaz, dapwangang kamu rawonsu. Antu kadingap kand ni mutapu wa kuman yom yafundau. Chid mud dibaz dikalapaku kwau. Tukat kumujikitish Yehova nakash anch twijik anch ukat kulikishin yitil yetu, mud yikalapaku kwau!—Kus. 51:11.
“Chakwel yitil yen ayijimangesh” (Mid. 3:19, TMK)
12. Mu Bibil mazu ‘kujimwangesh mud didj’ marumburikin ik?
12 Yehova usadidin dizu da mutapu umwing mulong wa kurumburil mutapu ukatay kujimwangesh yitil yetu rawonsu. Ulondin anch: “Najimangesha yitil yen mudi didj.” (Isay 44:22) Anch Yehova watulikishin, chid mud ukat kusadin didj mulong wa kubwik yitil yetu chakwel kangal yimekana kand.
“Najimangesha yitil yen mudi didj.” (Isay 44:22)
13. Mutapu ik tukata kwiyov anch Yehova watulikishin yitil yetu?
13 Mazu minam matufundishin ik? Anch Yehova watulikishin yitil yetu, tufanyidinap kudandamen kwifish nich piur pa yitil yiney. Kusutin mash ma Yesu Kristu, mabaz metu amalikishidin kal kamu rawonsu. Anch Yehova walikishin chitil, chid mud twachisalap kwetu. Winou wawiy mutapu ukatay Yehova kutulikishin anch twakarumuk kamu chakin.
YEHOVA UKAT KWITIY KAND ANCH TWIKALA ARUNEND
Dilikishin da Tatukwetu wa mwiur dikat kutukwash kwikal ni urund uwamp ni ndiy (Tal paragraf 14)
14. Mulong wak tukutwish kwikal ni kashinsh anch Yehova ukutulikishin kamu rawonsu? (Tal kand chipich.)
14 Anch Yehova watulikishin, tukutwish kwikal ni kashinsh anch ud kand murunetu. Chinech chikutwish kutukwash kulik kudandamen kwifish nich. Tufanyidinap kwov wom anch Yehova udandamedin kutujimen ni ukimbin mutapu wa kutupup. Kakutwishap kusal chom mud chinech. Mulong wak tufanyidin kumuchingejin Yehova anch walond anch watulikishin kal? Yehova wamuleja muprofet Jeremiy anch: “Am nikez kayilikishin yitil yau, kinikez kavurikap kand kuyip kwau.” (Jer. 31:34) Paul wajimbula mazu minam palonday anch: “Kinikez kuyivurikinap kand kuyip kwau.” (Heb. 8:12) Chom ik chirumburikina chakin kamu mazu minam?
“Kinikez kavurikap kand [yitil yau].” (Jer. 31:34)
15. Mutapu ik ukatay Yehova kutulikishin yitil yetu?
15 Mu Bibil dizu “kuvurik” kakatap kudisadin chisu chawonsu mulong wa kulond piur pa muntu udandamedina kutongijokin piur pa chom chasadika pakur. Pakwez, akat kudisadin mulong wa kulond piur pa muntu usadina chom kanang. Chilakej: Mpongarik wapampau pa mutond pamwing ni Yesu wamwela Yesu anch: “Yesu, nvurika piukeza kwez mudi Mwant!.” (Luka 23:42, 43) Kamwitap kwend Yesu kutong yom kanang piur pend pa chisu chinicha. Yesu wamuleja ikundj winou anch ukumuvumbul. Chawiy, komb anch Yehova walond anch kavurikinap kand yitil yetu, chinech chirumburikin anch kakutusalap kand chom chiyimp. Kakutupupap chisu chimwing mu machuku ma kurutu mulong wa yitil yatulikishinay kal.
16. Mutapu ik urumburilay Bibil want ipau udokiling ku dilikishin dakin?
16 Anch Yehova watulikishin, tukat kwiyov kamu pee. Bibil usadidin dizu dikwau mulong wa kutukwash kutesh chom chinech. Mulong wa kuburen kuwanyin kwetu, tud mud “asuk a chitil.” Pakwez tumujikishin Yehova mulong wa dilikishin dend, mulong ku ukwash wend tud mud asuk ‘akwolau ku chitil.’ (Rom 6:17, 18; Kuj. 1:5) Mwaning, Anch twijik anch Yehova watulikishidin kal, tukutwish kusangar nakash mud mutapu mukatay kusangar musuk wakwolau kal.
“Kudosh kwakukodinanyau ku chitil” (Rom 6:18)
17. Dilikishin dikat kutwok mutapu ik? (Isay 53:5)
17 Tang Isay 53:5. Dizu da nsuden tukimbina kwisambin ditufanakeshin ni antu akweta mayej makata kujipan. Kusutin chakupesh cha difut chapanay Yehova kusutin Mwanend, yid mud atwoka mu mutapu wa chifanakesh. (1 Pita 2:24) Anch twasal chitil, twayipish kal urund wetu ni Yehova. Pakwez kusutin difut, ukutwish kutulikishin ni tukutwish kand kwikal mu urund wa piswimp ni ndiy. Mud mutapu ukatay kusangar muntu wada ni mayej makash anch amwok, niyetu tukat kusangar anch atwok mu spiritu ni kwikal kand ni dilau da Yehova.
“Yitat yend [yatwoka]” (Isay 53:5)
DILIKISHIN DA YEHOVA DIRUMBURIKIN IK KUD ETU
18. Yom ik twileja kal kusutin kushinshikin mazu kushalijan tutanina mu Bibil piur pa dilikishin da Yehova? (Tal kand mushet “Mutapu Ukatay Yehova Kutulikishin.”)
18 Yom ik twileja kal kusutin kushinshikin mazu tutanina mu Bibil piur pa dilikishin da Yehova? Anch Yehova watulikishin yitil yetu, chid mud twayisalap kwetu ni tukutwish kwikal ni kashinsh anch kakutwishap kand kutupup mu machuku ma kurutu. Chinech chitukwashin kwikal ni urund uwamp ni Tatukwetu wa mwiur. Pa chisu chawiy chimwing, tukat kuvurik anch dilikishin dakin chid chipan. Yehova ndiy ukata kuchipan ku rukat ni ku ranaken rend rijim rikatay kuyimekeshin akayitil. Chid kwau chipan chamwamu.—Rom 3:24.
19. (a) Tufanyidin kumujikitish Yehova piur pa yom ik? (Rom 4:8) (b) Yom ik tukwisambina mu mutu wa mulong wambakedinap ou?
19 Tang Rom 4:8. Tumujikitishin nakash Yehova mulong wa dilikishin dend! (Kus. 130:4) Pakwez, anch tukatin anch Yehova atulikishin, kud chom cha usey tufanyidina kusal. Yesu walonda anch: “Anch en walikany kuyilikishin akwen kurumbuk kwau, Tatukwen niyend kakukulikishinanyap kurumbuk kwen.” (Mat. 6:14, 15) Chawiy komb, tufanyidin kumwimburij Yehova kusutin kuyilikishin antu akwau. Mutapu ik tukutwisha kusal mwamu? Mutu wa mulong wambakedinap ou ukutulej yom tufanyidina kusal.
MUMINY 46 Wajikit Yehova
a Mu Hebereu wa pakur, asadinang dizu “dilikishin,” mulong wa kulond kusu piur pa dilikishin dakin, ap anch kwading mitapu yikwau ya dilikishin. Mabibil mavud mabudishinap chitongijok chinech chida mu Kuseng 130:4.