Ov, Umwij Chakin Kamu Nzamb?

Antu avud alondining anch amwitiyijin Nzamb. Pakwez anch ayipul anch amwij chakin kamu Nzamb, akwiling mu mitapu kushalijan. Antu amwing akwiling anch Nzamb udi nzuj wa chisum ukatininga kuyipup antu mulong wa yom yiyimp yikatau kusal. Antu akwau akwiling anch Nzamb uyikatining ni ukat kuyilikishin antu chikalap nchik yom yikatau kusal. Pakwez antu akwau kand itiyijining anch Nzamb uding kulemp ni kakatap kutubangin. Kukwatijan ni yakul yiney kushalijan, antu avud akat kutong anch chikasikening kumwijik chakin kamu Nzamb.

Ov, chidi cha usey kamu kumwijik Nzamb? Mwaning. Kumwijik Nzamb nawamp kudi kwa usey nakash mu mwom wey. (Midimu 17:26-28) Anch wamusejin Nzamb piswimp, ijik kamu anch ukukukat nakash ni ukukukwash. (Jakobu 4:8) Anch wamwijik Nzamb nawamp, chinech chikukukwash wikala ni mwom wa chikupu.​—Yohan 17:3.

Mutapu ik ukutwisha kushiken ku kumwijik Nzamb? Tong bil pa muntu wija nawamp udia murund ney wa piswimp. Mutapu ik wasambisha urund wen? Chakusambish wijika bil dijin diend, wuntu wend, yom yikatiningay ni yikisiningay, yom yasalay kal ni yitonginay kusal, ni yom yikwau kand. Yawiy yikusala anch wikala mu urund ni muntu winou​—ni wijika mutapu udingay muntu winou.

Chilik chimwing kand, tukutwish kushiken ku kumwijik Nzamb mu kushinshikin yipul yilondwilaku ey:

• DIJIN DIA NZAMB NANY?

• MIKADIL IK YIKWETINGAY NZAMB?

• YOM IK YASALAY KAL NZAMB?

• YOM IK YIKUSALAY NZAMB?

• KUMWIJIK NZAMB KUKWET USEY IK KUDI EY?

Gazet winou amufundin mulong wa kupan yakul ya Bibil ku yipul yiney. Mitu ya milong yidia mu gazet winou yikukukwashap ching kusu kwijik chidiay chakin kamu Nzamb, pakwez yikukukwash kand wijika mutapu ukutwisha kutaninamu anch wikal mu urund wa piswimp nend.