Ikal ni Kashinsh Anch Yehova Wakulikishidin Kal

1-2. Mutapu ik tukata kwiyov anch twajingunin anch Yehova watulikishinang kal? (Tal kand chibur.)

MWANT David wova ushon nakash mulong wa yitil yasalay. (Kus. 40:12; 51:3) Wasala yom yiyimp nakash mu mwom wend. Pakwez wamekesha anch ukarumukin chakin kamu ni Yehova wamulikishina. (2 Sam. 12:13) Mud chibudikin, David wova musangar pajinguninay anch Yehova wamulikishidin.​—Kus. 32:1.

² Mud David, tukutwish niyetu kwikal ni musangar anch twajingunin anch Yehova watumekeshidin ranaken ni kutulikishin. Chitukasikeshin kamu nakash pa kwijik anch Yehova ukatin kutulikishin—chikalap nchik kujimb kwa yitil yetu—anch twakarumuk chakin kamu, twitiyin yitil yetu, ni twasal usu wa kulik kuyichirikin! (Jnsw. 28:13; Mid. 26:20; 1 Yoh. 1:9) Chitusangareshin kand kwijik anch ukat kulikishin rawonsu mud kwel anch kwikil kwau chitil chasadikang!​—Ezek. 33:16.

3-4. Mutapu ik wiyovay nambaz umwing kupwa kwa kutambul dibatish, ni yom ik tukumana mu mutu wa mulong winou?

³ Pakwez yisu yimwing, chikutwish kutukasiken kwitiy anch Yehova watulikishinang kal kamu. Yawiy yom yamushikena Jennifer. Anvaj end amufundisha piur pa Yehova. Pakwez papamayaku wasambisha kusal yom yiyimp ni wayijindjikinang anvaj end. Mu kusut kwa mivu, wamuchirikina Yehova ni watambula dibatish. Ulondin anch: “Kwinsambishin mwom wam wading wizwil ni milong ya masandj, kuleu maar, ujim nakash, ni kukat yom ya kumujimbu. Mu manang nading nij anch Bibil ulondin anch Yehova ukutwish kutulikishin yitil yetu kusutin chakupesh cha Yesu anch twakarumuk ni twamwilembil chakwel atulikishin. Pakwez chading chinkasikedin kwikal ni kashinsh anch wanlikishina.”

⁴ Ov, yisu yimwing chikukasikedining kwitiy anch Yehova wakulikishidin kal yitil yey ya pakur? Yehova ukatin anch twova musangar udokila ku ranaken rend mud mwiyovay David. Mu mutu wa mulong winou, tukuman mulong wak tufanyidin kwikal ni kashinsh anch Yehova walikishidin kal yitil yetu ni yom yikutwisha kutukwash kwikal ni kashinsh kinak.

MULONG WAK CHID CHA USEY KWIKAL NI KASHINSH ANCH YEHOVA WATULIKISHIDIN KAL?

5. Satan ukatin anch tutong mutapu ik? Let chilakej.

⁵ Anch twikal ni kashinsh anch Yehova watulikishidin kal, tukutwish kulik kuwil mu mupit wa Satan. Vurik anch Satan ukusal usu wend wawonsu mulong wa kutukangesh kumusadin Yehova. Mulong wa kuwanyish rutong rend riner, Satan ukutwish kutubachik kutong anch yitil yetu kakutwishap kuyilikishin. Shinshikin chilakej chimwing cha ikundj wadoshau mu chikumangen cha Korint mulong wa chisal chend cha masandj. (1 Ko. 5:1, 5, 13) Pakarumukay, Satan wading ukatin anch antu a mu chikumangen alik kumulikishin ni kumwak kand mu chikumangen. Chikwau kand, Satan wading ukatin anch muntu wakarumuka iyova anch kakutwishap kumulikishin—chakwel anch “ushon wamupandaken” wafanyina kulikap kumusadin Yehova. Rutong ra Satan ni mupit wend yiswimpinap. Pakwez “tujimbarelap yitongijok yend.”​—2 Ko. 2:5-11.

