MUTU WA MULONG WA PA CHIBUR | ATUMAN A YEHOVA ADI ANANY?
Atuman a Yehova adi antu a mutapu ik?
Tukwet dirijek didia pa mangand mawonsu diakad kwikal mu umwing ni yisak yikwau ya ma relijon. Ap anch biro mujim utakedila mangand mawonsu udi mu États-Unis, pakwez Atuman a Yehova avud ashich mu jingand jikwau. Atuman a Yehova ma miliyon chinan ni kusut akat kuyifundish antu akwau Bibil mu jingand 230 ni kusut. Asadining mwamu mulong wa kuwanyish mazu malonday Yesu anch: “Chifanyidin rusangu ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu.”—Mateu 24:14.
Chikalap nchik ndond tushicha, tukat kuziyil yijil kwa kwisotil. Chawiy lel tusadin usu wa kulik kwiyandjik mu milong ya politik. Tusadin mwamu mulong wa kulimish chijil chapanay Yesu kudi in Kristu cha kulik kwikal mu “umwing nau in mangand.” Mwamu, tukatap kwiyandjik mu milong ya politik ap kupan ukwash kwi njit. (Yohan 15:19; 17:16) Pakwez, chisu cha Njit ja II ja Mangand Mawonsu, ayikasa Atuman a Yehova mu rukan, ayimesha mar nakash ni chipandikena kuyip, ayisala mwamu mulong alika kwiyandjik mu milong ya politik. Mukurump wa egliz umwing wa mu Allemagne wafunda anch: “[Atuman a Yehova] akutwish kwikal chisak chimwing chamana mar mulong wa kom kau mu umutakel wa Reich wakasatu ap wa Nazi.”
“[Atuman a Yehova] akwet usu upandikena. Tukutwish kuyinkish antu inay akad choy ap yisend yijim ya chipolitik—pakwez tukutwishap kwetu. . . . Akat kuyilimish antakel a mangand pakwez itiyijin anch ching Want wa Nzamb wawiy ukeza kupwish milong yawonsu ya antu.”—Jurnal wa Nová Svoboda, mu République tchèque.
Chikwau kand, tukatap kwiyauril. Yesu wamulembila Nzamb piur pa in kwilejend anch: “Am kinikulembidilap ey kuyidiosh mu mangand.” (Yohan 17:15) Chawiy lel, tusadil midimu, tulandishin yom, ni tuyil ku shikol pamwing nau antu akwau mwin ndond tushicha.