Tumujikitishin Yehova Nakash Mulong Ukat Kulikishin Yitil Yetu

1-2. Mashakamin ma antu mafanijadin mutapu ik ni ma nsand wisambinangau mu paragraf wa kusambish?

TONGIJOKIN piur pa nsand wavadikina mu dijuku dikweta mapit. Dichuku dimwing chinship chikash chashikena. Anvaj end afa ku akisidan mukash. Rusang riner ramuziyisha nakash. Pakwez, kud kand rusang rikwau riyimp rimuchingedina. Wajingunin kal anch anvaj end ashesha nfalang jivud jadingau nich ni kumushil mabaz mavud. Tongin chad uswan ukwikalay nich, pa ndond pa kuswan mapit, ndiy waswan kal chad mabaz, ni antu akat kumwadin chakwel afut mabaz mashau anvaj end. Pakwez dibaz dipandaken kujimb nakash ni kakutwishap kudifut.

² Chilik chimwing kand, niyetu tud mud nsand winou. Anvaj etu a kusambish, Adam ni Ev, ading antu awanyidina ni ading ashich mu paradis muwamp nakash. (Dis. 1:27; 2:7-9) Ading ni mutapu wa kusanger mwom chikupu. Pakwez kwashikena chom chiyimp nakash, Adam ni Ev asala chitil. Ashadisha Paradis ni ruchingej rau ra kushakam chikupu. Uswan ik wayishilau anau? Bibil ulondin anch: “Chitil chandama mu mangand kusutin muntu umwing [Adam] ni rufu kusutin chitil, ni mwamu rufu rapalangana kud antu awonsu mulong awonsu asala chitil.” (Rom 5:12) Uswan watushilay Adam chid chitil ni rufu. Chitil twaswana did mud dibaz dijim nakash, dakaday muntu ap umwing kwikal ni mutapu wa kufut.​—Kus. 49:8, 9.

3. Mutapu ik ufanijadina yitil yetu ni “mabaz”?

³ Bibil ufanikeshin chitil nich dibaz. (Mat. 18:32-35) Anch twasal chitil, chid mud twiyandjik kal mu dibaz kud Yehova. Tufanyidin kufut dibaz dined. Anch Yehova kafutap dibaz dined, dafanyina kupwa ching anch twafa.​—Rom 6:7, 23.

4. (a) Pakad ukwash, yom ik yafanyina kuyishiken akayitil awonsu? (Kuseng 49:8-10) (b) Mu Bibil dizu “chitil” dimekeshin ik? (Tal mushet “Chitil.”)

⁴ Ov, tukutwish kand kutambul yom yashadishay Adam ni Ev? Tukutwishap kusal mwamu ku usu wetu ayinetu. (Tang Kuseng 49:8-10.) Pakad ukwash, twafanyinap kwikal ni ruchingej ra kwikal ni mwom mu machuku ma kurutu ap ruchingej ra divumbuk. Rufu retu rela kwau kwikal mud ra annam​—Mul. 3:19; 2 Pita 2:12.

5. Mutapu ik watukwashay Tatukwetu wa rukat kufut dibaz detu da chitil twaswana?

⁵ Tongijokin piur pa nsand twisambinang kwinsambishin. Mutapu ik wafanyinay kwiyov anch muntu ukweta mapit wamufutina mabaz mend mawonsu? Chakin kamu, nsand winou wafanyina kwikal mwin kujikitish nakash ni kwitiy chipan chamwinkishau kwa kwikatin. Chilik chimwing, Tatukwetu wa rukat, Yehova, watwinkisha chipan mulong wa kufut dibaz da chitil chatuswanishay Adam. Yesu walonda anch: “Nzamb wakata ngand nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kwikal nich mwom wa chikupu.” (Yoh. 3:16) Chikwau kand, chipan chinech chitukwashin kand kwikal ni urund wa piswimp ni Yehova.