6. Yom ik tukutwisha kusal mulong wa kulik kwifish nich?

⁶ Anch twikal ni kashinsh anch Yehova watulikishidin kal, tukutwishap kand kwifish nich. Anch twasal chitil, tukat kwifish nich. (Kus. 51:19) Chiyipinap kwau. Mulong anch twifish nich kom kakutwish kutubachik kuswimp ni kusal yom yiwamp. (2 Ko. 7:10, 11) Pakwez anch twakarumukin kal chad twadandamen kwifish nich, tukutwish kuziy ni kulikap kumusadin Yehova. Anch twikal ni kashinsh anch Yehova watulikishidin kal, tukudandamenap kwifish nich. Mwamu tukumusadin Yehova mud muchifanyidina—ni musangar nakash nich kom kishitwila. (Kol. 1:10, 11; 2 Tm. 1:3) Mutapu ik tukutwisha kwikal ni kashinsh anch Yehova watulikishidin kal?

YOM IK YIKUTWISHA KUTUKWASH KWIKAL NI KASHINSH ANCH YEHOVA WATULIKISHIDIN KAL?

7-8. Yom ik yalonday Yehova kud Moses piur pa amwinend, ni yom yiney yitwinkin kashinsh ik? (Kubudik 34:6, 7)

⁷ Tongijokin nawamp pa yom yalonday Yehova piur pa amwinend. Chilalej, tal yom yalonday Yehova kud Moses ku Mukandu wa Sinay.a (Tang Kubudik 34:6, 7.) Ap anch Yehova ukwet mikadil yivud yiwamp, watonda kumulej Moses anch ud “Nzamb wa ranaken ni mwin riy.” Ov, Nzamb wa mutapu winou ukutwish kulik kumulikishin kashalapol wend ukarumukina kamu chakin? Chakapuk chaya mwa! Kusal mwamu kukwikal kuburen ranaken ni kwikal ni muchim ukash—Yehova kadap mwamu bwat.

⁸ Tukwet kashinsh anch Yehova kadimbanap piur pend mulong ud Nzamb wa uyakin. (Kus. 31:6) Chawiy tukutwish kuchingejin yom yilondinay. Ang chikukasikedin kulik kwifish nich mulong wa yitil wasala pakur, iyipula anch: ‘Ov, nitiyijin kamu anch Yehova ud Nzamb wa ranaken ni mwin riy, ni ukutwish kumulikishin muntu mwawonsu ukarumukina? Chad ov, nifanyidinap kwikal ni kashinsh anch wanlikishidin kal niyam?’

9. Kuseng 32:5 utufundishin ik piur pa mutapu ukatay Yehova kulikishin yitil yetu?

⁹ Tongijokin pa yom yayipelau in kufund a Bibil kulond kud Yehova piur pa mutapu ukatay kulikishin. Chilakej, tal yom yalonday David piur pa mutapu ukatay Yehova kulikishin. (Tang Kuseng 32:5.) Walonda anch: “Ey wanlikishidin yitil yam yawonsu.” Dizu da Hebereu dikarumwinau anch “dilikishin” dikutwish kurumburik “kuzambul,” “kudosh,” ap “kusend.” Pamulikishinay David, chid mud Yehova wasenda dilim da yitil yend ni kudidjubwil kamu kulemp. Chawiy David wiyova pee padoshau dilim dading disendinay da kwifish nich. (Kus. 32:2-4) Tukutwish niyetu kwiyov mutapu umwing kand. Anch twakarumuk chakin kamu, tufanyidinap kudandamen kusend dilim da kwifish nich mulong wa yitil yadoshinay kal Yehova ni kuyidjibwil kulemp niyetu.

10-11. Mazu “ukuyilikishin swa” matufundishin ik piur pa Yehova? (Kuseng 86:5)

¹⁰ Tang Kuseng 86:5. Mu verse winou David umulejen Yehova anch “ukat kulikishin.” Buku umwing ulondin piur pa mazu minam anch: “Ud ‘mwin kulikishin’—wawiy mutapu ‘udingay.’” Mulong wak Yehova uding mwin kulikishin? Chikunku cha verse chilondwilaku chirumburil anch: “Ey wizwil nich rukat kud antu awonsu akata kukwifukwil.” Mud mutwamanang mu mutu wa mulong wasambelangaku ou, rukat rishinshamena ra Yehova rikat kumubachik kwikal ni urund ukash ni ushiching chikupu nau atushalapol end. Kusutin rukat rend rishinshamena, “ukuyilikishin swa” in yitil awonsu akarumukina. (Isay 55:7) Ang chikukasikedin kwitiy anch Yehova wakulikishidin kal, iyipula anch: ‘Ov, nitiyijin anch Yehova ud mwin kulikishin—anch ukat kuyilikishin swa antu awonsu akata kukarumuk ni kukimb kand ranaken rend? Chad, ov, nifanyidinap kwikal ni kashinsh anch wanlikishina niyam pinamwita kwinmekeshin ranaken?’

