Yom ik ukulonda ni muntu ulikina kwitiy Nzamb?
1 Mulej umwing mwin Polony wamuleja nambaz umwing mishoner mu Afrik anch: “Kinitiyinap Nzamb.” Pakwez, nambaz watwisha kwambamb ni mband winou, wamwinkisha buku La vie: comment est-elle apparue? Évolution ou création? Pachirikay mishoner rubing ralondulap, mulej wamuleja anch: “Nidap kand mwin kulik kwitiy Nzamb!” Watanga buku Création mwawonsu wa kabuj ni katat wadinga ni kwit dilejan dia Baibel. Ov mutapu ik tukutwisha kupan uman kud antu akata kulond anch kitiyinap Nzamb? Chakusambish, shinshikin milong kushalijan yikatau kulondin antu mwamu.
2 Milong yikata kushikij ku kulik kwitiy: Antu awonsu akata kulik kwitiy Nzamb kapamap mutapu winou bwat. Avud adinga mu difukwil kampand ni chisu chimwing ading ni kwitiy Nzamb. Pakwez, mulong wa mayej makash, milong ya dijuku yikash ap tusolikany twamanau, ritiy rau raziya. Kud akwau, yidi yom yilejau ku mashikol majim yawiy yayinkisha yitongijok yimwing yiyimp piur pa mutapu wau wa kuman Nzamb. Tal yilakej yilondwila ey ya antu akad kwitiy Nzamb akulishina ritiy rikash mudiay Yehova Nzamb ni kwikal Atuman end.
3 Mband umwing mu Paris amuvala nich musong wa mafup. Ap anch amubabatisha mu Katolik, wadinga ni kulond anch kitiyinap Nzamb. Dichuku dimwing payipulay amansel mulong wak Nzamb walikidilay anch avadika nich ubid wa mutapu winou, awiy amwakula anch: “Mulong ukukatin.” Walika kwitiy chitongijok chinech chakad kovikan. Chikwau kand, nsand umwing wa mu Finland wakwatau musong umwing wa mu misuny wakad kutwish kwok, wasambisha kwendil mwi nking ya ayilim. Makwend waya nend kud ikundj umwing, mwin kulembil mu Pentekotist, ikundj winou wadinga ni kulond anch ukakuyerilang antu. Pakwez kwamwokap mu chilay bwat. Mud chibudikin, nsand winou washadisha kusanger kwend mudiay Nzamb ni wikala mwin kulik kwitiy.
4 Ikundj umwing mu Hondura wapamina mu Katolik pakwez wileja dilejan dia mutapu wa kushakam mu chisak (philosophie socialiste) ni dilejan dia kulik kwitiy Nzamb. Chitiyinay mafundish ma ku iniversite anch antu adiokil ku dikarumuk (Évolution), walika kwitiy Nzamb. Chilik chimwing kand, mband umwing mu États-Unis wapamina mu Metodist. Ku iniversite wileja dilejan dia ngikadil ya muntu (psychologie). Ov mutapu ik wikala ritiy rend? Ulondin anch: “Mu chishipu chimwing kusu ashesha ritiy rawonsu nadinga nich mu difukwil.”
5 Tushikenany michim ya antu akashinsh: Antu avud akata kulond anch kitiyinap Nzamb akutwish kusot kwijik anch kudi mutapu wa kupwish milong ya mayej, kulik kovijan mu dijuku, kasolikany ni yikwau. Akatining nich muchim utok kuman yakul ku yipul mud: ‘Ov mulong wak kudia uyimp?’ ‘Ov mulong wak yom yiyimp yikat kuyishiken antu awamp?’ ni ‘Ov dirumburik dia mwom chom ik?’
6 Ikundj umwing ni mukajend adinga ni kushakam mu Swisse apama mwaad wau mud antu akad kwitiy Nzamb. Pisambinau uyakin kapamp ka kusambish, alika kwitiy. Pakwez adinga ni milong nakash mu dijuku diau ni adinga ni kutongin kulikijan. Pezau kand Atuman ni kuyendil, ayileja nich ukwash wa Baibel mutapu wa kupwish milong yau. Ashimoka nakash yiyul yiwamp ya kusadil yidia mu Mifund, ni itiya dilejan dia Baibel. Uruu wau wakasikana, aya kurutu muspiritu, ni atambula dibabatish.
7 Yitukutwisha kulond ni mwin kulik kwitiy: Anch muntu watulej anch udi wakad kwitiy Nzamb, tusalany usu wa kujingunin mulong wak ulondinay mwamu. Ov chidi mulong wa mutapu wamulilau, ov chidi mulong wa mar mamanay, ap chidi mulong wa rubabek ra difukwil ni mafundish ma makasu mateshinay? Tukutwish kumwipul anch: “Ov mwamu udinga machuku mawonsu?” ap “Ov mutapu ik washikedina kulik kwitiy Nzamb?” Chakul chend chikutukwash kwijik ya kulond. Paswiridinay muntu yitongijok yifanyidina, buku Y a-t-il un Créateur qui se soucie de vous? ukutwish wamukwash.
8 Tukutwish kudandamen misamb nich kumwipul anch:
◼ “Ov wiyipulap kal chipul chinech: ‘anch Nzamb udi kwaku, ov mulong wak kudia mar nakash ni kasolikany mu mangand?’ [Chingel akula.] Ov nikutwish amboku kukulej chitongijok cha Baibel piur pa mulong winou?” Tutanga Jeremiy 10:23 (NW). Anch twapwish kutang, tumwipula mwin kwisamb netu yitonginay piur pa verse winou. Kupwa tumuleja mapaj 16 ni 17 ma broshir Connaîtrons-nous un jour un monde sans guerre? Ap, tusadilany shapitre 10 wa buku Créateur. Tumwita kusend mukand ni kuutang.—Piur pa yiyul yikwau, tal buku Comment raisonner paj 111-12.
9 Chakin anch, antu awonsu akata kulik kwitiyin mwi Nzamb kakwitiyap uyakin. Pakwez kudi avud asotininga kushinshikin yitongijok yikwau. Tusadilany manangu, kwitiyij ni, piur pa yawonsu, usu wa Dizu dia Nzamb mulong wa kuyikwash kuman uyakin. —Midimu 28:23, 24; Heb. 4:12.