‘Ey Yey Watonda Kusal Mwamu’

1. Ov, mulong wak Yesu wasangara chisu ‘chamwovishau musangar nakash kudi Mwiku Utumbila’’? (Tal chipich cha kwinsambishil.)

OV, UKUTWISH kutongin pa kumuman Yesu Kristu chisu ‘chamwovishau musangar nakash kudi Mwiku Utumbila’? Pamwing ap utongin anch wamwemweta, ni mes mend mamekesha musangar nakash. Chad mulong wak? Wading wadioka kal kamu pa kuyitum in kwilejend 70 mu mudimu wa kulejan rusangu ruwamp ra Want wa Nzamb. Wamekesha musangar pa mutapu ukuwanyishau chisend chinech. Kwading akankuny avud a rusangu uwamp, mudi in manangu, in kufund ileja mu shikol ma piur, ni Afaris. Ayibachika antu avud chakwel amumana Yesu mudi muntu wachamwamu, nsongamabay kwend ni in kwilejend mudi “antu amwamu akad kwilej.” (Mid. 4:13; Mar. 6:3) Ap mwamu, in kwilej achirika mu mudimu wau nich musangar ujim nakash. Alejana kusutin mu yoziu yivud nakash, ni yikwau yadiokalanga kudi ayilembil! Ov, mulong wak adandamena kwikal ni musangar ni kutakaman?​—Tang Luka 10:1, 17-21.

2. (a) Ov, mutapu ik wadingau in kwilej a Yesu mudi anikanch? (b) Ov, chom ik chayikwasha in kwilej a Yesu kutesh uyakin wa mu Bibil?

² Shinshikin bil yalonday Yesu piur pa Yehova anch: “Tatuku, Mwant wa diur ni divu! Nakujikitish mulong ey wamekesha kudi [anikanch] antu akad kwilej yom yiwajindjika kudi in manangu ni antu ilejina. Mwawiy, Tatuku, mulong mwamu muwatonda ey kusal.” (Mat. 11:25, 26) Yesu kakimbap kurumburil anch in kwilejend ading anikanch ku mujimbu. Pakwez, Yesu wading wij anch ading ameken mudi anikanch pa kuyifanikesh nau in manangu ni antu a mu muchid ileja mashikol nakash, amananga anch akwet manangu. Cha usey, Yesu wayifundisha in kwilejend chakwel ikala mudi anikanch, pa kwikal in kwikepish ni akatila kuyifundish. (Mat. 18:1-4) Ov, mutapu wataninaumu mu kwikal in kwikepish? Kusutil ku mwiku utumbila, Yehova wayikwasha kukudish uyakin wa muspiritu ap anch in manang ni in kwilej yom yivud, adinga kuyipipej, ading abwikau kal pa mes kudi Satan ni kudi chibud chau.

3. Ov, chom ik tukwambambina mu mutu wa mulong winou?

³ Chidi chakin anch Yesu wasangara nakash! Chamusangaresha chading kuman mutapu wayikwashay Yehova antu in kwikepish kutesh uyakin wa mu Bibil, chikalap nchik mashikol milejau ap mwikadil wadingau nich. Yesu wading ukwet musangar mulong Tatukwend wakatish mutapu winou wa kufundish. Ov, mutapu ik wamekeshay Yehova kuswimp, ni mutapu ik wamekeshay anch witiyija kal mutapu winou wa kufundish? Mu mutu wa mulong winou tukwilej mutapu wijikishinay Yehova nlel uyakin wa mu Bibil kudi antu ikepishina.

KUYIRUMBURIL ANTU AWONSU UYAKIN

4. Ov, mu mutapu ik wikala dichap diswapela dia Chinong cha Kalam chipan cha rukat?

⁴ Mu mivu yasutina ey, yakudia ya muspiritu yaletinau kudi dirijek dia Yehova yamekesha kutesh kuswapela ni kwovikena nawamp. Tushinshikinany yilikej yisatu. Chakusambish, chidi kuswapej Chinong cha Kalam.a Pakwez, dichap dined chidi chipan cha rukat kudi antu asadina usu wa kutang nawamp rudim ap akad kurijik nawamp. Mitu ya majuku yilondin anch anau akwet katat musangar wa kwilej nich dichap dined, mutapu uwamp tutambwidila yakudia ya muspiritu. Antu avud afunda mikand mulong wa kujikitish piur pa dichap dined. Nambaz umwing wafunda mutapu walikay kupan yakul mu dilejan dia Chinong cha Kalam. Wafunda anch: “Nading muntu wakad kulondang nakash.” Chad nlel ulondining! Kupwa kwa kusambish kusadil dichap diswapela dia Chinong cha Kalam, wafunda anch: “Katat Nipanining yakul yivud, ni nikovangap kand wom! I kujikitish kuvud kudi Yehova ni kudi en.”