¹¹ Kwijik anch Yehova wij nawamp kuburen kuwanyin kwetu kukutwish kutukasikesh. (Kus. 139:1, 2) Chitongijok chinech choviken nawamp mu Kuseng mukwau wafunday David, ukutwisha kand niyend kutukwash kwikal ni kashinsh anch Yehova watulikishidin kal.

KANGAL WAVURAMEN YOM YIVURIKINAY YEHOVA

12-13. Kukwatijan ni Kuseng 103:14, yom ik yivurikinay Yehova piur petu ni chinech chikat kumubachik kusal ik?

¹² Tang Kuseng 103:14. David ulondin anch Yehova “ukat kuvurik anch, etu tudi kwetu rufunfut.” Mu mazu minam, David urumburil diyingishin dimwing dikata kumubachik Yehova kuyilikishin atushalapol end akata kukarumuk: Mulong wij nawamp anch tud kwetu akayitil. Mulong wa kutesh nawamp chitongijok chinech, el tushinshikinany mazu minam ma David.

¹³ David walonda anch Yehova “wij [nawamp] mutapu watutangay.” Wamuumba Adam “nich rufunfut ra divu” ni wading wij anch antu inay awanyidina ading akwet mimbu—chilakej, ading akwet kuswir kwa kuda, kulal, ni kupim. (Dis. 2:7) Pakwez pasalay Adam ni Eve chitil, antu ikala kand rufunfut mu mutapu ukwau. Mulong tud anau, twaswana chitil chikata kutubachik kusal yom yiyimp. Yehova wij nawamp uyakin winou. Pakwez palondinay David anch ukat kuvurik anch tud rufunfut, chirumburikin anch, mulong Yehova wij anch tud akayitil, chinech chikat kumubachik kutwanaken. Mazu malonday David tukutwish kumarumburil mu wiswimp anch: Yehova wij anch yisu yimwing tukurumbok; pakwez anch chom chinech chatushiken chad twakarumuk chakin kamu, ukutumekeshin ranaken ni kutulikishin​—Kus. 78:38, 39.

14. (a) Yom ik yikwau yilondinay David piur pa mutapu ukatay Yehova kulikishin? (Kuseng 103:12) (b) Yom ik tukutwisha kwilejin ku mutapu wamulikishinau David kud Yehova? (Tal kand mushet “Mutapu Ukatay Kutulikishin Yehova ni Kuvuramen.”)

¹⁴ Kuseng 103 utufundishin yom ik yikwau piur pa mutapu ukatay Yehova kulikishin? (Tang Kuseng 103:12.) David ulondin anch, ang Yehova watulikishin, ukat kutwal yitil yetu kulemp “mudi mudia kwingangel kulemp ni kurand.” Mutambu ukata kubudikin muten ud palemp nakash ni mutambu uukata kwandamin, chawiy mitambu yiney yaad yikutwishap kutanijan dichuku ap dimwing. Yiney yitufundishin ik piur pa yitil yikatay kulikishin Yehova? Piur pa verse winou buku umwing ulondin anch Nzamb ukat kutwal yitil kulemp niyetu, mud kupwa kwa didjimb da chom kanang. Chawiy tukutwish kwikal ni kashinsh anch kakuyivurikap kand amwinend ap kutuvurishay kand ayinetu. Chid chakin anch, didjimb dikutwish kutuvurish yom yasadika pakur. Pakwez anch Yehova walikishin kukatap kushal ap ka didjimb kakemp kusu kakutwisha kusal anch avurik kand chitil chetu ni kutupup mulong wa chitil chinech.​—Ezek. 18:21, 22; Mid. 3:19.

