MUTU WA MULONG WA PA CHIBUR | KUPWA KWA KUFA—CHITWISHIKIN KWIKAL KAND NI MWOM?
Chom ik Chikata Kushikenang Kupwa kwa Kufa?
“Nading nitongin anch kudi jindond jisatu jikata muntu kuya anch wafa: mwiur, mu karung ka misiny ap mu pirgatwar. Nading nij anch Nidiap muntu muwamp mulong wa kuya mwiur ap muyimp mulong wa kuya mu karung ka misiny. Nadingap nija nawamp chirumburikina pirgatwar. Nading kand kal nimanap yom yiney mu Bibil. Yading kwau yom yadingau antu kulond.”—Lionel.
“Nading nitongin anch antu awonsu ayiling mwiur pafilingau, pakwez nadingap nich kashinsh. Natongang anch rufu rawiy disudiel dia yom yawonsu—kwikil ruchingej mulong wa afu.”—Fernando.
Wiyipwilap kal anch: ‘Chom ik chakin kamu chikata kushiken anch muntu wafa? Akatish netu afila kal, akat kuman mar ndond kanang? Tukez kuyiman kand? Chom ik chitwinkishina kashinsh?’ Tushinshikinany amboku chifundishinay Bibil pa mulong winou. Chakusambish, tushinshikinany chifanikeshinay Bibil ni rufu. Kupwa tukwisambin piur pa ruchingej ripaninay Bibil, Dizu dia Nzamb.
Afu ading mu mwikadil ik?
CHAKUL CHA BIBIL: “Antu aom ij anch, kwisudiel tukez kafa, pakwez antu afu kijap chom, awiy kakwetap kand difut. Awiy ayivuramedin kal. Sal midimu yey yawonsu nich usu, mulong ku rufu kuukuya [mwi nzay muukuya, NWT] kwikiling midimu, ap yitongijok, ap ronganyin, ap manangu.”a—Mulej 9:5, 10.
Nzay yidi ndond yikatau kuyijik antu pafilingau; yidi ndond ya chijingidij ap mwikadil wakad kwijik chom ap kusal mudimu. Mwin kushinshaman Job, wamananga mutapu ik Nzay? Washadisha yom yend ni anend awonsu mu dichuku dimwing, ni wayela makwalong ma yitat yiyimp ya tushin mujimbu wakabuj. Wamuleja Nzamb anch: “A! Ing njindjika kwam mwi ndond ya afu [Douay Version, Bibil wa in Katolik ulondin anch mu karung ka misiny]. Njindjika kwam ching anch ujim wey wasut.” (Job 1:13-19; 2:7; 14:13) Chakin kamu, Job kakimbap kulond anch Nzay yiney yidi karung ka misiny, ndond ya kuyimeshin antu mar nakash. Pakwez, wading wij anch yading ndond ya kwiswedishin.
Kudi kand mutapu ukwau wa kwilej piur pa mwikadil wa afu. Tukutwish kushinshikin piur pa jinsangu jidia mu Bibil jilondina mulong wa antu chinan achirika kand ku mwom.—Tal mushet “Kuvumbuk Chinan Kulejenau mu Bibil.”
Kwikil muntu ap umwing pakach pa antu chinan inay avumbuka walonda anch ndond yiney yidi ya yiyukish ap ya mar. Anch antu avumbuka inay aya mwi ndond yiney chisu chafau, kelap kulond piur pa chom chinech? Ni kelap kufund mu Bibil yom yawonsu yamanau? Mu Bibil mwikil jinsangu ja mutapu winou. Antu chinan inay kalondap chom ap chimwing piur pa mulong winou. Mulong wak? Mulong ku rufu kadingap ij chom, ading kwau mudi muntu ulela tul tukash. Pakwez, Bibil ukat kusadil yisu yimwing dizu tul mulong wa kulond piur pa rufu. Chilakej, David ni Stefan, atushalapol a Nzamb ‘alala mu tul twa rufu.’—Midimu 7:60; 13:36.
Chad, ruchingej ik lel ridiaku mulong wa afu? Akutwish kulank pa tul twau twinetu?
a Mu Les Saintes Écritures — Traduction du monde nouveau, dizu “Nzay” adidioshin ku dizu dia Hebreu “Sheol” ni dia Grek “Hades.” Makarumun mamwing ma Bibil masadidin dizu “karung ka misiny,” pakwez mafundish ma mar ma chikupu madiap ma mu Bibil.