5. Ov, yom ik yatanidinamuu antu mu dichap diachirikidinau dia Les Saintes Écritures—Traduction du monde nouveau?

⁵ Chakad, nlel dikarumun diachirikidinau dia Les Saintes Écritures—Traduction du monde nouveau, dia Inglish adipana Mwinkind 5, 2013 mu chikumangan cha pa muvu.b Ma verse mavud masadidin kakat mazu makemp, chawiy chisadina anch kumutesh kwikala kuswapela. Chilakej, Job 10:1 wading ukwet mazu 27 katat ukwet kwend 19; Jinswir 8:6 wading ukweta mazu 20 katat ukwet 13. Mifund yawonsu yaad ey yoviken nawamp mu dikarumun disu dined. Pakwez, mukadivar umwing uzizidilau many ukweta makum ma mivu, ushinshamena mu mudimu wa kulejan ulondin anch: “Natanga mukand wa Job mu dichap disu, ni Namana anch kading kapamp ka kusambish kuutesh!” Antu avud alonda yom mudi yiney.

6. Ov, mutapu ik wiyovila piur pa kutokish kudia mu Mateu 24:45-47?

⁶ Chakasatu, shinshikin kand piur pa kutesh kwetu kwa katat kwatokishinau nawamp. Chilakej, kutesh kwetu kwovikena nawamp piur pa “kashalapol ushinshamena ni kubabal,” kwalejanau mu Chinong cha Kalam cha Kafunfut 15, 2013, kwatusangaresha. (Mat. 24:45-47, TMK) Charumburila anch kashalapol ushinshamena chawiy Chisak Chitakedila, pakwez “a mu chikumbu” awiy antu adishinau muspiritu, ikalap azizidinau many ap “amikoku akwau.” (Yoh. 10:16) Musangar mudi ik tukweta wa kwilej uyakin winou ni kuulejan kudi antu akwau! Ov, mu mitapu ik yikwau yamekeshay Yehova anch witiyijin mafundish maswapela kutesh ni movikena nawamp?

KURUMBURIL KWOVIKENA NAWAMP KWA JINSANGU JIDIA MU BIBIL

7, 8. Ov, yilakej ik yimwing ya jinsangu ja mu Bibil yimekeshina yom yijim yalondau mulong wa machuku ma kurutu?

⁷ Anch umusadidin Yehova kwasutin kal mivu yivud, ukutwish kuman anch kuswimp kumwing akurumburil mu mukand yimedina pa Bibil. Ov, mutapu ik? Pasak, alondanga nakash piur pa jinsangu jamekeshanga mutapu ukeza kasadik yom yijim mu machuku ma kurutu. mu Bibil afundamu Jinsangu ja yom yasadika, ni yadinga kumekesh yom yikwau yafanyina kuwanyin mu uprofet. Ov, kudi diyingish diakin dia kurumburil jinsangu ja mu Bibil mu mutapu winou? Mwaning. Chilakej, Yesu walonda piur pa “chilay cha Yona, muruu wa Nzamb.” (Tang Mateu 12:39, 40.) Yesu warumburila anch Yona wasala machuku mwivum mwa insh, chinech chimekeshin machuku mafanyinay Yesu kusal mwi nzay.

⁸ Mudi kand uprofet ukwau wabwakau mulong wa machuku ma kurutu. Kambuy Paul wisambina piur pa uprofet uvud. Chilakej, uruw wa Aburaham ni Hagar nenday Sara umekeshin urund wa Yehova ni muchid Isarel ni chikunku cha mwiur cha dirijek dia Nzamb. (Gal. 4:22-26) Chilik chimwing, tabernacle, tempel, Dichuku dia Kwitokish, mwin kupesh mujim ni yom yikwau yadinga mu Chijil cha Moses “yading kusu chijingidij cha yom yiwamp yikeza kwez.” (Heb. 9:23-25; 10:1) Chisangareshin ni chitukasikeshin mu ritiy mudi ik pa kwilej uprofet winou. Ov, tukutwish kulond anch, muntu mwawonsu, yishiken, ni yom yikwau yilondinau mu Bibil yimekeshin muntu ap chom kanang?