15. Yom ik tufanyidina kusal anch tudandamedin kwifish nich mulong wa yitila yetu ya pakur?

¹⁵ Mazu ma David mada mu Kuseng 103 matukwashin nchik kwikal ni kashinsh anch Yehova ukat kutulikishin? Anch tudandamedin kwifish nich mulong wa yitil ya pakur, tufanyidin kwiyipul anch: ‘Ov, nivuramedin yom yivurikinay Yehova—kwawiy kulond anch, ov, nivuramedin anch Yehova uvurikin anch nid mukayitil kudosh ku kuvadik kwam ni anch ukumulikishin mukayitil ukarumukina mud am? Ni ov, nikat kuvurik yom yitondinay Yehova kuvuramen—kwawiy kulond anch, ov, nikat kuvurik yitil yanlikishinay kal ni yakaday kwinchindin?’ Yehova kakatap kushinshikin pa yitil yetu ya pakur. Niyetu tufanyidin kusal mwamu. (Kus. 130:3) Anch twikal ni kashinsh anch Yehova watulikishidin kal, chikutuswapel kwilikishin ayinetu ni kudandamen kumusadin Yehova ni musangar.

16. Let chilakej chimekeshina ubaj wa kudandamen kwifish nich mulong wa yitil ya pakur. (Tal kand chipich.)

¹⁶ Shinshikin chilakej. Kudandamen kwifish nich mulong wa yitil yetu ya pakur kud mud kwendish motak oku udandamedin kutal pa dikalash dimekeshina kwinyim. Chakin, chid cha usey kutal pa dikalash chisu ni chisu mulong wa kwiyep ubaj ukutwisha kwez kwinyim. Pakwez anch tukimbin kulik kusal aksidang tufanyidin kutal kutuyila. Mu mutapu umwing kand, chikutwish kwikal cha usey kutonginaku yisu yimwing pa kurumbok kwetu kwa pakur mulong wa kudoshinaku dilejan ni kukasikesh mupak wetu wa kulik kuchirikin kurumbok kwinoku. Pakwez anch twadandamen kushinshikin pa kurumbok kwetu kwa pakur, tukutwish kushadish musangar wetu ni kulik kusal yom yivud mu mudimu wa Nzamb. Chid cha usey kutal kurutu. Tud mwi njil yitutwadina ku mwom wa chikupu mwi ngand yisu yashilayamu Nzamb. Mwinimwa yom yiyimp ya pakur ‘tukez kayivuramen.’​—Isay 65:17; Jnsw. 4:25.

DANDAMEN KUDUTISH MUCHIM WEY

17. Mulong wak tufanyidin kudandamen kuwinkish muchim wetu kashinsh anch Yehova utukatin ni ukatin kutulikishin?

¹⁷ Tufanyidin kudandamen kuwinkish muchim wetu kashinsh anch Yehova utukatin ni ukatin kutulikishin. (1 Yh 3:19, mazu ma kwinshin.) Mulong wak? Mulong Satan ukudandamen kutubachik kutong anch Yehova katukatinap ni kakutwishap kutulikishin. Rutong rend rid ching ra kutukangesh kumusadin Yehova. Twij anch Satan ukudandamen kusal usu mulong wij anch chisu chamwishal kal chikemp. (Kuj. 12:12) Kangal twamushil chisu cha kutupandakan!

18. Yom ik ufanyidina kusal mulong wa kukasikesh kashinsh key piur pa rukat ra Yehova ni dilikishin dend?

¹⁸ Mulong wa kukasikesh kashinsh key mu rukat ra Yehova, sadin yiyul twisambinang mu mutu wa mulong wasambelang ou. Mulong wa kuwinkish muchim wey kashinsh piur pa dilikishin da Yehova, tongijokin pa yom yalonday amwinend piur pend. Tongijokin pa yom yayipepilay in kufund a Bibil kulond piur pa mutapu ukatay kulikishin. Kangal wavuramen anch wij nawamp anch ud mukayitil ni anch ukukumekeshin ranaken rend. Vurik kand anch ukat kulikishin rawonsu. Anch wikal ni kashinsh mud kadingay nich David piur pa ranaken ra Yehova, ukutwish kulond anch: “Wajikit Yehova mulong wanlikishidin ‘yitil yam yawonsu’!”​—Kus. 32:5.