Uumwing Usangareshina ni Chivurikish

1, 2. Mu muvu wa 2018, musambu ik ukututeka etu awonsu mu uumwing ni mulong wak? (Tal chipich cha kwisambishin.)

NGOND wa 3 machuku ma ngond 31 muvu wa 2018, mamiliyon ma antu a pa mangand mawonsu makuya ku musambu usadikining kapamp kamwing pa muvu. Kupwa kwa muten kwandam, Atuman a Yehova ni antu akwau akukumangan pamwing mulong wa kuvurik yakupesh ya Yesu mulong wetwetu. Muvu ni muvu, Chivurikish cha rufu ra Kristu chikat kuyitek antu a Nzamb mu uumwing mu mutapu wa kushimwok, kusutamu chikumangan chin chawonsu panap pansh.

² Yehova ni Yesu afanyidin kwikal kamu ni musangar chisu chikatau kuman mamiliyon ma antu akat kuya ku musambu winou wa pakampwil saa ni saa, pa mangand mawonsu. Bibil urumburil anch “chisak chipandakena kujimb, chakad kutwish kuchind kudi muntu, mupwidil michid yawonsu ni majuku mawonsu, antu a mangand mawonsu ni jindim jawonsu,” abarika nich mazu ma piur anch: “Dipandish didi kudi Nzamb wetu ushicha pa nkwas, ni kudi Mwan a mukoku.” (Kujingunik 7:9, 10, TMK) Chisangareshin mudi ik kwijik anch muvu ni muvu ku Chivurikish, antu akat kumutumbish Yehova ni Yesu mulong wa yom yijim yayisadinau!

3. Yipul ik yikwakulau mu mutu wa mulong winou?

³ Mu mutu wa mulong winou, ukutan yakul ku yipul yiney yinying: (1) Mutapu ik nikutwisha kwirijek mulong wa Chivurikish chakwel nitaninamu kamu chipandakena? (2) Mu mitapu ik Chivurikish chikat kukwash antu a Nzamb awonsu kwikal mu uumwing? (3) Yom ik nikutwisha kusal chakwel nikasikesha uumwing pakach pa antu a Nzamb? (4) Ov, kukez kwikal Chivurikish cha nsudiel? Anch mwawiy, chisu ik?

MUTAPU IK TUKUTWISHA KWIRIJEK MULONG WA CHIVURIKISH NI KUTANINAMU ANCH TWAKUMANGAN?

4. Mulong wak chidi cha usey kudi etu kwikal ku Chivurikish?

⁴ Mulong wak chidi cha usey kudi etu kwikal ku Chivurikish? Diyingishin dimwing didi anch kukumangan ku yikumangan udi mutapu tukata kumwifukwil Yehova. Tukutwish kwikal nich kashinsh anch Yehova ni Yesu akat kuman kamu muntu ni muntu pakach petu ukata kusal yom yawonsu yikutwishay mulong wa kushik ku chikumangan chinech cha usey cha pa muvu. Tukatin kamu anch Yehova ni Yesu atumana anch tudi ku Chivurikish, ching anch kwatushiken chom kampand chikutukangesha kwikalaku. Anch yisal yetu yamekesh anch yikumangan yikwet usey kudi etu, tukumwinkish kamu Yehova diyingishin dia kulam majin metu mu “mukand wafundau yivurikish.” Mukand winou autazukin anch “mukand wa mwom.” Mudi majin ma antu awonsu akatinay Yehova anch atambula mwom wa chikupu.—Malakiy 3:16; Kujingunik 20:15.