9. Mutapu ik warumburilau rusangu ra mu Bibil piur pa Nabot?

⁹ Pasak, mikand yetu yading kurumbul anch muntu mwawonsu, yishiken, ni yom ya mu jinsangu kanang yirumburikin muntu ap yom. Shinshikin chilakej cha rusangu ra Nabot, warishishau pakad mulong ni wapunganau anch amujipa kudi Mwant mband Jezabel, chakwel nfumwend Ahab atambula chir cha nviny cha Nabot. (1 Ant 21:1-16) Mu muvu wa 1932, rusangu riner arirumburila mudi disengan. Ahab ni Jezabel ayifanikesha nich Satan ni dirijek diend; Nabot amufanikesha ni Yesu; kupwa rufu ra Nabot arifanikesha ni rufu ra Yesu rabwakau. Pakwez, kwinyim kwa makum ma mivu, mu buku “Que ton nom soit sanctifié,” wapalangeshau mu muvu wa 1961, Nabot amufanikesha ni azizidilau many, ni Jezabel amufanikesha ni Kristendom. Chikwau kand, mar mamumeshau Nabot kudi Jezabel amafanikeshin ni mar mayimeshinau azizidilau many a nlel. Mu mivu yivud, kurumburil kwinoku kwayikasikesha antu a Nzamb mu ritiy. Ov, mulong wak lel yom yaswimpa?

10. (a) Mutapu ik ukatay kashalapol ushinshamena kudimuk anch urumburil jinsangu ja mu Bibil? (b) Mikand yetu yikat kushinshikin nakash nlel piur pa chom ik?

¹⁰ Mudi mutukutwisha kuman, mu kusut kwa mivu Yehova wamukwasha “kashalapol ushinshamena ni kubabal” chakwel ashala kamu ubabela. Katat kashalapol ushinshamena ukat kushinshikinang nawamp pa rusangu ra mu Bibil rimekeshina chom chijim ching anch kudi diyingish dia mifund diovikeshina uyakin winou. Chikwau kand, kurumburil kwading kwa pakur piur yom yasadika ni yading yimekeshina yom yiney yading yikasiken kuyitesh, kuyivurik ni kuyisadil. Yom ya mafundish mudi minam​—mafanikeshin nany ni mulong wak—​makutwish kukasikan kumalam, kumavurik, ni kumasadil. Chikasikena nakash chidi anch, ap anch madi malejan ma kusadin ni makin mulondina jinsangu ja mu Bibil makutwish kukasikan pa kumatesh ap makutwish kushadish kurumburik kwau kwa kuwanyin. Chawiy lel, tumen anch mikand yetu lel unou yikasikeshidin nakash pa kutesh kuwamp, malejan mafanyidina kusadin piur pa ritiy, kujijaman, kwipan kudi Nzamb, ni mikadil yikwau kand yitukata kwilej piur pa jinsangu ja mu Bibil.c

11. (a) Ov, mutapu ik tuteshina nlel rusangu rilondina piur pa Nabot, ni mulong wak chilakej chinech chidi chiwamp kudi etu? (b) Ov, mulong wak mu mikand yetu akat kufanikesh yom yafundau mu Bibil ni mutapu uyikata kuwanyin nlel?

¹¹ Ov, mutapu ik tuteshina nlel rusangu rilondina piur pa Nabot? Rusangu riner rovaken nawamp mu wiswimp. Muntu muwamp wafa, chadingap kumekesh uprofet piur pa Yesu ap pa azizidilau many, pakwez chading mulong wakata kulam kushinshaman kwend. Wakata kulam Yijil ya Yehova ap anch amupompata nakash kudi in kuyikel a usu. (Kuch. 36:7; 1 Ant 21:3) Chidi chilakej chiwamp kudi etu mulong etu awonsu tukat kurish ni rupompat ra chilik chimwing mu mitapu kushalijan. (Tang 2 Timote 3:12.) In Kristu awonsu akutwish kutesh rusangu riner, kurivurik, ni kusadil dilejan dined ni kukasikesh ritiy rau.

12. (a) Ov, mulong wak tukutwishap kulond yawonsu piur pa jinsangu ja mu Bibil? (b) Mulong wak tutwishin kwijik kurumburik kwa yom ap anch yikasiken kuyitesh? (Tal mazu ma kwinshin.)