6. Yom ik tukwisambina mu mutu wa mulong winou? Ni mulong wak?

⁶ Mutapu ik tukutwisha kutaninamu mu chipan chinech chiwamp? Ni yom ik tufanyidina kusal chakwel atulikishin yitil, ap “mabaz” metu? Yakul ku yipul yiney tuyitanin chisu chikatay Bibil kusadin mazu mud kuchakwish, difut, kukwol, ni akat kuyiman anch atentamin. Mu mutu wa mulong winou, tukwisambin chirumburikina mazu minam mawonsu. Anch twatongijokin pa yom yasalay Yehova mulong wa kutulikishin, tukwikal kamu in kumujikitish nakash.

RUTONG: YEHOVA UKATIN ANCH TWIKAL ARUNEND

7. (a) Yom ik kand yikwau yashadishay Adam ni Ev? (b) Mulong tud an a Adam ni Ev, yom ik tuswirikedina? (Rom 5:10, 11)

⁷ Kudoshaku kushadish mutapu wa kushakam chikupu, Adam ni Ev ashadisha kand chom cha usey nakash: urund ni Tatukwau, Yehova. Kwinsambishin, Adam ni Ev ading mu dijuku da Nzamb. (Luka 3:38) Pakwez chisu chamubwambwilau Yehova, wayopata mu dijuku dend kurutu asambish kuval an. (Dis. 3:23, 24; 4:1) Mulong tud anau, chawiy tufanyidin kuchakwish ni Yehova. (Tang Rom 5:10, 11.) Mu kulond kukwau, tukwet kuswir kwa kukudish urund wa piswimp ni ndiy. Kukwatijan ni referans umwing, dizu da Grek dikarumwinau mu verse winou anch “kuchakwish” dikutwish kurumburik “kuta urund ni mukankuny.” Cha musangar nakash, Yehova ndiy wasala rizau ra kusambish mulong wa kuchakwish ni yetwetu. Mutapu ik?

DITENCHIK: KUCHAKWISH

8. Chom ik chirumburikina (a) kuchakwish? (b) kukwolik?

⁸ Kuchakwish did ditenchik datekay Yehova mulong wa kuchirish urund wa piswimp ni akayitil. Chinech chirumburikin kuswimp chom kanang ni chom chikwau chikweta usey umwing. Mwamu, chom chashadishau akutwish kuchiswinkesh ap kuchichirish. Mifund ya Grek ya win Kristu niyau yisambidin yom yasalay Yehova chakwel tutwish kwikal ni urund wa piswimp ni ndiy.​—Rom 3:25.

9. Yom ik yasalay Yehova mulong wa kulikishin yitil ya in Isarel?

⁹ Mulong wa kuyikwash In Isarel kusanger urund wa piswimp ni ndiy, Yehova watenchika yom kanang chakwel atwish kulikishin yitil yau ni kwikal nau mu urund wa piswimp. In Isarel asalang musambu wa pakampwil dichuku dimwing pa muvu. Dichuku dinida aditazukang anch Dichuku da Kuchakwish. Pa dichuku dinida, mwin kupesh mujim wapanang yakupesh ya annam mulong wa antu. Chakin kamu, yakupesh ya annam yafanyinap kamu kujimwangesh yitil ya in Isarel rawonsu, mulong annam kakwetap usey umwing nau antu. Pakwez chisu chawonsu chakarumukangau in in Isarel ni kupan yakupesh yading yitinay Yehova, walikishinang yitil yau. (Heb. 10:1-4) Chikwau kand, ditenchik dined ni yakupesh yapanangau pa Dichuku da Kuchakwish ni yisu yikwau yayivurishang in Isarel anch ading akayitil ni anch ading akwet kuswir kwa chom chikwau chijim nakash mulong wa kujimwangesh rawonsu yitil yau.