5. Mwi mbing kampand kurutu kwa Chivurikish, mutapu ik ukutwisha ‘kwipak ey amwiney anch udi mu ritiy’?

⁵ Mwi mbing kampand kurutu kwa Chivurikish, tukutwish kwipan nakash mu malembil ni mu kutong kamu nakash mutapu ukasikena urund wetu ni Yehova. (Tang 2 Korint 13:5, TMK.) Kambuy Paul wayileja in Kristu anch: “Ipakany en ayinen anch udiany mu ritiy.” Mutapu ik tukutwisha kusal mwamu? Tukutwish kwiyipul ayinetu anch: ‘Ov, nitiyijin kamu anch dined diawiy dirijek dimwing diatonday Yehova mulong wa kusal rusot rend? Nisadin usu nakash mulong wa kulejan ni kufundish rusangu ruwamp? Ov, yisal yam yimekeshin anch tushich machuku ma nsudiel ni nsudiel ya winyikel wa Satan yidi piswimp? Ruchingej ram mudiay Yehova ni Yesu ridi rikash mudi murading chisu nasambisha kumusadin Yehova?’ (Mateu 24:14; 2 Timote 3:1; Hebereu 3:14) Kutongijok piur pa yakul ku yipul yiney kukutukwash ‘kwipak ayinetu’ chitudia.

6. (a) Mutapu ik umwing kamu tukweta wa kutambul mwom wa chikupu? (b) Mutapu ik wirijekangay mukurump umwing wa chikumangen mulong wa Chivurikish muvu ni muvu, ni mutapu ik ukutwisha niyey kusal mwamu?

⁶ Mutapu umwing ukutwisha kwirijek mulong wa Chivurikish udi wa kutang ni kutongijokin piur pa mitu ya milong yirumburila mulong wak musambu winou udi wa usey nakash. (Tang Yohan 3:16; 17:3.) Mutapu umwing kamu tukutwisha etu kutambul mwom wa chikupu udi wa kwilej kumwijik Yehova ni kwikal ni ritiy mudiay Mwanend Yesu. Mulong wa kwirijek mulong wa Chivurikish, tufanyidin kwilej yom yikutwisha kutukwash twiyova anch tusejin kamu piswimp kudi awiy. Mutapu winou wawiy wasalangay mukadivar umwing wading mukurump wa chikumangen mu mivu yivud. Mu mivu yivud, wakumangejang mitu ya milong ya Chinong cha Kalam yisambinang piur pa Chivurikish ni piur pa rukat ratumekeshinau kudi Yehova ni Yesu. Mwi mbing kurutu kwa Chivurikish, watangang mitu ya milong yiney tupamp tuvud ni wayitongijokinang nakash mulong wa kwijik mulong wak musambu winou udi wa usey. Yisu yimwing, wawejinangaku mutu wa mulong umwing ap yaad ku mitu ya milong yikur. Watangang kand ni kutongijokin nakash piur pa maverse ma Bibil malondina piur pa Chivurikish. Mukurump winou walonda anch mu kusal yom yiney yawonsu, wilejang yom yisu muvu ni muvu. Chidia cha usey nakash chidi anch kwilej kwend kwasala anch amukata Yehova ni Yesu nakash. Anch niyey wilej mwamu, ukumekesh anch umukatin Yehova ni Yesu chipandakena. Ukwikal mwin kujikitish nakash mulong wa yom yakusadinau ni ukutaninamu chipandakena ku Chivurikish.

CHIVURIKISH CHITUKWASHINING KWIKAL MU UUMWING

7. (a) Yesu walembila piur pa yom ik uchuku pasalau musambu wa kusambish wa Yakudia ya Urel ya Nsalejetu? (b) Yom ik yimekeshina anch Yehova wakula malembil ma Yesu?

⁷ Uchuku pasadika musambu wa kusambish wa Yakudia ya Urel ya Nsalejetu, Yesu wasala malembil ma pakampwil. Walembila piur pa uumwing wa usey nakash ukwetay ndiy ni Tatukwend. Yesu walembila kand anch in kwilejend awonsu afanyina kwikal mu uumwing mudi wa mutapu winou. (Tang Yohan 17:20, 21.) Yehova wakula kamu malembil minam ma Mwanend mukatish. Kusutamu chikumangan chin chawonsu, Chivurikish chimekeshin patok anch Atuman a Yehova adi kamu mu uumwing. Dichuku dinidia, mamiliyon ma antu a mu jingand kushalijan ni akweta ulombu wa chikit kushalijan akumangening pamwing pa mangand mawonsu ni amekeshining anch itiyijin anch Yehova wamutuma Mwanend. Mu jindond jimwing, chiding cha pachipatu kuyiman antu a ulombu wa chikit kushalijan akat kukumangan pamwing mulong wa milong ya chirelijon, ni ap anch asal mwamu, antu akwau amening anch yiwapinap kwau. Pakwez, kimwawiyap mwiyovilingay Yehova ni Yesu. Kudi awiy, uumwing wetu ku Chivurikish udi uwamp nakash.