¹² Ov, tukutwish kulond anch jinsangu ja mu Bibil jalondanga ching piur pa malejan ma kusadin pakad kulond piur pa kurumburik? Bwat. Nlel mikand yetu yikat kutufundishang nakash yom yikata kutuvurish ap yikat kutukwash kuyisikej ni yikwau. Mikand yiney yimekeshining jinsangu jivud ja mu Bibil piur pa uprofet ukash wabwakau ni yimekeshin mutapu wawanyina ni uukeza kuwanyin. Chilakej, tukutwish chakin kulond anch kujijaman kwa Nabot chisu chamuzengolau ni rufu rend kutuvurishin kujijaman kwa kristu ni kwa azizidilau many. Pakwez, tukutwish kand kulond anch kujijaman kwa antu adia “amikoku akwau” a Mwant. Kutesh nawamp ni kufanikesh kwinoku yidiokil ku usu wa mafundish ma Nzamb.d

KURUMBURIL KUSWAPELA KWA YISHIMU YA YESU

13. Ov, yilakej ik yimekeshina anch tuteshin nawamp katat yishimu ya Yesu mu mutapu uswapela kutesh?

¹³ Yesu Kristu wading Mulej mujim wadinga pa mangand. Mutapu wend wa kufundish wading kusadil kwa yishimu ap yilakej. (Mat. 13:34) Yishimu ap yilakej yiding yiwamp mulong yikat kurumburil yom yikash mu mazu maswapela makutwisha kutukwash kutongijokin ni kushik ku muchim. Ov, mikand yetu yarumburil kand yishimu ya Yesu mu mutapu uswapela kutesh mu mivu yiney? Chakul chidi anch mwaning! Ov, twovap musangar chisu chabudishau Chinong cha Kalam cha Kafunfut 15, 2008 charumburila nawamp chishimu cha Yesu piur pa chivish, rubut ra mutard, ni wand? Nlel tuteshin nawamp anch yishimu yiney yading yilondina piur pa Want wa Nzamb ni kuya kurutu mu kukumangej kwa in kwifukwil akin a Kristu mu mangand minam mayimp.

14. (a) Ov, mutapu ik twarumburilanga chishimu cha mwin Samaria mwin riy? (b) Ov, mutapu ik tuteshina chishimu chinech katat?

¹⁴ Ov, mutapu ik tukutwisha kutesh kurumburik kwa mafundish makwau mapanay Yesu piur pa yishimu? Pakwez, mafundish mamwing mading yifanikesh ni uprofet; makwau mading malejan ma usey nakash ma kusadil. Ov, mutapu ik tukutwisha kwijik mafundish madinga ma yifanikesh ni makad kwikal? Mu uvud wa mivu, yakul yitokina yikat kwikalaku pakemp pakemp. Chilakej, shinshikin mutapu twarumburilanga chishimu cha Yesu cha mwin Samaria mwin riy. (Luka 10:30-37) Mu muvu wa 1924, Chinong cha Kalam chalonda anch mwin Samariy wading umumekeshin Yesu; njil yidiokila ku Yerusalem kushik ku Yeriko, yikurumukina, yamekesha mashakamin ma antu kudiokal ku wimbwambol mu chir cha Eden; ij adinga mwi njil amekesha in kwisak; ni mwin kupesh ni mwin Levi amekesha antakel a ma relijon ma makasu. Nlel, mikand yetu yikat kusadil chilakej chinech mulong wa kuvurish in Kristu awonsu anch ikala akad kasolikany pa kuyikwash antu akweta kuswir kwa ukwash, nakash kamu ukwash wa muspiritu. Chatwinkishap musangar wa kuman mutapu utokishinay Yehova mafundish kudi etu?

15. Ov, chom ik tukushinshikina mu mutu wa mulong ulondwilaku ou?

¹⁵ Mu mutu wetu wa mulong ulondwilaku ou, tukez kwisambin pa chishimu chikwau cha Yesu​—cha ayangadim dikum akad kal kwachik. (Mat. 25:1-13) Ov, mutapu ik usotilay Yesu anch in kwilejend atesha chishimu chinech cha usu machuku ma nsudiel minam? Antu, yom ni yishiken yimekeshinau mu chishimu chinech, ov, yikwet kurumburik kujim mu machuku ma kurutu? Ap, chikutwish kutukwash kutesh malejan makutwisha kutukwash mu machuku minam ma nsudiel? Tushinshikinany amboku mulong winou.