10. Yom ik yasalay Yehova mulong wa kulikishin yitil ya antu?

¹⁰ Yom ik yasalay Yehova chakwel atwish kulikishin yitil ya antu? Warijeka yom chakwel Mwanend mukatish ‘apana kapamp kamwing yakupesh ya kudosh yitil ya antu avud.’ (Heb. 9:28) Yesu wapana “mwom wend mud difut mulong wa kuyikol antu avud.” (Mat. 20:28) Difut chom ik?

USEY: DIFUT

11. (a) Kukwatijan ni Bibil, difut chom ik? (b) Nany wading uwanyidina kupan difut?

¹¹ Kukwatijan ni Bibil, difut ud usey ukatau kupan mulong wa kuchakwish nich.a Ku mes ma Yehova, dikat kutukwash kuchirish chom chashadishau. Mutapu ik? Tuvurikany anch Adam ni Ev ashadisha mwom uwanyidina ni mutapu wa kushakam chikupu. Chawiy difut dafanyina kwikal nich usey wisikena nich chom chashadishau. (1 Tim. 2:6, NWT.) Difut dined afanyina kudipan kud muntu ikundj wapamina kal (1) wading uwanyidina; (2) wading ni mutapu wa kushakam chikupu pa divu; ni (3) wading ukatina kupan mwom winou mulong wetwetu. Mwom wa muntu winou wafanyina chad kufut yom yashadishau.

12. Mulong wak Yesu wading uwanyishin yitinau mulong wa kupan difut?

¹² Tushinshikinany mayingishin masatu mamekeshina anch Yesu wading uwanyidin kupan difut. (1) Wading muntu uwanyidina​—“kasalap chitil” ap chimwing. (1 Pita 2:22) (2) Mulong wa chom chinech, wading ni mutapu wa kushakam chikupu pa divu. (3) Wading ukatin kufa ni kupan mwom wend mulong wetwetu. (Heb. 10:9, 10) Mulong wading muntu uwanyidina, Yesu wading ukwet usey umwing ni muntu wa kusambish, Adam, kurutu asala chitil. (1 Kor. 15:45) Mulong wafa mulong wetwetu, Yesu watwisha kufut difut dikweta usey umwing ni mwom washadishay Adam. (Rom 5:19) Mwamu Yesu wikala “Adam wa nsuden.” Tukwetap kand kuswir kwa muntu mukwau mulong wa kwez kufut yom yashadishay Adam. Yesu “walambula yakupesh kapamp kamwing.”​—Heb. 7:27; 10:12.

13. Kushalijan ik kuda pakach pa kuchakwish ni difut?

¹³ Chad, kushalijan ik kuda pakach pa kuchakwish ni difut? Kuchakwish yid yom yikatay Yehova kusal mulong wa kuchirish urund wa piswimp ni antu. Difut ud usey wapanay Yehova chakwel atwish kuchakwish ni antu akayitil. Usey winou umekeshin mash ma usey nakash ma Yesu michilau mulong wetwetu.​—Efes 1:7; Heb. 9:14.

YIBUDIKIN: KUKWOLIK NI KUMEKAN ANCH TUTENTAMIN

14. Yom ik tukimbina kushinshikin katat, ni mulong wak?

¹⁴ Mutapu ik tutanidinamu mu yom yatusadinay Yehova? Mulong wa kwakul ku chipul chinech, tukwisambin kurumburik kwa mazu maad masadidinay Bibil mulong wa kutukwash kutesh mutapu tutanidinamu mu dilikishin da Yehova.

15-16. (a) Kukwatijan ni Bibil, kukwolik chom ik? (b) Mutapu ik wiyovila pa kwijik anch akukwodin kal ku chitil ni rufu?

¹⁵ Bibil ulondin anch twakwolikin kal mulong Yehova wapana difut. Kambuy Pita walonda anch: “En wijany anch akukwolanya ku yaku yamwamu yiwaswananya ya anshankuren. Kakukwolanyap nich yom yikata kushadish usey mudi utad wa argent, ap wa or, pakwez en akukwolanya nich mash ma Kristu makweta usey ukash. Ndiy wading mudi mwan a mukoku wa kupesh wakad kapad ap chitaj.”​—1 Pita 1:18, 19.