8. Uruu ik wamwinkau Ezekiel kudiay Yehova?

⁸ Chitudia antu a Yehova, tukatap kukashimuk anch tudi mu uumwing mu mutapu winou. Yehova wasambela kulejan uumwing winou kusutin uruu wamwinkay Ezekiel. Wamuleja Ezekiel kukwat mitond yaad, mutond umwing ‘mulong wa Yuda’ ni mutond ukwau ‘mulong wa Josef,’ ni kuyitek pamwing chakwel yikala mutond umwing. (Tang Ezekiel 37:15-17.) Mutu wa mulong wa “Yipul ya in Kutang” wabudishau mu Chinong cha Kalam cha Ngond wa 6, 2016 (mu Français) warumburila anch: “Kusutin muprofet wend Ezekiel, Yehova watakela kumulej anch antu end akuchirik mwi Ngand ya Kushilamu ni anch akwikal kand mu uumwing mudi muchid umwing. Uprofet winou watakela kand kulejan anch antu akumwifukwila Nzamb mu machuku ma nsudiel akwikal mu uumwing mudi muchid umwing.”

9. Muvu ni muvu ku Chivurikish, mutapu ik tumening uumwing watakelau kulejan mu uprofet wa Ezekiel?

⁹ Kwisambishin kwa muvu wa 1919, Yehova wasambisha kuyitenchik pakemp pakemp ni kuyitek azizidilau many mu uumwing. Ading mudi mutond ‘mulong wa Yuda.’ Kupwa, antu avud ading ni ruchingej ra kushakam chikupu panap pa divu asambisha kwimbomb nau azizidilau many. Antu inay akweta ruchingej ra kushakam panap pa divu adi mudi mutond ‘mulong wa Josef.’ Yehova washilamu kubomb mitond yiney yaad ni kuyisal yikala “kamutond kamwing” mu chikas chend. (Ezekiel 37:19) Wasala azizidilau many ni “amikoku akwau” kwikal “chisak chimwing.” (Yohan 10:16; Zakariy 8:23) Nlel, yisak yiney yawonsu yaad yidi mu uumwing ni yimusadidin Yehova pamwing. Ni akwet Mwant umwing, Yesu Kristu, utazukinau mu uprofet wa Ezekiel anch ‘David kashalapol’ wa Nzamb. (Ezekiel 37:24, 25) Muvu ni muvu ku Chivurikish, pitukata kukumangan mulong wa kuvurik rufu ra Yesu, tumening uumwing wa yisak yiney yaad watakelay kulejan Ezekiel. Pakwez, yom ik tukutwisha kusal etu awonsu mulong wa kulam ni kukasikesh uumwing wa antu a Nzamb?

YOM IK TUKUTWISHA KUSAL ETU AWONSU MULONG WA KUKASIKESH UUMWING?

10. Mutapu ik tukutwisha kukasikesh uumwing pakach pa antu a Nzamb?

¹⁰ Wisu mutapu wa kusambish tukutwisha kukasikesh uumwing pakach pa antu a Nzamb? Mu kusal usu wa kwikal ikepishina. Padingay Yesu pa divu, wayileja in kwilejend anch afanyidin kwikal ikepishina. (Mateu 23:12) Antu adia mu mangand minam akat kwiman ayinau yisu yivud anch adi a usey nakash kuyisutamu antu akwau. Pakwez anch tudi ikepishina, tukuyilimish akadivar atakedina chikumangen ni tukuziyin ku umutakel wau. Ching anch twasal mwamu chad lel chikumangen chikal mu uumwing. Cha usey nakash, anch twikal ikepishina, tukumusangaresh Nzamb mulong ndiy ‘uyipompatin in chibud, pakwez ukat kuyanaken in kwikepish.’—1 Pita 5:5.

