Mulong Wak Chipul Chinech?

Afunda pa dibay dimwing dijim dialandau kudi chisak chimwing cha antu akad kumwitiyij Nzamb anch “Ov, ukutwish kwikal nich musangar pakad Nzamb? Mamiliyon ma antu makwet musangar winou.” Antu inay akat kwiyov chakin kamu anch kakwetap kuswir kwa Nzamb.

Ku mutambu ukwau, antu avud alondina anch amwitiyijin Nzamb akwatin mipak mudi kadingakup kwend. Salvatore Fisichella, bishop umwing mujim wa Katolik wayileja yid ya mu egliz wend anch: “Mukututal muntu ap umwing kakutwishap kujingunin anch tudi in Kristu nlel unou mulong mashakamin metu madi ma chilik chimwing ni ma antu akad kwitiyij.”

Antu amwing kakwetap chisu cha kumubangin Nzamb. Amen anch udi kulemp nakash ap kakutwishap kusal chom ap chimwing mu mwom wau. Antu mudi inay akat kumukimb Nzamb ching kusu anch mar mayishiken ap anch aswiridin chom chimwing​—nakash mudi udi kashalapol ku mutambu wau mulong wa kuyikwash.

Akwau kakatap kusadil yiyilejinau mu relijon wau, pamwing ap mulong atongin anch chidiap cha usey kuyisadil. Tujimbula chilakej chimwing kusu, in Katolik 76 pa chitot adia mu Allemange itiyijin anch chiwapidil kudi ikundj ni mband kushakam pamwing kurutu kwa kwatijan​—chitongijok chishalijadina nakash ni malejan ma egliz wau ni ma Bibil. (1 Korint 6:18; Hebereu 13:4) Pakwez, kadiap in Katolik ayinau amena kulik kwovijan pakach pa relijon wau ni mulad wa mashakamin mau. Amakurump a maegliz mavud akat kwinan anch antu au akwet mashakamin mudi ma “antu akad kumwitiyij Nzamb.”

Yilakej yiney yibachikin ku kwipul chipul ech: Ov, tumuswirikedin chakin kamu Nzamb? Chipul chinech chidiap chisu. Achipula kwinsambishil kwa Bibil. Chakwel tutana chakul ku chipul chinech, tushinshikinany amboku pa uvud wa yipul yalangwishau mu mukand wa Bibil wa Disambishil.