¹⁶ Kusutin cha kupesh cha difut, tukutwish kukwolik ku chitil ni rufu. (Rom 5:21) Chakin kamu, tumujikitishin nakash Yehova ni Yesu mulong atukwola kusutin mash ma usey ma Yesu.​—1 Kor. 15:22.

17-18. (a) Kumekan anch tud atentamina kurumburikin ik? (b) Mutapu ik tutanidinamu mulong Yehova utumen anch tutentamin?

¹⁷ Bibil ulondin anch atushalapol a Yehova ayimen kud ndiy anch atentamin. Chinech chirumburikin anch tukwetap kand kuswir kwa kufut mulong wa yitil tukata kusal. Ap anch Yehova wasala mwamu, kakutwishap kujip mbil jend piur pa kutentam. Ukat kutuman anch tutentamin ku ranaken rend rijim. Chikwau kand, Yehova kakatap kusanger yitil. Pakwez ukatin kulikishin yitil yetu mulong tumekeshin ritiy mu yom yasalay ndiy ni Yesu wapana difut.​—Rom 3:24; Gal. 2:16.

¹⁸ Mutapu ik tukata kutaninamu anch Yehova watuman anch tutentamin? Antu amwing amenau kal anch atentamin ayitondin kal mulong wa kuyikel pamwing ni Yesu mwiur ni ikadin kal an a Nzamb. (Tit. 3:7; 1 Yoh. 3:1) Yitil yau ayilikishidin kal. Chid mud kand kal asalangap yitil, ni chawiy chisadina anch ikal awanyidina kwandam mu Want. (Rom 8:1, 2, 30) Antu akwau amenau anch atentamin akushakam chikupu pa divu. Yehova walikishidin kal yitil yau ni ikadin kal arunend. (Jak. 2:21-23) Antu ada mu chisak chijim chikupanda ku Armagedon, akwikal ni mutapu wa kulik kufa. (Yoh. 11:26) ‘Antu atentamina’ ni ‘antu akad kutentam’ afila kal akuvumbuk. (Mid. 24:15; Yoh. 5:28, 29) Kupwa, atushalapol awonsu a Yehova aziyidina ada pa divu akez “kwikal ni want ipau wa uyaj wa an a Nzamb.” (Rom 8:21) Tuchingejin kamu chisu tukutwisha kwikal nich urund mud winou ni Tatukwetu, Yehova!

19. Mutapu ik waswimpa mwom wetu kwikal uwamp? (Tal kand mushet “Dilikishin da Yehova.”)

¹⁹ Chakin kamu, tud mud nsand twisambinang kwinsambishin washadisha yom yawonsu ni kuswan dibaz dipandakena kujimb dakaday kutwish kufut. Pakwez tumujikitishin Yehova mulong watukwasha. Mulong wetu waswimpa mulong Yehova watenchika yom chakwel alikishin yitil yetu ni mulong Yesu wapana difut. Ritiy retu muday Yesu Kristu ritukwashin kukwolik ku chitil ni rufu. Anch Yehova walikishin yitil yetu chid mud twayisalap. Cha usey nakash, tukutwish chad kwikal ni urund uwamp ni Tatukwetu wa rukat uda mwiur, Yehova.

20. Yom ik tukwisambina mu mutu wa mulong wambakedinap?

²⁰ Anch twatongijokin pa yom yatusadinay Yehova ni Yesu, tukat kumujikitish kamu nich muchim wetu wawonsu. (2 Kor. 5:15) Pakad ukwash wau, twafanyinap kwikal ni ruchingej ap rumwing! Chad chom ik chirumburikina chakin kamu dilikishin da Yehova kud muntu ni muntu wa pakach petu? Yawiy yom tukwisambina mu mutu wa mulong wambakedinap ou.