11. Kutong piur pa mukat ni nviny ukatau kusadin ku Chivurikish kukutwish kutukwash mutapu ik kukasikesh uumwing?

¹¹ Wisu mutapu wa kaad tukutwisha kukasikesh uumwing? Mu kutongin kamu nawamp piur pa kurumburik kwa mukat ni nviny. Tufanyidin kusal mwamu kurutu kwa Chivurikish, pakampwil kamu uchuku winiwa. (1 Korint 11:23-25) Mukat wakad chivish umekeshin mujimbu uwanyidina wa Yesu wapanay mudi mulambu. Nviny musuz umekeshin mash mend. Pakwez tuswirikedin kusal yom yivud pa ndond kwau pa kwijik yom yiney ya pa dishin. Tukwet kuswir kwa kuvurik anch difut dia yakupesh ya Yesu dikwet kand yisal yijim yaad ya rukat. Yehova wamupana Mwanend mulong wetwetu ni Yesu wapana mwom wend kwa kwikatin mulong wetwetu. Chisu tukutonga piur pa rukat rau, rikutubachik kuyikat kamu. Ni rukat tukweta etu awonsu mulong wa Yehova rikukasikesh uumwing wetu.

12. Mutapu ik warumburilay Yesu patok mu rusangu ra mwant ni atushalapol end anch Yehova ukatining anch tuyilikishina akwetu?

¹² Wisu mutapu wa kasatu tukutwisha kukasikesh uumwing? Udi wa kuyilikishin akwetu kwa kwikatin. Anch twasal mwamu, tumekeshin anch tujikitishin anch Yehova ukutwish kutulikishin yitil yetu mulong wa yakupesh ya Yesu. Mulong wa kumekesh mulong wak chidi cha usey kulikishin, Yesu walonda rusangu ra mwant ni atushalapol end. Tang amboku Mateu 18:23-34 ni iyipula amwiney anch: ‘Ov, nikasikeshin kusal yom yafundishay Yesu? Nikat kushimpish muchim ni kwovijan nawamp ni akadivar nau anambaz nam? Niswakeling kulikishin antu akata kwinrumbukin?’ Chidi chakin anch yitil yimwing yiding yijim kusutamu yikwau. Ni chikutwish kutukasiken etu antu akad kuwanyin kulikishin yitil yimwing. Pakwez rusangu ra Yesu ritufundishin yom yikatinay Yehova anch tusala. (Tang Mateu 18:35.) Yesu wovikesha yom yiney patok anch Yehova kakutwishap kutulikishin anch etu tuyilikishidinap akadivar netu akarumukina kamu chakin. Chinech chawiy chom tufanyidina kutongin kamu nakash. Mulong wa kuchidij ni kulam uumwing wetu ukweta usey, tufanyidin kuyilikishin akwetu mudi mwatufundishay Yesu.

13. Mutapu ik tukukasikesha uumwing anch twalam chisambu nau antu akwau?

¹³ Anch twayilikishin antu akwau, tukulam chisambu nau akadivar ni anambaz netu. Kambuy Paul walonda anch tufanyidin kusal usu nakash wa kushal mu uumwing umwing ni mukwau ni kulam chisambu. (Efes 4:3) Komb pa chisu cha Chivurikish, pakampwil kamu uchuku winiwa, ufanyidin kutong mutapu ukuyisadina akwen. Iyipula anch: ‘Ov, antu angija ij kamu anch nidandamedinap kulam ujim mulong wa antu anrumbukidina? Antu amen kamu anch nisadin usu wa kulam chisambu ni kukasikesh uumwing?’ Yiney yawiy yipul ya usey tufanyidina kutongin.

