Mudimu ukash​—Ov, Ukweting Usey?

Mudi Alex ulondinau mu rusangu riner, antu avud nlel kakatap kusanger midimu yikash. Aaron mwin kurijek ma motak walonda anch: “Antu avud atongining anch kakwetap usey anch asadin midimu ‘yakad usey’. Antu atongining anch: ‘Nisadil kwam mwamu mulong nikwetap mudimu ukwau wa kusal’.”

Ov, mulong wak antu avud atongining anch mudimu ukash udiap mulong wawawiy? Pamwingap ayibachikin kudi jinsangu jikatau kutesh ku televizion, jikata kumekesh ching mom “uwamp” wa yom ya usey ni yiswapela. Matthieu, mwin kutenchik milong ya in kusal mudimu walonda anch: “Antu amening anch, ap anch wasal usu wa kusal mudimu ukash mulong wa kutenchik mwom wey, ukutaninamu kwey ching yom yikemp.” Shane, muntu ukata kulam yom ya antu akwau witiyija chitongijok chawiy chinech. Walonda anch: “Muntu usadila mudimu nakash dichuku diakabuj chakwel amufuta chidi chom chisadiningau antu avud pakad kutaninamu.”

Ku mutambu ukwau, antu avud niyawiy akat kutaninamu mu mudimu ukash usadiningau. Daniel ukweta mivu 25 wasala mu mudimu wa rutung walonda anch “Nij anch mudimu ukash ukat kufutang kamu, pakampwil anch autakedin ni yitongijok yiwamp.” Andre, ukweta mivu 23, witiya niyend chitongijok chinech. Walonda anch “Nitiyijin anch musangar ni kuzangurok yidiokiling ku kusal. Kukepish kusal mudimu ni mijikit yikwau kukutwishap kwaletish musangar wa machuku mavud​—pakwez kukat kuletish ching kusu mar makad kupwang.”

Antu mudi Daniel ni Andre, ov, mutapu ik wakudishau chitongijok chiwamp piur pa mudimu ukash? Chidi mulong asadina yany ya Bibil mu mwom wau. Pa ndond pa kulik kusanger mudimu ukash, Bibil utukasikeshin kwikal ni mushiku ni in kudandamen. Pakwez Bibil utulejin yom yivud nakash pakad kwimen ching kusu pa kusal mudimu ukash. Utulejin kand mutapu tukutwisha kusanger mudimu wetu.

Ov, yany ik ya mu Bibil yikutwisha kukukwash chakwel wikala ni musangar mu mudimu wey? Tukwitin chakwel ushinshikina yom yikemp kusu yambambidinau mu mutu wa mulong ulondwilaku ou.