14. Mutapu ik tukutwisha kumekesh anch ‘tukwashijadin muntu ni mukwau mu rukat’?

¹⁴ Wisu mutapu wa kanying tukutwisha kukasikesh uumwing? Mu kumwimburij Yehova mu kumekesh rukat. (1 Yohan 4:8) Tufanyidinap kulond anch: “Nikutwish kuyikat akadivar nam, pakwez kanshindidinap kuyikat.” Anch twatong mu mutapu winou, tulondwilap chiyul cha Paul cha ‘kukwashijan muntu ni mukwau mu rukat.’ (Efes 4:2) Ijik anch Paul kalondap ching anch tufanyidin ‘kukwashijan muntu ni mukwau’ pakwez tufanyidin kusal mwamu “mu rukat.” Yidi yom yishalijadina. Kuding antu a mitapu kushalijan mu yikumangen yetu ni Yehova wayipwita awonsu kwez kudi ndiy. (Yohan 6:44) Komb ufanyidin kwikal ni mayingishin mawamp mavud ma kuyikat. Anch akadivar nau anambaz netu awanyidin kutambul rukat ra Nzamb, ing mutapu ik tukutwisha kulond anch kawanyidinap kutambul rukat retu? Tufanyidin kwikal nich mushiku wa kuyikat akadivar netu mutapu ukatinay Yehova anch tuyikata.—1 Yohan 4:20, 21.

CHISU IK TUKUSALA CHIVURIKISH CHA NSUDIEL?

15. Mutapu ik twija anch kukwikal Chivurikish cha nsudiel?

¹⁵ Dichuku dimwing, tukukumangan ku Chivurikish kapamp ka nsudien. Mutapu ik twija mwamu? Paul wayileja in Kristu azizidilau many anch chisu chikuvurikau rufu ra Yesu muvu ni muvu, akat “[kudandamen kwijikesh] patok rufu ra Nsalejetu djat ni pa kwezilay.” (1 Korint 11:26) Mu uprofet wend piur pa machuku ma nsudiel, Yesu walonda kand piur pa “kwez” kwend. Palonday piur pa mar makash mezina kurutu oku, walonda anch: “Chijingidij cha Mwan a Muntu chikez kumekan mwiur. Chad antu awonsu pa mangand akez kudil pakez kumumanau Mwan a muntu ukat kwez mu madj ma mwiur nich ukash ni uyaj ujim. Akez kubul mpuny yijim, chad ukez kuyitum aruu a mwiur kuya ku mitambu ni mitambu ya ngand, mulong wa kuyikumangej antu atonday Nzamb adia ku mitambu yawonsu ya ngand.” (Mateu 24:29-31) Yesu “[u]kuyikumangej antu atonda[u]” chisu chikuyisenday in Kristu awonsu azizidilau many mulong wa kuya mwiur. Chinech chikusadik kupwa kwa mar makash kusambish, pakwez kurutu kwa njit ja Harmagedon. Mwi njit jinej, Yesu pamwing ni antu awonsu 144 000 akurish nau ant a pa divu ni akuyiwin. (Kujingunik 17:12-14) Chivurikish cha nsudien tukusala kurutu Kristu “eza” mulong wa kukumangej azizidinau many chawiy chikwikala Chivurikish cha nsudien.

16. Mulong wak ukwatina mupak wa kwikal ku Chivurikish muvu winou?

¹⁶ Kwat mupak wa kwikal ku Chivurikish chikusadika ngond wa 3 machuku ma ngond 31 muvu wa 2018. Ni mwita Yehova akukwasha usala usu wey chakwel umekesha anch tudi antu end adia mu uumwing. (Tang Kuseng 133:1.) Dichuku dimwing, tukukumangan ku Chivurikish kapamp ka nsudien. Patuchingedina dichuku dinidia, el tumekesha anch uumwing usangareshina tukweting ku Chivurikish muvu ni muvu uding wa usey nakash.